ស្ទឹងត្រែងៈ អាជ្ញាធរកម្ពុជា និងឡាវបានជូនដំណឹងឲ្យពលរដ្ឋខេត្តស្ទឹងត្រែងនៃកម្ពុជា ត្រៀមខ្លួនទប់ទល់គ្រោះមហន្តរាយពីការបាក់ទំនប់វារីអគ្គិសនីរបស់ឡាវ ដែលអាចមានផលប៉ះពាល់ខ្លាំង ខណៈនៅឯខេត្ដរតនគិរី ទឹកទន្លេសេសានបានជន់លិចស្រុក ៤ ហើយ គិតត្រឹមថ្ងៃទី ២៤ ខែកក្កដាដែលកម្ពស់ទឹកទន្លេសេសានបានឡើងដល់ ៩,៣៤ ម៉ែត្រគឺលើសកម្រិតប្រកាសអាសន្នចំនួន ១,៣៤ ម៉ែត្រ។ នេះបើតាមការជូនដំណឹងពីអាជ្ញាធរកម្ពុជាពីម្សិលមិញ។
តាមការជូនដំណឹងពីក្រសួងធនធានទឹក និងឧតុនិយមឲ្យដឹងថា តំបន់មួយចំនួនដែលត្រូវជន់លិចនោះមាននៅក្នុងស្រុកតាវែង អូរយ៉ាដាវ អណ្តូងមាស និងស្រុកវ៉ើនសៃ។
លោក ថង សាវុន អភិបាលខេត្តរតនគិរីឲ្យដឹងពីម្សិលមិញថា មកដល់ពេលនេះខាងខេត្ដកំពុងបូកសរុបផលប៉ះពាល់។ «យើងអត់ទាន់មានរបាយការណ៍សរុបទេ ខាងយើងកំពុងបូកសរុប»។
បើតាមការជូនដំណឹងរបស់ក្រសួងធនធានទឹក និងឧតុនិយមថ្ងៃទី ២៤ កម្ពស់ទឹកទន្លេសេសានបានឡើងហួសកម្រិតត្រូវប្រកាសអាសន្នបណ្ដាលឱ្យលិចលង់ផ្ទះប្រជាពលរដ្ឋ ហើយអាជ្ញាធរបានជម្លៀសប្រជាជនទៅរកទីទួលសុវត្ថិភាព។
សេចក្តីជូនដំណឹងបញ្ជាក់ថា៖ «ក្នុងនោះទឹកជំនន់បានលិចភូមិចំនួន ២ ខ្លាំងជាងគេគឺភូមិយ៉ន ឃុំតាវែងក្រោម និងភូមិអូរតាបូក ឃុំតាវែងលើ ស្រុកតាវែង ដែលអាជ្ញាធរត្រូវជួយសង្គ្រោះមុនគេ»។
នាល្ងាចថ្ងៃម្សិលមិញដដែលនេះដែរក្រសួងធនធានទឹកបានប្រកាសដំណឹងទាន់ហេតុការណ៍ឲ្យប្រជាពលរដ្ឋរស់នៅខេត្តស្ទឹងត្រែងប្រុងប្រយ័ត្ន និងឲ្យអាជ្ញាធរខេត្តត្រៀមជម្លៀសពលរដ្ឋទៅទីទួលសុវត្ថិភាព បន្ទាប់ពីទំនប់វារីអគ្គិសនី Se-Pian Se Nam Noi នៅប្រទេសឡាវបានបាក់នៅរសៀលថ្ងៃទី ២៤ ខែកក្កដា។
ជាមួយគ្នានេះសាលាខេត្ដ Attapeu នៃប្រទេសឡាវបានជូនដំណឹងថា ការបាក់ទំនប់វារីអគ្គិសនី Se-Pian Se Nam Noi នេះ «នឹងបង្កផលប៉ះពាល់ធ្ងន់ធ្ងរ។ ដូច្នេះសូមសាលាខេត្ដស្ទឹងត្រែងត្រៀមខ្លួនដើម្បីទប់ស្កាត់គ្រោះមហន្ដរាយនេះ»។
សេចក្ដីជូនដំណឹងបញ្ជាក់ទៀតថា ទំនប់វារីអគ្គិសនីនៅក្នុងខេត្ត Attapeu នៅឡាវ និងមានចម្ងាយប្រមាណ ៧០ គីឡូម៉ែត្រពីព្រំដែនកម្ពុជា-ឡាវបានបាក់។ ទំនប់នេះមានសមត្ថភាពស្តុកទឹកបានប្រមាណ ៥ ពាន់លានម៉ែត្រគុប និងអាចផលិតថាមពលអគ្គិសនីបាន ៤១០ មេហ្គាវ៉ាត់។ ទឹកដែលហូរចេញពីតំបន់ទំនប់នឹងត្រូវហូរចូលមកក្នុងទន្លេសេកុង។
ក្រសួងបានបញ្ជាក់ឲ្យប្រជាពលរដ្ឋដែលរស់នៅតាមដងទន្លេសេកុង ពិសេសអាជ្ញាធរខេត្តស្ទឹងត្រែង ក្រសួងស្ថាប័នពាក់ព័ន្ធជ្រាបជាព័ត៌មាន និងត្រៀមលក្ខណៈជម្លៀសបងប្អូនប្រជាពលរដ្ឋទៅកាន់ទីទួលសុវត្ថិភាព។
ប៉ុន្តែភ្នំពេញប៉ុស្ដិ៍មិនអាចសុំការបកស្រាយពីមន្ដ្រីគ្រប់គ្រងគ្រោះមហន្ដរាយ ដើម្បីសាកសួរព័ត៌មាននៃផលប៉ះពាល់នានាអំពីទឹកជំនន់នេះបានទេកាលពីថ្ងៃម្សិលមិញ។
នៅខេត្តត្បូងឃ្មុំឯណោះវិញគិតត្រឹមល្ងាចថ្ងៃទី ២៤ ខែកក្កដាទឹកជំនន់បានធ្វើឲ្យដាច់ផ្លូវលំមួយចំនួននៅមូលដ្ឋានស្រុកត្បូងឃ្មុំដែលនាំឲ្យពិបាកធ្វើដំណើរ និងដឹកសន្លឹកឆ្នោតទៅកាន់ការិយាល័យបោះឆ្នោត ប៉ុន្ដែមិនបានលិចដល់ការិយាល័យបោះឆ្នោតនោះទេ។ នេះបើតាមការឲ្យដឹងពីលោក សុខ ឈិន ប្រធានការិយាល័យបោះឆ្នោត ខេត្តត្បូងឃ្មុំ។
លោកបន្ដថា៖ «ទឹកដែលហូរចាក់នៅពាក់កណ្ដាលភូមិពាមជីលាំងនោះគឺជាព្រែកទេ មិនមានប៉ះពាល់ដល់ការិយាល័យបោះឆ្នោតទេ ព្រោះការិយាល័យនៅម្ខាងទៀតនៃព្រែក»។
លោក ឈិន ថា មធ្យោបាយនៃការនាំយកសន្លឹកឆ្នោតទៅការិយាល័យបោះឆ្នោតក្រុមការងារអាចនឹងដឹកជញ្ជូនតាមទូក ខណៈការិយាល័យបោះឆ្នោតស្ថិតនៅម្ខាងនៃព្រែកមានចំនួន ៧ ការិយាល័យ។
ខណៈនេះដែរប្រជាពលរដ្ឋប្រមាណ ៥៧៨ គ្រួសារដែលរងគ្រោះដោយសារជំនន់ទឹកភ្លៀងនៅឃុំចំនួន ៣ ក្នុងស្រុកស្រែអំបិល ខេត្តកោះកុង ពីម្សិលមិញ បានទទួលអំណោយព្រះមហាក្សត្រនរោត្តម សីហមុនី។
លោក គង់ សំអុល រដ្ឋមន្ត្រីក្រសួងព្រះបរមរាជវាំងបញ្ជាក់ថាព្រះករុណា ព្រះបាទនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាព្រោះតែទឹកព្រះទ័យអាណិតស្រឡាញ់ប្រជានុរាស្ត្រគ្រប់ពេលវេលាទើបព្រះអង្គរាជតម្រិះចាត់បញ្ជូនរូបលោកនាំយកព្រះរាជអំណោយមកចែកជូនដល់ប្រជាពលរដ្ឋចំនួន ៥៧៨ គ្រួសារដែលរស់នៅក្នុងឃុំដងពែង ឃុំស្រែអំបិល និងឃុំជីខលើ ស្រុកស្រែអំបិលក្នុងគ្រារងការខូចខាតដីស្រែចម្ការ ផ្ទះសំបែង សត្វពាហនៈ និងផ្លូវគមនាគមន៍នេះ។
លោកស្រី មិថុនា ភូថង អភិបាលខេត្តកោះកុងបានឲ្យដឹងថា ស្ថានភាពជំនន់ទឹកភ្លៀងបានធូរស្រាលខ្លះហើយ រីឯពលរដ្ឋមួយចំនួនវិលត្រឡប់ទៅលំនៅឋានវិញហើយដែរ។
លោកស្រីថា៖ «គ្មានពលរដ្ឋណាម្នាក់បាត់បង់ជីវិតដោយទឹកជំនន់នេះឡើយ ក្រៅពីការខូចស្រូវស្រែដំណាំ ផ្ទះសំបែង សត្វពាហនៈ និងផ្លូវគមនាគមន៍»។
គួរបញ្ជាក់ថាព្រះរាជអំណោយដែលផ្តល់ជូនប្រជាពលរដ្ឋរងគ្រោះជំនន់ទឹកភ្លៀងខាងលើក្នុងមួយគ្រួសារៗទទួលបានអង្ករ ៥០ គីឡូក្រាម ត្រីខ ២០ កំប៉ុង កៅស៊ូតង់ចំនួន ២ អាវយឺត ១ មី ២ កេស ថវិកា ៤០ ម៉ឺនរៀល និងសម្ភារប្រើប្រាស់មួយចំនួនទៀត។
គិតត្រឹមថ្ងៃទី ១៩ ខែកក្កដា ទឹកជំនន់បានលិចខេត្តមួយចំនួនក្នុងនោះផ្ទះពលរដ្ឋជន់លិចអស់ ១៧-៨៦ ខ្នងដីស្រែរាប់ពាន់ហិកតា៕