.jpg)
ផ្លូវជាតិលេខ ៦៣ ម្ដុំផ្សារក្រោមនឹងត្រូវពង្រីក។ រូបថត សហការី
សៀមរាប: អាជ្ញាធរក្រុងសៀមរាបបានប្រាប់ឲ្យពលរដ្ឋរស់នៅអមផ្លូវជាតិលេខ ៦៣ ម្ដុំផ្សារក្រោម សង្កាត់សៀមរាប ក្រុងសៀមរាបត្រូវធ្វើការរុះរើសំណង់តូប សំយាប ខឿន ខ្សាច់ ថ្ម ការ៉ូឡា ឥដ្ឋ និងបណ្តាញខ្សែភ្លើងដែលធ្លាក់រាយប៉ាយតាមផ្លូវសាធារណៈឲ្យអស់ក្នុងរយៈពេល ១៥ ថ្ងៃគិតចាប់ពីថ្ងៃទី ១៥ ដល់ថ្ងៃទី ២៩ ខែមេសា ជាកំហិត ដើម្បីពង្រីកផ្លូវរៀបចំសណ្ដាប់ធ្នាប់ និងរបៀបរៀបរយ។
តាមសេចក្ដីជូនដំណឹងរបស់រដ្ឋបាលក្រុងសៀមរាបចុះថ្ងៃទី ១៥ ខែមេសាដែលភ្នំពេញប៉ុស្ដិ៍ទទួលបាន បានឲ្យដឹងថា រដ្ឋបាលខេត្តសៀមរាបនឹងបន្តធ្វើការជួសជុល កែលម្អផ្លូវផ្សារក្រោមចាប់ពីចំណុចបំបែកផ្លូវបៀលប្រាយដល់ក្រវាត់ក្រុងសៀមរាប។ ដោយឡែកចំពោះនៅមុខផ្សារក្រោមកែលម្អចំណតរថយន្តធុនតូច និងសួន ព្រមទាំងគម្រោងសាងសង់ផ្លូវក្រាលកៅស៊ូចាប់ពីផ្លូវក្រវាត់ក្រុងដល់កែងច្រមុះជ្រូកផ្លូវជាតិលេខ ៦៣ ទៅភ្នំក្រោមកាត់តាមភូមិត្រៀក និងភូមិក្រសាំងរលើង សង្កាត់សៀមរាប។
លិខិតបន្តថា ម្ចាស់ក្រុមហ៊ុន សហគ្រាស អាជីវកម្មដ្ឋាន ផ្សារ គេហដ្ឋាន គ្រឹះស្ថានឯកជន និងប្រជាពលរដ្ឋដែលមានការពាក់ព័ន្ធទាំងអស់ត្រូវធ្វើការរុះរើសំណង់តូប សំយាប ខឿន ខ្សាច់ ថ្ម ការ៉ូឡា ឥដ្ឋ បណ្តាញខ្សែភ្លើងដែលធ្លាក់រាយប៉ាយ សួនច្បារ សម្ភារ និងសំណង់ការដ្ឋានផ្សេងៗទាំងអស់ព្រមទាំងបញ្ឈប់ការលក់ដូរនៅលើសួនច្បារ និងផ្លូវសាធារណៈឲ្យបានអស់ក្នុងរយៈពេល ១៥ ថ្ងៃគិតចាប់ពីថ្ងៃចុះហត្ថលេខានៅថ្ងៃទី ១៥ ខែមេសា។ ក្នុងករណីមិនគោរព និងអនុវត្តតាមខ្លឹមសារនៃសេចក្តីនេះរដ្ឋបាលក្រុងសៀមរាបនឹងចាត់វិធានការរដ្ឋបាលធ្វើការរុះរើដកហូតសម្ភារទាំងនោះចេញដោយពុំទទួលខុសត្រូវ ឬបាត់បង់នូវទ្រព្យសម្បត្តិរបស់បងប្អូនឡើយ។
លិខិតដដែលនេះបានឲ្យដឹងថា៖ «រដ្ឋបាលក្រុងសង្ឃឹម និងជឿជាក់យ៉ាងមុតមាំថាលោក លោកស្រី និងបងប្អូនប្រជាពលរដ្ឋនឹងគោរពតាមខ្លឹមសារនៃសេចក្តីជូនដំណឹងប្រកបដោយប្រសិទ្ធភាពខ្ពស់»។
លោក នួន ពុទ្ធារ៉ា អភិបាលក្រុងសៀមរាបបានថ្លែងថា ក្នុងអំឡុងពេលនេះ ក្រុមហ៊ុនសាងសង់ផ្លូវ និងអាជ្ញាធរជំនាញបានត្រៀមខ្លួនរួចរាល់ហើយ ដើម្បីធ្វើការវាស់វែង និងសិក្សាការស្ថាបនាផ្លូវ ១ ខ្សែទំហំ ២២ ម៉ែត្រ (ទទឹង) នេះ។ ពលរដ្ឋមិនមានការជំទាស់អ្វីទេ ព្រោះវាជាការបម្រើឲ្យផលប្រយោជន៍រួមសម្រាប់ប្រើប្រាស់ជាសាធារណៈនៅក្នុងខេត្តសៀមរាបទាំងមូល។
លោកបញ្ជាក់ថា៖ «ខ្ញុំមិនទាន់ដឹងថា គម្រោងផ្លូវនេះធ្វើឲ្យប៉ះពាល់ប្រជាពលរដ្ឋប៉ុន្មានគ្រួសារទេ ដោយមន្ត្រីជំនាញកំពុងធ្វើការងារវាស់វែង បើវាស់វែងរួចរាល់ យើងអាចដឹងពីចំនួនពលរដ្ឋប៉ះពាល់ពីគម្រោងនេះហើយ ប៉ុន្ដែខ្ញុំគិតថា វាមិនប៉ះពាល់អ្វីធ្ងន់ធ្ងរទេ បើប៉ះពាល់គឺប៉ះតែតូបលក់ដូរ របងផ្ទះ និងអីវ៉ាន់តិចតួចដែលពួកគាត់ដាក់នៅខាងមុខផ្ទះប៉ុណ្ណោះ»។
លោកបន្តថា ចំពោះផលប៉ះពាល់ពលរដ្ឋនេះអាជ្ញាធរនឹងធ្វើការយកចិត្តទុកដាក់ដោះស្រាយជូនពួកគាត់ឲ្យបានល្អ។ ជាពិសេសតំបន់ស្មុគស្មាញចាប់ពីកែងច្រមុះជ្រូករហូតដល់ផ្សារក្រោមអាចនឹងពិបាកក្នុងការដោះស្រាយ ព្រោះទីនោះជាតំបន់ទីប្រជុំជន និងជាកន្លែងលក់ដូររបស់អាជីវករ ប៉ុន្ដែយ៉ាងណាអាជ្ញាធរជំនាញនឹងព្យាយាមដោះស្រាយឲ្យបានល្អបំផុត។
លោក ឈុន ឡេង ប្រជាពលរដ្ឋម្នាក់ក្នុងចំណោមអ្នកប៉ះពាល់ផ្សេងទៀតរស់នៅម្ដុំផ្សារក្រោមបានថ្លែងថា ផ្ទះរបស់លោកក៏រងផលប៉ះពាល់ពីការពង្រីកផ្លូវនេះដែរ ដោយត្រូវរុះរើសំយាបខាងមុខផ្ទះចំនួន ៣ ម៉ែត្រចូលមកក្នុងផ្ទះ។ ការពង្រីកផ្លូវនេះពិតជាធ្វើឲ្យប៉ះពាល់ផ្ទះប្រជាពលរដ្ឋជាច្រើនខ្នងផ្ទះ ខណៈពលរដ្ឋមួយចំនួនបានសាងសង់របងថ្មខ្ពស់ៗ និងអ្នកខ្លះបានប៉ះពាល់ផ្ទះតែម្ដង។ លោក ឡេង បានបន្តថា លោកមិនមានអ្វីតវ៉ាជាមួយអាជ្ញាធរទេ ដោយគ្រាន់តែស្នើអាជ្ញាធរអនុវត្តច្បាប់មានតម្លាភាព និងយុត្តិធម៌តាមច្បាប់ ដោយឥតលម្អៀងចំពោះអ្នកមានលុយ ឬអ្នកមានអំណាច។
លោកថា៖ «ខ្ញុំអត់មានអ្វីតវ៉ាទេ ចាំមើលតែពលរដ្ឋយើងដទៃទៀត គាត់គិតយ៉ាងណា ហើយអាជ្ញាធរអនុវត្តបែបណា? ព្រោះផ្ទះខ្ញុំនេះ ប៉ះពាល់សំយាបខាងមុខចំនួន ៣ ម៉ែត្រដែរ។ យើងសោកស្ដាយដែរ ព្រោះសំយាបហ្នឹង សម្រាប់ដាក់អីវ៉ាន់លក់ដូរទំនិញតិចតួចនៅខាងមុខផ្ទះ»៕
