.jpg)
សមត្ថកិច្ចចុះបង្ក្រាបក្លិបកម្សាន្តមួយកន្លែងនៅខណ្ឌសែនសុខ រាជធានីភ្នំពេញ កាលពីសប្ដាហ៍មុន។ រូបថត ហ្វេសប៊ុក
ភ្នំពេញៈ អាជ្ញាធររាជធានី-ខេត្តកំពុងបន្តរឹតបន្តឹងការណែនាំរបស់រដ្ឋាភិបាលក៏ដូចជាក្រសួងសុខាភិបាលក្នុងការទប់ស្កាត់ការរីករាលដាលជំងឺកូវីដ ១៩ ដោយមិនអនុញ្ញាតឱ្យមានការបើកដំណើរការទីតាំងកម្សាន្តសម្រាប់មនុស្សពេញវ័យ ដូចជាខារ៉ាអូខេ ក្លិបជាដើមក្នុងនោះបើម្ចាស់អាជីវកម្មទាំងនោះនៅបន្តបំពានការណែនាំនឹងឈានដល់ការដកហូតអាជីវកម្ម។
លោក សឿន សេន ស្នងការរងទទួលផែនសេនាធិការនៃស្នងការដ្ឋាននគរបាលខេត្ដសៀមរាបបានថ្លែងប្រាប់ភ្នំពេញ ប៉ុស្ដិ៍ថា កាលពីការណែនាំរបស់ក្រសួងសុខាភិបាលជំហានទី ១ សមត្ថកិច្ចខេត្ដសៀមរាបបានចុះបិទទីតាំង ខារ៉ាអូខេខ្នាតធំចំនួន ១០ ទីតាំង បៀរហ្គាឌិន ចំនួន ១៦ ទីតាំង ក្លិបកម្សាន្តចំនួន ៧ ទីតាំង និងរោងកុនចំនួន ៣ ទីតាំង។
លោកបន្ថែមថា តាមប្រសាសន៍ណែនាំរបស់លោកនាយករដ្ឋមន្ដ្រី ហ៊ុន សែន ដោយបញ្ជាឱ្យផ្លាស់ប្ដូរពីខារ៉ាអូខេមកបើកដំណើរការជាភោជនីយដ្ឋានវិញនោះ ទីតាំងកម្សាន្តនានាក្នុងខេត្ដសៀមរាបក៏បានអនុវត្ដតាមផងដែរ។ ប៉ុន្ដែក្នុងនោះមានខារ៉ាអូខេចំនួន ៣ ទីតាំងបានបន្លំភ្នែកសមត្ថកិច្ចដោយដាក់ឈ្មោះជាភោជនីយដ្ឋាន ប៉ុន្ដែលួចបើកខារ៉ាអូខេឡើងវិញ។
លោកបញ្ជាក់ថា៖ «ករណីនេះយើងបានចុះទៅបិទទីតាំងទាំង ៣ នោះនិងឱ្យម្ចាស់ទីតាំងនេះធ្វើកិច្ចសន្យាបញ្ឈប់សកម្មភាពបន្តទៀត។ ក្នុងករណីដែលម្ចាស់ខារ៉ាអូខេទាំង ៣ ទីតាំងនេះនៅតែបន្តបើកយើងនឹងសុំគោលការណ៍ពីគណៈបញ្ជាការឯកភាពខេត្ដដកហូតអាជ្ញាប័ណ្ណអាជីវកម្មនោះតែម្ដង»។
លោក សឿន សេន ថ្លែងថាសមត្ថកិច្ចនៃស្នងការដ្ឋាននគរបាលខេត្ដសៀមរាបបានបន្តចុះអនុវត្ដគោលការណ៍ណែនាំរបស់រដ្ឋាភិបាលក៏ដូចជាក្រសួងសុខាភិបាលជាប្រចាំដោយមិនអនុញ្ញាតឱ្យមានការបើកដំណើរការខារ៉ាអូខេ ឬក្លិបកម្សាន្តឡើយ។
ដោយឡែកចំពោះខេត្តព្រះសីហនុលោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុបានឱ្យដឹងថា ក្រោយអនុវត្ដការណែនាំរបស់រដ្ឋាភិបាល ក៏ដូចជាក្រសួងសុខាភិបាល អាជ្ញាធរខេត្ដព្រះសីហនុបានចុះណែនាំ និងផ្អាកដំណើរការទីតាំងដូចជា ខារ៉ាអូខេ ក្លិបជាដើម និងរហូតដល់បច្ចុប្បន្នមិនទាន់មានទីតាំងណាមួយបើកដំណើរការវិញទេ។
លោកបញ្ជាក់ថា៖ «សម្រាប់ខេត្ដព្រះសីហនុ យើងមិនទាន់មានករណីណាមួយកើតឡើងរហូតឈានដល់សមត្ថកិច្ចចុះទៅបង្ក្រាបនៅឡើយទេ។ ទីតាំងមណ្ឌលកម្សាន្តសម្រាប់មនុស្សពេញវ័យក្នុងខេត្ដព្រះសីហនុនេះមិនទាន់ហ៊ានបើកនៅឡើយទេ»។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងឲ្យដឹងថា ការអនុវត្ដការណែនាំការបិទទីតាំងកម្សាន្តគឺបានអនុវត្ដតាមស្ដង់ដាតែមួយគ្រប់រាជធានី-ខេត្ដទាំងអស់៕
វីដេអូ៖
