ភ្នំពេញ: អាជ្ញាធរខណ្ឌចំការមនពីម្សិលមិញបានរារាំងក្រុមយុវជនជាង ២០ នាក់ និងព្រះសង្ឃប្រមាណជាជិត ១០ អង្គ ដែលមកជួបជុំគ្នាប្រារព្ធខួប ៤ ឆ្នាំ នៃការស្លាប់លោក កែម ឡី នៅបរិវេណស្ថានីយប្រេងឥន្ធនៈកាល់តិចនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ខណៈអាជ្ញាធរហៅបុរសម្នាក់ដែលពាក់អាវមានរូបលោក កែម ឡី ទៅសាកសួរ ប៉ុន្ដែបានអនុញ្ញាតឲ្យត្រឡប់មកផ្ទះវិញ។
បុរសម្នាក់ឈ្មោះ ខាន់ ចាន់ថន វ័យប្រមាណ ៣០ ឆ្នាំ ត្រូវបានអាជ្ញាធរខណ្ឌចំការមនហៅទៅសួរនាំ ខណៈបុរសនោះបានជិះកង់ដោយពាក់អាវមានរូបលោក កែម ឡី ចូលទៅបរិវេណស្ថានីយប្រេងឥន្ធនៈកាល់តិច ស្តុបបូកគោ នៅព្រឹកថ្ងៃទី ៨ ខែកក្កដា ដែលជាកន្លែងឃាតករបាញ់សម្លាប់លោក កែម ឡី កាលពី ៤ ឆ្នាំមុន។
លោក ហុង ចាន់ថេង នាយប៉ុស្តិ៍នគរបាលរដ្ឋបាលសង្កាត់បឹងត្របែក ខណ្ឌចំការមនបានថ្លែងពីម្សិលមិញថា យុវជន និងព្រះសង្ឃបានចាកចេញពីបរិវេណស្ថានីយប្រេងឥន្ធនៈកាល់តិច ស្តុបបូកគោអស់ហើយ ក្រោយពីមានការណែនាំ និងសម្របសម្រួលពីអាជ្ញាធរមូលដ្ឋាន។ ម្យ៉ាងទៀតបរិវេណនេះ ត្រូវបានរដ្ឋបាលខណ្ឌចំការមនជូនដំណឹងពីការហាមឃាត់ប្រារព្ធពិធីនេះ។
លោកបន្តថា ក្នុងអំឡុងពេលនោះអាជ្ញាធរបានហៅបុរសម្នាក់ដែលពាក់អាវមានរូបលោក កែម ឡី ចូលបរិវេណស្ថានីយប្រេងឥន្ធនៈកាល់តិច ប៉ុន្ដែត្រូវបានអនុញ្ញាតឲ្យគាត់ត្រឡប់ទៅផ្ទះវិញហើយ ក្រោយពេលហៅសាកសួរ និងណែនាំជិត ១ ម៉ោងដោយគ្រាន់តែអប់រំគាត់ប៉ុណ្ណោះ និងគ្មានការធ្វើកិច្ចសន្យាអ្វីនោះទេ។
លោកបញ្ជាក់ថា៖ «យើងសាកសួរគាត់ប្រហែលកន្លះម៉ោង យើងឲ្យគាត់ទៅវិញហើយ អត់មានឃាត់ខ្លួនអ្វីទេ គាត់គ្រាន់តែពាក់មានរូបលោក កែម ឡី ទេ។ គាត់អត់មានធ្វើសកម្មភាពអ្វីដែលប៉ះពាល់សណ្ដាប់ធ្នាប់ ខ្ញុំបានសួរគាត់ គាត់ថា គាត់ជិះកង់កាត់តាមផ្លូវហ្នឹង ហើយឃើញគេឈរជុំៗគ្នា ក៏ចូលទៅមើលគេលេង គាត់អត់ដឹងរឿងអីទេ»។
សេចក្ដីប្រកាសព័ត៌មានរបស់រដ្ឋបាលខណ្ឌចំការមនចុះថ្ងៃទី ៧ ខែកក្កដា ដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា ម្ចាស់ស្ថានីយកាល់តិច ស្តុបបូកគោបានស្នើសុំមកអាជ្ញាធរឲ្យជួយចាត់វិធានការនានា ដើម្បីធានាប្រក្រតីភាពនៃការប្រកបអាជីវកម្ម សណ្ដាប់ធ្នាប់សាធារណៈសន្ដិសុខ និងធានាបាននូវហានិភ័យនៃអគ្គិភ័យដែលអាចកើតមានជាយថាហេតុនៅក្នុងស្ថានីយប្រេង។
សេចក្ដីប្រកាសព័ត៌មានបន្តថា ដោយយោងតាមសំណូមពរ ហើយផ្អែកតាមច្បាប់ និងលិខិតបទដ្ឋានគតិយុត្តនានា រដ្ឋបាលខណ្ឌចំការមន នឹងចាត់វិធានការមិនឲ្យមានការជួបជុំនៅទីតាំងនោះឡើយ ដោយសារមានការស្នើសុំពីម្ចាស់ស្ថានីយប្រេងឥន្ធនៈកាល់តិច ដើម្បីធានាបាននូវសន្តិសុខ សណ្ដាប់ធ្នាប់សាធារណៈយោងតាមស្មារតីនៃច្បាប់ស្ដីពីការធ្វើបាតុកម្ម ដោយសន្តិវិធី អ្នកចង់សម្ដែងមតិត្រូវជួបជុំនៅទីលានប្រជាធិបតេយ្យ និងស្ថានភាពជំងឺកូវីដ១៩ កំពុងរីករាលដាលជាសកល ក្រសួងសុខាភិបាលបានបិទនូវការជួបជុំគ្រប់ប្រភេទនៅទូទាំងប្រទេស។
រដ្ឋបាលខណ្ឌចំការមនបានឲ្យដឹងថា៖ «រដ្ឋបាលខណ្ឌចំការមនគ្មានជម្រើសអ្វីក្រៅពីការអនុវត្តវិធានការរដ្ឋបាល និងវិធានការច្បាប់ចំពោះជនទាំងឡាយណាដែលប្រព្រឹត្តផ្ទុយនឹងច្បាប់ និងលិខិតបទដ្ឋានគតិយុត្តនានា»។
លោក ថុន រដ្ឋា សកម្មជនបរិស្ថានដែលបានចូលរួមក្នុងសកម្មភាពប្រារព្ធខួប ៤ ឆ្នាំនៃការស្លាប់លោក កែម ឡី បានថ្លែងថាកាលពីម្សិលមិញថា តាមគម្រោងយុវជន និងព្រះសង្ឃគ្រោងជួបជុំគ្នាហូបកាហ្វេ និងបង្សុកូល ដើម្បីឧទ្ទិសដល់វិញ្ញាណក្ខន្ធលោក កែម ឡី ដែលត្រូវបានឃាតករបាញ់សម្លាប់កាលពីថ្ងៃទី ១០ ខែកក្កដា ឆ្នាំ ២០១៦ ប៉ុន្តែគម្រោងនេះត្រូវបានអាជ្ញាធរជាច្រើននាក់បានព្យាយាមរារាំងមិនឲ្យមានការជួបជុំធ្វើពិធីបែបសាសនានោះឡើយ ក្រោមហេតុផលមានការស្នើសុំពីម្ចាស់ស្ថានីយ និងដើម្បីរក្សាសណ្តាប់ធ្នាប់៕