កំពតៈ អាជ្ញាធរបានបញ្ជាឱ្យគ្រឿងចក្របញ្ឈប់ការកាយយកអាចម៍ដីនៅក្នុងអាងទំនប់ទឹកអូរច្រនៀងនៅក្នុងឃុំកំពង់ត្រាចខាងលិច ស្រុកកំពង់ត្រាចជាបណ្តោះអាសន្នសិន បន្ទាប់ពីមានប្រជាពលរដ្ឋជាង ១០ គ្រួសារបានតវ៉ាថា ការកាយដីនេះបានធ្វើឱ្យប៉ះពាល់ដីធ្លីរបស់ពួកគាត់ដែលធ្លាប់អាស្រ័យផល។
កាលពីថ្ងៃទី ២១ មីនា មានអេស្កាវ៉ាទ័រ និងឡានដឹកដីប្រមាណ ១០ គ្រឿង បានចុះកាយដីក្នុងអាងទំនប់ទឹកអូរច្រនៀង ដែលអាជ្ញាធរអះអាងថា ជាការកាយដើម្បីស្តារទំនប់ដែលបានរីងស្ងួតគ្មានទឹកប្រើប្រាស់នៅក្នុងរដូវប្រាំង និងមានទឹកជន់លិចខ្លាំងនៅក្នុងរដូវវស្សា។
ពលរដ្ឋម្នាក់ដែលបានចូលរួមការតវ៉ានេះលោក ម៉ែន សុភាព អាយុ ៣៧ ឆ្នាំ រស់នៅក្នុងភូមិ ២ ឃុំកំពង់ត្រាច ប្រាប់អ្នកកាសែតក្នុងអំឡុងពេលតវ៉ាថា ប្រជាពលរដ្ឋជាច្រើនគ្រួសារបានចេញមុខមកតវ៉ា រឿងគ្រឿងចក្រជាច្រើនចុះកាយដីក្នុងទំនប់ទឹកធ្វើឱ្យពលរដ្ឋមានការខឹងសម្បារឿងពួកគាត់បានបាត់បង់ដីធ្លី ដែលធ្លាប់អាស្រ័យផលនៅក្នុងទំនប់នេះ។
អ្នកស្រុកបានចោទថា ការមកកាយយកអាចម៍ដីនេះ គឺធ្វើឡើងដើម្បីយកដីនេះទៅលក់ដែលបានធ្វើលើដីពួកគាត់ឱ្យក្លាយជារណ្ដៅអស់។ «ប្រជាពលរដ្ឋមកពីភូមិដើមចារ និងភូមិអូរច្រនៀង ក្នុងឃុំកំពង់ត្រាចខាងលិចមានដីនៅក្នុងអាងទំនប់ទឹកនេះចំនួន ២៥ ហិកតា ហើយដីទាំងនោះជាដីបង្កបង្កើនផលស្រូវ។ សុំឱ្យអាជ្ញាធរកំណត់ព្រំឱ្យបានច្បាស់ ព្រោះគ្រឿងចក្រចុះមកកាយដីហាក់ដូចអនាធិបតេយ្យ»។
ចំណែកលោក សន ត្រី អាយុ ៥២ ឆ្នាំ ជាប្រជាពលរដ្ឋរស់នៅភូមិដើមចារថ្លែងថាគ្រឿងចក្រចុះមកកាយដីក្នុងអាងទំនប់ទឹកនេះដោយម្ដងកាយចំណុចនេះ ម្ដងកាយចំណុចនោះធ្វើឱ្យអ្នកភូមិបាត់បង់ដីសម្រាប់ធ្វើកសិកម្ម។ «ដីនៅក្នុងអាងទំនប់ទឹកនេះ មិនមានប្លង់កម្មសិទ្ធិស្របច្បាប់ទេ តែពួកគាត់កាន់កាប់តាំងពីដូនតាមក»។
លោក ចេន តាន់ មេឃុំកំពង់ត្រាចខាងលិចថ្លែងថា ដោយសារតែកន្លងមកអាងទំនប់ទឹកអូរច្រនៀងនេះបានរីងហើយគ្មានទឹកប្រើប្រាស់នៅរដូវប្រាំង និងមានការជន់លិចខ្លាំងនៅរដូវវស្សា ទើបអាជ្ញាធរស្រុក និងមានការចូលរួមពីរដ្ឋបាលឃុំផងនោះបានអនុញ្ញាតឱ្យគ្រឿងចក្រទាំងនេះធ្វើការស្តារ។ ការស្តារនេះគឺមានគោលបំណងធ្វើយ៉ាងណាឱ្យអាងទំនប់ទឹកអូរច្រនៀងនេះអាចរក្សាទឹកបានច្រើនសម្រាប់ផ្គត់ផ្គង់ដល់អ្នកស្រុក។
លោកបញ្ជាក់ថា៖ «គណៈស្រុក និងឃុំពិភាក្សាជាមួយគ្នាថា បើយើងមិនបានស្តារទំនប់ឡើងទេ នៅតែទឹកហ្នឹងប្រើមិនគ្រប់អ៊ីចឹង ខែវស្សាលិចទឹកខែប្រាំង អត់ទឹកប្រើ ហើយអ៊ីចឹងយើងក៏បានពិភាក្សាថា ឥឡូវបើយើងទុកឱ្យក្រសួងធនធានទឹកស្តារ នោះក្រសួងមិនមានលុយស្តារទេ។ យើងក៏សម្រេចឱ្យឯកជនយកអាចម៍ដីនេះទៅចាក់បំពេញផ្ទះអ្នកភូមិដើម្បីបានកម្រៃហើយយើងដោះដូរដើម្បីបានរណ្តៅហ្នឹងយកទឹកប្រើវិញ»។
ទោះយ៉ាងណាលោកថា ដោយសារតែមានប្រជាពលរដ្ឋតវ៉ាជំទាស់នឹងការស្តារនេះអាជ្ញាធរបានផ្អាកឱ្យគ្រឿងចក្របញ្ឈប់ការកាយរណ្តៅដីជាបណ្តោះអាសន្នសិន ដើម្បីរង់ចាំការសម្រេចដោះស្រាយពីថ្នាក់លើហើយពលរដ្ឋក៏បានបញ្ឈប់ការតវ៉ា។
លោក យន់ ផល្លី អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តកំពត និងកែបបានលើកឡើងថា វាគឺជារឿងត្រឹមត្រូវ បើអាជ្ញាធរធ្វើការស្តារទំនប់នេះឱ្យបានជ្រៅដើម្បីធានារក្សាទឹកទុកសម្រាប់ប្រើប្រាស់គ្រប់រដូវ ដែលក្នុងនាមជាប្រជាពលរដ្ឋ គួរណាស់តែចូលរួម មិនគួរណាមករារាំងសកម្មភាពនៃការស្តាទំនប់នោះទេ។ «ប្រជាពលរដ្ឋគាត់អាស្រ័យផលនៅលើដីរដ្ឋ ពេលណាដែលរដ្ឋត្រូវការ យើងត្រូវតែប្រគល់សិទ្ធិឱ្យរដ្ឋអភិវឌ្ឍ...រដ្ឋត្រូវការស្តារបឹងស្តារប្រឡាយយើងត្រូវចូលរួមដោយគ្មានការជំទាស់»៕