The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ថៃ​ដោះលែង​ពលរដ្ឋ​ខ្មែរ​ ២៥ ​នាក់​ពី​​ពន្ធនាគារ​រឿង​កាប់ឈើ

អាជ្ញាធរ​ថៃ​ដោះលែង​ពលរដ្ឋ​ខ្មែរ​ ២៥ ​នាក់​ពី​​ពន្ធនាគារ​រឿង​កាប់ឈើ

ជនរងគ្រោះ​ដែល​ទាហាន​ថៃ​បាញ់​ឲ្យ​របួស​កន្លងមក​​។
ជនរងគ្រោះ​ដែល​ទាហាន​ថៃ​បាញ់​ឲ្យ​របួស​កន្លងមក​​។ ហេង ជីវ័ន

អាជ្ញាធរ​ថៃ​ដោះលែង​ពលរដ្ឋ​ខ្មែរ​ ២៥ ​នាក់​ពី​​ពន្ធនាគារ​រឿង​កាប់ឈើ

ឧត្តរមានជ័យៈ ពលរដ្ឋ​ខ្មែរ​សរុប ២៥ នាក់ ដែល​សុទ្ធសឹង​ជា​បុរស ត្រូវ​បាន​អាជ្ញាធរ​ថៃ​ដោះលែង និង​បញ្ជូន​ត្រឡប់​មក​កម្ពុជា​វិញ​ជា​បន្តបន្ទាប់​ចំនួន ៥ លើក ក្នុង​ខែ​មេសា​នេះ ក្រោយពី​​ជាប់​ពន្ធនាគារ​អស់​ពេល​ជាច្រើន​ខែ​ឆ្នាំ​ក្នុង​ប្រទេស​ថៃ ពាក់ព័ន្ធ​នឹង​ការកាប់ឈើ និង​ឆ្លងដែន​ខុសច្បាប់។

ប្រធាន​ក្រុម​ការងារ​ទំនាក់ទំនង​​ព្រំដែន​កម្ពុជា-ថៃ ប្រចាំ​ច្រក​​អន្តរជាតិ ជាំសាង៉ាំ លោក តូច រ៉ា បាន​ឲ្យ​ដឹងថា តាម​ការសាកសួរ អ្នក​ទាំង​ ២៥ នាក់​នេះ មួយ​ចំនួន​បាន​​ជាប់​ឃុំ​ក្នុង​ពន្ធនាគារ​ស្រុក​ខាន់តាឡាក់ ខេត្ត​ស៊ីសាកេត និង​ខ្លះ​ទៀត​នៅ​ពន្ធនាគារ ខេត្ត​អ៊ូប៊ុន ប្រទេស​ថៃ។ អ្នក​ទាំងនេះ ត្រូវ​បាន​អាជ្ញាធរ​​ថៃ បញ្ជូន​មក​ប្រគល់​ឲ្យ​អាជ្ញាធរ​កម្ពុជា​វិញ​តាម​ច្រកទ្វារ​អន្តរជាតិ​ជាំសាង៉ាំ ក្នុង​ភូមិ​ជើងភ្នំ ឃុំ​ត្រពាំងប្រីយ៍ ស្រុក​អន្លង់វែង​ខេត្ត​ឧត្តរមានជ័យ តាម​កាលបរិច្ឆេទ​ខុសៗ​គ្នា។

បើ​តាម​លោក តូច រ៉ា ក្នុង​ចំណោម​ ២៥ នាក់​នោះ ៥ នាក់ ត្រូវ​បាន​បញ្ជូន​មក​នៅ​ថ្ងៃ​ទី ១៩ មេសា ១០ នាក់​ថ្ងៃ​ទី ១៨ មេសា ២ នាក់​ថ្ងៃ​ទី ១២ មេសា ៤ នាក់ ថ្ងៃ​ទី ៩ មេសា និង​ ៤ នាក់​ទៀត ថ្ងៃ​ទី ៦ មេសា​។

លោក​ថា៖ «ពួកគេ​ទាំងនេះ មាន​ស្រុកកំណើត​នៅ​ខេត្ត​ខុសៗ​គ្នា។ ក្រោយពី​មន្ត្រី​យើង​បាន​ធ្វើ​កំណត់ហេតុ និង​អប់រំ​ហើយ យើង​ក៏បាន​បញ្ជូន​ត្រឡប់​ទៅ​ស្រុក​វិញ​រៀងៗ​ខ្លួន»​។ លោក​ថា៖ «មិន​ថា​ខែ​ណា​ក៏​មាន​ការបញ្ជូន​ត្រឡប់​មក​ដែរ ពលរដ្ឋ​សុទ្ធតែ​បាន​ឮ និង​ដឹង​ពី​រឿង​​គ្រោះថ្នាក់​ចំពោះ​ការឆ្លងដែន​កាប់ឈើ​ខុសច្បាប់​នេះ តែ​ពួកគាត់​នៅតែ​ទៅ ព្រោះ​ចង់​បាន​ប្រាក់​ច្រើន។ ពលរដ្ឋ​ដែល​បញ្ចូន​មក​មាន​ជា​ហូរហែ ខែ​ខ្លះ ៥ ទៅ ៦ នាក់ តែ​ខែ​នេះ​មាន​ច្រើន»​។

តាមរយៈ​ការសាកសួរ​ផ្ទាល់​មាត់ ក្នុង​កំណត់ហេតុ​របស់​សមត្ថកិច្ច បុរស​ម្នាក់​ឈ្មោះ ជា ជឿន អាយុ ៤៦ ឆ្នាំ មាន​ស្រុកកំណើត​នៅ​ខេត្ត​កំពង់ធំ បាន​រៀបរាប់​ថា ដំបូង​ឡើយ ​ដោយសារ​​តែ​មាន​ក្រុម​ឈ្មួញ​បាន​ទៅ​តាម​បណ្តា​ខេត្ត-ក្រុង​នានា ដើរ​បំផុស​ឲ្យ​ប្រជាពលរដ្ឋ​ទៅ​កាប់ឈើ​គ្រញូង​ឲ្យ​ពួក​ខ្លួន ដើម្បី​ជា​ការទិញ​លក់​តម្លៃ​ខ្ពស់​ក្នុង​មួយ​ម៉ែត្រ​គុប។

លោក ជា ជឿន​ថា៖ «ក្រុម​ឈ្មួញ​ទាំងនោះ បាន​អះអាង​ថា រឿង​ស្បៀង គ្រឿង​ឧបភោគ ​បរិភោគ ពួកគេ​ជា​អ្នកទិញ​ឲ្យ យើង​មិន​ពិបាក​​ចំណាយ​លុយ​​ទេ ឲ្យ​តែ​បាន​ឈើ​​គ្រញូង​យក​មក​លក់​ឲ្យ​គេ ហើយ​ដាច់ខាត​​មិន​អាច​លក់​ទៅ​ឲ្យ​អ្នកផ្សេងៗ​បាន​នោះ​ទេ ហើយ​ឈ្នួញ​ទាំងនោះ បាន​ប្រាប់​ថា នៅ​តាម​ដងផ្លូវ គឺ​គេ​បាន​និយាយ​ជាមួយ​ក្រុម​ទាហាន​ថៃ និង​ទាហាន​កម្ពុជា​រួចរាល់ ដោយ​មិន​បាច់​ភ័យខ្លាច​ទេ»។

ក្នុង​កំណត់ហេតុ​ដដែល​នោះ លោក ជា ជឿន បាន​បន្ត​ថា ក្រោយ​មក​ក៏​មាន​ប្រជាពលរដ្ឋ​ជាច្រើន​ក្រុម​ដែល​រួមដំណើរ​ជាមួយ​លោក បាន​ឡើង​ភ្នំ​ដងរែក​ចូល​តាម​ច្រក​អូរខ្សាច់ ស្ថិត​ក្នុង​ឃុំ​​អូរស្វាយ ស្រុក​ត្រពាំង​ប្រាសាទ ឆ្លងដែន​ចូល​ទៅក្នុង​ទឹកដី​ថៃ​ជាច្រើន​គីឡូម៉ែត្រ រុករក​កាប់ឈើ​គ្រញួង មាន​ប្រជាពលរដ្ឋ​ខ្លះ​កំពុង​តែ​កាប់ ខ្លះ​កំពុង​តែ​ជញ្ជូន​​ឈើ​គ្រញូង ស្រាប់តែ​នៅ​វេលា​ម៉ោង​ ៤ រសៀល ថ្ងៃ​ទី​ ១៨ ​សីហា ២០១៣ នោះ ត្រូវ​ក្រុម​​ទាហាន​​ឈុត​ខ្មៅ​ថៃ បាន​បាញ់រះ​ជាច្រើន​គ្រាប់។

លោក ថា៖ «ខ្ញុំ​មិន​បាន​ដឹង​ថា មាន​ប្រជាពលរដ្ឋ​ផ្សេងៗ​ទៀត​រងរបួស ឬ​មាន​អ្នក​ស្លាប់​ប៉ុន្មាន​នាក់​ទេ​​ព្រោះ​ខ្ញុំ ត្រូវ​បាន​ទាហាន​ថៃ ចាប់​នាំ​យក​ទៅ​ដាក់​នៅក្នុង​ពន្ធនាគារ ស្រុក​ខាន់តាឡាក់ ខេត្ត​ស៊ីសាកេត រហូត​ដោះលែង គឺ​ថ្ងៃ​ទី​ ១៨ ខែ​មេសា ឆ្នាំ ២០១៥​»​។

ក្រៅពី​ច្រក​អន្តរជាតិ​ជាំសាង៉ាំ​នេះ ក៏​មាន​ពលរដ្ឋ​ខ្មែរ​ជាច្រើន​នាក់​ទៀត ត្រូវ​បាន​បញ្ជូន​ត្រឡប់​មក​​កម្ពុជា​វិញ តាម​ច្រក​ព្រំដែន និង​​ច្រក​របៀង​ផ្សេងៗ​ទៀត បន្ទាប់ពី​ជាប់​ឃុំ​ខ្លួន​ក្នុង​ពន្ធនាគារ​​នៅ​ប្រទេស​ថៃ អស់​ជាច្រើន​ខែ​ឆ្នាំ ហើយ​មាន​ករណី​នេះ​ជាច្រើន​ទៀត ពលរដ្ឋ​ខ្មែរ​ក៏​ត្រូវ​បាន​ទាហាន​ថៃ​បាញ់​ស្លាប់​ភ្លាមៗ​ផង​ដែរ។

ជាក់ស្តែង កាលពី​ថ្ងៃ​ទី ៥ ខែ​កុម្ភៈ ពលរដ្ឋ​ខ្មែរ​ ៣ ​នាក់​ត្រូវ​បាន​ទាហាន​ថៃ​បាញ់​ស្លាប់ និង​ម្នាក់​របួសធ្ងន់ ខណៈ​លួច​ឆ្លងដែន​ខុសច្បាប់​ចូល​ទៅក្នុង​ទឹកដី​ថៃ​ដើម្បី​កាប់ឈើ​គ្រញូង​លក់ ហើយ​ករណី​នេះ ក្រសួង​ការបរទេស​កម្ពុជា ក៏​បាន​ធ្វើ​​កំណត់​ការទូត​ស្នើ​ទៅ​ភាគី​ថៃ ផ្តន្ទាទោស​ទាហាន​ថៃ​ផង​ដែរ ។

តាមរបាយការណ៍​ទិសដៅ​ការងារ​របស់​ក្រសួង​មហាផ្ទៃ ចេញផ្សាយ​កាលពី​ថ្ងៃ​ទី ២៣ ខែ​កុម្ភៈ ឆ្នាំ ២០១៥ បាន​ឲ្យ​ដឹង​ថា ប្រជាពលរដ្ឋ​ខ្មែរ នៅតែ​បន្ត​លួច​ឆ្លងដែន​ចូល​ក្នុង​ទឹកដី​ថៃ ដោយ​ខុសច្បាប់ និង​ត្រូវ​បាន​ទាហាន​ថៃ​បាញ់​សម្លាប់​សរុប ៩ ​នាក់ រងរបួស ១៦ នាក់ រត់​រួច​មក​វិញ ២៨ នាក់ ថៃ​ចាប់​បាន ១៩ នាក់ និង​បញ្ជូន​ឲ្យ​មក​កម្ពុជា​វិញ​ចំនួន ៣ ២៨៣ នាក់ ក្នុង​ឆ្នាំ​ ២០១៤។

ចំនួន​នេះ មាន​ការធ្លាក់ចុះ បើ​ធៀប​ទៅ​នឹង​ឆ្នាំ ២០១៣ ដែល​ថៃ​បាន​បាញ់​សម្លាប់​ពលរដ្ឋ​ខ្មែរ​រហូត​ដល់​ទៅ​ ៤៧ ​នាក់៕

អត្ថបទគួរចាប់អារម្មណ៍