The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរនឹង​បញ្ឈប់​រថយន្ត​ធុនធំ ​បើក​ចូល​ក្រុង​ព្រះសីហនុ​

អាជ្ញាធរនឹង​បញ្ឈប់​រថយន្ត​ធុនធំ ​បើក​ចូល​ក្រុង​ព្រះសីហនុ​

Content image - Phnom Penh Post
ស្ថាន​ភាព​ចរាចរណ៍​ នៅ​តាម​ផ្លូវ​មួយ​ ក្នុង​ក្រុង​ព្រះ​សីហនុ កាល​ពី​ខែ​មុន​​​។ ហេង ជីវ័ន

អាជ្ញាធរនឹង​បញ្ឈប់​រថយន្ត​ធុនធំ ​បើក​ចូល​ក្រុង​ព្រះសីហនុ​

សីហនុៈ រដ្ឋបាល​ខេត្ដ​ព្រះសីហនុ គ្រោង​នឹង​បញ្ឈប់​លែង​ឱ្យ​រថយន្ដធុន​ធំ​ បើក​ចូល​ក្នុង​ក្រុង​ និង​ទីប្រជុំ​ជននា​ពេល​​ឆាប់​ៗនេះ ខណៈ​ដែល​​មាន​កំណើនប្រជា​ជន និង​កំណើន​​យាន​យន្ដ​យ៉ាង​គំហុក ដែល​ធ្វើ​​ឱ្យ​មាន​ការ​កក​ស្ទះ​​ចរាចរណ៍​យ៉ាង​ខ្លាំង​នាពេល​បច្ចុប្បន្ន​ ក្នុង​ខេត្ត​ទេស​ចរណ៍​ជាប់​មាត់សមុទ្រ​មួយ​នេះ​។ នេះ​បើតាម​លោក ឃាង ភារម្យ អ្នក​នាំពាក្យ​​រដ្ឋបាល​ខេត្ដ​ព្រះសីហនុ។

បើ​តាម​អាជ្ញា​ធរ​ខេត្ត និង​សង្គម​ស៊ី​វិល បញ្ហា​កក​ស្ទះ​ចរាចរណ៍នៅ​ក្រុង​ព្រះ​សីហនុ​នេះបាន​កើត​ឡើង​បន្ទាប់​ពី​​ខេត្ដ​​​ទេស​ចរណ៍​ជាប់​សមុទ្រ​មួយ​នេះ ត្រូវ​បាន​បង្កើត​ជា​ប៉ូល​សេដ្ឋ​កិច្ច​ពិសេស ដើម្បី​ទាក់​ទាញ​យក​វិនិយោគិន​បរទស ពិសេស​វិនិយោគិន​​ជនជាតិ​ចិន​ទៅ​វិនិយោគ ដែល​ធ្វើ​ឲ្យ​មាន​ជន​ជាតិ​ចិន​​ជា​ច្រើន​ចូល​ទៅ​វិនិ​យោគ​​និង​ស្នាក់​នៅ​ក្នុង​ខេត្ត​នេះ។

លោក ឃាង ភារម្យ បាន​ឱ្យ​ដឹង​កាល​ពីម្សិល​មិញ​ថា នា​រយៈកាល​ចុង​ក្រោយ​នេះ ពិតជា​មាន​​ការ​កក​ស្ទះ​ចរា​ចរណ៍​ខ្លាំង ជាពិសេស​នៅ​តាម​ទី​ប្រជុំ​ជន​ខេត្ដ​និង​នៅ​តាម​បណ្ដោយ​ផ្លូវ​ជាតិ​សំខាន់ៗ​ចូល​​មក​ក្រុង​ព្រះសីហនុ​។

លោក​បន្ថែមថា ឆ្លង​កាត់​ការ​វាយ​តម្លៃរបស់​រដ្ឋ​បាល​ខេត្ដ​ បញ្ហា​នេះ​ គឺ​បង្ក​ឡើង​ដោយ​កំណើន​យានយន្ដ ដោយ​កើន​​ឡើង​យ៉ាង​គំហុក ដែល​ធ្វើ​ឱ្យ​ផ្លូវ​សំខាន់​ធំៗមួយ​ចំនួន​ ក្នុង​ខេត្ដ​ត្រូវ​បាន​កកស្ទះ។

ក្នុង​នោះ​ ​ហេដ្ឋា​រចនា​សម្ព័ន្ធ​ផ្លូវ​ថ្នល់ ក្នុង​ក្រុងបាន​​​ទទួល​រង​ការ​ខូច​ខាត​នាពេល​កន្លង​មក ពីការ​សាងសង់សំណង់​អគារ​ធំៗ ដោយ​មាន​ការ​ដឹក​ជញ្ជូន​សម្ភារសំណង់ និង​ឡាន​ដឹក​បេតុង​ជាដើម ទើប​នាំ​ឱ្យ​មាន​ការ​ខូចខាត​ដល់​ផ្លូវ​ថ្នល់​យ៉ាង​ដំណំ​​ទាមទារ​ត្រូវ​ធ្វើ​ការ​ជួស​ជុល​ជា​បន្ទាន់។

លោក​បាន​ថ្លែង​ថា​៖ «ផ្លូវ​មួយ​ចំនួន យើង​បាន​ជួស​ជុល​ជា​បន្ទាន់ហើយ​ផ្លូវ​មួយ​ចំនួន​ទៀ​ត​ ក៏កំពុង​ស្ថិត​ក្នុង​ការ​ជួស​ជុល​​។ ​ការ​កក​ស្ទះ​ចរាចរណ៍នេះ​វា​ ស្រប​ជាមួយ​កំណើន​យានយន្ដផ្សំ​បញ្ចូល​គ្នា​ទើប​បណ្ដាល​ឱ្យ​មាន​ការ​កកស្ទះ​នៅ​កន្លែង​សំខាន់ៗ»។

បើ​តាម​លោក ភារម្យ ទិស​ដៅ​របស់​រដ្ឋ​បាល​ខេត្ដ​នៅ​ក្នុង​ពេល​ឆាប់ៗ​ខាង​មុខ​នេះនឹង​មិន​អនុញ្ញាតឱ្យ​រថយន្ដ​ធុន​ធំ ធ្វើ​ចរាចរណ៍​នៅ​ក្នុង​ទី​រួមខេត្ដ ឬទីប្រជុំ​ជនក្នុង​ក្រុង​ព្រះ​សីហនុ​តទៅទៀត​ហើយ​ ព្រោះ​រថយន្ដ​ធុន​​ធំបាន​បង្ក​ឱ្យ​មាន​ការ​កក​ស្ទះ​ខ្លាំង។

លោក​បញ្ជាក់ថា​៖ «យើង​​កំពុង​ពិចារណាលែង​ឱ្យ​ចូល​​ទាំង​យប់​ទាំង​ថ្ងៃ​ចំពោះ​រថ​យន្ដ​ធំៗ ក្នុង​ក្រុង​ព្រះ​សីហនុ ហើយ​រដ្ឋ​​បាល​ខេត្ដ​នឹង​ត្រៀម​ចេញ​លិខិត​ជូន​ដំណឹង​ក្នុង​ពេល​ឆាប់ៗពាក់​ព័ន្ធ​នឹង​រឿង​នេះ»។

ជាដំណោះ​ស្រាយ​ ពាក់​ព័ន្ធ​នឹង​រថយន្ដ​ធុន​ធំ​លែង​​ឱ្យ​ចូល​ក្រុង​នេះ​ បើ​តាម​លោក ភារម្យ​ រដ្ឋ​បាល​ខេត្ដនឹង​រៀប​ចំ​ទីតាំង​ផ្សេងនៅ​ជាយ​ក្រុង ដោយ​ឲ្យរថ​យន្ដ​តូច​ៗ​ទៅ​ដឹក​ជញ្ជូន​ទំនិញ​ទម្ងន់​ត្រឹម ​៥ តោន​​ ដឹក​​ជំនួស​រថយន្ត​ធុនធំ​​ចូល​ក្រុង​វិញ។

ប៉ុន្តែ​បើ​តាម​​សង្គម​ស៊ីវិល និង​ប្រជាពលរដ្ឋ​មួយ​ចំនួន​ ដែល​កំពុង​រស់​នៅ​ក្នុង​ខេត្ត​ព្រះ​សីហនុ លើក​ឡើង​ថា ការ​កក​ស្ទះ​ចរាចរណ៍​មួយ​ផ្នែក​ក៏​​ប​ណ្ដាល​​​មក​ពី​ជន​បរទេស ​ជា​ពិសេស​ជន​ជាតិ​ចិន​មួយ​ចំនួន បើ​ក​បរ​មិន​គោរព​ច្បាប់ និង​មន្រ្ដី​​អនុវត្ដ​ច្បាប់​ មិន​ទាន់​​ពង្រឹង​ការ​គោរព​ច្បាប់​ឲ្យ​បាន​​ល្អ​​ផងដែរ។

ឆ្លើយ​តប​ជុំ​វិញ​បញ្ហា​នេះ​ ​លោក ភារម្យ ក៏​បាន​ថ្លែង​ផង​ដែរ​ថា ការ​កក​ស្ទះ​ចរាចរណ៍ ក៏បណ្ដាល​​មក​ពី​ប្រជា​ពលរដ្ឋ​ដែល​ប្រើ​ប្រាស់​យាន​យន្ដ មិន​បាន​ចូលរួម​គោរព​ច្បាប់​ចរាចរណ៍​ផងដែរ។

លោក​ថា៖ «​ពលរដ្ឋ​មួយ​ចំនួន​ធំ បើក​បរ​ដោយ​ជែង​គ្នា ដណ្ដើម​ផ្លូវ​គ្នា​បើក​បរមិន​​​យោគ​យល់​គ្នា​ ទើ​ប​​បណ្ដាល​ឱ្យ​​កក​ស្ទះ​ ​កត្ដា​ទាំង​នេះ ​យើង​កំពុង​ប្រឈម»។

ប៉ុន្ដែ​នារយៈពេល​ចុង​ក្រោ​យ​​នេះ លោក ភារម្យ​បញ្ជាក់ថា បន្ទាប់​ពីលោក​អភិបាល​ខេត្ដ បាន​ដាក់​វិធាន​ការ​បន្ទាន់ ដើម្បី​​ដោះ​ស្រាយ​ឃើញ​ថា បញ្ហា​ស្ទះ​ចរាចរណ៍​មាន​ការ​ធូរស្រាល​មក​វិញខ្លះ​អាច​សម្រួល​បាន​មួយ​ចំនួន​ធំ។

លោក​ថា ក្នុង​នោះ​រដ្ឋបាល​ខេត្ដ​ ក៏បាន​ជំរុញ​ការ​ជួស​ជុល​ផ្លូវសំខាន់​ៗ​ នៅ​ក្នុង​ទី​ប្រជុំ​ជន ដោយ​ផ្លូវ​មួយ​ចំនួន​បាន​ធ្វើ​រួច​រាល់ និង​មួយ​ចំនួន​ទៀតកំពុង​ជំរុញធ្វើ​ឱ្យ​បាន​ឆាប់​ ដើម្បី​ដោះ​បញ្ហា​កក​ស្ទះ​នេះ​ផងដែរ។

ក្នុង​កិច្ចប្រជុំ​លើ​បញ្ហា​កកស្ទះ​ចរាចរណ៍នេះ​របស់​​មន្ត្រី​នគរបាល និង​មន្ទី​រសារ​ធា​​រណការ​ខេត្ត​ព្រះសីហនុ កាល​ពី​សប្ដាហ៍មុនបង្ហាញថា ការ​កកស្ទះចរាចរណ៍​ខ្លាំង​​ ចាប់​ពី​ចំណុច​ផ្លូវ​​ជាតិ​លេខ ៤ មាន​ចម្ងាយ​ជិត ៦ គីឡូម៉ែត្រ។

របាយ​ការណ៍​ដដែល​ថា ការ​កកស្ទះ​នេះ គឺ​បាន​កើត​ឡើ​ង​ខ្លាំង​ ​នៅពេល​ល្ងាច ជាពិសេស​ជាប់គាំង​ខ្លាំង នៅ​ថ្ងៃ​សុក្រ ថ្ងៃ​សៅរ៍ និង​ថ្ងៃអាទិត្យ។ ក្រៅពី​ផ្លូវ​ជា​តិលេខ ៤ ចំណុច​មុខ​ផ្សារ​ឃ្លាំង​លើ ក៏មាន​ការកកស្ទះ​ខ្លាំង តាម​បណ្ដោយ​ផ្លូវ​ឯករាជ្យ ផ្លូវ​អិល​វី ផ្លូវ​មុខ​ផ្សារ​លើ ផ្លូវ​មហោស្រព​ចាស់ ផ្លូវ​ជាប់​ផ្សារ​ពាណិជ្ជកម្មផ្លូវ​ចាប់ពី​អូរ ១ ដ​ល់​​អូរ ៣ ក៏ត្រូវ​កកស្ទះ​ចរាចរណ៍​រាល់ថ្ងៃ​ដែរ។

លោក​​ស្រី​ ជៀប សុធារី អ្នកសម្រប​សម្រួល​សមាគម​អាដ​ហុក​ប្រចាំ​ខេត្ដ​ព្រះ​សីហនុ​ បាន​មើល​ឃើញថា បញ្ហា​កក​ស្ទះ​ចរាចរណ៍នេះ ក្រៅ​ពីរថយន្ដ​ធុន​ធំ ក៏បណ្ដាល​មក​ពី​ជនជាតិចិន ​ដែល​ចូល​មក​​រស់នៅ​ក្នុង​ក្រុង​ព្រះសីហនុ​មួយ​ចំនួន បើក​បរ​មិន​គោរពច្បាប់ និង​មន្រ្ដី​ចរាចរណ៍​អនុវត្ដ​ច្បាប់​ចំពោះ​ជន​ល្មើស​មិន​ទាន់​បាន​ម៉ឺងម៉ាត់។

លោក​ស្រី​ថា​៖ «ជនជាតិ​ចិន​នេះ ដែល​មក​រស់នៅ​ក្រុង​ព្រះសីហនុនេះ បើក​បរ​មិនដឹង​ទិស​តំបន់អីទេ ពេលខ្លះដល់​ភ្លើង​ស្ដុបក៏មិ​ន​ឈប់ដែរ។ ឥឡូវនេះ យើង​មិន​ដឹង​ធ្វើ​ម៉េច​ទេ ខ្ញុំ​ធ្លាប់​នៅ​កំពង់​សោម​យូរ​ហើយ​ធ្លាប់តែ​រីក​រាយ ដល់​ពេល​ឥឡូវ​ស្ត្រេស​ខ្លាំង​ណាស់​បញ្ហា​ស្ទះ​ចរាចរណ៍​នេះ»។

លោកស្រី​លើក​ឡើង​​ថាកំ​ណើ​ន​​ប្រជាជន​កើនឡើងច្រើន យាន​​យន្ដ​ក៏ច្រើនក្នុង​ក្រុង​ព្រះ​សីហ​នុ គឺ​ជា​មូល​ហេតុ​ដែល​នាំ​ឲ្យ​មាន​ការ​កក​ស្ទះ​ចរាចរណ៍​។ «យើង​ឃើញថា ផ្លូវ​សាធារណៈ​យើង​កន្លែង​ខ្លះ​ក្នុង​ក្រុង យើង​ខំធ្វើ​ផ្លូវ​ធំៗប៉ុន្ដែ​អ្នក​ចត​យាន​យន្ដ​នោះ​​ទៅ​ចត​នៅ​លើ​ផ្លូវ ទើប​នាំ​ឱ្យ​កក​ស្ទះ ស្រប​ពេល​រាល់ថ្ងៃ​ហ្នឹង​ ឡាន​កុងតឺន័រ​ធំៗ​ក៏ច្រើន​ទៀត»។

លោក ង៉ែត វិចិត្រ ប្រជាពលរដ្ឋ​មួយ​រូប​ រស់​នៅ​ក្នុង​ក្រុង​ព្រះសីហនុ គាំ​ទ្រ​ប្រសិន​បើ​អាជ្ញាធរ អនុវត្ដ​ច្បាប់​តឹង​រឹុងចំពោះ​អ្នក​​បើក​បរ​នៅ​លើដង​ផ្លូវ ដែល​មិន​គោរព​ច្បាប់​​ ដោយ​លោក​ថ្លែង​ថា នា​ពេល​បច្ចុប្បន្ន​រូប​លោក ក៏​ដូច​ជា​ប្រជា​ពល​រដ្ឋ​រស់​នៅ​ខេត្ត​ព្រះសីហនុ មាន​ការ​ព្រួយ​បារម្ភ​ចំពោះ​ជន​បរទេស ពិសេស​ជន​ជាតិ​ចិន​ដែល​បើក​បរ​ដោយ​មិន​គោរព​ច្បាប់​ ដែល​មិន​ត្រឹម​តែ​ធ្វើ​ឱ្យ​កក​ស្ទះ​ចរាចរណ៍​​ប៉ុណ្ណោះ​ទេ ថែម​​ទាំង​បង្កគ្រោះ​ថ្នាក់​​ដល់​អាយុ​ជីវិត​មនុស្ស​ថែម​ទៀត។

លោក​បាន​បន្ថែម​ថា​៖ «ខ្ញុំ​ឃើញ​ប៉ូលិសខ្លះ​ពេល​ឃាត់​ជន​​ជាតិ​ចិន​បើក​បរ​​ខុស​ច្បាប់ មិន​បាន​អនុវត្ដ​ច្បាប់​​ឲ្យ​បាន​ល្អ​ទេ ត្រឹម​ទទួល​លុយ​បន្តិចបន្តួច​ក៏​ឱ្យ​ជន​ល្មើស​រួច​ខ្លួន ប៉ុន្ដែ​ក៏មាន​ប៉ូលិស​ខ្លះ​ គាត់​មិន​ទទួល​ដែរ។ ដូច្នេះ​ខ្ញុំ​ចង់​ឱ្យ​អាជ្ញាធរ​អនុវត្ដ​ច្បាប់​ឱ្យ​បាន​តឹង​រឹុង កុំ​ឱ្យជន​​ជាតិ​ចិន​​គេមើលងាយ ព្រោះ​តែ​លុយ​បន្តិច​បន្ទួច​។ ត្រូវ​អនុវត្ដ​ច្បាប់​ឱ្យ​តឹង​រឹុង​ដើម្បី​ឱ្យ​មាន​សណ្ដា​ប់ធ្នា​ប់​ល្អ ប្រជា​ពល​រដ្ឋរ​ស់នៅ​​បាន​រីករាយ​ដូច​ពី​មុន​ឡើង​វិញ»។

បើ​តាមលោក ភារម្យ នា​ពេ​ល​​បច្ចុប្បន្ន ​ប្រជាជន​រស់នៅ​ខេត្ដ​ព្រះសីហនុ ​មាន​​ប្រមាណ​​ជាង ២ សែន​នាក់ ខណៈកាល​ពី​ប្រមាណ ៣ ឆ្នាំមុនមាន​ជាង ១០ ម៉ឺន​នាក់​ប៉ុណ្ណោះ​។ ដោយឡែក​ចំពោះ​ជន​ជាតិចិន​ដែល​ទៅរស់នៅ និង​វិនិយោគ​លើវិស័​យ​​នានា​ក្នុង​ខេត្ដនេះមាន​ចំនួន​ជាង ៤ ម៉ឺន​នាក់​​ ដែល​ចំនួន​នេះ​មាន​ការ​​ឡើង​ចុះ​ទៅ​តាម​រដូវកាល៕

អត្ថបទគួរចាប់អារម្មណ៍