សៀមរាបៈ អាជ្ញាធរជាតិអប្សរាគ្រោងនឹងដោះលែងសត្វស្លាបកម្រចំនួន ៣ ប្រភេទ ដែលមានសរុប ១១ ក្បាលទៅក្នុងព្រៃធម្មជាតិនៃឧទ្យានអង្គរក្នុងពេលឆាប់ៗនេះ បន្ទាប់ពីធ្លាប់បានលែងសត្វជាច្រើនប្រភេទចូលទៅក្នុងតំបន់នេះ។ ជាមួយគ្នាក៏បានអំពាវនាវដល់សាធារណជនចូលរួមថែរក្សាសត្វទាំងនេះផងដែរ។
អាជ្ញាធរជាតិអប្សរាបញ្ជាក់នៅទំព័រហ្វេសប៊ុកផ្លូវការរបស់ខ្លួននៅថ្ងៃទី ១៧ ខែឧសភាថា៖ «កាលពីចុងសប្តាហ៍កន្លងទៅ គម្រោងដោះលែងសត្វព្រៃក្នុងឧទ្យានអង្គរក្រោមកិច្ចសហការរវាងអាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការ Wildlife Alliance បានដឹកជញ្ជូនសត្វស្លាប ៣ ប្រភេទផ្សេងទៀតសរុបចំនួន ១១ ក្បាលមក កាន់ព្រៃរមណីយដ្ឋានអង្គរ»។
សត្វស្លាបទាំងនោះរួមមានសត្វក្ងោកចំនួន ៥ ក្បាល សត្វកេងកងធំចំនួន ៣ ក្បាល និងសត្វព្វាំង ចំនួន ៣ ក្បាល ដែលទទួលបានជាអំណោយពីអង្គការអភិរក្សសត្វព្រៃនានា និងប្រជាពលរដ្ឋយកមកផ្សាំងនៅក្នុងព្រៃរមណីយដ្ឋានអង្គរ។
បើតាមអាជ្ញាធរជាតិអប្សរា «ក្រុមការងារគម្រោងនឹងធ្វើការដោះលែងសត្វស្លាបទាំងនេះចេញពីទ្រុងចូលទៅក្នុងព្រៃនាពេលខាងមុខ»។
អាជ្ញាធរជាតិអប្សរាបានបញ្ជាក់ថា កន្លងមកគម្រោងដោះលែងសត្វព្រៃក្នុងឧទ្យានអង្គរទទួលបានជោគជ័យក្នុងការដោះលែងសត្វព្រៃជាច្រើនប្រភេទចូលក្នុងព្រៃធម្មជាតិនៃឧទ្យានអង្គរមានដូចជា សត្វទោចមកុដ ១១ ក្បាល ដែលកើតកូនបាន ៤ ក្បាល សត្វឈ្លូស ៤ ក្បាល សត្វស្វាព្រាម ១២ ក្បាល សត្វសំពោចក្រអូប ៥ ក្បាល សត្វភេខ្លួនរលោង ៤ ក្បាល ដែលកើតកូនបាន ២ ក្បាល សត្វឆ្មាដាវ ២ ក្បាល សត្វកេងកងតូច ២ ក្បាល និងសត្វផ្សេងៗមួយចំនួនទៀត។
អាជ្ញាធរជាតិអប្សរាក៏បានឱ្យដឹងដែរថា មកទល់បច្ចុប្បន្នសត្វទាំងអស់នេះនៅតែមានវត្តមាននៅទីនោះនៅឡើយ ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារ «ដើម្បីឱ្យសត្វព្រៃទាំងអស់បន្តវត្តមាននៅក្នុងព្រៃធម្មជាតិនៃឧទ្យានអង្គរយើងនឹងបង្កើនចំនួនបន្ថែមទៀត»។
ជាមួយនេះដែរ អាជ្ញាធរជាតិអប្សរាបានអំពាវនាវទៅដល់សាធារណជនភ្ញៀវជាតិ និងអន្តរជាតិ ជាពិសេសប្រជាពលរដ្ឋ ដែលរស់នៅក្នុងតំបន់នោះឱ្យចូលរួមថែរក្សាសត្វព្រៃទាំងនោះ ដោយចៀសវាងមានបំណងមិនល្អពេលប្រទះឃើញ និងចៀសវាងផ្តល់ចំណីឱ្យសត្វទាំងនោះ។
លោក ឡុង កុសល អ្នកនាំពាក្យអាជ្ញាធរជាតិអប្សរា មិនអាចទាក់ទងបានដើម្បីសុំការបញ្ជាក់បន្ថែមបានទេនៅថ្ងៃទី ១៧ ខែឧសភា។
ក៏ប៉ុន្តែតាមសេចក្តីប្រកាសព័ត៌មានរបស់អង្គការ Wildlife Alliance ដែលភ្នំពេញប៉ុស្តិ៍ទទួលបានកាលពីចុងខែមេសាដែលបានដកស្រង់សម្ដីមន្ត្រីអាជ្ញាធរជាតិអប្សរាឱ្យដឹងថា បន្ទាប់ពីដោះលែង សត្វទាំងនោះត្រូវបានត្រួតពិនិត្យយ៉ាងប្រុងប្រយ័ត្ន ដើម្បីធានាវត្តមាន និងសុខុមាលភាពរបស់ពួកវា។
កាមេរ៉ាត្រូវបានបំពាក់នៅក្នុងព្រៃដើម្បីត្រួតពិនិត្យសត្វទាំងនោះ ហើយមានអ្នកថែទាំ ២ នាក់ជាអ្នកមើលថែពួកវា រួមទាំងផ្តល់អាហារបន្ថែម។
សេចក្តីប្រកាសព័ត៌មានដដែលបញ្ជាក់ថា តំបន់ប្រាសាទអង្គរធ្លាប់បានបាត់មុខចេញពីពិភពលោក ហើយការរកឃើញឡើងវិញ នាំឱ្យមានការទទួលស្គាល់ជាសកលនៃអង្គរជាមជ្ឈមណ្ឌលបេតិកភណ្ឌវប្បធម៌របស់កម្ពុជា។ ប្រសិនបើជោគជ័យ គម្រោងដោះលែងសត្វព្រៃក្នុងឧទ្យានអង្គរនៅតែបន្តកើតមាន ហើយនៅតំបន់អង្គរអាចដណ្តើមបានជាតំបន់បេតិកភណ្ឌធម្មជាតិដ៏សំខាន់របស់កម្ពុជាផងដែរ៕