The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ជាតិ​អប្សរា ​នឹង​រុះរើ​សំណង់​ក្នុង​តំបន់​អង្គរ​ឲ្យ​អស់​នៅ​ចុង​ឆ្នាំ​នេះ




អាជ្ញាធរ​ជាតិ​អប្សរា ​នឹង​រុះរើ​សំណង់​ក្នុង​តំបន់​អង្គរ​ឲ្យ​អស់​នៅ​ចុង​ឆ្នាំ​នេះ

Content image - Phnom Penh Post
សំណង់​ភោជនីយដ្ឋាន​ក្នុង​តំបន់​អង្គរ​ដែល​ទើប​រុះរើ​ថ្មីៗ​នេះ​។ រូបថត អាជ្ញាធរ​ជាតិ​អប្សរា

អាជ្ញាធរ​ជាតិ​អប្សរា ​នឹង​រុះរើ​សំណង់​ក្នុង​តំបន់​អង្គរ​ឲ្យ​អស់​នៅ​ចុង​ឆ្នាំ​នេះ

សៀមរាប: អាជ្ញាធរ​ជាតិ​អប្សរា​បាន​ដាក់​ផែនការ​ចុះ​រុះរើ​សំណង់ និង​តូប​លក់ដូរ​ក្នុង​តំបន់​ប្រាសាទ​អង្គរវត្ត​ឲ្យ​អស់​នៅត្រឹម​ចុងឆ្នាំ​ ២០២០ ​នេះ ខណៈ​សំណង់​ និង​តូប​លក់ដូរ​ចំនួន​ ១០ ​ទីតាំង​ ត្រូវ​បាន​អាជ្ញាធរ​ជាតិ​អប្សរា និង​មន្ទីរ​ទេសចរណ៍​ខេត្ត​សៀមរាប​សហការ​គ្នា​រុះរើ​ចេញពី​មុខ​ប្រាសាទ​អង្គរវត្ត​ក្នុង​រយៈពេល​ ៦ ​ខែ​នៃ​ឆ្នាំ​ ២០២០ នេះ​។

លោក​ ឡុង កុសល ប្រធាន​នាយកដ្ឋាន​ផ្សព្វផ្សាយ និង​ជា​អ្នកនាំពាក្យ​នៃ​អាជ្ញាធរ​ជាតិ​អប្សរា​បាន​ថ្លែង​ពី​ថ្ងៃ​ ១៤ ​មិថុនា​ថា​ក្នុង​រយៈពេល​ ៦ ​ខែ​ឆ្នាំ​នេះ​មាន​សំណង់ និង​តូប​លក់ដូរ​ដែល​អាជីវករ​សាងសង់​ក្នុង​តំបន់​ប្រាសាទអង្គរវត្ត​ចំនួន​ ១០ ​ទីតាំង​ត្រូវ​បាន​រុះរើ​ដោយ​ស្ម័គ្រចិត្ត និង​ប្រគល់​ទីតាំង​នោះ​ជូន​អាជ្ញាធរ​ជាតិ​អប្សរា​ដើម្បី​អភិវឌ្ឍ​ហេដ្ឋារចនាសម្ព័ន្ធ និង​សម្បទា​ទេសចរណ៍​។

លោក​បន្តថា អាជ្ញាធរ​ជាតិ​អប្សរា​បាន​ដាក់​ចេញ​ផែនការ​រុះរើ​សំណង់​ទាំងនេះ​ឲ្យ​អស់​ត្រឹម​ចុង​ឆ្នាំនេះ​។ អាជីវករ​ទាំងអស់​បាន​ស្ម័គ្រចិត្ត​សហការ​ជាមួយ​អាជ្ញាធរ​ជាតិ​អប្សរា​ដោយ​សម្រេច​រុះរើ​ខ្លួនឯង​ និង​មួយចំនួន​ទៀត​កំពុង​រក​ពេល​សមស្រប​ដើម្បី​រុះ​រើចេញ​ ប៉ុន្ដែ​មិនមាន​អ្នក​ជំទាស់​នឹង​វិធានការ​របស់​អាជ្ញាធរ​ជាតិ​អប្សរា​ទេ​។

លោក​ ឡុង កុសល បាន​បញ្ជាក់​​ថា​៖ «​សំណង់​ដែល​រុះរើ​ទាំង​​ ១០ ​ទីតាំង​នេះ​គឺជា​ប្រភេទ​ហាង​ធំៗ និង​ភោជនីយដ្ឋាន​ធំៗ​ដោយ​មាន​ប្រក់​ក្បឿង ខ្លះ​ប្រក​ស័ង្កសី ខ្លះ​ប្រក់​ស្បូវ​។ មើល​ទៅ​សល់​មិន​ច្រើន​ទៀត​ទេ គឺ​ពួកគាត់​រុះរើ​ជិត​អស់ហើយ ប៉ុន្ដែ​ខ្ញុំ​អត់​ចាំ​ចំនួន​ដែល​នៅ​សល់​សំណង់​ទាំង​ហ្នឹង​ទេ តែ​យ៉ាងណា​យើង​បាន​ដាក់​ផែនការ​រុះរើ​សំណង់​ និង​តូប​លក់ដូរ​ទាំងអស់​នៅ​ចុង​ឆ្នាំ​ ២០២០ ​នេះ​»​។

លោក​ ស្រ៊ុន គីមសេង ម្ចាស់​ភោជនីយដ្ឋាន​ «​ផ្ទះបាយ​តានី​ខ្មែរ​អង្គរ​» ​ដែល​មាន​ទីតាំង​ខាងមុខ​ប្រាសាទអង្គរវត្ត​ថ្លែង​កាលពី​ថ្ងៃ​ ១៤ ​មិថុនា​ ថា ភោជនីយដ្ឋាន​របស់​លោក​មាន​បណ្ដោយ​ ២០​ ម៉ែត្រ​ និង​ទទឹង​ប្រវែង​ ៣០​ ម៉ែត្រ​ដោយ​លោក​បាន​រុះរើ​រួចរាល់​កាលពី​ខែ​មុន ដើម្បី​ចូលរួម​រក្សា​សោភណភាព​នៅ​ខាង​មុខ​ប្រាសាទ​អង្គរវត្ត​ជាមួយ​អាជ្ញាធរ​ជាតិ​អប្សរា​។

លោក​បន្តថា ការរុះរើ​នេះ​លោក​ក៏មាន​ការសោកស្ដាយ​សម្ភារ​ដែល​បាក់បែក​មួយចំនួន​ដែរ ប៉ុន្ដែ​អ្វី​ដែល​សំខាន់​ជាង​នេះ​គឺ​លោក​បាន​ចូលរួម​លើកកម្ពស់​សោភណភាព​តំបន់​ប្រាសាទ​អង្គរវត្ត​ដែល​ជា​ការសហការ​ទាំងអស់​គ្នា​។ ​អាជ្ញាធរ​ជាតិ​អប្សរា​បាន​អនុវត្ត​មាន​តម្លាភាព និង​យុត្តិធម៌​អាច​ទទួល​យក​បាន ព្រោះ​សំណង់ ឬ​តូប​ដែល​ប៉ះពាល់​ត្រូវតែ​រុះ​រើចេញ​ទាំងអស់​ដូចៗ​គ្នា​។

លោក​បញ្ជាក់ថា​៖ «​បញ្ហា​រុះរើ​ភោជនីយដ្ឋាន​នេះ ធម្មតា​វា​ប៉ះពាល់​ហើយ​គឺ​ទាំង​ជីវភាព​ទាំង​សម្ភារ​នានា ប៉ុន្ដែ​យើង​ត្រូវតែ​ចូលរួម​ទាំងអស់​គ្នា ដើម្បី​លើកកម្ពស់​បរិស្ថាន វប្បធម៌ សោភណភាព​បរិវេណ​ប្រាសាទ​។ ខ្ញុំ​នៅមាន​ភោជនីយដ្ឋាន​មួយទៀត​នៅ​ក្រុង​សៀមរាប​ដែរ​ដូច្នេះ​ខ្ញុំ​មក​បើក​ដំណើរការ​មួយ​នេះ​សិន ប្រសិន​បើ​អាជ្ញាធរ​ជាតិ​អប្សរា​អាច​រក​ទីតាំង​ណាមួយ​សមរម្យ​ឲ្យ​ពួកខ្ញុំ​គឺ​ពួកខ្ញុំ​នឹង​គោរព​តាម​ការណែនាំ​គាត់​ទៀត​»​។

លោក​ យិត ចាន់ដារដ្ឋ អគ្គនាយករង​អាជ្ញាធរ​ជាតិ​អប្សរា​ត្រូវ​បាន​គេហទំព័រ​ហ្វេសប៊ុក​អាជ្ញាធរ​ជាតិ​អប្សរា​ដកស្រង់​សម្ដី​កាលពី​ថ្ងៃទី​ ១២ ខែមិថុនា ​ថា ការរុះរើ​សំណង់​ទាំងអស់​មុខ​ប្រាសាទ​អង្គរវត្ត​គឺ​មិន​ត្រូវបាន​លើកលែង​អគារ​ណាមួយ​ទេ សូម្បីតែ​សំណង់​របស់​អាជ្ញាធរ​ជាតិ​អប្សរា​ខ្លួនឯង​ផ្ទាល់ ក៏​ត្រូវ​តែ​រុះរើ​ចេញពី​តំបន់​ហាមឃាត់​ដែរ​។

ជាមួយ​នេះ​ដែរ​ក្នុង​នាម​អាជ្ញាធរ​ជាតិ​អប្សរា​លោក យិត ចាន់ដារដ្ឋ បាន​អរគុណ​ចំពោះ​កិច្ចសហការ​របស់​ក្រសួង និង​មន្ទីរ​ទេសចរណ៍​ខេត្ត​​សៀមរាប ក៏ដូចជា​ក្រុមអាជីវករ​ដែល​បាន​លះបង់​ទ្រព្យធន​របស់​ខ្លួន​នៅក្នុង​ការបម្រើ​ផលប្រយោជន៍​រួម​ និង​ស្គាល់​ពី​តម្លៃ​អង្គរ ដើម្បី​ទុក​លទ្ធភាព​ជូន​ដល់​អាជ្ញាធរ​ជាតិ​អប្សរា​អភិវឌ្ឍ​ទីលាន​នៅ​មុខ​ប្រាសាទ​អង្គរវត្ត​ឲ្យ​ក្លាយ​ទៅ​ជា​ទី​ចាប់អារម្មណ៍​បំផុត​៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។