The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ជំរុញ​ឲ្យ​អ្នក​រស់នៅ​ ប៊ុលឌិង ​បោះឆ្នោត​ជូន CPP

អាជ្ញាធរ​ជំរុញ​ឲ្យ​អ្នក​រស់នៅ​ ប៊ុលឌិង ​បោះឆ្នោត​ជូន CPP

Content image - Phnom Penh Post
អាជ្ញាធរ​ក្នុង​សង្កាត់​ទន្លេ​បាសាក់​និយាយ​ទៅ​កាន់​ប្រជាពលរដ្ឋ​នៅ​ប៊ុលឌិង​កាលពី​ម្សិលមិញ។ ហេង ជីវ័ន

អាជ្ញាធរ​ជំរុញ​ឲ្យ​អ្នក​រស់នៅ​ ប៊ុលឌិង ​បោះឆ្នោត​ជូន CPP

ភ្នំពេញៈ អាជ្ញាធរ​មូលដ្ឋាន​ក្នុង​សង្កាត់​ទន្លេបាសាក់ ខណ្ឌ​ចំការមន​កាលពី​ម្សិលមិញ​ បាន​ជំរុញ​ឲ្យ​ប្រជាពលរដ្ឋ​ដែល​រស់នៅ​អគារ​ប៊ុលឌិង​ស​បោះឆ្នោត​ជូន​គណបក្ស​ប្រជាជន​ ទើប​អាច​មាន​ដំណោះស្រាយ​ឆាប់​រហ័ស​ក្នុង​ការ​អភិវឌ្ឍ​អគារ​ប៊ុលឌិង ដែល​រដ្ឋាភិបាល​គ្រោង​ធ្វើការ​អភិវឌ្ឍ​ជាមួយ​ក្រុមហ៊ុន​ជប៉ុន ខណៈ​ដែល​លោក​ ជា សុផារ៉ា រដ្ឋមន្រ្តី​ក្រសួង​ដែនដី​នឹង​ជួប​ពិភាក្សា​ជាមួយ​អ្នក​ភូមិ​ពី​បញ្ហា​នេះ​នៅ​ថ្ងៃ​សុក្រ​នេះ។

កាលពី​ម្សិលមិញ​ អាជ្ញាធរ​មូលដ្ឋាន​បាន​រៀបចំ​វេទិកា​ភូមិ ឃុំ​មាន​សុវត្ថិភាព​ហើយ​ក្នុង​វេទិកា​នេះ​អាជ្ញាធរ​មូលដ្ឋាន​បាន​ជំរុញ​ឲ្យ​ភូមិ​បោះឆ្នោត​ជូន​គណបក្ស​ប្រជាជន​ដោយ​លើក​ឡើង​ថា​មាន​តែ​គណបក្ស​ប្រជាជន​ប៉ុណ្ណោះ ទើប​អាច​រក​ដំណោះស្រាយ​ជូន​អ្នក​រស់នៅ​ក្នុង​អគារ​ប៊ុលឌិងស​នេះ​បាន​ឆាប់​រហ័ស។

មន្រ្តី​មូលដ្ឋាន​និយាយ​ទៅ​កាន់​អ្នក​ភូមិ​ប៊ុលឌិង​ថា ដំណោះស្រាយ​ចំពោះ​អគារ​ប៊ុលឌិងស​គឺ ស្មុគស្មាញ​ និង​លំបាក​ដែល​មាន​តែ​គណបក្ស​ប្រជាជន និង ​លោក ជា សុផារ៉ា ប៉ុណ្ណោះ​ទើប​អាច​ជួយ​រក​ដំណោះស្រាយ​ធ្វើការ​អភិវឌ្ឍ​តំបន់​នេះ​បាន។ «ដូច្នេះ​សូម​បងប្អូន​ជួយ​បោះឆ្នោត​ជូន​គណបក្ស​ប្រជាជន»។

អ្នកភូមិ​ម្នាក់​ឈ្មោះ កុល សុវ៉ាន់ អាយុ ៦២ ឆ្នាំ​បាន​ឲ្យ​ដឹង​ថា​មន្រ្តី​អាជ្ញាធរ​មូលដ្ឋាន​ពិតជា​បាន​ជំរុញ​ឲ្យ​អ្នកភូមិ​បោះឆ្នោត​ជូន​គណបក្ស​ប្រជាជន​មែន​ដើម្បី​ទទួល​បាន​ដំណោះស្រាយ​បាន​លឿន។

អ្នកភូមិ​រូប​នេះ​និយាយ​ថា៖« ខ្ញុំ​មិន​បាន​ចាប់​អារម្មណ៍​រឿង​បោះឆ្នោត​ជូន CPP ឬ​អត់​នោះ​ទេ​ព្រោះ​ពលរដ្ឋ​មាន​ការ​សម្រេច​ចិត្ត​រៀងៗ​ខ្លួន ​ខ្ញុំ​ខ្វល់​ចិត្ត​តែ​រឿង​ដំណោះស្រាយ​គឺ​ខ្ញុំ​នៅ​ចង់​លក់​ផ្ទះ​ដោយ​មិន​ចង់​ចាកចេញ​ហើយ​ត្រឡប់​មក​វិញ​នោះ​ទេ ព្រោះ​ខ្លាច​មក​វិញ​មិន​មាន​ឈ្មោះ​ទទួល​បាន​ផ្ទះ​ដូច​ករណី​បឹងកក់ និង​បុរី​កីឡា​ជាដើម»។

ចំណែកឯ​អ្នកភូមិ​ម្នាក់​ទៀត​ឈ្មោះ យ៉ាន ភារុំ អាយុ ៥៣ ឆ្នាំ​បាន​និយាយ​ថា​មាន​តែ​គណបក្ស​ប្រជាជន​ទេ​ទើប​អាច​រក្សា​ដំណោះស្រាយ​រឿង​អគារ​ប៊ុលឌិង។ អ្នកភូមិ​រូប​នោះ​និយាយ​ថា៖ «ខ្ញុំ​នៅ​ជាមួយ​គាត់​សុខសប្បាយ អ៊ីចឹង​នៅ​តែ​គាំទ្រ​គាត់​អ៊ីចឹង»។

ចំណែកឯ​អ្នកភូមិ​ម្នាក់​ទៀត​ឈ្មោះ សោម ស៊ីថា អាយុ ៥៦ ឆ្នាំ​បាន​និយាយ​ថា បើ​គណបក្ស​ប្រជាជន​កាន់​រាល់​ឯកសារ​អស់​ហើយ អ៊ីចឹង​ដំណោះស្រាយ​អគារ​គឺ​លើ​គណបក្ស​ប្រជាជន​ហើយ។ អ្នកភូមិ​រូប​នេះ​ថា៖ «មន្រ្តី​បក្ស​ប្រជាជន​អ្នក​កាន់​ទៅ​ហើយ​ចុះ​រាល់​ឯកសារ​អភិវឌ្ឍន៍​ទាំង​អស់​គាត់​ដឹង»។

លោក ញែម សុវណ្ណ ប្រធាន​ភូមិ ២ នៃ​អគារ​ប៊ុលឌិង បាន​ថ្លែង​ថា​អាជ្ញាធរ​មូលដ្ឋាន​ពិត​ជា​បាន​និយាយ​សូម​ឲ្យ​ប្រជាពលរដ្ឋ​នៅ​អគារ​ប៊ុលឌិង​ជួយ​បោះឆ្នោត​ជូន​គណបក្ស​ប្រជាជន​មែន។ «ខ្ញុំ​គិត​ថា​នេះ​ជា​រឿង​ធម្មតា គ្មាន​អ្វី​ចម្លែក​ទេ»។

យោង​តាម Facebook របស់​រដ្ឋមន្រ្តី​ក្រសួង​ដែនដី​លោក ជា សុផារ៉ា បាន​ប្រកាស​ថា​នៅ​វេលា​ម៉ោង ៨:៣០ នាទី​ព្រឹក​នេះ​លោក​នឹង​ប្រជុំ​ជាមួយ​ប្រជាពលរដ្ឋ​ដែល​រស់នៅ​ក្នុង​អគារ​ប៊ុលឌិងស ដើម្បី​រក​ការ​ឯកភាព​គ្នា​ក្នុង​ការ​អភិវឌ្ឍ។ «សូម​បងប្អូន​ចូលរួម និង​លើក​ឡើង​នូវ​បំណង​ប្រាថ្នា​របស់​ខ្លួន»។

លោក ម៉ន ផល្លា សមាជិក​ក្រុម​ប្រឹក្សា​គណបក្ស​សង្រ្គោះជាតិ​សម្រាប់​រាជធានី​ភ្នំពេញ​បាន​លើក​ឡើង​ថា​ការ​ដែល​អាជ្ញាធរ​មូលដ្ឋាន​យក​ម៉ោង​ធ្វើការ​របស់​រដ្ឋ​ទៅ​ធ្វើការ​ឃោសនា​ជំរុញ​ឲ្យ​ប្រជាពលរដ្ឋ​បោះឆ្នោត​ឲ្យ​គណបក្ស​ខ្លួន​នៅ​មុន​ពេល​បោះឆ្នោត​គឺជា​រឿង​អយុត្តិធម៌​សម្រាប់​គណបក្ស​ផ្សេងៗ។

លោក​បញ្ជាក់​ថា​គណបក្ស​ណា​ក៏​អាច​ដោះស្រាយ​បញ្ហា​ជូន​ប្រជាពលរដ្ឋ​បាន​ដែរ ឲ្យ​តែ​គណបក្ស​នោះ​ជាប់​ឆ្នោត​មិនមែន​មាន​តែ​គណបក្ស​ប្រជាជន​នោះ​ទេ។

លោក​ថា៖ «មិនមែន​ការ​អភិវឌ្ឍ​ប្រទេស ឬ​អគារ​ប៊ុលឌិង​អាស្រ័យ​លើ​បក្ស​នោះ​ទេ​ឲ្យ​តែ​បក្ស​ណា​ជាប់​គឺ​បក្ស​នោះ​ត្រូវ​តែ​មាន​កាតព្វកិច្ច​ដោះស្រាយ​ក្នុង​នាម​អាជ្ញាធរ​រដ្ឋ វា​មិនមែន​ទាល់​តែ​បក្ស​ខ្លួន​បាន​ដោះស្រាយ​ចេញ​នោះ​ទេ»។

ចំណែក​លោក សឿង សារ៉ាន់ ប្រធាន​ផ្នែក​តស៊ូ​មតិ​នៃ​សមាគម​ធាង​ត្នោត​បាន​ថ្លែង​ថា​ការ​ជំរុញ​ឲ្យ​ប្រជាពលរដ្ឋ​បោះឆ្នោត​ឲ្យ​ជា​ថ្នូរ​នឹង​ការ​ដោះស្រាយ​បញ្ហា​ផ្ទះ​សំបែង​របស់​អាជ្ញាធរ​មូលដ្ឋាន​នេះ​វា​ហាក់បី​ដូចជា​ការ​គំរាម​ដល់​ប្រជាពលរដ្ឋ​ថា បើ​មិន​បោះឆ្នោត​ជូន​គណបក្ស​ប្រជាជន​ទេ​បញ្ហា​នឹង​មិន​ត្រូវ​បាន​ដោះស្រាយ​ឡើយ។

លោក​ថា៖ «មន្រ្តី​ភូមិ​មិន​មាន​ឥទ្ធិពល​ក្នុង​ការ​រក​ដំណោះស្រាយ​ក្រៅពី​ក្រសួង​ស្ថាប័ន​ជំនាញ​នោះ​ទេ ប៉ុន្តែ​ពួកគេ​គួរ​តែ​ពន្យល់​ប្រជាពលរដ្ឋ​ឲ្យ​រិះរក​មធ្យោបាយ​ណា​មួយ​ដើម្បី​ជំរុញ​ធ្វើ​ឲ្យ​មាន​ដំណោះស្រាយ​ដែល​ផ្តល់​ផលប្រយោជន៍​ជូន​ប្រជាពលរដ្ឋ​ជា​ជាង​រក​ឱកាស​ដើម្បី​កេង​ចំណេញ​សន្លឹក​ឆ្នោត»។

ក្រសួង​រៀបចំ​ដែនដី នគរូបនីយកម្ម និង​សំណង់​គ្រោង​នឹង​ធ្វើការ​អវិវឌ្ឍ​អគារ​ប៊ុលឌិង​ដែល​មាន​អាយុកាល​ចំណាស់​ជាមួយ​ក្រុមហ៊ុន​ជប៉ុន Arakawa ក្នុង​តម្លៃ ៨០ លាន​ដុល្លារ​តែ​រហូត​មក​ទល់​ពេល​នេះ​មិន​ទាន់​មាន​ដំណោះស្រាយ​យ៉ាង​ណា​នោះ​ទេ​ ខណៈ​ក្រសួង​ផ្តល់​ជម្រើស​ពីរ​ដល់​ប្រជាពលរដ្ឋ​ចំនួន​ពីរ​ក្នុង​នោះ​ទី ១ គឺ​ត្រូវ​ចាកចេញ​បណ្តោះអាសន្ន និង​ត្រឡប់​មក​វិញ​បាន​ទទួល​ផ្ទះ​សង់​ថ្មី​ក្នុង​ទីតាំង​ដដែល និង​ជម្រើស​ទី​ពីរ​គឺ​លក់ និង​ចាកចេញ៕

អត្ថបទគួរចាប់អារម្មណ៍