ភ្នំពេញៈ អាជ្ញាធរនឹងស្រាវជ្រាវទូទាំងរាជធានីភ្នំពេញដើម្បីរក និងរឹបអូសសៀវភៅដែលនិយាយអំពីលោក គឹម សុខ ដែលសរសេរដោយលោកមេធាវី យ៉ែម បុញ្ញឫទិ្ធ ដែលជាមន្ត្រីជាន់ខ្ពស់របស់អតីតគណបក្សសង្គ្រោះជាតិ។
លោក ជុំ វុឌ្ឍី ប្រធានមន្ទីរវប្បធម៌ និងវិចិត្រសិល្បៈបានបដិសេធចំពោះការចោទប្រកាន់ថាចំណាត់ការនេះពាក់ព័ន្ធនឹងរឿងនយោបាយដែលធ្វើឲ្យមន្ត្រីរបស់លោករឹបអូសសៀវភៅដែលសរសេរដោយអតីតតំណាងរាស្ត្រគណបក្សសង្គ្រោះជាតិរូបនេះ និងសៀវភៅអំពីលោក គឹម សុខ។
លោកបានថ្លែងថា៖ «សៀវភៅណាក៏ដោយដែលដាក់តាំងគឺត្រូវគោរពច្បាប់ជាមុន និងទទួលការអនុញ្ញាតចំពោះខ្លឹមសារ មិនមែនតែចំពោះប្រភេទសៀវភៅទាំងនេះទេ។ យើងធ្វើវាជាទៀងទាត់ ប៉ុន្តែដោយសារអ្នកទាំង ២ ជាអ្នកនយោបាយ ដូច្នេះវាធ្វើឲ្យអ្នករាល់គ្នាភ្ញាក់ផ្អើល»។
មន្ត្រីពីខណ្ឌទួលគោក និងខណ្ឌដូនពេញបានចុះទៅរឹបអូសសៀវភៅពីអាជីវករដែលសរសេរដោយមេធាវី យ៉ែម បុញ្ញឫទ្ធិ ដែលជាអតីតតំណាងរាស្ត្រគណបក្សសង្គ្រោះជាតិដែលត្រូវបានរំលាយដោយតុលាការដែលសៀវភៅទាំង ២ នេះមានចំណងជើងថា តម្លៃមនុស្ស និងទស្សនវិស័យសម្រាប់ការផ្សះផ្សាជាតិ និងការស្តារសង្គម និងទស្សនវិជ្ជាសង្គម និងនយោបាយរបស់លោក គឹម សុខ កាលពីថ្ងៃសៅរ៍។
លោកបានថ្លែងថា៖ «ពួកគេលម្អៀងចំពោះយើង។ យើងមិនអត់ឱនឲ្យនរណាដែលមិនសុំការអនុញ្ញាតស្របច្បាប់នោះទេ»។
លោកបានថ្លែងបន្តថា៖ «នៅពេលអ្នកចង់បោះពុម្ព វាត្រូវតែមានការអនុញ្ញាតពីមន្ទីរ វាត្រូវការការពិនិត្យថា តើព័ត៌មាននោះត្រឹមត្រូវឬអត់ ឧទាហរណ៍អំពីប្រវត្តិសាស្ត្រ ហើយបន្ទាប់ពីនោះនៅពេលអត្ថបទនោះត្រឹមត្រូវគឺត្រូវសុំការអនុញ្ញាតបោះពុម្ព»។
លោក វុឌ្ឍី បានអះអាងថា៖ «រហូតមកដល់ពេលនេះ យើងគ្រាន់តែអប់រំរោងពុម្ព»។
លោក ហង្ស វិទូ ដែលជាអ្នកវិភាគនយោបាយបានអះអាងថា លោកបានសរសេរអំពីសៀវភៅ គឹម សុខ ដែលត្រូវបានបោះពុម្ពប្រហែល ១០០០ ក្បាលអំពីលោក គឹម សុខ ដូចជាទស្សនៈរបស់គាត់អំពីអ្នកដែលហ៊ានលើកកម្ពស់សេរីភាពនៃការនិយាយស្តី និងចំណុចទស្សនៈនយោបាយជាទូទៅ។
លោកបានថ្លែងបន្តថា៖ «ជាទូទៅយើងគ្រាន់តែស្នើសុំលេខកូដពីបណ្ណាល័យជាតិដើម្បីទទួលការអនុញ្ញាត ហើយបោះពុម្ពមិនមែនសៀវភៅទាំងអស់ដែលលក់នៅទីផ្សារស្របច្បាប់ត្រូវមានការអនុញ្ញាតពីក្រសួងនោះទេ ដោយសារវានឹងត្រូវចំណាយពេល ២ ឆ្នាំសម្រាប់នីតិវិធី»។
លោកបានថ្លែងបន្តថា៖ «យើងលក់វា ១ ឆ្នាំហើយ គ្មាននរណាមានបញ្ហាអំពីវាទេ។ អស់រយៈពេលជាង ១ ឆ្នាំចាប់តាំងពីលោក គឹម សុខ ត្រូវបានចាប់ដាក់ពន្ធនាគារ។ ទើបតែឥឡូវពួកគេរឹបអូសវាជាមួយ យ៉ែម បុញ្ញឫទ្ធិ។ សំណួររបស់ខ្ញុំគឺថា តើសៀវភៅចំនួនប៉ុន្មានក្បាលដែលទទួលបានការអនុញ្ញាតពីក្រសួងដើម្បីបោះពុម្ព? ស្ទើរតែគ្មាន»។
លោក វិទូ បានបោះពុម្ពសៀវភៅ ១០ ក្បាលពាក់ព័ន្ធនឹងនយោបាយជាមួយនឹងភាសាផ្សេងៗ។
លោកថ្លែងថា៖ «អ្វីដែលខ្ញុំយល់ឃើញថា វាភ្ញាក់ផ្អើលសម្រាប់ខ្ញុំគឺសៀវភៅដាក់លក់ ១ ឆ្នាំរួចហើយ។ ហេតុអ្វីទើបតែមករឹបអូសឥឡូវនេះ? ហេតុអ្វីទើបតែរឹបអូសបន្ទាប់ពីលោក គឹម សុខ ចេញពីពន្ធនាគារ?»។
លោក គឹម សុខ ដែលទើបតែចេញពីពន្ធនាគារត្រូវបានសាលាដំបូងរាជធានីភ្នំពេញចេញដីកាបង្គាប់ឲ្យចូលខ្លួនសាជាថ្មីនៅថ្ងៃទី ១៤ ខែកញ្ញា តែអ្នកវិភាគរូបនេះកំពុងគេចខ្លួន ក្រោយពីលោក ហ៊ុន សែន នាយករដ្ឋមន្ត្រីបញ្ជាឲ្យមេធាវីគណបក្សប្រជាជនតាមទារលុយសំណងជំងឺចិត្តប្រហាក់ប្រហែលជា ២០ ម៉ឺនដុល្លារសហរដ្នអាមេរិកពាក់ព័ន្ធបណ្ដឹងដែលបានចោទគណបក្សប្រជាជនជាអ្នកនៅពីក្រោយឃាតកម្មបាញ់សម្លាប់លោក កែម ឡី។
រឿងនេះធ្វើឲ្យលោក គឹម សុខ ជាប់គុក ១៨ ខែ ហើយត្រូវបានតុលាការដោះលែងកាលពីថ្ងៃទី ១៧ ខែសីហា ឆ្នាំ ២០១៨ ដោយផុតអាជ្ញាយុកាល (ផុតកំណត់ទោសដែលជាប់ពន្ធនាគារ)៕ PS