ភ្នំពេញៈ អាជ្ញាធរជាតិអប្សរាកាលពីថ្ងៃទី ១៥ កក្កដា បានបន្តព្រមានចាត់វិធានការផ្លូវច្បាប់ចំពោះអ្នកប្រកាសលក់ដូរដីធ្លីក្នុងតំបន់រមណីយដ្ឋានអង្គរ ដោយសារតំបន់នេះមានស្ថានីយបុរាណវត្ថុសំខាន់ៗដែលត្រូវការពារក្នុងកម្រិតខ្ពស់បំផុត ប៉ុន្តែនៅតែមានសកម្មភាពពុះដីលក់ជាបន្តបន្ទាប់ ថ្វីបើអាជ្ញាធរជាតិអប្សរាធ្លាប់បានហាម និងប្ដឹងទៅតុលាការក៏ដោយ។
លោក ឡុង កុសល អ្នកនាំពាក្យអាជ្ញាធរជាតិអប្សរាបានបញ្ជាក់ប្រាប់ភ្នំពេញប៉ុស្ដិ៍ពីម្សិលមិញថា សកម្មភាពលក់ដូរដីធ្លីក្នុងតំបន់រមណីយដ្ឋានអង្គរនៅតែកើតមាន បើទោះបីជាថ្មីៗនេះ អាជ្ញាធរជាតិអប្សរាបានប្រកាសហាមឃាត់ និងអនុវត្ដវិធានការចុះបិទទីតាំងលក់ដូរដីធ្លីមួយចំនួនក៏ដោយ។
លោកបានថ្លែងថា៖ «បញ្ហាដែលយើងនៅតែឃើញនោះគឺថា បុគ្គល និងឈ្មួញលក់ដូរដីធ្លីមួយចំនួននៅតែមកបន្តលក់ដូរដីធ្លីនៅតំបន់នេះដដែល។ យើងក៏បានចាត់វិធានការតាមផ្លូវច្បាប់ប្ដឹងបុគ្គលទាំងនោះទៅតុលាការមួយចំនួនរួចហើយដែរ»។
បើតាមលោក កុសល អ្វីដែលអាជ្ញាធរជាតិអប្សរាមានការព្រួយបារម្ភនោះ គឺប្រជាពលរដ្ឋដែលមកពីខេត្ដផ្សេងៗ មិនមែនជាពលរដ្ឋរស់នៅក្នុងខេត្ដសៀមរាបបាននាំគ្នាមកទិញដីទុកដើម្បីសាងសង់ទីលម្ហែ ឬទិញទុកលក់យកចំណេញទេ។ ប៉ុន្ដែទិញរួចបែរជាខាតប្រយោជន៍ទៅវិញ ព្រោះដីនៅតំបន់រមណីយដ្ឋានអង្គរ ទោះបីជាទិញហើយក៏ច្បាប់មិនអនុញ្ញាតឱ្យធ្វើអ្វីបានទាំងអស់។
លោកបានថ្លែងថា៖ «ខ្ញុំសូមអំពាវនាវដល់ពលរដ្ឋ ពិសេសពលរដ្ឋដែលរស់នៅក្នុងខេត្ដឆ្ងាយៗ សូមកុំឱ្យចាញ់បោកឈ្មួញមកទិញដីក្នុងតំបន់រមណីយដ្ឋានអង្គរ។ បើចង់មកទិញដីក្នុងខេត្ដសៀមរាប គួរសាកសួរពីប្រភពដីនោះឱ្យបានច្បាស់លាស់សិនថា តើជាដីស្ថិតក្នុងតំបន់រមណីយដ្ឋានអង្គរ តំបន់ការពារបេតិកភណ្ឌពិភពលោកដែរឬយ៉ាងណា?
បើស្ថិតនៅក្នុងតំបន់ទាំងនេះសូមកុំទិញឱ្យសោះ»។
កាលពីថ្ងៃទី ១៥ ខែកក្កដា អាជ្ញាធរជាតិអប្សរាបានព្រមានជាសាធារណៈលើហ្វេសប៊ុករបស់ខ្លួនថា៖ «បុគ្គលដែលប្រកាសលក់ដូរដីធ្លីក្នុងតំបន់រមណីយដ្ឋានអង្គរដែលជាបេតិកភណ្ឌពិភពលោកអាចនឹងប្រឈមវិធានការផ្លូវច្បាប់ប្រសិនបើមិនបញ្ឈប់»។
ជាមួយនេះអាជ្ញាធរជាតិអប្សរាក៏បានអំពាវនាវដល់ម្ចាស់គណនីហ្វេសប៊ុក Choch Choub និងបុគ្គលផ្សេងទៀតផងដែរ ខណៈហ្វេសប៊ុកទាំងនេះកំពុងប្រកាសលក់ដីធ្លីក្នុងតំបន់រមណីយដ្ឋានអង្គរ និងបានរំឭកឱ្យបញ្ឈប់សកម្មភាពនេះជាបន្ទាន់។ ក្នុងករណីមិនព្រមបញ្ឈប់សកម្មភាពទេ អាជ្ញាធរជាតិអប្សរានឹងចាត់វិធានការទៅតាមផ្លូវច្បាប់ជាធរមាន។
ទន្ទឹមនឹងនេះអាជ្ញាធរជាតិអប្សរាបានអំពាវនាវដល់សាធារណជនដែលមានបំណងទិញដីធ្លីក្នុងតំបន់នេះកុំទិញឱ្យសោះ ហើយបើមានចម្ងល់ពាក់ព័ន្ធនឹងការគ្រប់គ្រងដីធ្លីក្នុងតំបន់រមណីយដ្ឋានអង្គរសូមទាក់ទងមកកាន់អាជ្ញាធរជាតិអប្សរាតាមរយៈលេខទូរស័ព្ទ ០៩២ ៨៩ ៩៩ ៦៦។
បើតាមអាជ្ញាធរជាតិអប្សរាដីធ្លីក្នុងតំបន់រមណីយដ្ឋានអង្គរគឺជាតំបន់មានស្ថានីយបុរាណវត្ថុសំខាន់ៗដែលត្រូវការកិច្ចការពារកម្រិតខ្ពស់បំផុត (ក្នុងតំបន់ ១) និងជាតំបន់សម្បូរសំណល់បុរាណវត្ថុដែលត្រូវការពារទប់ទល់នឹងនឹងការប្រើប្រាស់ដីធ្លីផ្តេសផ្តាស និងការអភិវឌ្ឍមិនសមស្រប (ក្នុងតំបន់ ២)។
អាជ្ញាធរជាតិអប្សរាបានឲ្យដឹងថា ការលក់ទិញដីធ្លីក្នុងតំបន់នេះគឺផ្ទុយនឹងព្រះរាជក្រឹត្យលេខ ០០១ ន.ស ចុះថ្ងៃទី ២៨ ខែឧសភា ឆ្នាំ ១៩៩៤ ស្តីពីការកំណត់ និងការចាត់ចែងគ្រប់គ្រងតំបន់សៀមរាបអង្គរ និងសេចក្តីសម្រេចលេខ ៧០ សសរ ចុះថ្ងៃទី ១៦ ខែវិច្ឆិកា ឆ្នាំ ២០០៤ របស់រាជរដ្ឋាភិបាលស្តីពីការកំណត់បទដ្ឋាននៃការប្រើប្រាស់ដីធ្លីនៅតំបន់ ១ និងតំបន់ ២។
លោក សួស ណារិន មន្ដ្រីអង្កេតនៅសមាគមសិទ្ធិមនុស្សអាដហុកប្រចាំខេត្ដសៀមរាបបានលើកឡើងថា ការទិញ-លក់ដីធ្លីនៅតំបន់គ្រប់គ្រងដោយអាជ្ញាធរជាតិអប្សរាភាគច្រើនកើតឡើងរវាងតែភាគីអ្នកទិញ និងអ្នកលក់។ ចំណែកអាជ្ញាធរភូមិ-ឃុំ និងស្រុកមិនដែលឃើញមានការចុះហត្ថលេខាលើលិខិតទិញ-លក់នោះឡើយ។
លោកថា៖ «យើងចាត់ទុកថា ការលក់ដូរដីធ្លីនៅតំបន់រមណីយដ្ឋានអង្គរគឺជាការខុសច្បាប់។ សង្គមស៊ីវិលយើងមិនគាំទ្រចំពោះការទិញ-លក់ដីធ្លីនៅតំបន់នេះទេ។ បើបុគ្គលណានៅតែបន្តទិញលក់ដីធ្លីនៅតំបន់នេះទៀតអាជ្ញាធរគួរតែមានវិធានតាមផ្លូវច្បាប់កុំឱ្យបញ្ហានេះរឹតតែរីករាលដាល»៕