ភ្នំពេញ៖ ក្នុងអំឡុងពេលអនុវត្តនូវវិធានការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាល អាជ្ញាធរនឹងចាត់វិធានការច្បាប់យ៉ាងម៉ឺងម៉ាត់ ក្នុងនោះមានទាំងការឃាត់ទុកជាបណ្តោះអាសន្ននូវមធ្យោបាយធ្វើដំណើរ ដោយអនុលោមតាមបទប្បញ្ញត្តិ និងនីតិវិធីជាធរមាន បើមានការបំពានវិធានការហាមឃាត់ ការធ្វើដំណើរនេះ។
នៅក្នុងសេចក្តីសម្រេចស្តីពីការកែសម្រួលវិធានការ ដែលត្រូវអនុវត្តន៍ក្នុងអំឡុងពេលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្ដាល ដែលរាជរដ្ឋាភិបាលចេញនូវការកែសម្រួលហាមបុគ្គលគ្រប់រូប មិនឱ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួន។
យោងតាមសេចក្តីសម្រេចកែសម្រួលដែលចុះហត្ថលេខាដោយ លោកនាយករដ្ឋមន្រ្តី ហ៊ុន សែន កាលពីថ្ងៃទី ១៨ ខែមេសា បានលើកឡើងថា ការធ្វើដំណើរចេញក្រៅពីលំនៅឋាន ឬទីសំណាក់បច្ចុប្បន្ន ត្រូវបានអនុញ្ញាតក្នុងករណីចាំបាច់ប៉ុណ្ណោះ ដោយត្រូវមានលិខិតអនុញ្ញាតធ្វើដំណើរពីគណៈកម្មការប្រតិបត្តិនៃ គ.ប.ខ (គណៈកម្មការបិទខ្ទប់) អមដោយឯកសារសម្គាល់ អត្តសញ្ញាណ និងលិខិតបញ្ជាក់ការងារដែលមានកំណត់ច្បាស់លាស់ពីឈ្មោះ មុខងារ និងប្រភេទ អាជីវកម្មចេញដោយទីកន្លែងអាជីវកម្មពាក់ព័ន្ធ។
ការធ្វើដំណើរក្នុងគោលបំណងនេះ អាចធ្វើឡើងដោយសមាជិកយ៉ាងច្រើន ២ នាក់ ក្នុងមួយលំនៅឋាន ឬទីសំណាក់ ដោយមិនឱ្យលើសពី ៣ ដង ក្នុងមួយសប្តាហ៍ និងនៅទីតាំងដែលជិតបំផុតក្នុងរង្វង់ភូមិសាស្រ្តក្រុង ឬខណ្ឌដែលខ្លួនរស់នៅ ដោយត្រូវយកតាមខ្លួននូវអត្តសញ្ញាណប័ណ្ណសញ្ជាតិខ្មែរ ឬបណ្ណសម្គាល់ខ្លួន។
សេចក្តីសម្រេចការកែសម្រួលបានបញ្ជាក់ថា ចំពោះការធ្វើដំណើរសម្រាប់អ្នកសារព័ត៌មានត្រូវមានភ្ជាប់ជាមួយនូវឯកសារបញ្ជាក់អំពីអត្តសញ្ញាណ និងការងារ ព្រមទាំងមានលិខិតអនុញ្ញាតសម្រាប់ការធ្វើដំណើរពីក្រសួងព័ត៌មាន។
ប្រភពដដែលបានបន្តថា ចំនួនបុគ្គលិករបស់អង្គភាពព័ត៌មាននីមួយៗ ត្រូវកាត់បន្ថយមកនៅត្រឹមកម្រិតអប្បបរមា សម្រាប់ទទួលការអនុញ្ញាតឱ្យធ្វើដំណើរដោយក្រសួងព័ត៌មាន។
សម្រាប់ការធ្វើដំណើរទៅមន្ទីរពេទ្យ មណ្ឌលសុខភាព សម្ភព ឬទីកន្លែងព្យាបាល ដោយមូលហេតុសុខភាពបន្ទាន់នៅក្នុងរង្វង់ភូមិសាស្ត្រដែលត្រូវបានបិទខ្ទប់ អាចធ្វើទៅបានដោយមានការអនុញ្ញាតពីអាជ្ញាធរមានសមត្ថកិច្ច ដែលអនុវត្តវិធានការបិទខ្ទប់ដោយកំណត់ចំនួនមនុស្សមិនឱ្យលើសពី ៤ នាក់ សម្រាប់ករណីនីមួយៗ។
ចំពោះសកម្មភាពការងាររបស់ស្ថាប័នសាធារណៈត្រូវកាត់បន្ថយចំនួនអ្នកធ្វើការឱ្យមកនៅត្រឹមកម្រិតអប្បបរមាមិនឱ្យលើសពី ២% និងត្រូវអនុវត្តគោលការណ៍អាហារថ្ងៃត្រង់ នៅហ្នឹងកន្លែងបំពេញការងារ ដើម្បីធានានិរន្តរភាពការងាររបស់ស្ថាប័ន៕