ព្រះសីហនុៈ ទីតាំងសំណង់កំពង់ផែមួយកន្លែងដែលសង់រំលោភចូលឆ្នេរសមុទ្រគ្មានច្បាប់ក្នុងសង្កាត់លេខ១ ក្រុងព្រះសីហនុត្រូវបានអាជ្ញាធរសម្រេចចុះវ៉ៃកម្ចេច បន្ទាប់ពីមន្ត្រីជំនាញជូនដំណឹងឲ្យម្ចាស់រុះរើខ្លួនឯង តែមិនព្រមអនុវត្តជាអ្វីដែលសង្គមស៊ីវិលយល់ថា ជាការត្រឹមត្រូវ ប៉ុន្ដែគួរធ្វើនៅគ្រប់កន្លែងល្មើសច្បាប់ដទៃទៀតជាប្រចាំ ឱ្យដូចភ្លៀងរលឹម។
លោក ឱ សារឿន អ្នកនាំពាក្យសាលាខេត្ដព្រះសីហនុបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា កម្លាំងអាជ្ញាធរក្រុងព្រះសីហនុបានចុះទៅអនុវត្ដច្បាប់បែបនេះគឺធ្វើឡើងកាលពីថ្ងៃទី ២៤ ខែតុលា តាមបញ្ជាពីលោក យន្ដ មីន អភិបាលខេត្ដព្រះសីហនុ បន្ទាប់ពីមានការណែនាំ និងអត់ធ្មត់ជាច្រើនលើកចំពោះការសាងសង់គ្មានច្បាប់អនុញ្ញាតនេះ។
លោកបន្ដថា៖ «ការអនុវត្ដនេះគឺបានឆ្លងកាត់ការអត់ធ្មត់ច្រើនបំផុតមកហើយរបស់អាជ្ញាធរ។
យើងមិនចង់ប្រើវិធានការទោសទណ្ឌអ្វីសម្រាប់ពលរដ្ឋយើងឱ្យហួសហេតុពេកទេ។ គឺថាយើងធ្វើក្នុងកម្រិតយើងអាចនិយាយអប់រំណែនាំគ្នាបាន។ ប៉ុន្ដែការធ្វើនេះក៏សំខាន់មួយដែរសម្រាប់ពលរដ្ឋដទៃ ឬជនទាំងឡាយណាដែលមានគំនិតល្មើស មិនអនុវត្ដច្បាប់ឲ្យបានល្អ»។
គួរបញ្ជាក់ថាការចុះរុះរើនេះបានធ្វើឡើងបន្ទាប់ពីអភិបាលខេត្តព្រះសីហនុលោក យន្ត មីន បានបញ្ជាឲ្យក្រុមការងារចុះអនុវត្តកាលពីថ្ងៃទី ១៦ ខែតុលាឆ្នាំនេះទៅលើសំណង់កំពង់ផែដែលសង់រំលោភយកឆ្នេរដោយមានម្ចាស់ឈ្មោះ តាន់ សុខុម ក្នុងភូមិ៣ សង្កាត់លេខ១ ដោយឱ្យរុះរើ និងរក្សាឆ្នេរសមុទ្រនៅចំណុចនោះឲ្យដូចដើមវិញ តែមន្ត្រីទើបបានចុះអនុវត្ត។
ម្យ៉ាងទៀតមុនដាក់បញ្ជារបស់លោក យន្ត មីន នេះគឺប្រធានការិយាល័យគ្រប់គ្រង និងអភិវឌ្ឍន៍សំណង់ខេត្ដព្រះសីហនុលោក លី ចិត្ដនិយម ក៏ធ្លាប់បានចេញសេចក្តីជូនដំណឹងឲ្យម្ចាស់សំណង់កំពង់ផែនេះរុះរើដោយខ្លួនឯងម្តងហើយដែរកាលថ្ងៃទី ១៩ ខែកញ្ញា ឆ្នាំ ២០១៨ ដោយទុករយៈពេល ៧ ថ្ងៃ ប៉ុន្តែគិតមកទល់ពេលនេះជាង ១ ខែមកហើយម្ចាស់មិនបានអនុវត្តតាម។
យ៉ាងណាក្ដីលោក គង់ សុផាន់ណ្ណៈ មន្ដ្រីរដ្ឋបាលក្រុងព្រះសីហនុបានឲ្យដឹងកាលពីម្សិលមិញថា ការចុះរុះរើសំណង់កំពង់ផែក្នុងទីតាំងសង្កាត់លេខ ១ នេះគឺទើបធ្វើបានតែមួយផ្នែកប៉ុណ្ណោះមិនទាន់រួចទាំងស្រុងទេ ព្រោះមិនអាចយករថយន្ដសម្រាប់វាយកម្ទេចចូលបាន។
លោកបានបន្ដថា៖ «ក្រុមការងារបានចុះទៅអនុវត្ដតាម ស.ជ.ណ របស់ខេត្ដហើយ។ ប៉ុន្ដែទីតាំងសាងសង់កំពង់ផែនេះពិបាកក្នុងការយកអេស្កាវ៉ាទ័រចុះវាយកម្ទេចយើងចុះវាយកម្ទេចបានមួយចំនួនគឺយើងឲ្យមនុស្សចុះវាយកម្ទេចប៉ុណ្ណោះ។ ដូច្នេះក្រុមការងារក៏សម្រេចឲ្យគាត់[ម្ចាស់] រុះរើដោយខ្លួនឯងបន្ដទៀតដោយសម្រេចទុកពេលឲ្យគាត់ចំនួន ៥ ថ្ងៃគឺចាប់ពីថ្ងៃទី ២៤ ខែតុលាតទៅ»។
លោក សុផាន់ណ្ណៈ បានបញ្ជាក់ថាការទុកពេល ៥ ថ្ងៃឲ្យម្ចាស់រុះរើដោយខ្លួនឯងនេះ បើមិនព្រមអនុវត្ដតាមទេគឺដល់ថ្ងៃកំណត់អាជ្ញាធរនឹងចុះទៅម្ដងទៀតហើយនឹងដាក់ពាក្យបណ្ដឹងទៅតុលាការដើម្បីចុះទៅរុះរើ។ ប៉ុន្ដែបើមានប៉ះពាល់ដល់ផ្ទះរបស់គាត់គឺអាជ្ញាធរនឹងមិនទទួលខុសត្រូវឡើយ។
ទោះបីជាយ៉ាងណាការអនុវត្ដច្បាប់ដោយវាយកម្ទេចសំណង់កំពង់ផែនៅចំណុចសង្កាត់លេខ ១ នេះហាក់បង្ហាញពីមន្ទិលពីមូលហេតុនៅឡើយ ខណៈទីតាំងផ្សេងទៀតដូចជានៅតំបន់ឆ្នេរព្រែកត្រែងដែលក្រុមហ៊ុនបានចាក់ដីលុបសមុទ្រ ហើយមានទាំងបញ្ជាពីលោកនាយករដ្ឋមន្ដ្រីថែមទៀតតែអាជ្ញាធរនៅតែមិនទាន់ចុះអនុវត្ដច្បាប់នោះ។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) ការស្វាគមន៍ចំពោះការចុះអនុវត្ដច្បាប់រុះរើសំណង់កំពង់ផែដែលសង់ខុសច្បាប់រំលោភចូលឆ្នេរសមុទ្រនេះលោកយល់ឃើញថាអាជ្ញាធរមិនគួរអនុវត្តតែមួយកន្លែងនោះទេគឺ ត្រូវអនុវត្ដឲ្យបានគ្រប់កន្លែងចំពោះសំណង់ខុសច្បាប់នៅក្រុងព្រះសីហនុនេះ។
លោកថា៖ «បើរដ្ឋបាលខេត្តមានចំណាត់ការបែបនេះទៀត ខ្ញុំគាំទ្រដែលចុះអនុវត្ដវិធានការក្ដៅលើអ្នកសាងសង់រំលោភចូលឆ្នេរសមុទ្ររបស់រដ្ឋនេះ។ ប៉ុន្ដែសូមកុំធ្វើតែមួយ សូមឲ្យធ្វើជាបន្ដបន្ទាប់រហូតទៀត។ ពីព្រោះការរំលោភបំពានលើឆ្នេរសមុទ្រ ចាក់ដីលុបសមុទ្រនេះមិនមែនមានតែមួយកន្លែងនេះទេ គឺនៅមានជាច្រើនកន្លែងជាបន្ដបន្ទាប់ទៀត»។
លោក សុខុម បានបញ្ជាក់ថា៖ «ខ្ញុំសូមឲ្យវិធានការនេះធ្វើឱ្យដូចភ្លៀងរលឹម ធ្វើឲ្យបានជាបន្ដបន្ទាប់រហូតតទៅ។ កុំធ្វើដូចភ្លៀងមួយមេខែប្រាំង ហើយរាំងបាត់ទៅវិញនោះ។ មិនត្រូវធ្វើកន្លែងមួយ ហើយទុកឱ្យកន្លែងផ្សេងដុះរីកដូចផ្សិតទៀតនោះទេ»។
បើតាមការបញ្ជាក់ពីលោក សុខ សុខុម ក្រៅពីនេះទៀតគឺករណីក្រុមហ៊ុនឯកជនចាក់ដីលុបឆ្នេរស្ថិតក្នុងតំបន់ឆ្នេរព្រែកត្រែងដែលលោកនាយករដ្ឋមន្ដ្រី ហ៊ុន សែន កាលពីថ្ងៃទី ១៨ ខែកញ្ញាបានបញ្ជាឲ្យលោក ជា សុផារ៉ា រដ្ឋមន្ដ្រីក្រសួងរៀបចំដែនដីនគរូបនីយកម្ម និងសំណង់ចុះទៅពិនិត្យដោយផ្ទាល់ ហើយបានបញ្ជាឲ្យក្រុមហ៊ុនកាយយកដីចេញវិញនោះ ប៉ុន្តែរហូតមកទល់ពេលនេះក្រុមហ៊ុនមិនត្រឹមតែមិនបានកាយដីចេញវិញទេ តែថែមទាំងធ្វើរបងព័ទ្ធជុំវិញបន្ថែមទៀតផង។
ទាក់ទងនឹងការមន្ទិលខាងលើនេះលោក ឱ សារឿន បានលើកឡើងថា៖ «ក្រុមមន្ដ្រីជំនាញតែងតែឃ្លាំមើលរហូតហ្នឹងក្រែងការអនុវត្តរបស់គាត់ (ក្រុមហ៊ុនចាក់ដីលុបឆ្នេរ) នៅមានបន្ដទៀតដែរ ឬអី បើនៅមានយើងនឹងមានវិធានការបន្តទៀត។ បើក្រុមហ៊ុនគាត់ទទួលបានសិទ្ធិរៀបចំ ឬវិនិយោគនោះ យើងមិនអាចទៅបង្ខំគាត់ឲ្យគាត់ត្រូវតែធ្វើម៉េចៗទេ នេះជារឿងលទ្ធភាពរបស់ខ្លួនគាត់»។
លោកបន្ថែមថា៖ «គោលការណ៍របស់យើងសំខាន់អ្វីដែលជាចំណាត់ការរបស់ប្រមុខរាជរដ្ឋាភិបាលបានដាក់ចុះឲ្យយើងចុះអនុវត្ដដោយធ្វើការជាមួយក្រុមហ៊ុន ហើយក្រុមហ៊ុនគាត់សន្យាថាអនុវត្ដ អ៊ីចឹងគឺជារឿងមួយចប់សព្វគ្រប់សម្រាប់យើងហើយ។ ព្រោះគាត់បានសន្យាទៅតាមអ្វីដែលយើងបានផ្ដល់ជូនគាត់អស់ហើយ»៕