ព្រះសីហនុៈ អាជ្ញាធរខេត្តព្រះសីហនុនឹងចាប់ផ្ដើមបើកការដ្ឋានស្ដារ និងពង្រីកអូរប្រឡាយទាំង ៥ ខ្សែ ប្រវែងប្រហែល ២៦ គីឡូម៉ែត្ររួមទាំងប្រឡាយតូចៗផ្សេងទៀតនៅថ្ងៃទី ៩ ខែធ្នូ ដើម្បីរំដោះទឹកនៅពេលដែលមានភ្លៀងកុំឱ្យមានការជន់លិចទីក្រុងទេសចរណ៍មួយនេះ ដូចកាលពីឆ្នាំកន្លងមកទៀត។
ជាមួយគ្នានេះលោក គួច ចំរើន អភិបាលខេត្តព្រះសីហនុបានស្នើឱ្យមន្ទីរជំនាញចុះអប់រំប្រជាពលរដ្ឋឱ្យរុះរើសំណង់ដែលសង់រំលោភយកចំណីដីអូរប្រឡាយទាំងនោះដើម្បីពន្លឿនដល់គម្រោងស្តារអូរប្រឡាយរំដោះទឹកនេះ។
លោក បុរី វង្សសានិត ប្រធានមន្ទីរសាធារណការ និងដឹកជញ្ជូនខេត្តព្រះសីហនុបានលើកឡើងថា អូរប្រឡាយទាំង ៥ ខ្សែនោះគឺមានអូរប្រឡាយអូរឈើទាល អូរប្រឡាយអូរអេម៉ារីយូ អូរប្រឡាយ អូរសំអាត អូរប្រឡាយស្ពានឆេះ អូរប្រឡាយអណ្ដូងអ៊ុនតាក់ រួមទាំងប្រឡាយតូចៗជាច្រើនទៀត ដែលមានទទឹងចាប់ពី ៣ ម៉ែត្រទៅដល់ជាង ៦០ ម៉ែត្រនឹងត្រូវធ្វើការស្ដារ និងពង្រីកឡើងវិញ។
លោកបន្តថា ការរំលោភបំពានដីចំណីអូរប្រឡាយទាំង ៥ ខ្សែ ដើម្បីសាងសង់សំណង់ខុសច្បាប់គឺជាមូលហេតុចម្បងបណ្ដាលឱ្យមានការកកស្ទះធ្វើឱ្យមានទឹកលិចលង់នៅក្នុងរដូវវស្សា។ លោក វង្សសានិត បានថ្លែងបែបនេះនៅក្នុងកិច្ចប្រជុំមួយដឹកនាំដោយលោក គួច ចំរើន ស្ដីពីការងារស្ដារអូរប្រឡាយទាំង ៥ ខ្សែក្នុងក្រុងព្រះសីហនុកាលពីថ្ងៃទី ៣ ខែធ្នូ។
លោក គួច ចំរើន បានជំរុញឱ្យមន្ទីរសាធារណការ មន្ទីររៀបចំដែនដី និងអាជ្ញាធរមូលដ្ឋានរៀបចំបោះបង្គោលកំណត់និយាមការទីតាំងអូរប្រឡាយទាំង ៥ ខ្សែ ដើម្បីឱ្យក្រុមការងារមានភាពងាយស្រួលចុះស្ដារអូរប្រឡាយទាំងនោះ និងចុះអប់រំប្រជាពលរដ្ឋឱ្យរុះរើសំណង់ទាំងឡាយដែលប៉ះពាល់ចំណីអូរប្រឡាយចេញដើម្បីងាយស្រួលក្នុងការដាក់គ្រឿងចក្រកាយ។
បើតាមទំព័រហ្វេសប៊ុករដ្ឋបាលខេត្តព្រះសីហនុបានស្រង់សម្ដីលោក គួច ចំរើន មកចុះផ្សាយថា៖ «យើងកំពុងមានការមមាញឹកក្នុងការស្ថាបនាផ្លូវទាំង ៣៤ ខ្សែ ដូច្នេះប្រព័ន្ធអូរប្រឡាយនៅក្នុងក្រុងព្រះសីហនុក៏ត្រូវធ្វើការស្ដារឡើងវិញជាមួយគ្នា ដើម្បីបញ្ចៀសនូវជំនន់ទឹកភ្លៀងកុំឱ្យលិចក្នុងរដូវវស្សានៅឆ្នាំ ២០២០ ខាងមុខ»។
កាលពីខែសីហាពលរដ្ឋខ្មែរ ២ នាក់ និងចិនម្នាក់នៅក្នុងក្រុងព្រះសីហនុបានស្លាប់ និងជាច្រើននាក់ផ្សេងទៀតត្រូវបានជម្លៀសពីផ្ទះសំបែងទៅកាន់ទីទួលមានសុវត្ថិភាព ខណៈទីក្រុងមួយនេះត្រូវជន់លិចដោយសារជំនន់ទឹកភ្លៀង។
កាលពីថ្ងៃម្សិលមិញលោក ឃាង ភារម្យ អ្នកនាំពាក្យសាលាខេត្តព្រះសីហនុនិយាយថាលោកមិនទាន់ដឹងអំពីដំណើរការកាយស្ដារ និងពង្រីកអូរប្រឡាយទាំងនោះត្រូវបញ្ចប់នៅពេលណាឡើយដោយលោកគ្រាន់តែបញ្ជាក់ថានឹងធ្វើឱ្យហើយមុនរដូវវស្សាឆ្នាំក្រោយមកដល់។
លោកថា ថ្វីដ្បិតខេត្តទើបប្រកាសអំពីការបើកការដ្ឋានស្ដារប្រឡាយទាំងនោះក្ដី ប៉ុន្តែកន្លងមកអាជ្ញាធរខេត្តបានធ្វើការងារនេះយូរមកហើយដូចជាចុះទៅបាញ់ថ្នាំលើរបងសំណង់សង់លើចំណីអូរប្រឡាយខុសច្បាប់ជាដើម។ លោកថា៖ «ដូចខ្ញុំបញ្ជាក់ថា ការងារស្ដារអូរប្រឡាយទាំងហ្នឹង យើងធ្វើយូរមកហើយមិនមែនទើបនឹងចាប់ផ្ដើមធ្វើទេ។ អ៊ីចឹងវាត្រូវការរយៈពេល ពីព្រោះភូមិសាស្ដ្រខ្លះមានលក្ខណៈស្មុគស្មាញអាហ្នឹងយើងត្រូវការប្រើប្រាស់រយៈពេល»។
លោកបន្តថាចាប់ពីថ្ងៃទី ៩ ខែធ្នូ តទៅ អាជ្ញាធរនឹងចុះទៅអនុវត្តតាមច្បាប់ ដើម្បីកាយដី និងឈូសឆាយសំណង់អនាធិបតេយ្យដែលសង់ និងចាក់រំលោភលើដីចំណីអូរប្រឡាយ ដោយមិនទទួលខុសត្រូវឡើយ ប្រសិនបើម្ចាស់ដី និងម្ចាស់សំណង់អនាធិបតេយ្យ មិនព្រមកាយ និងរុះរើដោយខ្លួនឯងតាមសេចក្ដីជូនដំណឹងរបស់រដ្ឋបាលខេត្តកាលពីពេលកន្លងមក។
ទោះយ៉ាងណាលោក ភារម្យ មិនទាន់ច្បាស់អំពីចំនួនប្រជាពលរដ្ឋដែលចាក់ដី និងសង់សំណង់អនាធិបតេយ្យរំលោភលើដីចំណីអូរប្រឡាយឡើយ ដោយបានជំរុញឱ្យសួរខាងរដ្ឋបាលក្រុងព្រះសីហនុវិញ ប៉ុន្តែលោកបញ្ជាក់ថា អាជ្ញាធរក៏នឹងពិចារណាក្នុងការដោះស្រាយផលប៉ះពាល់ទៅដល់ម្ចាស់សំណង់អនាធិបតេយ្យមួយចំនួនដែរ។
លោកថា៖ «អ្នកចាក់ដីចូល ធ្វើរបងរំលោភចូល អាហ្នឹងគឺអត់មាននិយាយរឿងសំណងទេគឺឱ្យគាត់កាយចេញ និងរុះរើដោយខ្លួនឯងវិញ។ ទី២ បើយើងនិយាយអំពីសំណង់មិនរៀបរយគឺយើងមើលទៅលើស្ថានភាពរស់នៅជីវភាព និងរយៈកាលនៃការរស់នៅរបស់ពួកគាត់ដែលយើងត្រូវពិចារណាថា នឹងត្រូវដោះស្រាយរបៀបម៉េច»។
លោក អ៊ី សុខឡេង អភិបាលក្រុងព្រះសីហនុបញ្ជាក់ពីម្សិលមិញថា លោកក៏មិនដឹងថា ពលរដ្ឋប៉ុន្មានបានសង់លំនៅឋាន ឬចាក់ដីរំលោភលើអូរប្រឡាយទាំងនោះ ឬក៏ដីចំណីអូរប្រឡាយប៉ុន្មានត្រូវបានគេរំលោភយកនោះដែរ ដោយសារការងារនេះគឺជាគម្រោងរបស់ថ្នាក់ជាតិហើយលោកបានជំរុញឱ្យទៅសួរខាងមន្ទីរដែនដីវិញ ព្រោះមន្ទីរនេះកន្លងមកគឺជាអ្នកចុះស្រង់ស្ថិតិអំពីទំហំចំណីដីអូរប្រឡាយដែលត្រូវបានគេរំលោភ។
ប៉ុន្តែកាលពីថ្ងៃម្សិលមិញលោក ចេង ស្រុង ប្រធានមន្ទីរដែនដីខេត្តព្រះសីហនុ មិនអាចទាក់ទងសុំការបញ្ជាក់បានទេ ដោយសារទូរស័ព្ទរបស់លោកពុំមានអ្នកទទួល៕