.jpg)
ក្រុមមន្ត្រីចុះពិនិត្យសំណង់សង់លើដីភ្នំដោះក្រមុំ កាលពីថ្ងៃទី ១ ធ្នូ។ រូបថត សហការី
មណ្ឌលគិរីៈ អាជ្ញាធរខេត្តមណ្ឌលគិរីដាក់ឱសានវាទដល់អ្នកដែលបានសាងសង់ផ្ទះ និងសំណង់នានា ដែលរំលោភយកដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំស្ថិតនៅ ឃុំសុខដុម ក្រុងសែនមនោរម្យ ដោយអាជ្ញាធរតម្រូវឱ្យរុះរើចេញជាបន្ទាន់ពីថ្ងៃទី ១ ដល់ថ្ងៃទី ៦ ធ្នូ ជាកំហិត ខណៈមន្ត្រីជំនាញក៏ព្រមានចាត់វិធានការតឹងរ៉ឹងតាមនីតិវិធីច្បាប់ បើជនទាំងនោះមិនព្រមអនុវត្ត។
លោក សី ទូច ប្រធានមន្ទីរវប្បធម៌ខេត្តមណ្ឌលគិរី ឱ្យដឹងពីម្សិលមិញថា បន្ទាប់ពីមានការចង្អុលបង្ហាញ និងណែនាំដោយផ្ទាល់ពីលោក ស្វាយ សំអ៊ាង អភិបាលខេត្តមណ្ឌលគិរី ក្រុមការងារចម្រុះដឹកនាំដោយលោកស្រី ជុំ ណារី នាយករងរដ្ឋបាលខេត្ត និងមានការចូលរួមពីរដ្ឋបាលក្រុងសែនមនោរម្យ មន្ទីរជំនាញ អង្គភាពពាក់ព័ន្ធបានចុះណែនាំ និងដាក់ឱសានវាទដល់អ្នកដែលសាងសង់ផ្ទះ និងសំណង់ចំនួន ១២ ខ្នងរំលោភយកដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ។
បើតាមលោក សី ទូច ក្នុងប្រតិបត្តិការនេះអាជ្ញាធរបានដកបង្គោលរបងមួយចំនួនដែលក្រុមជនល្មើសបានបោះរំលោភយកដីភ្នំដោះក្រមុំ។ គណៈកម្មការចម្រុះក៏បានតម្រូវឱ្យរុះរើផ្ទះ ក៏ដូចជាសំណង់រឹងមួយចំនួនចេញជាបន្ទាន់ដោយកំណត់ត្រឹមថ្ងៃទី៦ ធ្នូ ជាកំហិត។ ក្នុងករណីជនទាំងនោះមិនព្រមអនុវត្ត ក្រុមការងារនឹងចុះមកអនុវត្តទៅតាមនីតិវិធីច្បាប់យ៉ាងម៉ឺងម៉ាត់បំផុត។
លោក សី ទូច ថ្លែងថា៖ «ដើម្បីការពារសម្បត្តិបេតិកភណ្ឌវប្បធម៌ជាតិ ក្រុមការងារយើងមិនខ្លាចនឿយហត់ និងការប្រឈមជាមួយជនល្មើសឡើយ។ ខ្ញុំសូមអរគុណថ្នាក់ដឹកនាំទាំងអស់ដែលបានគាំទ្រ និងលើកទឹកចិត្តក៏ដូចជាអរគុណស្ថាប័នពាក់ព័ន្ធ និងប្រជាសហគមន៍ដែលបានសហការ និងចូលរួម»។
លោកប្រធានមន្ទីរបន្តថា៖ «យើងនឹងបន្តធ្វើកិច្ចការងារនេះទៀតរហូតទទួលបានភ័ស្តុតាងគ្រប់គ្រាន់ ដើម្បីដាក់ពាក្យបណ្ដឹងទៅតុលាការ»។
មេឃុំ សុខដុម លោក ពៅ សុផាត ថ្លែងពីម្សិលមិញថា អាជ្ញាធរខេត្ត និងមន្ត្រីជំនាញបានចុះមកធ្វើកិច្ចការនេះហើយដោយបានដាក់ឱសានវាទទៅក្រុមអ្នកដែលសាងសង់ផ្ទះ និងរោងសរុបចំនួន ៤ ទីតាំងដែលរំលោភយកដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ។ ប្រសិនពួកគាត់មិនព្រមរុះរើតាមឱសានវាទរបស់មន្ត្រីជំនាញទេ អាជ្ញាធរនឹងចុះរុះរើ និងចាត់វិធានការតាមច្បាប់។
លោកថា៖ «យើងបានបង្ក្រាបជាច្រើនលើកមកហើយ ប៉ុន្ដែពួកគាត់នៅតែនាំគ្នាមករំលោភយកដីធ្លីនៅតំបន់នេះទៀត។ យើងបានធ្វើការផ្សព្វផ្សាយជាច្រើនលើកដែរ គឺកុំឱ្យពួកគាត់ទៅចាប់យកដីនៅតំបន់គេហាមឃាត់នេះ ព្រោះដីគេអភិរក្ស។ អ្នកដែលរំលោភយកដីនេះ គឺមិនមែនពលរដ្ឋនៅក្នុងមូលដ្ឋានហ្នឹងទេ គឺគាត់ចំណាកស្រុកមកពីតំបន់ផ្សេង»។
អ្នកស្រី ភ្លឹក ភីរម្យ តំណាងសហគមន៍ជនជាតិដើមភាគតិចព្នងនៅឃុំសុខដុមពីម្សិលមិញសម្តែងការខកចិត្តចំពោះអ្នកគ្រប់គ្រងដីតំបន់នេះ ដែលអ្នកស្រីថា អសមត្ថភាព បណ្តែតបណ្តោយឱ្យមានការទន្ទ្រានយកដីភ្នំដោះក្រមុំម្ដងហើយម្ដងទៀតយ៉ាងអនាធិបតេយ្យ។
អ្នកស្រីថាកាលពីឆ្នាំ ២០០៤ ពេលដែលភ្នំដោះក្រមុំត្រូវបានស្នើសុំដាក់បញ្ចូលជាតំបន់មជ្ឈមណ្ឌលវប្បធម៌ជនជាតិ គឺផ្ទៃដីនេះមានទំហំ ១០១ ហិកតា។ ប៉ុន្ដែដោយការគ្រប់គ្រងចន្លោះប្រហោងធ្វើឱ្យទំហំផ្ទៃដីភ្នំនេះមានគេចូលកាន់កាប់ជាបន្តបន្ទាប់នៅសល់ទំហំប្រមាណ ៨០ ហិកតាប៉ុណ្ណោះ។
អ្នកស្រី ភីរម្យ និយាយថា៖ «ខ្ញុំសូមជំរុញឱ្យអាជ្ញាធរដាក់វិធានការជាក់លាក់ណាមួយ ដើម្បីកុំឱ្យការបង្ក្រាបករណីដដែលអ៊ីចឹង។ សព្វថ្ងៃនេះ យើងអត់បានធ្វើកិច្ចការងារអ្វីផ្សេងទេ គឺម្នាក់ៗរវល់តែមកការពារដីភ្នំហ្នឹង»៕
