.jpg)
ទីតាំងបើកបនល្បែងហ្គេមបាញ់ត្រីខុសច្បាប់ ២ កន្លែងក្នុងភូមិ-សង្កាត់ស្វាយប៉ាក ត្រូវអាជ្ញាធរចុះបិទ បន្ទាប់ពីអ្នកភូមិនាំគ្នាវាយកម្ទេច។ រូបថត ហ្វេសប៊ុក
ភ្នំពេញៈ អាជ្ញាធរខណ្ឌឫស្សីកែវបានចុះទៅបិទទីតាំងបើកបនល្បែងហ្គេមបាញ់ត្រីខុសច្បាប់ ២ កន្លែងក្នុងភូមិ-សង្កាត់ស្វាយប៉ាក បន្ទាប់ពីក្រុមអ្នកភូមិជាង ១០០ នាក់បាននាំគ្នាទៅវាយកម្ទេចចោលកាលពីព្រឹកថ្ងៃទី ១៥ ខែមីនាខណៈដែលអាជ្ញាធរមូលដ្ឋានព្រងើយកន្តើយមិនចុះបង្ក្រាប។ នេះបើតាមប្រជាពលរដ្ឋនៃសហគមន៍វៀតណាមក្នុងសង្កាត់ស្វាយប៉ាក។
លោក ទ្រឿង យ៉ាំងឡូ តំណាងប្រជាសហគមន៍វៀតណាមក្នុងសង្កាត់ស្វាយប៉ាកបានប្រាប់ភ្នំពេញប៉ុស្តិ៍ថា ទីតាំងហ្គេមបាញ់ត្រីទាំង ២ កន្លែង ដែលរងការវាយកម្ទេចចោលនោះបានបង្កឲ្យក្មេងៗនៅក្នុងភូមិគេចវេះពីការសិក្សា ហើយចេះតែលួចទ្រព្យសម្បត្តិនៅក្នុងគ្រួសារមកលេងហ្គេម ហើយកាលពីយប់ថ្ងៃទី ១៣ ខែមីនា មានករណីមនុស្សមួយក្រុមមានគ្នា ៦ នាក់ ចេញពីទីតាំងល្បែងនោះមកវាយប្លន់យកទូរស័ព្ទរបស់អ្នកភូមិចំនួន ២ គ្រឿង និងកាប់បំផ្លាញម៉ូតូអ្នកភូមិអស់ ២ គ្រឿងថែមទៀត។
លោកថា៖ «យើងបាននាំគ្នាទៅប្ដឹងអាជ្ញាធរមូលដ្ឋានឲ្យចុះមកបង្ក្រាបចាប់ និងបិទទីតាំងបនល្បែងហ្គេមបាញ់ត្រីទាំង ២ ទីតាំងនោះ ប៉ុន្តែមិនឃើញមានសមត្ថកិច្ចណាម្នាក់ចុះមកបង្ក្រាបបិទនោះទេ។ នៅព្រឹកថ្ងៃទី ១៥ ខែមីនាអ្នកភូមិសម្រេចចិត្តនាំគ្នាចូលទៅវាយកម្ទេចទូហ្គេមនោះចោលតែម្ដង»។
បើតាមលោក យ៉ាំងឡូ ក្រោយពីអ្នកភូមិបាននាំគ្នាចូលវាយកម្ទេចទូហ្គេមបាញ់ត្រីទាំង ២ ទីតាំងនោះនៅល្ងាចថ្ងៃដដែលនោះកម្លាំងនគរបាលខណ្ឌឫស្សីកែវ បានចុះទៅពិនិត្យអង្កេត ហើយបានប្រមូលយកវត្ថុតាងទាំងអស់ទៅខណ្ឌ ហើយបានបង្គាប់ឲ្យម្ចាស់ទីតាំងហ្គេមនោះធ្វើកិច្ចសន្យាបញ្ឈប់សកម្មភាព។
ទោះយ៉ាងណានៅថ្ងៃម្សិលមិញអ្នកភូមិដែលបានចូលរួមវាយកម្ទេចទូហ្គេមបាញ់ត្រីទាំងនោះបានសម្ដែងក្ដីព្រួយបារម្ភបន្ទាប់ពីឮសម្ដីរបស់ម្ចាស់ទីតាំងហ្គេមបាញ់ត្រីម្នាក់ឈ្មោះ ច្រឹង យ៉ាំងប៊ិន និយាយថានឹងដាក់ពាក្យប្ដឹងពួកគេទៅតុលាការពីបទ «ចូលលុកលុយ និងបំផ្លិចបំផ្លាញទ្រព្យសម្បត្តិអ្នកដទៃដោយខុសច្បាប់»។
ភ្នំពេញប៉ុស្តិ៍មិនអាចទាក់ទងម្ចាស់ទីតាំងហ្គេមលោក ច្រឹង យ៉ាំងប៊ិន បានទេពីម្សិលមិញ។
លោក ហ៊ាង ថារ៉េត អធិការខណ្ឌឫស្សីកែវថ្លែងថាលោកបានបញ្ជាឲ្យមន្ត្រីរបស់លោកចុះបិទទីតាំងហ្គេមបាញ់ត្រីនោះអស់ហើយថែមទាំងបានរឹបអូសយកទូហ្គេមទៅកម្ទេចចោលអស់ហើយដែរ។
លោកថា ថ្វីដ្បិតសកម្មភាពរបស់អ្នកភូមិបានធ្វើហួសព្រំដែននៃច្បាប់ ប៉ុន្តែបានបង្ហាញពីការចូលរួមនៅក្នុងការធ្វើឲ្យប្រសើរឡើងនូវគោលនយោបាយ ភូមិ-ឃុំមានសុវត្ថិភាព៕
