.jpg)
សកម្មភាពត្រៀមដុតបំផ្លាញគ្រឿងញៀនឆ្នាំ ២០១៩ នៅកោះពេជ្រ។ ហុង មិនា
ភ្នំពេញ: លោក ម៉ក់ ជីតូ អគ្គស្នងការរងនគរបាលជាតិទទួលផែនគ្រឿងញៀនបានប្រាប់ភ្នំពេញប៉ុស្តិ៍កាលពីម្សិលមិញថា អាជ្ញាធរជាតិប្រយុទ្ធប្រឆាំងគ្រឿងញៀនគ្រោងដុតបំផ្លាញគ្រឿងញៀនជាច្រើនប្រភេទចំនួនសរុបជាង ៥០០ គីឡូក្រាម នៅថ្ងៃ ២៦ ខែ មិថុនា ឆ្នាំ ២០២០ នៅមជ្ឈមណ្ឌលកោះពេជ្រ ត្រូវនឹងថ្ងៃទិវាប្រយុទ្ធប្រឆាំងគ្រឿងញៀនអន្តរជាតិ។
លោក ម៉ក់ ជីតូ បានឲ្យដឹងថាលោក កែ គឹមយ៉ាន ឧបនាយករដ្ឋមន្ដ្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនធ្វើជាអធិបតីតំណាងរាជរដ្ឋាភិបាល។
លោកថ្លែងបន្តថា កម្មវិធីនេះត្រូវបានរៀបចំតូចល្មមដែលនឹងមានអ្នកចូលរួមប្រមាណជាង ២០០ នាក់ ដោយសារមិនអាចប្រមូលផ្ដុំគ្នាច្រើនបានក្នុងអំឡុងពេលបង្ការជំងឺឆ្លងកូវីដ ១៩ ក្នុងឆ្នាំ ២០២០ នេះ។
លោក ជីតូ ថ្លែងថា៖ «កម្មវិធីនេះជារៀងរាល់ឆ្នាំត្រូវបានធ្វើឡើងយ៉ាងអធិកអធមដែលជាឱកាសបង្ហាញពីការយកចិត្តទុកដាក់ខ្លាំងចំពោះការបង្ក្រាបគ្រឿងញៀន។ ក្នុងនោះអាជ្ញាធរជាតិប្រយុទ្ធប្រឆាំងគ្រឿងញៀនចង់បង្ហាញសារមួយចំនួនពីផលប៉ះពាល់នៃសារធាតុញៀន និងជះឥទ្ធិពលទៅលើបុគ្គល គ្រួសារ និងសង្គមជាតិ»។
លោក ម៉ក់ ជីតូ បានឲ្យដឹងផងដែរថា ក្នុងរយៈពេលត្រឹម ៦ ខែឆ្នាំនេះការបង្ក្រាបគ្រឿងញៀនជាលក្ខណៈទ្រង់ទ្រាយធំមានច្រើនករណី ជាពិសេសការបង្ក្រាបចំកន្លែងកែច្នៃ និងមេខ្លោងជួញដូរធំៗតែម្ដង ហើយការចាប់ និងរឹបអូសបានភាគច្រើននាំចូលមកពីវៀតណាម ចិន និងថៃ។ រីឯខាងឡាវហាក់បីដូចស្ងាត់ហើយ ព្រោះអាជ្ញាធរឡាវសហការជាមួយអាជ្ញាធរកម្ពុជាបានយ៉ាងជិតស្និទ្ធ។
លោក ជីតូ ថ្លែងឲ្យដឹងទៀតថា អាជ្ញាធរជាតិប្រយុទ្ធប្រឆាំងគ្រឿងញៀនបានដាក់ចេញវិធានការថ្មីៗជាច្រើន ដើម្បីបង្ក្រាប ទប់ស្កាត់ការជួញដូរ និងការផលិតគ្រឿងញៀនគ្រប់រូបភាព។ ក្នុងនោះកម្ពុជានៅតែបន្តសហការជាមួយបណ្ដាប្រទេសជិតខាងដដែល ដើម្បីទប់ស្កាត់ និងបង្ក្រាបទីតាំងកែច្នៃ ឬជួញដូរគ្រឿងញៀនឆ្លងដែន ជាពិសេសការលួចនាំចូលតាមផ្លូវទឹក និងផ្លូវអាកាស។
លោក វ៉ី សំណាង អភិបាលខេត្តកំពង់ស្ពឺបានថ្លែងឲ្យដឹងកាលពីម្សិលមិញដែរថា រដ្ឋបាលខេត្តកំពង់ស្ពឺក៏រៀបចំកម្មវិធីនេះដែរ ប៉ុន្ដែត្រូវរៀបចំជាមួយអាជ្ញាធរជាតិប្រយុទ្ធប្រឆាំងគ្រឿងញៀននៅមជ្ឈមណ្ឌលកោះពេជ្រ។
លោកបញ្ជាក់ថា៖ «យើងប្រារព្ធកម្មវិធីនេះជារៀងរាល់ឆ្នាំ ប៉ុន្ដែឆ្នាំនេះខេត្តកំពង់ស្ពឺ ខេត្តតាកែវ និងខេត្តកណ្ដាលគឺត្រូវមកចូលរួមជាមួយអាជ្ញាធរជាតិប្រយុទ្ធប្រឆាំងគ្រឿងញៀនផ្ទាល់នៅកោះពេជ្រ រីឯបណ្ដាខេត្តផ្សេងៗទៀត គេធ្វើតាមតំបន់គេ ឧទាហរណ៍ថា ខេត្តបាត់ដំបង ខេត្តសៀមរាប និងខេត្តឧត្តរមានជ័យ គេធ្វើជាមួយគ្នាទៅ ហើយខេត្តផ្សេងៗដែលនៅជាប់ៗគ្នាគេធ្វើរួមគ្នាអ៊ីចឹងដែរ»។
លោក អំ សំអាត ប្រធានផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (LICADHO) បានថ្លែងឲ្យដឹងកាលពីម្សិលមិញដោយទទួលស្គាល់ការបង្ក្រាបរបស់សមត្ថកិច្ច ហើយក៏ជំរុញឲ្យសមត្ថកិច្ចរកយុទ្ធសាស្ត្របន្ថែមក្នុងការបង្ក្រាបទ្វេដងទៀត ដោយសារបទល្មើសគ្រឿងញៀននៅតែបន្តកើតមាន។ ជាពិសេសហូរហៀរដល់ទីជនបទដែលធ្វើឲ្យមានការព្រួយបារម្ភខ្លាំង។
លោកបញ្ជាក់ថា៖ «ដូចយើងដឹងស្រាប់ហើយ ភាពចង្អៀតណែននៃពន្ធនាគារ គឺអ្នកទោសភាគច្រើនកើតចេញពីបទល្មើសគ្រឿងញៀន បញ្ហានេះគឺយើងមានការព្រួយបារម្ភខ្លាំង។ យើងទទួលស្គាល់ហើយការបង្ក្រាបធ្វើរាល់ថ្ងៃ ប៉ុន្ដែយើងគួររកវិធីសាស្ត្របែបណា ដើម្បីបង្ក្រាបទីតាំងផលិត ទីតាំងជួញដូរធំៗដែលជាឫសគល់ប្រភពនៃគ្រឿងញៀនហ្នឹង»។
តាមរបាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានឲ្យដឹងពីម្សិលមិញថា លទ្ធផលអនុវត្តច្បាប់បង្ក្រាបបទល្មើសគ្រឿងញៀនចាប់ពីថ្ងៃទី ១ ខែមករា ដល់ថ្ងៃទី ២៣ ខែមិថុនា ឆ្នាំ ២០២០ នេះមានចំនួន ៥ ១៧២ ករណី ដោយឃាត់មនុស្សចំនួន ១០ ២១៣ នាក់ (ស្រី ៦៣១ នាក់) ក្នុងនោះមានជនបរទេស ១៣៨ នាក់ (ស្រី ២១ នាក់) ដែលមាន ៧ សញ្ជាតិ។
ក្នុងចំណោម ៥ ១៧២ ករណី មានការជួញដូរ រក្សាទុក កែច្នៃ ចាត់ចែង និងដាំដុះត្រូវបានសមត្ថកិច្ចបង្ក្រាបចំនួន ៣ ២៦៧ ករណី និងឃាត់មនុស្សចំនួន ៦ ១៥២ នាក់ (ស្រី ៤៨០ នាក់) រីឯអ្នកប្រើប្រាស់ចំនួន ៤ ១៦១ នាក់(ស្រី ១៥១ នាក់)។ ដោយរឹបអូសសារធាតុញៀនគ្រប់ប្រភេទចំនួនជាង ២៥៧ គីឡូក្រាម និង ៨២៣ កញ្ចប់តូច កញ្ឆាចំនួន ១៨១ ៩៤២ ដើម និងជាង ២៦៦ គីឡូក្រាម និងសម្ភារមួយចំនួនទៀត៕
