.jpg)
ទិដ្ឋភាពប្រាសាទស្រះស្រង់ និងស្ពានបណ្តោះអាសន្ន។ រូប អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរានឹងរុះរើស្ពានបណ្តោះអាសន្នដែលឆ្លងទៅប្រាសាទបុរាណនៅកណ្តាលស្រះស្រង់ ក្នុងរមណីយដ្ឋានអង្គរ ដើម្បីរក្សាតម្លៃ និងភាពដើមនៃប្រាសាទបុរាណ បន្ទាប់ពីគម្រោងជួសជុលប្រាសាទដ៏ចំណាស់នេះត្រូវបានបញ្ចប់ជាស្ថាពរ និងសម្ពោធដាក់ឱ្យប្រើប្រាស់កាលពីពេលថ្មីៗនេះ។
ដើម្បីអបអរសាទរការបញ្ចប់គម្រោងជួសជុលប្រាសាទកណ្តាលស្រះស្រង់ អាជ្ញាធរជាតិអប្សរាបានរៀបចំពិធីសម្ពោធឱ្យភ្ញៀវទេសចរជាតិ និងអន្តរជាតិចូលទស្សនាកាលពីថ្ងៃទី ២២ ខែកុម្ភៈ ដោយមានការចូលរួមពីលោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។
អ្នកនាំពាក្យអាជ្ញាធរជាតិអប្សរា លោក ឡុង កុសល ប្រាប់ ភ្នំពេញ ប៉ុស្តិ៍ ពីម្សិលមិញថា បច្ចុប្បន្ននេះដោយសារប្រាសាទនៅកណ្តាលស្រះស្រង់ និងមានទឹកព័ទ្ធជុំវិញ ទើបអាជ្ញាធរជាតិអប្សរាបានសាងសង់ស្ពានបណ្តោះអាសន្នដើម្បីធ្វើពិធីសម្ពោធ និងឱ្យភ្ញៀវទេសចរឆ្លងកាត់ ប៉ុន្តែលោកថា ស្ពាននេះទុកត្រឹមរយៈពេលប្រហែល ២ សប្តាហ៍ទៀតប៉ុណ្ណោះនឹងរុះរើចេញវិញ។
អាជ្ញាធរជាតិអប្សរាបានធ្វើកូនស្ពានមួយ ដើម្បីឱ្យភ្ញៀវទេសចរ និងទុកពេលឱ្យប្រជាពលរដ្ឋដែលមានចំណាប់អារម្មណ៍បានចូលទស្សនាទៅដល់ប្រាសាទស្រះស្រង់ដោយផ្ទាល់ ក៏ប៉ុន្តែកូនស្ពាននេះមិនទុកនៅយូរទេ អាស្រ័យតាមការពិនិត្យមើលជាក់ស្តែងប្រហែលត្រឹមមួយសប្តាហ៍ ឬ ២ សប្តាហ៍នឹងត្រូវរើចេញវិញ ពីព្រោះស្រះស្រង់ ដើមឡើយក៏អត់មានស្ពានឆ្លងដែរ។
លោកបន្តថា៖ «ព្រោះយើងមិនអាចមានស្ពានឆ្លងកាត់ទៅបែបនេះទេ យើងមិនអាចបង្កើតអ្វីថ្មីដែលធ្វើឱ្យប៉ះពាល់ដល់តម្លៃដើមនៃតំបន់នោះទេ ព្រោះគោលគំនិតនៃក្រុមការងារថែរក្សាបេតិកភណ្ឌគឺចៀសវាងបង្កើតអ្វីដែលថ្មីធ្វើឱ្យប៉ះពាល់ដល់តម្លៃនៃប្រាសាទ»។
យ៉ាងណាក្តី អាជ្ញាធរជាតិអប្សរាកំពុងរៀបចំកន្លែងបិទផ្ទាំងព័ត៌មាន ទាក់ទងប្រាសាទស្រះស្រង់នៅទីនោះ ដើម្បីឱ្យភ្ញៀវទេសចរបានដឹង និងស្វែងយល់ពីប្រាសាទដែលបានបាត់ខ្លួនជាច្រើនឆ្នាំមកនេះ។
លោកថា៖ «តែប្រជាពលរដ្ឋដែលចង់ឃើញ និងទស្សនាអាចមើលពីចម្ងាយ និងអាចស្វែងយល់ពីប្រាសាទស្រះស្រង់នេះបានតាមរយៈការសរសេរព័ត៌មានបិទនៅមុខនោះ ឬរៀបចំវិធីផ្សេងទៀត ព្រោះយើងកំពុងរៀបចំបន្តទៅលើការងារនេះ»។
បើតាមលោក កុសល ក្រោយពីដាក់សម្ពោធជាសាធារណៈប្រាសាទនេះទទួលបានចំណាប់អារម្មរណ៍យ៉ាងច្រើនកុះករពីប្រជាពលរដ្ឋទាំងក្នុងតំបន់ និងទូទាំងប្រទេសដោយពួកគាត់បានអញ្ជើញមកទស្សនាជាហូរហែ។
ជាមួយគ្នានេះដែរ អាជ្ញាធរជាតិអប្សរាក៏បានដាក់សម្ពោធឱ្យប្រើប្រាស់ជាផ្លូវការនូវរហាត់ទឹកបុរាណ ដែលបង្ហាញពីអត្តសញ្ញាណរបស់ខេត្តសៀមរាបផងដែរ។ លោកថា៖ «យើងដឹងហើយតាមដងស្ទឹងសៀមរាបពីដើមមក បងប្អូនពលរដ្ឋតែងតែប្រើប្រាស់រហាត់ទឹកជាវិធីសាស្ត្រដើម្បីប្រមូលទឹកយកមកប្រើប្រាស់ជាលក្ខណៈចិញ្ចឹមជីវិត និងប្រើប្រាស់សម្រាប់កសិកម្ម»។
លោក កុសល បន្តថារហាត់ទឹកនេះត្រូវបានកសាងតាំងពីទសវត្សរ៍ទី ៦០ មកម្ល៉េះ ប៉ុន្តែដោយសារមានសភាពទ្រុឌទ្រោមទើបក្រុមការងារជំនាញ សម្រេចជួសជុល និងដាក់ឱ្យដំណើរការឡើងវិញ ដោយរក្សានូវទ្រង់ទ្រាយដើម និងរក្សាកម្ពស់ដដែលដើម្បីបម្រើកិច្ចការផ្សេងៗដែលពាក់ព័ន្ធជាមួយសមត្ថកិច្ចអាជ្ញាធរជាតិអប្សរា។
បើតាមឯកសារជាច្រើន ស្រះស្រង់ ត្រូវបានសាងសង់ឡើងក្នុងរជ្ជកាលព្រះបាទជេន្ទ្រវរ្ម័ន ទី២ នាពាក់កណ្តាលសតវត្សរ៍ទី១០ បន្ទាប់មកត្រូវបានកែលម្អដោយព្រះបាទជ័យវរ្ម័នទី៧ នៅសតវត្សរ៍ទី១២ ដើម្បីឧទ្ទិសដល់ពុទ្ធសាសនា។ ចំណែករហាត់ទឹកមានបណ្តោយ ១៨ ម៉ែត្រ កម្ពស់ ១២ ម៉ែត្រ អង្កត់ផ្ចិត ១១,៦ ម៉ែត្រ គឺត្រូវបានកសាងឡើងតាំងពីទសវត្សរ៍ទី៦០ ក្នុងសម័យសង្គមរាស្ត្រនិយម៕
