កំពង់ស្ពឺៈ អាជ្ញាធរស្រុកឱរ៉ាល់ នៅថ្ងៃទី១៦ ខែសីហា បានចុះពិនិត្យទីតាំងដីទំនាស់មួយកន្លែង ដែលមានទំហំ ៤៥ ហិកតា ស្ថិតនៅក្នុងភូមិតាំងរបង ឃុំ ហោងសំណំ បន្ទាប់ពីអ្នកភូមិ ១៧ គ្រួសារ ព្រមទាំងតំណាងក្រុមហ៊ុនយិនវូ និងក្រុមហ៊ុនឌ្រីមខហ្វី ដែលជាម្ចាស់វិវាទក្នុងសំណុំរឿងដីធ្លីនេះ មិនបានឯកភាពគ្នា នៅក្នុងកិច្ចប្រជុំស្វែងរកដំណោះស្រាយ កាលពីរសៀលទី១៥ ខែសីហា។ នេះបើតាម លោក មួង ភី អភិបាលស្រុកឱរ៉ាល់។
លោកភី បានថ្លែងនៅថ្ងៃទី១៦ សីហាថា កាលពីថ្ងៃទី១៤ ខែសីហា ឆ្នាំ២០១៨ ខាងភាគីក្រុមហ៊ុនយិនវូ និងក្រុមហ៊ុនឌ្រីមខហ្វី បាននាំយកគ្រឿងចក្រទៅឈូសឆាយដីនៅក្នុងតំបន់នោះ ក្នុងគោលបំណងធ្វើការអភិវឌ្ឍន៍ទៅតាមគម្រោងផែនការរបស់ខ្លួន ដោយសំអាងថាដីនោះក្រុមហ៊ុនបានទិញពីប្រជាពលរដ្ឋមួយចំនួនតាំងពីឆ្នាំ២០០៧មកម្លេ៉ះ ប៉ុន្តែត្រូវបានប្រជាពលរដ្ឋ១៧គ្រួសារ ដែលបាននិងកំពុងរស់នៅដោយស្របច្បាប់នៅក្នុងតំបន់នោះ ធ្វើការតវ៉ានិងរារាំងមិនឲ្យឈូសឆាយ ដោយអះអាងថាជាដីចំការរបស់ពួកគាត់។
លោកបានបញ្ជាក់ថា៖«ក្រោយការត្រួតពិនិត្យ អាជ្ញាធររកឃើញថា អ្នកភូមិ១១គ្រួសារ មានបង្កាន់ដៃកាន់កាប់ដី ដែលទទួលស្គាល់ដោយអាជ្ញាធរ ភូមិ-ឃុំ តាំងពីមុនឆ្នាំ ២០០០មកម្លេ៉ះ ដោយឡែកអ្នកភូមិ៦គ្រួសារទៀត មិនមានឯកសារបញ្ជាក់នោះទេ»។
លោក បានបន្តថា ចំពោះករណីនេះ អាជ្ញាធរ នឹងបន្តធ្វើការសម្របសម្រួល ដំណោះស្រាយទៅតាមផ្លូវច្បាប់ ដោយគ្រោងនឹងកោះអញ្ជើញគូទំនាស់ពាក់ព័ន្ធទាំងអស់ មកជួបប្រជុំដោះស្រាយជាថ្មី នៅដើមសប្ដាហ៍ក្រោយនេះ។
លោកបន្ថែមថា៖«យើងនឹងខិតខំធ្វើការដោះស្រាយ ករណីវិវាទដីធ្លីមួយនេះ ឲ្យអស់ពីលទ្ធភាព ហើយបើសិនជាពួកគេនៅមិនឯកភាពគ្នាទេនោះ យើងនឹងបញ្ជូនសំណុំរឿងនេះ ទៅកាន់អាជ្ញាធរខេត្ត ដើម្បីដោះស្រាយបន្តតាមនីតិវិធីច្បាប់»៕