The Phnom Penh Post Search

Search form

Logo of Phnom Penh Post newspaper Phnom Penh Post - អាជ្ញាធរ​ចុះ​ត្រួតពិនិត្យ​កោះដំឡូង​ដែល​កាន់​កាប់​ដោយ Polonsky




អាជ្ញាធរ​ចុះ​ត្រួតពិនិត្យ​កោះដំឡូង​ដែល​កាន់​កាប់​ដោយ Polonsky

សេដ្ឋី​រុស្ស៊ី Polonsky(ដើរ​មុខ)​ពេល​សមត្ថកិច្ច​នាំ​ខ្លួន​ពី​កោះ​ដំឡូង​ពីខែ​មុន​។
សេដ្ឋី​រុស្ស៊ី Polonsky(ដើរ​មុខ)​ពេល​សមត្ថកិច្ច​នាំ​ខ្លួន​ពី​កោះ​ដំឡូង​ពីខែ​មុន​។ រូប សហការី

អាជ្ញាធរ​ចុះ​ត្រួតពិនិត្យ​កោះដំឡូង​ដែល​កាន់​កាប់​ដោយ Polonsky

ព្រះសីហនុៈ កម្លាំង​ម្រុះ​ខេត្ត​ព្រះសីហនុ ដឹកនាំ​ដោយ​អភិបាល​រង​ខេត្ត លោក ឈិន សេងងួន បាន​ចុះ​ទៅ​ធ្វើ​ការ​ត្រួតពិនិត្យ​កន្លែង​ស្នាក់​នៅ​របស់់​មហា​សេដ្ឋីរុស្ស៊ី Seigei Polonsky នៅ​លើកោះដំឡូង ដើម្បី​ធ្វើ​កំណត់​ហតុ និង​រក្សាទុក​ ក្រោយ​ពី​ការបណ្តេញ​មហាសេដ្ឋី​រូប​នេះចេញ​ទៅ​ប្រទេស​រុស្ស៊ី​វិញកាល​ពី​ពាក់កណ្តាល​ខែ​មុន​។

លោក​ សេងងួន បាន​ឲ្យ​ដឹង​កាល​ពី​ថ្ងៃ​អង្គារ​ថា ​អាជ្ញាធរ និង​សមត្ថកិច្ច បាន​ចុះ​ឆែកឆេរ​ កោះដំឡូង​កាល​ពី​ថ្ងៃ​ទី១ ខែ​មិថុនា ហើយ​បាន​រក​ឃើញនូវ​របស់​របរ​ ជា​រូប​ចម្លាក់​អប្សរា និង​រូប​ចម្លាក់​នាគ រូប​ព្រះពុទ្ធ​អង្គ និង​រូប​ចម្លាក់​ផ្សេងៗ​ទៀត ដែល​ដាក់​តាំង​ក្នុង​បន្ទប់​បឹងកាឡូ​ ដែល​គេ​ទើប​សាងសង់​ឡើង​កាលពី​អំឡុង​ឆ្នាំ​ ២០១៤។ អាជ្ញាធរ​រកឃើញ​ថា មាន​បន្ទប់​បឹងកាឡូ​ចំនួន​ ២៥ ដែល​មាន​ខ្លះមិន​មាន​ដាក់ស្លាក​បន្ទប់​នៅ​ឡើយ។

លោក បញ្ជាក់​ថា៖ «​បឹង​កាឡូទាំង​ ២៥ សង់​ថ្មីៗ ក្នុង​ឆ្នាំ​ ២០១៤ ហើយ​គាត់​សង់​ខុសច្បាប់​ទេ។ យើង​ពិនិត្យ​មើល ហើ យ​ឲ្យ​​កងទ័ពជើង​ទឹក​រក្សា​ទុក កុំ​ឲ្យ​មាន​ការ​បាត់បង់​ខ្លាច​មាន​គេ​លួច»។ ក្នុង​ការ​ឆែកឆេរ ក៏​រក​ឃើញ​មាន​ទូ​ដែក​សុវត្ថិភាព​ផង​ដែរ។

លោក Polonsky ដែល​ពេលនេះ​កំពុង​ស្ថិតនៅ​មន្ទីរ​ឃុំឃាំង នា​ប្រទេស​រុស្ស៊ី ត្រូវ​បាន​សមត្ថកិច្ច​​កម្ពុជា ចាប់ ខ្លួន​កាល​ពី​ខែ​ឧសភា នៅ​លើ​កោះ ដំឡូង​ដែល​មាន​ផ្ទៃដី​ទំហំ​ប្រមាណ​ ៣០ ហិកតា ក្នុង​ខេត្ត​​ព្រះសីហនុ។ Polonsky ជា​មហាសេដ្ឋី​ដែល​មាន​រឿង​អាស្រូវ និង​ត្រូវ​បាន​នគរបាល​អន្តរជាតិ អាំង​ទែរប៉ូល ​ស្វែងរក​​ចាប់​ខ្លួន ទាក់ទង​ទៅ​នឹង​ការកេង​បន្លំ​ប្រាក់ ១៦៧ លានដុល្លារ នៅ​ទីក្រុង​ម៉ូស្គូ ប្រទេស​រុស្សី។

តាម​ប្រភព​ព័ត៌មាន​បាន​អះអាង​ថា លោក Polonsky ​បាន​ទទួល​សិទ្ធិ​អភិវឌ្ឍន៍​នៅ​លើកោះ​ចំនួន ៨ ក្នុង​ខេត្ត​ព្រះសីហនុ​ ប៉ុន្តែ​អាជ្ញាធរ​ខេត្ត​​ជាប់​មាត់សមុទ្រ​មួយ​នេះ មិន​បាន​ឲ្យ​ដឹង​ទេថា តើ​បន្ទាប់​ពី​ចុះ​ទៅ​ធ្វើការ​ត្រួតពិនិត្យ​កោះដំឡូង​រួចមក​ ពួកគេ​នឹង​ទៅ​ធ្វើ​ការ​ត្រួតពិនិត្យ​កោះ​ណា​ផ្សេង​ទៀត​នោះឡើយ​៕

អត្ថបទគួរចាប់អារម្មណ៍