បាត់ដំបងៈ អាជ្ញាធរមូលដ្ឋានបាន និងកំពុងមានវិធានការអប់រំដល់ពលរដ្ឋពីការប្រើប្រាស់ម្សៅថ្នាំគីមី ក្រោយពីស្ត្រីជាកម្មករម្នាក់បានស្លាប់ក្នុងឧប្បត្តិហេតុផ្ទុះម្សៅថ្នាំគីមី ខណៈដែលនាងកំពុងបុកថ្នាំនោះ ដើម្បីយកទៅបាញ់ដើមតាង៉ែនកាលពីថ្ងៃទី ១៣ មិថុនា នៅភូមិតាគ្រក់ ឃុំត្រែង ស្រុករតនមណ្ឌុល ខេត្តបាត់ដំបង។
លោក ឥន្ទ សៅឫទ្ធិ អភិបាលស្រុករតនមណ្ឌលប្រាប់ពីម្សិលមិញថា ពាក់ព័ន្ធបញ្ហាគ្រោះថ្នាក់ស្ត្រីម្នាក់ដែលស៊ីឈ្នួលក្នុងចម្ការតាង៉ែនស្លាប់នោះ អាជ្ញាធរស្រុករតនមណ្ឌលរបស់លោកបាននិងកំពុងចាត់វិធានការដោយចាត់ចែងដល់មន្ត្រីមានសមត្ថកិច្ចធ្វើការផ្សព្វផ្សាយដល់ពលរដ្ឋពីផលប៉ះពាល់ និងគ្រោះថ្នាក់។
លោកថា៖ «ករណីនេះខ្ញុំបានដាក់វិធានការផ្សព្វផ្សាយហើយ ពិសេសគឺខ្ញុំបានប្រាប់ដល់មន្ទីរកសិកម្មស្រុករតនមណ្ឌលឲ្យចុះអប់រំដល់អ្នកប្រកបកសិកម្ម»។
លោក សន និល អធិការនគរបាលស្រុករតនមណ្ឌលប្រាប់កាលពីថ្ងៃទី ១៤ មិថុនា ថា ស្ត្រីរងគ្រោះស្លាប់ឈ្មោះ យាន យ៉ា អាយុ ៣០ ឆ្នាំ និងមានប្តីឈ្មោះ ណាន សុខា អាយុ ៣២ ឆ្នាំ។ ទាំង ២ នាក់ ជាកម្មករចម្ការតាង៉ែន ហើយពួកគេស្នាក់នៅក្នុងភូមិ-ឃុំខាងលើ។ ចំណែកឯម្ចាស់ចម្ការឈ្មោះ ឈឿង ម៉ៅ អាយុ ៥៧ ឆ្នាំ។
លោកថ្លែងថា ស្ត្រីរងគ្រោះ និងប្តីបានមកធ្វើជាកម្មករក្នុងចម្ការតាង៉ែនទើបតែបាន ៥ ថ្ងៃប៉ុណ្ណោះ និងទទួលបានតម្លៃឈ្នួលក្នុង ១ ថ្ងៃ ម្នាក់ ៣ ម៉ឺនរៀល។ ពួកគេទាំង ២ នាក់ប្តីប្រពន្ធមានមុខងារលាយម្សៅថ្នាំគីមី ហើយយកទៅបាញ់ដើមតាង៉ែនដើម្បីឲ្យឆាប់ចេញផ្កា។
លោកថ្លែងថា៖ «ស្ត្រីរងគ្រោះគាត់យកម្សៅថ្នាំគីមីនោះដាក់ក្នុងធុងស្ពេត្រូហើយបុកឲ្យម៉ដ្ឋតែត្រូវម្សៅគីមីនោះផ្ទុះបណ្តាលឲ្យត្រូវតែម្តង»។
លោកបន្តថា ហេតុការណ៍នេះកើតឡើងនៅវេលាម៉ោង ១ កន្លះរសៀលថ្ងៃទី ១៣ មិថុនា។ មុនកើតហេតុគេបានឃើញស្ត្រីរងគ្រោះយកការុងម្សៅដុំថ្នាំគីមី ដែលមានឈ្មោះ ប៉ូតាស្យូមក្លូរីដ ផលិតនៅប្រទេសចិនមកស្រាយមាត់ការុង ហើយបានយកដុំម្សៅគីមីនោះទៅដាក់ក្នុងធុងប៉េត្រូដើម្បីបុកឲ្យម៉ដ្ឋបំណងយកទៅលាយជាមួយទឹកសម្រាប់បាញ់ដើមតាង៉ែនដើម្បីឲ្យឆាប់ចេញផ្កា។ ប៉ុន្តែពេលស្ត្រីរងគ្រោះកំពុងបុកដុំម្សៅគីមីនោះនៅក្រោមដើមតាង៉ែនស្រាប់តែផ្ទុះឡើងតែម្តង។
លោកបន្ថែមថា ក្រោយកើតហេតុពលរដ្ឋបានរាយការណ៍ប្រាប់សមត្ថកិច្ច ហើយភ្លាមៗនោះសមត្ថកិច្ចបានចុះទៅដល់កន្លែងកើតហេតុពិនិត្យឃើញថា នៅដើមតាង៉ែនត្រូវបាក់មែក និងជ្រុះស្លឹកស្ទើរអស់មួយចំហៀងដើម ដោយសារកម្លាំងផ្ទុះ។ រីឯមនុស្សបានខ្ទាតចេញពីកន្លែងកើតហេតុប្រមាណជា ២ ទៅ ៣ ម៉ែត្រ។ ចំពោះសាកសពវិញ ពីក្បាលដល់ចង្កេះត្រូវសុសសាច់ ហើយត្រឹមចង្កេះចុះមកក្រោមត្រូវបែកសាច់ទាំងដុំៗ និងដាច់ឆ្អឹងត្រង់ជង្គង់ចុះក្រោមខ្ទេចសុសសាច់តែម្តង។
លោកថា បើតាមស្ត្រីចំណាស់ម្នាក់ដែលធ្វើការក្នុងចម្ការតាង៉ែនដែរ ប្រាប់សមត្ថកិច្ចថា ស្ត្រីរងគ្រោះធ្លាប់ប្រាប់គាត់ថា នាងធ្វើការជាកម្មករចម្ការតាង៉ែននៅប្រទេសថៃ ១០ ឆ្នាំ។ នាងក៏មានបទពិសោធក្នុងការលាយថ្នាំគីមីបាញ់ឲ្យតាង៉ែនឆាប់ចេញផ្កាដែរ។ ប៉ុន្តែដោយសារនៅប្រទេសថៃមានជំងឺកូវីដ១៩ ទើបស្ត្រីរងគ្រោះត្រឡប់មកស្រុកកំណើតវិញ និងទើបតែចូលធ្វើកម្មករក្នុងចម្ការកើតហេតុបាន ៥ ថ្ងៃប៉ុណ្ណោះ។
ពាក់ព័ន្ធនឹងម្ចាស់ចម្ការវិញលោកអធិការមិនបានបញ្ជាក់ថា តើគាត់នឹងមានចំណែកទទួលខុសត្រូវក្នុងហេតុការណ៍នោះយ៉ាងណាទេ។ តែសមត្ថកិច្ចមួយរូបនៃអធិការដ្ឋាននគរបាលស្រុករតនមណ្ឌលស្នើមិនឲ្យបញ្ចេញឈ្មោះប្រាប់ថា ករណីនេះគ្មានជាប់ពាក់ព័ន្ធនឹងម្ចាស់ចម្ការតាង៉ែននោះទេ ព្រោះជាឧបទ្ទវហេតុដោយចៃដន្យប៉ុណ្ណោះ។ តែម្ចាស់ចម្ការក៏ជួយចេញសំណងមួយចំនួនក្នុងការចាត់ចែងពិធីបុណ្យសពដែរ៕