ភ្នំពេញៈ មន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ខ្លួនកំពុងប្រមូល និងគ្រោងកើបសំរាមចេញពីប្រឡាយទឹកស្អុយ ដែលប្រជាពលរដ្ឋបានបោះចូលនៅសប្តាហ៍ក្រោយ ហើយបានអំពាវនាវឲ្យប្រជាពលរដ្ឋមេត្តាទុកដាក់សំរាមឲ្យបានត្រឹមត្រូវ ចៀសវាងបោះសំរាមចូលក្នុងប្រឡាយ ដែលការប្រកាសនេះ បន្ទាប់ពីប្រជាពលរដ្ឋបានរិះគន់រឿងសំរាមអណ្តែតស្អេកស្កះនៅពេញប្រឡាយដោយគ្មានការអើពើពីអាជ្ញាធរពាក់ព័ន្ធ។
ប៉ុន្តែលោក ដួង ច័ន្ទសារ៉ាត ប្រធានអង្គភាពលូទឹក បូមទឹកនិងស្ថានីយចម្រោះសម្អាតនៃមន្ទីរសាធារណការ និងដឹកជញ្ជូនរាជធានីភ្នំពេញបាននិយាយពីម្សិលមិញថា ករណីសំរាមពេញប្រឡាយទឹកស្អុយនេះ គឺមកពីប្រជាពលរដ្ឋខ្លួនឯង ដែលតែងតែបោះចោលសំរាមពាសវាលពាសកាល ជាពិសេសបោះចូលក្នុងលូ ឬប្រឡាយបើទោះជាមានការផ្សព្វផ្សាយពីភាគីពាក់ព័ន្ធជុំវិញការទុកដាក់សំរាមឲ្យបានត្រឹមត្រូវក៏ដោយ។
លោក ច័ន្ទសារ៉ាត បន្តថា ជាទូទៅអាជ្ញាធរមានផែនការក្នុងការប្រមូលសំរាមចេញពីក្នុងប្រឡាយចំនួន ៤ ដង ក្នុង ១ ឆ្នាំ និងធ្វើជាប្រចាំដោយការកៀរសំរាមដែលអណ្តែតក្នុងប្រឡាយជុំវិញរាជធានីភ្នំពេញយកមកផ្ទុកទុកនៅកន្លែងតែមួយ គឺនៅចុងប្រឡាយបឹងត្របែក និងយកគ្រឿងចក្រកើបចេញនៅពេលដល់ពេលកំណត់។
លោកបញ្ជាក់ថា៖ «គាត់រិះគន់ តែសំរាមគាត់អ្នកបោះចូលលូ ហើយខ្ញុំអ្នកប្រមូលហ្នឹង មិនមែនប្រមូលរាល់ថ្ងៃណា គ្នាយើងតិច ប្រហែលជា ១០ នាក់អីហ្នឹង។ អ៊ីចឹងយើងរុញកៀរតាំងពីក្រោយមន្ទីរពេទ្យរបេង ហើយមកឲ្យនៅចុងប្រឡាយនេះដោយរង់ចាំគ្រឿងចក្រកាយ និងកើបចេញម្តង។ ខ្ញុំសំណូមពរដល់ប្រជាពលរដ្ឋកុំឲ្យបោះសំរាមចូលប្រឡាយគួរដាក់តាមគោលដៅ ដែលអាជ្ញាធរណែនាំព្រោះខាងក្រុមហ៊ុនប្រមូលសំរាមគេមិនប្រមូលទេបើនៅក្នុងប្រឡាយនោះ»។
បើតាមលោក ច័ន្ទ សារ៉ាត ក្នុងមួយឆ្នាំៗក្រុមការងារ បានប្រមូលសំរាមចេញពីប្រឡាយ ដែលពលរដ្ឋបានបោះចូលក្នុងប្រឡាយប្រមាណជាង ១ ម៉ឺនតោន ខណៈសំរាមជាសំណល់រឹងនៅកម្ពុជាបានកើនឡើងដល់ជិត ១ លានតោនកន្លះក្នុងឆ្នាំ ២០១៧។
របាយការណ៍របស់សហភាពអឺរ៉ុប មានថង់ប្លាស្ទិកប្រមាណជាង ១០ លានថង់ត្រូវគេប៉ាន់ប្រមាណថា បានប្រើប្រាស់ក្នុងរាជធានីភ្នំពេញជារៀងរាល់ថ្ងៃ។
លោក សឿង សារ៉ន នាយកប្រតិបត្តិនៃអង្គការសមាគមធាងត្នោត ដែលធ្លាប់បានធ្វើការស្រាវជ្រាវស្តីពីអភិបាលកិច្ចទីក្រុង «ការគ្រប់គ្រងកាកសំណល់នៅក្នុងរាជធានីភ្នំពេញ» បានប្រាប់ថា ការគ្រប់គ្រងសំរាម គឺជាកាតព្វកិច្ចនៃការចូលរួមទាំងអស់គ្នាចៀសវាងការចោទប្រកាន់គ្នាទៅវិញទៅមក គឺភាគីពាក់ព័ន្ធ ជាពិសេសពលរដ្ឋ ត្រូវរួមគ្នាគ្រប់គ្រងសំរាមឲ្យបានត្រឹមត្រូវ។
លោកបញ្ជាក់ថា៖ «ចៀសវាងដាក់កំហុសគ្នាទៅវិញទៅមក គឺជាការទទួលខុសត្រូវទាំងអស់គ្នា ជារួមមក គឺសហគមន៍ប្រជាពលរដ្ឋខ្លួនឯង ត្រូវចេះទុកដាក់សំរាម និងក្រុមហ៊ុនដែលមានការទទួលខុសត្រូវទុកដាក់សំរាម ត្រូវធានា និងកំណត់ទីតាំង និងពេលវេលាឲ្យបានច្បាស់លាស់ ក្នុងការប្រមូលសំរាម។ ចំណែកអាជ្ញាធរ ត្រូវចែករំលែកព័ត៌មាន និងអនុវត្តឲ្យបានត្រឹមត្រូវ ប្រាកដថា ពលរដ្ឋគាត់មានការយល់ដឹង និងទទួលបានព័ត៌មានគ្រប់គ្រាន់ទាក់ទងនឹងបញ្ហាសំរាមនេះ»។
តាមអនុក្រឹត្យស្តីពីការគ្រប់គ្រងសំរាម និងសំណល់រឹង និងរាវ នៅទីប្រជុំជនឆ្នាំ ២០១៥ បានកំណត់ថា ចំពោះជនទាំងឡាយណា ដែលមិនគោរពអនុវត្ត ការវេចខ្ចប់ ការញែកឬបែងចែក និងទុកដាក់សំរាមតាមដងផ្លូវ មិនបានសមស្របតាមពេលវេលាដែលបានកំណត់ ការបោះចោលសំរាមតាមទីសាធារណៈ តាមដងផ្លូវ ការដុតសំរាមនៅទីប្រជុំជនសាធារណៈ មិនបានត្រឹមត្រូវ នឹងត្រូវផាកពិន័យជាប្រាក់ចាប់ពី ១ ម៉ឺនរៀលទៅ ២០ ម៉ឺនរៀលទៅតាមប្រភេទសំរាម៕