.jpg)
លោកគ្រូ អ្នកគ្រូ ក្នុងសិក្ខាសាលាបរិស្ថានគ្មានផ្សែងបារី។ រីតា
ភ្នំពេញៈ អាជ្ញាធររាជធានីភ្នំពេញ នឹងចុះត្រួតពិនិត្យការអនុវត្តបរិស្ថានគ្មានផ្សែងបារីនៅតាមគ្រឹះស្ថានអប់រំទូទាំងរាជធានីភ្នំពេញនៅខែក្រោយ បន្ទាប់ពីបានសហការជាមួយសង្គមស៊ីវិល កាលពីម្សិលមិញផ្សព្វផ្សាយទៅដល់ថ្នាក់ដឹកនាំគ្រឹះស្ថានអប់រំទាំងនោះ ពីវិធានច្បាប់ និងការដាក់ទោសទណ្ឌជុំវិញការអនុវត្តបរិស្ថានគ្មានផ្សែងបារី។
ការចុះត្រួតពិនិត្យនេះ គ្រោងនឹងធ្វើឡើងបន្ទាប់ពីច្បាប់ស្តីពីការត្រួតពិនិត្យផលិតផលថ្នាំជក់ និងអនុក្រឹត្យស្តីពីការហាមការជក់ឬការបង្ហុយផ្សែងផលិតផលថ្នាំជក់នៅកន្លែងធ្វើការនិងកន្លែងសាធារណៈ ដែលបានហាមឃាត់មិនឲ្យជក់បារីនៅក្នុងបរិវេណគ្រឹះស្ថានសិក្សា ស្ថិតក្នុងដំណាក់កាលផ្សព្វផ្សាយ និងគ្រោងមានការចុះអនុវត្តការផាកពិន័យក្នុងពេលខាងមុខ។
នាយក នាយិកា និងគ្រូបង្រៀនមកពីគ្រប់គ្រឹះស្ថានអប់រំទូទាំងរាជធានីភ្នំពេញប្រមាណជាង ៣០០ នាក់ពីម្សិលមិញបានចូលរួមក្នុងសិក្ខាសាលាស្តីពីការអនុវត្តបរិស្ថានគ្មានផ្សែងបារីក្នុងគ្រឹះស្ថានសិក្សា នៅមន្ទីរអប់រំ យុវជន និងកីឡារាជធានីភ្នំពេញ។
លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានថ្លែងក្នុងឱកាសនោះថា ជារៀងរាល់ឆ្នាំប្រទេសកម្ពុជាខាតបង់ថវិកាប្រមាណ ១៦៣ លានដុល្លារអាមេរិក ទៅលើការព្យាបាលជំងឺ និងការបាត់បង់កម្លាំងពលកម្ម។ ជាងនេះទៅទៀតទឹកប្រាក់ដែលប្រជាពលរដ្ឋកម្ពុជាបានចំណាយទៅលើការទិញបារីជក់ជាប្រចាំឆ្នាំមានប្រមាណ ២០១ លានដុល្លារអាមេរិក។
លោកបន្តថា ការអនុវត្តបរិស្ថានគ្មានផ្សែងបារីនៅក្នុងគ្រឹះស្ថានសិក្សាគឺជាវិធានការមួយដើម្បីកាត់បន្ថយផលប៉ះពាល់ដែលបណ្ដាលមកពីការប្រើប្រាស់ផលិតផលថ្នាំជក់ ហើយក៏ជាការអនុលោមតាមច្បាប់ស្តីពីការត្រួតពិនិត្យផលិតផលថ្នាំជក់ និងអនុក្រឹត្យស្តីពីការហាមការជក់ ឬការបង្ហុយផ្សែងផលិតផលថ្នាំជក់នៅកន្លែងធ្វើការ និងកន្លែងសាធារណៈ ដែលបានហាមឃាត់មិនឲ្យជក់បារីនៅក្នុងបរិវេណគ្រឹះស្ថានសិក្សា។
លោកបញ្ជាក់ថា៖ «ខ្ញុំសូមលើកទឹកចិត្តឲ្យលោក លោកស្រី លោកគ្រូ អ្នកគ្រូទាំងអស់យកចិត្តទុកដាក់លើបទបង្ហាញរបស់វាគ្មិន ស្វែងយល់ពីភារកិច្ចរបស់ខ្លួនក្នុងនាមជាថ្នាក់ដឹកនាំគ្រឹះស្ថានសិក្សា ដើម្បីអនុវត្តបរិស្ថានគ្មានផ្សែងបារីនៅក្នុងសាលារបស់ខ្លួនឲ្យមានប្រសិទ្ធភាពខ្ពស់។
តាមការប្រកាសនៅក្នុងសិក្ខាសាលាកាលពីម្សិលមិញ បន្ទាប់ពីការផ្សព្វផ្សាយនេះអនុគណៈកម្មាធិការត្រួតពិនិត្យថ្នាំជក់រាជធានីភ្នំពេញ សហការជាមួយមន្ទីរអប់រំ យុវជន និងកីឡារាជធានីភ្នំពេញ នឹងធ្វើការចុះត្រួតពិនិត្យនៅតាមសាលាទាំងអស់ទូទាំងក្រុង ដើម្បីពិនិត្យមើលពីការអនុវត្តត្រឹមត្រូវរបស់សាលាទាំងនោះ។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាបានថ្លែងដែរថា ការចុះត្រួតពិនិត្យនឹងមានវិធានការចំពោះគ្រឹះស្ថានសិក្សាទាំងឡាយណា ដែលមិនបានអនុវត្តតាមការប្រកាសរបស់ច្បាប់ ដោយវិធានការនោះនឹងដាក់ចេញជាលើកដំបូងនៅតាមគ្រឹះស្ថានទាំងអស់ក្នុងរាជធានីភ្នំពេញ ខណៈច្បាប់នេះនឹងបន្តផ្សព្វផ្សាយទៅតាមបណ្តាខេត្តជាបន្តទៀត មុននឹងឈានដល់ការអនុវត្តការផាកពិន័យ និងទណ្ឌកម្មជាអន្តរកាល។
លោកបញ្ជាក់ថា៖ «បើទោះជានៅមិនទាន់មានការសិក្សាណាមួយបញ្ជាក់ពីលទ្ធផលនេះច្បាស់លាស់ពីការសិក្សានៅតាមសាលារៀន តែពាក់ព័ន្ធនឹងការអនុវត្តគ្មានផ្សែងបារីក្នុងសាលាក្នុងរាជធានីភ្នំពេញនេះ គាត់បានអនុវត្តបានល្អកន្លងមក។ តែការសិក្សា និងចុះត្រួតពិនិត្យការអនុវត្តនេះ នឹងធ្វើឡើងនៅខែក្រោយ ដើម្បីវាយតម្លៃការអនុវត្តរបស់ពួកគាត់ទូទាំងរាជធានីភ្នំពេញ»។
លោកបន្តថា ច្បាប់ទាំងនេះ ក៏មានគោលដៅផងដែរ ក្នុងការពិន័យដល់គ្រឹះស្ថានអប់រំណា ដែលមិនគោរពតាមបទប្បញ្ញត្តិនេះជាធរមាន នៅពេលគណៈកម្មាធិការត្រួតពិនិត្យថ្នាំជក់ ចុះត្រួតពិនិត្យឃើញថា មិនគោរពទៅតាមច្បាប់ ដែលបានផ្សព្វផ្សាយ។
យោងតាមច្បាប់ស្តីពីការត្រួតពិនិត្យផលិតផលថ្នាំជក់ អនុក្រឹត្យ និងសេចក្តីណែនាំនានា ស្តីពីការហាមប្រើប្រាស់ និងផ្សព្វផ្សាយពាណិជ្ជកម្មថ្នាំជក់ ក្នុងបរិវេណគ្រឹះស្ថានសាធារណៈ និងឯកជន បានឲ្យដឹងថា តួនាទីអ្នកគ្រប់គ្រង ឬម្ចាស់គ្រឹះស្ថានសិក្សាទាំងអស់ទូទាំងប្រទេស ត្រូវមានភារកិច្ចហាមឃាត់ដាច់ខាតរាល់ការប្រើប្រាស់ ចែកចាយ ការផ្សាយពាណិជ្ជកម្មបារីនៅក្នុងគ្រឹះស្ថានសិក្សា។ ចំពោះអ្នកគ្រប់គ្រង ឬម្ចាស់គ្រឹះស្ថានសិក្សា ឬអ្នកប្រើប្រាស់ណាល្មើសនឹងវិធានច្បាប់នេះ នឹងត្រូវពិន័យជាអន្តរកាលចាប់ពី ៥ ម៉ឺនរៀល ដល់ ១ លានរៀល។
លោកស្រី កែវ សុខពិសី អភិបាលរងរាជធានីភ្នំពេញ ដែលបានចូលរួមក្នុងឱកាសនោះបានថ្លែងថា ការផ្សព្វផ្សាយបរិស្ថានគ្មានផ្សែងបារីនៅតាមគ្រឹះស្ថានសិក្សានៅពេលនេះ គឺដើម្បីរួមចំណែកកាត់បន្ថយជំងឺ ជាពិសេសជំងឺផ្សេងៗនៅក្នុងសាលារៀន ដែលកើតឡើងទៅលើកុមារដែលបានស្រូបផ្សែងបារី ព្រមទាំងការបង្ការការជក់បារីនៅតាមសាលារៀនផងដែរ។
លោក ឆាយ សុងលី នាយកវិទ្យាល័យសម្តេចហ៊ុន សែន ភ្នំពេញថ្មី វ័យ ៥១ ឆ្នាំ បានប្រាប់ភ្នំពេញប៉ុស្តិ៍ពីម្សិលមិញថា សាលាលោកបានចូលរួមផ្សព្វផ្សាយរួចហើយ តែការប្រព្រឹត្តរបស់ជនមួយចំនួន ជាពិសេសគ្រូបង្រៀនផ្ទាល់តែម្តង នៅតែបន្តកើតមាន។
លោកបន្តថា ៖ «មិនដឹងនិយាយថាម៉េច បានផ្សព្វផ្សាយឲ្យគាត់ប៉ុន្មានដងហើយ តែគាត់នៅតែជក់ នៅក្នុងទីធ្លាសាលារៀន តែក្នុងថ្នាក់រៀនពួកគាត់អត់ជក់ទេ។ ខ្ញុំចង់ឲ្យមានអ្នកចុះទៅផ្ទាល់ ហើយឃើញពួកគាត់ជក់ ចុះទៅផាកពិន័យតែម្តង»។
តាមអង្គការសុខភាពពិភពលោក បានរកឃើញថា ការប្រើប្រាស់ផលិតផលថ្នាំជក់ (បារី) បង្កវិបត្តិជាច្រើនដល់សង្គម ដោយបង្កជាជំងឺរុាំរ៉ៃជាច្រើនដល់ទាំងអ្នកជក់ និងអ្នកស្រូបផ្សែងបារីពីគេ ដូចជា ជំងឺមហារីកសួត ជំងឺផ្លូវដង្ហើម ជំងឺស្ទះសរសៃឈាមបេះដូង ដាច់សរសៃឈាមខួរក្បាល ខណៈចំពោះស្ត្រីមានផ្ទៃពោះដែលស្រូបផ្សែងបារីពីគេបណ្ដាលឲ្យកូនកើតមុនពេលកំណត់ កើតមកមិនប្រក្រតី ឬកើតមកស្លាប់ជាដើម៕
