សៀមរាប៖ ក្រុមជំនាញការផ្នែកព្រៃឈើនៃអាជ្ញាធរជាតិអប្សរា គ្រោងកាត់ដើមឈើចំនួន ៤ ដើម ដែលដុះជាប់នឹងរចនាសម្ព័ន្ធប្រាសាទបន្ទាយក្ដី ស្ថិតក្នុងរមណីយដ្ឋានអង្គរ ដើម្បីបញ្ចៀសការដួលរលំដោយធម្មជាតិ ដែលអាចនឹងខូចខាតដល់ប្រាសាទបុរាណ។ នេះបើយោងតាមការឱ្យដឹងពី លោក ឡុង កុសល អ្នកនាំពាក្យអាជ្ញាធរជាតិអប្សរាបានប្រាប់ ភ្នំពេញ ប៉ុស្តិ៍ កាលពីរសៀលថ្ងៃទី ២៩ ខែ មេសា ឆ្នាំ ២០២១។
លោក កុសល បានថ្លែងថា ដើមឈើដែលនឹងត្រូវកាត់ដកហូតនោះ ដោយហេតុអាចនឹងដួលរលំធ្វើឱ្យខូចខាតដល់រចនាសម្ព័ន្ធនៃប្រាសាទបន្ទាយក្ដី។ ដើមឈើនោះ មានដើមពង្រចំនួន ៣ ដើម និងដើមចាន់ចំនួន ១ ដើម។ ដើមឈើទាំងនោះ បានដុះជាប់នៅខាងមុខខ្លោងទ្វារចូលប្រាសាទដែលងាយនឹងយោលយោក ឬដួលរលំខូចខាតដល់រចនាសម្ព័ន្ធនៃខ្លោងទ្វារប្រាសាទបន្ទាយក្ដី ព្រោះជិតចូលរដូវភ្លៀងធ្លាក់ និងខ្យល់។
លោក កុសល ថ្លែងថា ក្រុមជំនាញការផ្នែកព្រៃឈើនៃអាជ្ញាធរជាតិអប្សរា នឹងធ្វើការកាត់ដកហូតនូវដើមឈើទាំង ៤ ដើមនោះ នៅក្នុងសប្ដាហ៍ទី ១ នៃខែឧសភា ខាងមុខនេះ។
លោក ជូ រ៉ាឌីណា អនុប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរាបានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២៩ ខែមេសាថា នៅពេលនេះ ក្រុមមន្ត្រីជំនាញកំពុងសិក្សាអំពីស្ថានភាពនៃដើមឈើទាំង ៤ ដើមនោះ ដើម្បីរកវិធីសាស្ត្រធ្វើយ៉ាងណាកាត់ដកហូតចេញពីខ្លោងទ្វារប្រាសាទបន្ទាយក្ដី ដោយប្រុងប្រយ័ត្នមិនឱ្យប៉ះពាល់ដល់រចនាសម្ព័នខ្លោងទ្វារនោះទេ។
លោកបានថ្លែងថា ដើមឈើទាំង ៤ ដើមនោះ បានដុះទ្រេតជាប់ខឿនខ្លោងទ្វារប្រាសាទ និងមានសភាពពុកគល់ និងដើម ប្រព័ន្ធឫសខ្សោយដុះគ្របលើថ្ម និងចាក់ចូលក្នុងរចនាសម្ព័ន្ធគ្រឹះរបស់ខ្លោងទ្វារ បណ្តាលឲ្យថ្មរបើកឡើង និងរំកិលចេញពីទីតាំងដើម។
លោកថ្លែងថា៖ «ក្រុមអ្នកជំនាញយើងត្រូវសិក្សារិះរកវិធីសាស្ត្រ បច្ចេកទេស និងមធ្យោបាយឲ្យបានសមស្របបំផុត ដើម្បីកាត់ដកដើមឈើទាំងនោះដោយប្រុងប្រយ័ត្ន»។
លោកថា ក្រុមមន្ត្រីជំនាញទេសភាពព្រៃឈើនៃអាជ្ញាធរជាតិអប្សារា បានធ្វើការកាត់មែកឈើមួយចំនួន ដែលដុះនៅជាប់ប្រាសាទសួព្រ័ត្រ ទល់មុខទីលានប្រាសាទជល់ដំរី។
ក្នុងរយ:ពេល ៤ ខែដើមឆ្នាំ ២០២១ នេះ ក្រុមអ្នកជំនាញបានធ្វើការកាត់ក្រី មែកឈើ និងកាត់ដកហូតដើមឈើ ដែលងាយនឹងដួលរលំធ្វើឱ្យខូចប្រាសាទបុរាណ នឹងអាចគ្រោះថ្នាក់ដល់ភ្ញៀវទេសចរបានជាង ១០ ទីតាំងហើយ ដូចជានៅលើភ្នំគូលេន ក្រុងអង្គរធំ និងនៅក្រោយតំបន់អង្គរតូច ព្រមទាំងទីតាំងជាច្រើនទៀត ស្ថិតក្នុងរមណីយដ្ឋានអង្គរ។
ការកាត់ដកហូត និងកាត់ក្រីដើមឈើនេះ មិនមានន័យថា កាត់ដើមឈើបំផ្លាញចោលនោះទេ គឺធ្វើឡើងចំពោះដើមឈើដែលងាយនឹងដួលរលំប៉ុណ្ណោះ៕