សៀមរាបៈ ស្ពានបុរាណតាអោងដែលមានអាយុកាលប្រមាណ ៩០០ ឆ្នាំ កំពុងត្រូវបានក្រុមមន្ត្រីជំនាញនៃអាជ្ញាធរជាតិអប្សរារៀបចំជួសជុលស្ដារឡើងវិញ ក្នុងទម្រង់រចនាប័ទ្មដើម ដើម្បីរក្សាទុកជាកេរដំណែលសម្រាប់មនុស្សជំនាន់ក្រោយបានទស្សនា និងសិក្សាស្រាវជ្រាវនូវស្នាដៃបុព្វបុរសខ្មែរ។ នេះបើតាមមន្ត្រីបច្ចេកទេសនៃនាយកដ្ឋានអភិរក្សប្រាសាទក្រៅឧទ្យានអង្គរដែលចូលរួមជួសជុលស្ដារឡើងវិញនូវស្ពានបុរាណដ៏ចំណាស់នេះ។
លោក ពុទ្ធ សុទ្ធ ប្រធានគម្រោងជួសជុលស្ពានតាអោងប្រាប់ ភ្នំពេញ ប៉ុស្តិ៍ថា ស្ពានតាអោងជាស្ពានបុរាណ វែងជាងគេក្នុងចំណោមស្ពានបុរាណចំនួន ២៣ លើកំណាត់ផ្លូវបុរាណពីអង្គរទៅបាកាណ (ព្រះខ័នកំពង់ស្វាយ)។
ស្ពាននេះមានទីតាំងស្ថិតនៅក្នុងភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប មានបណ្តោយ ៧៥ ម៉ែត្រ ទទឹង ១៣ ម៉ែត្រ កម្ពស់ ៨ ម៉ែត្រ និងមានរន្ធត្រដេវចំនួន ១៤ ធ្វើអំពីថ្មបាយក្រៀម លម្អដោយបង្កាន់ដៃនាគក្បាល ៩ និងមានព្រះពុទ្ធសមាធិនៅចំកណ្តាលក្បាលនាគធ្វើអំពីថ្មភក់។ ដោយផ្អែកលើក្បាច់ចម្លាក់បង្កាន់ដៃនាគនៅលើតួស្ពាននេះ គេអាចសន្និដ្ឋានបានថា ស្ពាននេះបានសាងសង់ក្នុងរចនាប័ទ្មបាយ័នក្នុងចន្លោះឆ្នាំ ១១៨១-១២២០ នៃគ្រិស្ដសករាជ។
ដោយរងឥទ្ធិពលនៃអាកាសធាតុ និងសម្ពាធនៃទម្ងន់អស់រយៈពេលជាច្រើនសតវត្សរ៍ដែលបង្កឡើងពីកត្តាមនុស្ស និងធម្មជាតិបច្ចុប្បន្នស្ពានបុរាណនេះមានសភាពចាស់ទ្រុឌទ្រោមខ្លាំង ដោយផ្នែកជាច្រើននៃតួស្ពានសងខាងបានប្រេះញែកចេញពីគ្នា។
លោកបញ្ជាក់ថា៖ «ភាពអច្ឆរិយនៃសំណង់ស្ពានបុរាណនេះ គឺធ្វើឡើងពីថ្មបាយក្រៀម និងថ្មភក់សុទ្ធសាធ ដូច្នេះដើម្បីរក្សាស្នាដៃ និងកេរដំណែលបុព្វបុរសយើងឱ្យគង់វង្សស្ថិតស្ថេរយូរអង្វែងមន្ត្រីជំនាញនៃអាជ្ញាធរជាតិអប្សរាយើងនឹងខិតខំជួសជុលកែលម្អឡើងវិញដោយរក្សានូវគ្រប់ទម្រង់នៃរចនាប័ទ្មដើមនៃសំណង់ស្ពានបុរាណនេះ»។
បើតាមលោក ពុទ្ធ សុទ្ធ នៅពេលនេះក្រុមការងាររបស់លោកកំពុងធ្វើចន្ទល់ដែកអបសសរស្ពាន ដើម្បីការពារបាក់ស្រុត នៅពេលរុះរើ និងជីកកាយចេញនូវផ្នែកដែលពុកផុយ និងប្រមូលបំណែកថ្មដែលបានជ្រុះធ្លាក់មកផ្គុំភ្ជាប់គ្នាដើម្បីរៀបចំដាក់បញ្ចូលទៅតាមទីតាំងដើមឡើងវិញ។ គម្រោងជួសជុលស្ពានបុរាណនេះបានចាប់ផ្ដើមនៅថ្ងៃទី ១៥ ខែ មករា ឆ្នាំ ២០២១ ដោយប្រើថវិកាមូលនិធិរបស់អាជ្ញាធរជាតិអប្សរា ហើយគ្រោងនឹងបញ្ចប់នៅខែមិថុនា ឆ្នាំ ២០២១។
ដើម្បីសម្រួលដល់ដំណើការជួសជុលស្ពានបុរាណនេះគ្រប់មធ្យោបាយធ្វើដំណើរទាំងអស់ត្រូវបានហាមឃាត់ធ្វើចរាចរណ៍ទៅមកឆ្លងកាត់លើស្ពាននេះ។
លោក ពៅ ប៊ុនធឿន អភិបាលស្រុកជីក្រែងបានប្រាប់ ភ្នំពេញ ប៉ុស្តិ៍ថា នៅពេលនេះ អាជ្ញាធរមូលដ្ឋានបានរៀបចំធ្វើផ្លូវវាងមួយអមតាមបណ្ដោយស្ពាន សម្រាប់ឱ្យអ្នកភូមិបើកបរម៉ូតូ និង គោយន្តឆ្លងកាត់។ ចំណែករថយន្តធុនធ្ងន់មិនអនុញ្ញាតឱ្យធ្វើដំណើរឆ្លងកាត់តំបន់នោះទេ។ លោកថ្លែងថា៖ «យើងចាំបាច់ត្រូវហាមឃាត់ការធ្វើចរាចរណ៍នូវរថយន្តធុនធ្ងន់ឆ្លងកាត់តំបន់នេះ ព្រោះវាអាចបង្កឱ្យរញ្ជួយដល់គ្រឹះស្ពាន និងរំខានដល់ដំណើរការជួសជុលស្ពាន»។
បើតាមលោក ប៊ុនពៅ ប្រជាពលរដ្ឋ និងអាជ្ញាធរមូលដ្ឋានបានចូលរួមគាំទ្រចំពោះវិធានការនានាក្នុងការថែរក្សាការពារ ស្ពានតាអោងនេះជារៀងរហូតមក ដោយមិនអនុញ្ញាតឱ្យរថយន្តធុនធ្ងន់បើកឆ្លងកាត់ស្ពាននេះឡើយ៕