សៀមរាបៈ អាជ្ញាធរជាតិអប្សរាប្រកាសឲ្យបញ្ឈប់ជាបន្ទាន់ចំពោះបុគ្គលដែលប្រកាសលក់ដូរដីធ្លីក្នុងតំបន់រមណីយដ្ឋានអង្គរ ដែលជាបេតិកភណ្ឌពិភពលោកដោយព្រមានថា អាចនឹងប្រឈមវិធានការផ្លូវច្បាប់ប្រសិនបើមិនបញ្ឈប់សកម្មភាព បន្ទាប់ពីមានបុគ្គលមួយចំនួននៅតែប្រកាសលក់ដីធ្លីដោយខុសច្បាប់តាមបណ្តាញសង្គមហ្វេសប៊ុក។
អាជ្ញាធរជាតិអប្សរាបានបង្ហោះនៅលើទំព័រហ្វេសប៊ុកកាលពីថ្ងៃទី ២០ កញ្ញា ដោយបានភ្ជាប់មកជាមួយនឹងគណនីហ្វេសប៊ុកដែលមានឈ្មោះថា Vannchheun Bonjour បន្ទាប់ពីគណនីនេះបានប្រកាសលក់ដីទំហំ ១០ គុណនឹង ២០ ម៉ែត្រមានទីតាំងនៅជិតផ្លូវ ៦០ ម៉ែត្រ ដោយដីតំបន់នេះស្ថិតក្រោមការគ្រប់គ្រងរបស់អាជ្ញាធរជាតិអប្សរា។
ទំព័រហ្វេសប៊ុកដដែលព្រមានថា ក្នុងករណីមិនព្រមបញ្ឈប់សកម្មភាពនេះទេ អាជ្ញាធរជាតិអប្សរានឹងចាត់វិធានការទៅតាមផ្លូវច្បាប់ជាធរមាន។ ម្យ៉ាងទៀត ដើម្បីបង្ការការខូចខាតផលប្រយោជន៍របស់សាធារណជនដែលកើតឡើងពីការទិញដីធ្លីក្នុងតំបន់រមណីយដ្ឋានអង្គរ អាជ្ញាធរជាតិអប្សរាក៏សូមអំពាវនាវផងដែរដល់សាធារណជនសូមកុំទិញដីក្នុងតំបន់នេះឱ្យសោះ និងសូមធ្វើការទាក់ទងមកកាន់អាជ្ញាធរជាតិអប្សរា ប្រសិនបើមានចម្ងល់ដែលពាក់ព័ន្ធនឹងការគ្រប់គ្រងដីធ្លីក្នុងតំបន់រមណីយដ្ឋានអង្គរ។
អាជ្ញាធរជាតិអប្សរាបញ្ជាក់ថា៖ «ដើម្បីអនុវត្តគោលការណ៍ច្បាប់ក្នុងកិច្ចការអភិរក្ស និងអភិវឌ្ឍរមណីយដ្ឋានអង្គរប្រកបដោយចីរភាព អាជ្ញាធរជាតិអប្សរា សូមធ្វើការអំពាវនាវដល់បុគ្គលដែលមានគណនីហ្វេសប៊ុក Vannchheun Bonjour និងបុគ្គលផ្សេងទៀតដែលកំពុងតែប្រកាសលក់ដីធ្លីនៅក្នុងតំបន់រមណីយដ្ឋានអង្គរតាមប្រព័ន្ធទំនាក់ទំនងសង្គមឲ្យបញ្ឈប់នូវសកម្មភាពរបស់ខ្លួនជាបន្ទាន់»។
លោក រិទ្ធ វ៉ាន់ឈឿន ជាម្ចាស់គណនីដែលបានប្រកាសលក់ដីក្នុងតំបន់អាជ្ញាធរជាតិអប្សរាបានប្រាប់ភ្នំពេញប៉ុស្តិ៍ពីម្សិលមិញ ដោយព្រមទទួលកំហុសថា ដោយសារតែទាល់ និងត្រូវការលុយខ្លាំង ទើបលោកសម្រេចចិត្តបង្ហោះលក់ដីដែលបានទិញបន្តពីពលរដ្ឋដទៃកាលពីឆ្នាំ ២០១៩។
លោកបញ្ជាក់ថា ដីដែលមានទំហំ ១០ ម៉ែត្រ គុណនឹង ២០ ម៉ែត្រនេះ គឺលោកបានទិញក្នុងតម្លៃជិត ១ ម៉ឺនដុល្លារ ដោយសង្ឃឹមថា នឹងអាចរស់នៅអាស្រ័យផលបាន ព្រោះមានការទទួលស្គាល់ពីអាជ្ញាធរដែនដី។
លោកនិយាយថា៖ «ខ្ញុំផ្ទាល់ គឺឈប់ហើយបានចំណាយលុយឡើងជិត ១ ម៉ឺនដុល្លារថាទិញទៅបានស្របច្បាប់អីអ៊ីចឹងតែទិញទៅធ្វើអីមិនកើត ហើយត្រូវតែចូលរួមថែរក្សាបេតិកភណ្ឌជាតិដែរ។ យើងក៏ខកបំណង ហើយលុយក៏ពិបាករកផង។ ខ្ញុំដាក់លក់នេះគឺចាល់ខ្លាំងមែនទែន ព្រោះលុយធនាគារមិនមានអីបង់ទេ តែបើមិនអាចលក់ដីនេះបានមានតែមិនលក់ ហើយទៅរកអីផ្សេងទៅ ស្តាយលុយដែលបានចំណាយទិញដីនេះណាស់»។
លោក ឡុង កុសល អ្នកនាំពាក្យអាជ្ញាធរជាតិអប្សរាថ្លែងពីម្សិលមិញថា តំបន់រមណីយដ្ឋានអង្គរ គឺជាតំបន់មានស្ថានីយបុរាណវត្ថុសំខាន់ៗដែលត្រូវការកិច្ចការពារកម្រិតខ្ពស់បំផុត (តំបន់ ១) និងជាតំបន់សម្បូរសំណល់បុរាណវត្ថុដែលត្រូវការពារទប់ទល់នឹងការប្រើប្រាស់ដីធ្លីផ្តេសផ្តាស និងការអភិវឌ្ឍមិនសមស្រប (តំបន់ ២)។
លោកថា ដីក្នុងតំបន់ទាំងនេះគឺមិនអាចលក់ដូរបានទេ ហើយការលក់ទិញដីធ្លីក្នុងតំបន់នេះ គឺផ្ទុយនឹងច្បាប់ដែលមានចែងក្នុងព្រះរាជក្រឹត្យចុះថ្ងៃទី ២៨ ខែ ឧសភា ឆ្នាំ ១៩៩៤ ស្តីពីការកំណត់ និងការចាត់ចែងគ្រប់គ្រងតំបន់សៀមរាបអង្គរ និងសេចក្តីសម្រេចចុះថ្ងៃទី ១៦ ខែ វិច្ឆិកា ឆ្នាំ ២០០៤ របស់រាជរដ្ឋាភិបាលស្តីពីការកំណត់បទដ្ឋាននៃការប្រើប្រាស់ដីធ្លីនៅតំបន់ ១ និងតំបន់ ២។
លោកបន្តថា៖ «ការពិតទៅអាជ្ញាធរភូមិ ឃុំ-សង្កាត់ហ្នឹង ក៏ធ្វើខុសច្បាប់ដែរ ព្រោះរដ្ឋបាលខេត្តសៀមរាបបានចេញលិខិតណែនាំមិនឲ្យអាជ្ញាធរភូមិ ឃុំ សង្កាត់ហ្នឹង ចុះហត្ថលេខាលើការទិញ-លក់ដីធ្លី នៅក្នុងតំបន់ការពារនោះទេ។ នេះគឺជាការទទួលខុសត្រូវចំពោះមុខច្បាប់របស់អាជ្ញាធរមូលដ្ឋានក្នុងការចេញលិខិតបញ្ជាក់ការលក់ដូរដីហ្នឹង»។
បើតាមលោក ឡុង កុសល មកទល់ពេលនេះអាជ្ញាធរជាតិអប្សរាបានដាក់ពាក្យបណ្តឹងទៅតុលាការជាច្រើនករណីរួចមកហើយចំពោះបុគ្គលដែលបានលក់ដូរដីធ្លីដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា ខណៈលោកក៏សង្ឃឹមថា សារទាំងនេះនឹងជួយដល់ពលរដ្ឋដទៃទៀតកុំឲ្យក្លាយខ្លួនជាជនរងគ្រោះក្នុងការទិញដីនៅតំបន់បេតិកភណ្ឌពិភពលោក៕