.jpg)
រដ្ឋបាលព្រៃឈើ និងអាជ្ញាធរជាតិអប្សរាបានចាប់ស្វាមួយចំនួនចេញពីតំបន់ប្រាសាទអង្គរវត្ត ដោយសារពួកវាមានភាពកោងកាច និង រពឹសខ្លាំង។ រូបថត ហ្វេសប៊ុក
សៀមរាបៈ រដ្ឋបាលព្រៃឈើ និងអាជ្ញាធរជាតិអប្សរាបានចាប់ស្វាមួយចំនួនចេញពីតំបន់ប្រាសាទអង្គរវត្ត។ ស្វាទាំងនោះត្រូវបានគេអះអាងថា មានភាពកោងកាច និង រពឹសខ្លាំងដែលជារឿយៗបានបង្កផលប៉ះពាល់ដល់ប្រាសាទ និងភ្ញៀវទេសចរជាតិ និងអន្តរជាតិ។
ប៉ុន្តែក្រុមជនឱកាសនិយមមួយចំនួនបាននាំគ្នាថតវីដេអូអំពីសកម្មភាពនៃការចាប់ស្វាទាំងនោះ ហើយបង្ហោះនៅតាមប្រព័ន្ធ YouTube របស់ពួកគេ ដែលធ្វើឲ្យអ្នកទស្សនាមួយចំនួនមានការយល់ច្រឡំ ហើយចាត់ទុកសកម្មភាពនៃការចាប់ដកហូតសត្វស្វារបស់មន្ត្រីជំនាញនៃស្ថាប័នទាំង ២ ខាងលើនេះថាជាទង្វើ «អសីលធម៌»។ ពួកគេបានរៀបរាប់ថា ស្វាដែលត្រូវបានចាប់ដកហូតទៅនោះមានមួយចំនួនជាស្វាញីដែលកំពុងបំបៅដោះកូនអាយុ ៣ ខែ និងមួយចំនួនទៀតជាស្វាឈ្មោលពេញវ័យ។
អ្នកទស្សនាជាច្រើនបានសម្ដែងក្ដីអាណិតអាសូរដល់កូនស្វាតូចៗដែលត្រូវបានគេចាប់មេរបស់វាទៅ ពួកគេខ្លះថាកូនស្វាទាំងនោះនឹងត្រូវស្លាប់ដោយការអត់ឃ្លាន ឬ ពីការវាយប្រហារពីសត្វ ឬក្រុមស្វាដទៃទៀត ព្រោះពួកវាមិនអាចរកអាហារ ឬការពារខ្លួនដោយខ្លួនឯងបាននោះទេ។
កាលពីម្សិលមិញ ភ្នំពេញប៉ុស្តិ៍បានប្រទះឃើញខ្សែវីដេអូចំនួន ២ ត្រូវបានគេបង្ហោះនៅក្នុងប្រព័ន្ធ You Tube ដែលខ្សែវីដេអូទី ១ (https://youtu.be/G_iwSO-3JZw) បានបង្ហាញពីរូបភាពសត្វស្វាដែលត្រូវបានគេចាប់បង្ខាំងនៅក្នុងទ្រង់ ព្រមទាំងមានមន្ត្រីជំនាញកាន់រំពាត់ដើរចាំវាយស្វាទាំងនោះ ខណៈខ្សែវីដេអូទី ២ (https://youtu.be/305KNZAwO_A) បានបង្ហាញអំពីកូនស្វាតូចៗ និង មានការសរសេរជាសារថា មេបារបស់វាត្រូវបានអាជ្ញាធរអប្សរា និងរដ្ឋបាលព្រៃឈើចាប់យកទៅដោយសារមានបណ្ដឹងពីប្រជាពលរដ្ឋមួយចំនួន។
ខ្សែវីដេអូទី ២ នេះបានសរសេរថា៖ «អាជ្ញាធរអប្សរាបានចាប់បំបែកមេស្វាចំនួន ២០ ក្បាលចេញពីកូនតូចៗរបស់ពួកវា ខណៈស្វាឈ្មោល ២០ ក្បាលទៀតក៏ត្រូវបានចាប់បំបែកពីក្រុមគ្រួសាររបស់ពួកវាដែរ។ ស្វាពេញវ័យ និងស្វាតូចៗសរុប ៤០ ក្បាលត្រូវបានអាជ្ញាធរអប្សរានាំយកទៅសម្លាប់»។
ជុំវិញករណីនេះលោក ឡុង កុសល អ្នកនាំពាក្យអាជ្ញាធរអប្សរានៅថ្ងៃម្សិលមិញបានច្រានចោលចំពោះការផ្សព្វផ្សាយបែបវាយប្រហារដោយគ្មានមូលដ្ឋានច្បាប់របស់ក្រុមជនឱកាសនិយមទាំងនោះ។
លោកបានប្រាប់ភ្នំពេញប៉ុស្តិ៍ថា៖ «យើងពិតជាមានការចាប់ដកហូតស្វាមួយចំនួនចេញពីតំបន់អង្គរ ព្រោះវាជាស្វាកាច និងរពឹសដែលតែងតែបង្កបញ្ហាដល់ភ្ញៀវទេសចរ និង ដំបូលប្រាសាទរបស់យើង។ ប៉ុន្តែគ្មានការធ្វើទារុណកម្ម ឬសម្លាប់ពួកវានោះទេ»។
លោក កុសល បានឲ្យដឹងថា៖ «ករណីនេះសមត្ថកិច្ចយើងកំពុងធ្វើការស្រាវជ្រាវរកប្រភពគណនី YouTube នោះ ដើម្បីសួរនាំ និងចាត់ចំណាត់ការទៅតាមផ្លូវច្បាប់»។
លោក កុសល ថ្លែងថាស្វានៅក្នុងតំបន់ប្រាសាទអង្គរមានច្រើនប្រភេទ និងរាប់ពាន់ក្បាល។ សត្វស្វាដែលស្លូតគឺអាចជួយទាក់ទាញទេសចរឲ្យមកទស្សនាតំបន់ប្រាសាទអង្គរបានច្រើន ដោយសារតែភាពក្រមិចក្រមើមរបស់វា ប៉ុន្តែសត្វស្វាដែលកាច វាក៏បង្កនូវហានិភ័យដល់មនុស្សផងដែរ គឺវាអាចវាយប្រហារមកលើមនុស្ស ដោយការខាំ ឬក្រញៅ។
លោក ព្រាប សុជាតិ មន្ត្រីជំនាញផ្នែកសត្វព្រៃនៃសួនសត្វភ្នំតាម៉ៅដែលបានចូលរួមនៅក្នុងប្រតិបត្តិការចាប់ដកហូតស្វាកាច និងរពឹសពីតំបន់ប្រាសាទអង្គរកាលពីពេលថ្មីៗនេះបានប្រាប់ភ្នំពេញប៉ុស្តិ៍ថា សត្វស្វាដែលត្រូវបានចាប់ដកហូតទាំងនោះសរុបមានជាង ២០ ក្បាល ហើយពួកវាត្រូវបាននាំយកទៅដោះលែងនៅក្នុងសហគមន៍ព្រៃឈើភូមិព្រៃខ្លា ឃុំត្នោតជុំ ស្រុកក្រគរ ខេត្តពោធិ៍សាត់។
លោកបានបញ្ជាក់ថា៖ «យើងចាប់តែស្វាដែលកាច និងរពឹសដែលត្រូវបានកត់សម្គាល់ជាច្រើនដងចំពោះសកម្មភាពរបស់វាមកលើភ្ញៀវទេសចរ និងប្រាង្គប្រាសាទរបស់យើងមួយចំនួននាពេលកន្លងមកប៉ុណ្ណោះ។ ស្វាទាំងនោះភាគច្រើននៅក្នុងបរិវេណប្រាសាទអង្គរវត្ត អង្គរធំ ទន្លេអុំ និងប្រាសាទបក្សីចាំក្រុង»។
ដោយឡែកនៅថ្ងៃទី ៥ ខែតុលាឆ្នាំ ២០១៩ នគរបាល និងមន្ត្រីឧទ្យានុរក្សដែនជម្រកសត្វព្រៃកែវសីមាចាប់បុរសម្នាក់ ពាក់ព័ន្ធករណីជួញដូរសត្វព្រៃខុសច្បាប់ដោយរកឃើញសត្វស្វា ១៣ ក្បាល៕
