ភ្នំពេញ: អាជ្ញាធរខណ្ឌសែនសុខ និងមន្ត្រីមន្ទីរសាធារណការ និងដឹកជញ្ជូនរាជធានីភ្នំពេញបានបិទយានដ្ឋានកែច្នៃ និងជួសជុលរថយន្ដខុសច្បាប់ជាង ៤០ ទីតាំង ក្នុងចំណោម ១១០ ទីតាំង នៅក្នុងខណ្ឌសែនសុខ បន្ទាប់ពីពួកគេមិនគោរពតាមការអប់រំណែនាំរបស់អាជ្ញាធរនាពេលកន្លងមក។
លោកស្រី បុប្ផា ផានី អនុប្រធានមន្ទីរសាធារណការ និងដឹកជញ្ជូនរាជធានីភ្នំពេញបានថ្លែងពីថ្ងៃចន្ទថា នៅថ្ងៃទី ២៤ ខែសីហា លោកស្រីបានសហការជាមួយអាជ្ញាធរមូលដ្ឋាន និងសមត្ថកិច្ចពាក់ព័ន្ធចុះបិទអាជីវកម្មយានដ្ឋានខុសច្បាប់ជាង ៤០ ទីតាំង នៅក្នុងខណ្ឌសែនសុខក្រោយពីម្ចាស់អាជីវកម្មទាំងអស់នេះបំពានបម្រាម និងកិច្ចសន្យារបស់អាជ្ញាធរ។
លោកស្រីបន្តថា មន្ត្រីជំនាញបានចុះត្រួតពិនិត្យយានដ្ឋានស្ថិតក្នុងខណ្ឌសែនសុខទាំងអស់មានយានដ្ឋានសរុបចំនួន ១១០ ទីតាំង ដែលជាកន្លែងកាត់តរថយន្ត ជួសជុល និងទីតាំងដំឡើងរថយន្តគ្រប់ប្រភេទ។ ក្នុងនោះមន្ត្រីរកឃើញចំនួនជាង ៤០ ទីតាំង គ្មានច្បាប់អនុញ្ញាត ហើយបិទអាជីវកម្មតែម្ដង។
លោកស្រីបន្តថា៖ «យើងធ្លាប់បានធ្វើការណែនាំ អប់រំ និងធ្វើកិច្ចសន្យាជាបន្តបន្ទាប់ ប៉ុន្ដែពួកគាត់ដែលជាម្ចាស់អាជីវកម្មមិនព្រមស្ដាប់តាមការណែនាំដូច្នេះយើងត្រូវតែបិទចោលទាំងស្រុងតែម្ដង។ ជុំវិញនីតិវិធីបញ្ជូនសំណុំរឿងទៅតុលាការ ឬមិនបញ្ជូនគឺខ្ញុំទុកលទ្ធភាពឲ្យសាលារាជធានីភ្នំពេញចាត់ចែងនៅពេលក្រោយទៀត ប៉ុន្ដែអ្វីដែលជាបញ្ហាចំពោះមុខនេះ គឺយើងចុះទៅបិទទីតាំងគ្មានច្បាប់សិន»។
លោកស្រី ផានី បន្ថែមថាយានដ្ឋានជួសជុលរថយន្តក្នុងរាជធានីភ្នំពេញសរុបមានចំនួន ៩៧១ ទីតាំង ក្នុងនោះគ្មានច្បាប់អនុញ្ញាតចំនួន ៣៩០ ទីតាំង ដែលមន្ទីរជំនាញ គ្រោងនឹងសហការជាមួយសមត្ថកិច្ចពាក់ព័ន្ធចុះបិទអាជីវកម្មជាបន្ដបន្ទាប់បន្ថែមទៀត។
លោក ម៉ូវ ម៉ានិត អភិបាលខណ្ឌសែនសុខបានបដិសេធធ្វើអត្ថាធិប្បាយជុំវិញករណីនេះ ដោយលោកថ្លែងថាកំពុងជាប់រវល់ការងារតាមបណ្ដាខេត្ត។
ប៉ុន្តែ លោក សក់ ច័ន្ទកញ្ញារិទ្ធ អភិបាលរងខណ្ឌសែនសុខបានថ្លែងថា ម្ចាស់អាជីវកម្មយានដ្ឋានទាំងអស់នេះត្រូវបានអាជ្ញាធរចុះទៅព្រមាន អប់រំ ណែនាំ និងធ្វើកិច្ចសន្យាជាច្រើនលើករួចមកហើយ ប៉ុន្ដែពួកគាត់មិនព្រមស្ដាប់តាមអនុសាសន៍របស់អាជ្ញាធរទេ។ ដូច្នេះអាជ្ញាធរ និងមន្ត្រីជំនាញចុះបិទអាជីវកម្មពួកគាត់តែម្ដង ដើម្បីជាការព្រមានទៅដល់ម្ចាស់យានដ្ឋានផ្សេងៗទៀត។
លោកបន្តថា ប្រសិនម្ចាស់អាជីវកម្មណាមួយចង់បើកដំណើរការឡើងវិញ ត្រូវតែដាក់ពាក្យសុំមកអាជ្ញាធរ និងដាក់ទៅមន្ត្រីជំនាញមន្ទីរសាធារណការ និងដឹកជញ្ជូនរាជធានីភ្នំពេញឲ្យបានត្រឹមត្រូវតាមផ្លូវច្បាប់។
លោក ច័ន្ទកញ្ញារិទ្ធ បន្តថា នៅមុនពេលអនុញ្ញាតឲ្យបើកអាជីវកម្មឡើងវិញ មន្ត្រីជំនាញនឹងចុះទៅត្រួតពិនិត្យទីតាំងជាក់ស្ដែង និងសកម្មភាពផ្ទាល់ដើម្បីចៀសវាងការប្រព្រឹត្តល្មើសច្បាប់បន្តទៀត។
លោកបញ្ជាក់ថា៖ «បើគាត់ចង់បើកឡើងវិញ គឺត្រូវទៅបំពេញបែបបទថ្មីឡើងវិញ បើមិនអ៊ីចឹងគេបិទលែងឲ្យធ្វើអាជីវកម្មរហូតហ្នឹង ហើយខាងខ្ញុំបានត្រឹមតែណែនាំហ្នឹងហើយ ហើយរឿងគេអនុញ្ញាត ឬមិនអនុញ្ញាតឲ្យបើកឡើងវិញអាហ្នឹងជារឿងរបស់មន្ត្រីជំនាញយើង»។
គួររំឭកថា លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន កាលពីអំឡុងខែធ្នូ ឆ្នាំ ២០១៩ បានស្នើឲ្យអាជ្ញាធររាជធានី-ខេត្ដសហការជាមួយមន្ទីរសាធារណការ និងដឹកជញ្ជូនរាជធានី-ខេត្ដត្រូវចុះបិទកន្លែងយានដ្ឋានជួសជុល និងយានដ្ឋានកែច្នៃ ដំឡើងយានយន្ដខុសលក្ខណៈបច្ចេកទេសដែលអត់មានច្បាប់ឲ្យអស់ត្រឹមឆ្នាំ ២០២០ នេះ។ ដោយឡែកនៅឆ្នាំ ២០២០ នេះ លោកចង់ឲ្យគ្រប់យានដ្ឋានជួសជុល ឬយានដ្ឋានកែច្នៃ ដំឡើងយានយន្ដទាំងអស់គឺមានច្បាប់ និងបច្ចេកទេសត្រឹមត្រូវទាំងអស់៕