ក្រចេះ: ក្នុងនាមអាជ្ញាធរខេត្តក្រចេះអភិបាលរងខេត្តលោក គង់ គឹមនី ជំរុញឱ្យអាជ្ញាធរមូលដ្ឋានស្រាវជ្រាវរកមុខមេខ្យល់ដែលកៀរគរប្រជាពលរដ្ឋចូលទៅកាប់ទន្ទ្រានដីក្រុមហ៊ុនសម្បទានសេដ្ឋកិច្ច CHPB Development នៅឃុំកំពង់ចាម ស្រុកសំបូរ ខេត្តក្រចេះដោយតម្រូវឱ្យបញ្ឈប់សកម្មភាពនេះជាបន្ទាន់ បន្ទាប់ពីមានការស្នើពីក្រុមហ៊ុនឱ្យអាជ្ញាធរជួយអន្តរាគមន៍។
លោក គង់ គឹមនី ប្រាប់ភ្នំពេញប៉ុស្ដិ៍កាលពីថ្ងៃទី ២៦ តុលាថា លោកបានជំរុញឱ្យអាជ្ញាធរមូលដ្ឋានជួយទប់ស្កាត់សកម្មភាពរំលោភទន្ទ្រានដីរបស់ក្រុមហ៊ុន CHPB Development។ ក្នុងនោះមានដីព្រៃរបស់រដ្ឋមួយចំនួនក៏ត្រូវបានគេរំលោភយកធ្វើជាកម្មសិទ្ធិផងដែរ។
ពលរដ្ឋទាំងនោះជឿតាមការញុះញង់របស់មេខ្លោង ម្នាក់មិនស្គាល់អត្តសញ្ញាណដោយប្រាប់ឱ្យពួកគាត់ទៅចាប់យកដីនៅតំបន់នោះ ព្រមទាំងនិយាយកុហកថាអាជ្ញាធរនឹងកាត់ចែកដីឱ្យពលរដ្ឋដែលមករស់នៅ និងអាស្រ័យផលលើដីជាក់ស្ដែង។ ដូច្នេះពួកគាត់បាននាំគ្នាទៅសង់រោង សង់ខ្ទម និងយកដើមចេក ដូង ស្វាយ និងដំណាំមួយចំនួនទៀតទៅដាំនៅលើដីនោះ ដើម្បីសម្គាល់ជាដីរបស់ពួកគាត់។
លោកថា៖ «ខ្ញុំអត់ចាំចំនួនអ្នកទៅទន្ទ្រានដីហ្នឹងទេ ប៉ុន្ដែក្នុងនាមអាជ្ញាធរខ្ញុំសូមអំពាវនាវដល់ប្រជាពលរដ្ឋឱ្យចេះគោរពច្បាប់ កុំធ្វើអ្វីបំពានច្បាប់។ បើសិនជាបងប្អូនខ្វះដីពិតប្រាកដ ខ្ញុំសុំឱ្យបងប្អូនដាក់ពាក្យស្នើសុំដីសម្បទានសង្គមកិច្ច និងមូលដ្ឋាន ឬបងប្អូនផ្ទាល់មកអាជ្ញាធរខេត្ត។ យើងនឹងពិចារណាផ្ដល់ជូនពួកគាត់ ហើយជាក់ស្ដែងដូចយើងបានធ្វើកន្លងមកនេះ គឺយើងបានចែកដីសង្គមកិច្ចជូនពលរដ្ឋក្រីក្រជាច្រើនគ្រួសាររួចមកហើយ»។
លោក ឈិត ណន មេឃុំកំពង់ចាម ស្រុកសំបូរថ្លែងកាលពីថ្ងៃទី ២៦ តុលា ថា លោកបានទទួលអនុសាសន៍ពីថ្នាក់លើហើយដោយតម្រូវឱ្យធ្វើការផ្សព្វផ្សាយ ឬជូនដំណឹងឱ្យពលរដ្ឋដឹងគ្រប់ៗគ្នាសិន ដើម្បីឱ្យពួកគាត់បានយល់អំពីនីតិវិធីច្បាប់។ ពួកគាត់ជាពលរដ្ឋចំណាកស្រុកខ្លះ និងមួយចំនួនទៀតពលរដ្ឋនៅក្នុងមូលដ្ឋានឃុំកំពង់ចាម ប៉ុន្ដែពួកគាត់បានជឿតាមការញុះញង់របស់មេខ្លោង។
លោកបញ្ជាក់ថា៖ «មេខ្លោងដែលញុះញង់ពលរដ្ឋ គឺគាត់ធ្វើអ្វីមួយមិនបើកចំហទេ គឺគាត់បំផុសបំផុលឱ្យពលរដ្ឋទៅចាប់យកដីក្រុមហ៊ុន បន្ទាប់មកស្នើសុំឱ្យអាជ្ញាធរទទួលស្គាល់ សិទ្ធិកាន់កាប់ដីជូនគាត់ ហើយគាត់ក៏លក់ទៅឱ្យមេខ្លោងហ្នឹងតែម្ដង។ ពួកគាត់មិនមែនជាអ្នកខ្វះខាតដី ឬជាគ្រួសារក្រីក្រអ្វីទេ គឺនិយាយរួមគាត់ ដើរចាប់ដីរដ្ឋលក់»។
បើតាមមេឃុំរូបនេះ ក្រុមហ៊ុនសម្បទានសេដ្ឋកិច្ច CHPB Development មានដីចំនួន ១២ ១៩០ ហិកតា សម្រាប់វិនិយោគដាំដំណាំកសិឧស្សាហកម្មលើដំណាំកៅស៊ូ។ តែបច្ចុប្បន្ននេះដីព្រៃក្រុមហ៊ុន ១ ផ្នែកធំ កំពុងរងការកាប់ទន្ទ្រានពីសំណាក់ប្រជាពលរដ្ឋចំណាកស្រុកយកធ្វើជាកម្មសិទ្ធិ និងបានសាងសង់សំណង់អនាធិបតេយ្យដូចជា កូនខ្ទម សង់រោង និងដាំដើមចេកលើដីក្រុមហ៊ុននោះទៀតផង។
លោក ជា ចំរើន តំណាងក្រុមហ៊ុនសម្បទានសេដ្ឋកិច្ច CHPB Development បានថ្លែងកាលពីថ្ងៃទី ២៦ តុលា ថា ការចុះពិនិត្យមើលទីតាំងដីសម្បទានសេដ្ឋកិច្ចរបស់ក្រុមហ៊ុនពីសំណាក់អាជ្ញាធរនេះ បន្ទាប់ពីក្រុមហ៊ុនបានស្នើដល់ក្រសួង អាជ្ញាធរខេត្ត និងមន្ទីរពាក់ព័ន្ធជួយទប់ស្កាត់ការកាប់រានដីព្រៃរបស់ក្រុមហ៊ុនធ្វើជាកម្មសិទ្ធិពីពលរដ្ឋចំណាកស្រុកជាច្រើនគ្រួសារ។
លោកបន្តថា អាជ្ញាធរបានជួយអន្តរាគមន៍ហើយដោយជំរុញឱ្យមានមន្ត្រីមូលដ្ឋានចុះផ្សព្វផ្សាយ ហាមឃាត់ពលរដ្ឋមិនឱ្យទៅឈូសឆាយដីរបស់ក្រុមហ៊ុនបន្តទៀត។ ក្រុមហ៊ុនធ្លាប់បានហាមឃាត់ជាច្រើនលើកមកហើយ ប៉ុន្ដែពលរដ្ឋមួយចំនួននៅតែបន្តធ្វើសកម្មភាពតាមការញុះញង់របស់មេខ្លោងម្នាក់។
លោកថា៖ «យើងមិនមានវិធានការក្ដៅអ្វីដាក់ពួកគាត់ទេ គឺគ្រាន់តែហាមឃាត់ ឬជូនដំណឹង ប៉ុន្ដែមិនមានប្រើហិង្សាអ្វីដាក់ពួកគាត់ទេ តែពួកគាត់មិនស្ដាប់យើង។ អ៊ីចឹងយើងបានតែស្នើសុំឱ្យអាជ្ញាធរជួយអន្តរាគមន៍ ព្រោះដីក្រុមហ៊ុនមួយចំនួនធំត្រូវបានគេរំលោភយកធ្វើជាកម្មសិទ្ធិទៅហើយ»។
មន្ត្រីសម្របសម្រួលសិទ្ធិមនុស្សនៃសមាគមអាដហុក ប្រចាំខេត្តក្រចេះលោក ធីម ហ៊ន ថ្លែងកាលពីថ្ងៃទី ២៦ តុលា ថាលោកមិនទាន់បានចុះទៅសិក្សាករណីនេះបានស៊ីជម្រៅទេ ប៉ុន្ដែលោកថា ប្រសិនមានករណីដូចភាគីក្រុមហ៊ុន និងអាជ្ញាធរលើកឡើងមែន គឺពិតជាខុសច្បាប់។ លោកស្នើឱ្យអាជ្ញាធរគួរតែមានវិធានការទប់ស្កាត់ឱ្យបានសមរម្យ ដោយចៀសវាងការប្រើប្រាស់អំពើហិង្សាដាក់ពួកគាត់។
មន្ត្រីសិទ្ធិមនុស្សរូបនេះបញ្ជាក់ថា៖ «ខ្ញុំគិតថា មុនដាក់វិធានការទប់ស្កាត់ទៅលើពួកគាត់ អាជ្ញាធរគួរតែមានការសិក្សាពីដើមហេតុឱ្យបានច្បាស់លាស់សិនថា តើពលរដ្ឋជាអ្នកខិលខូចទៅរំលោភយកដីក្រុមហ៊ុន ឬក្រុមហ៊ុនខិលខូចទៅឈូសឆាយលើសដែនកំណត់ដីរបស់ខ្លួន ហើយមកប៉ះពាល់ដល់ដីប្រជាពលរដ្ឋទៀតឬយ៉ាងណា។ ដូច្នេះក្នុងនាមអាជ្ញាធរត្រូវតែព្យាយាមរកវិធានការដោះស្រាយដោយសន្ដិវិធីតាមផ្លូវច្បាប់»៕