The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ប្រាប់​ពលរដ្ឋថា​ ប៉ះពាល់​កិតិ្តយស​ជាតិ បើ​រស់​នៅ​ក្បែរ​ព្រលាន​យន្ត​ហោះ

អាជ្ញាធរ​ប្រាប់​ពលរដ្ឋថា​ ប៉ះពាល់​កិតិ្តយស​ជាតិ បើ​រស់​នៅ​ក្បែរ​ព្រលាន​យន្ត​ហោះ

Content image - Phnom Penh Post
លោកយន្ត មីន ពេលជួបពលរដ្ឋរស់នៅក្បែរព្រលានយន្តហោះកងកេង ខេត្តព្រះសីហនុ ថ្ងៃទី១៧ ខែធ្នូ​។ រូបថត សហ​ការី

អាជ្ញាធរ​ប្រាប់​ពលរដ្ឋថា​ ប៉ះពាល់​កិតិ្តយស​ជាតិ បើ​រស់​នៅ​ក្បែរ​ព្រលាន​យន្ត​ហោះ

ព្រះសីហនុៈ អភិបាល​ខេត្ដ​ព្រះ​សីហនុ ​លោក​ យន្ត មីន​ ថ្មី​ៗ​នេះ​បាន​ដឹក​នាំ​ក្រុម​ការ​ងារ​ចុះ​ទៅ​ដល់​ផ្ទះ​ប្រជា​ពលរដ្ឋ​ជាង ៦០ ​គ្រួសារ​ ដើម្បី​សិក្សា​ និង​ពន្យល់​ប្រជា​ពលរដ្ឋ​ដែល​រស់​នៅ​ជាប់​របង​ព្រលាន​យន្ដ​ហោះ​កងកេង​ ស្ថិត​នៅ​ស្រុក​ព្រៃ​នប់ ខេត្ត​ព្រះសីហនុ ថា​ ប៉ះពាល់​មុខ​មាត់​ជាតិ​ដោយ​ប្រាប់​ឲ្យ​ពួក​គេ​ផ្លាស់​ប្ដូរ​លំ​នៅ​ថ្មី​ ខណៈ​រាជ​រដ្ឋាភិបាល​មាន​គម្រោង​ពង្រីក​ព្រលាន​យន្ដ​ហោះ​នោះ​។

ក្នុង​ជំនួប​កាល​ពី​ថ្ងៃ​ទី ១៧ ខែធ្នូ ​​ ជា​មួយ​ប្រជា​ពលរដ្ឋ​ ៦២ គ្រួសារ ​នៅ​សាលា​ឃុំ​រាម ស្រុក​ព្រៃ​នប់ ខេត្ដ​ព្រះសីហនុ​ លោក ​យន្ត មីន ​បាន​ពន្យល់​ប្រជា​ពលរដ្ឋ​អំពី​ផល​ប៉ះពាល់​ដល់​មុខ​មាត់​ប្រទេស​ជាតិ ​និង​ប៉ះពាល់​ដល់​ព្រលាន​យន្ត​ហោះ​អន្តរ​ជាតិ​ខេត្ត​ព្រះ​សីហនុ​ (ព្រលាន​យន្តហោះ​កងកេង) ចំពោះ​ការ​រស់​នៅ​របស់​ប្រជា​ពលរដ្ឋ​ក្បែរ​ព្រលាន​យន្ដ​ហោះ​នេះ​។ ទោះ​បី​ជា​យ៉ាង​ណា ​នៅ​ពេល​ទាក់ទង​ពី​ម្សិលមិញ ​លោក​យន្ត មីន ​បដិសេធ​ធ្វើ​អត្ថា​ធិប្បាយ​ ដោយ​រុញ​ឲ្យ​សួរ​អ្នក​នាំ​ពាក្យ។

លោក​ឱ សារឿន​ អ្នក​នាំ​ពាក្យ​សាលា​ខេត្ដ​ព្រះ​សីហនុ ​បាន​ប្រាប់​ភ្នំពេញ​ប៉ុស្តិ៍ ពី​ម្សិលមិញ​ថា ​ជា​ជំហាន​ដំបូង​នេះ​ រដ្ឋបាល​ខេត្ដ​នៅ​មិន​ទាន់​មាន​គោល​ការណ៍​ច្បាស់​លាស់​ណា​មួយ​ដើម្បី​ដោះស្រាយ​ចំពោះ​ការ​ផ្លាស់​ប្ដូរ​លំនៅ​របស់​ប្រជា​ពលរដ្ឋ​នោះ​ទេ​។

លោក​ បញ្ជាក់​ថា​៖ «ជា​រួម​គឺ​យើង​ចុះ​សិក្សា​សិន ​​ជា​លទ្ធផល​ បន្ទាប់​ពី​ការ​សិក្សា​បឋម​ គឺ​ជា​សំណូម​ពរ​របស់​ប្រជា​ពលរដ្ឋ​ទេ ​ពួក​គាត់​ស្នើ​សុំ​ទទួល​យក​នូវ​គោល​ការណ៍​ទៅ​តាម​តម្លៃ​ទីផ្សារ ​ដែល​នេះ​ជា​សំណូម​ពរ​របស់​ពួក​គាត់។​ ប៉ុន្ដែ​ការ​ឆ្លើយ​តប​យ៉ាង​ណា ​យើង​អត់​ទាន់​អាច​ជម្រាប​ជូន​ទេ​ ដោយ​សារ ​យើង​ត្រូវ​ធ្វើ​របាយ​ការណ៍​ដាក់​ជូន​ទៅ​រាជ​រដ្ឋាភិបាល​ជា​មុន​សិន​ដើម្បី​ទុក​ឲ្យ​លោក​ជា​អ្នក​សម្រេច​»។

បើ​តាម​លោក ​សារឿន ​តាម​រយៈ​ជំនួប​បឋម​ជា​មួយ​ប្រជា​ពលរដ្ឋ​នោះ ​រដ្ឋបាល​ខេត្ត​ព្រះសីហនុ​មាន​បំណង​ដោះ​ស្រាយ​រៀប​ចំ​ទី​តាំង​ដី​ជា​ភូមិ​មួយ​ចម្ងាយ​ពី​ទី​តាំង​បច្ចុប្បន្ន​ប្រមាណ​ជា​ ២ គីឡូ​ម៉ែត្រ ​ដែល​មាន​ការ​អភិវឌ្ឍ​ រៀបចំ​ហេដ្ឋា​រចនា​សម្ព័ន្ធ​ទឹក ​ភ្លើង ដោយ​ក្នុង​ ១ ​គ្រួសារ​ទទួល​បាន​ដី​ទំហំ ១៥​ គុណ ២៥ ​ម៉ែត្រ ​ដែល​មាន​កម្ម​សិទ្ធិ​ត្រឹម​ត្រូវ​ស្រប​ច្បាប់​ជូន​ប្រជា​ពលរដ្ឋ​ផង​ដែរ​។

ឆ្លើយ​តប​ទៅ​នឹង​ការ​ស្នើ​សុំ​ដោះ​ដូរ​លំនៅ​ឋាន​របស់​ប្រជា​ពល​រដ្ឋ​នេះ ប្រជា​ពលរដ្ឋ​ទាំង ៦២ ​គ្រួសារ ​មិន​យល់​ព្រម​ចំពោះ​ការ​ដោះ​ដូរ​ជា​ដី​ដែល​រដ្ឋបាល​ខេត្ដ​បាន​កំណត់​នោះ​ទេ​ ដោយ​​ពួក​គាត់​បាន​ឯក​ភាព​គ្នា មាន​បំណង​​ដោះ​ដូរ​ជា​ថវិកា (លក់​ដី​នោះ​) ទៅ​តាម​តម្លៃ​ទីផ្សារ​ក្នុង​ក្រុង​ព្រះ​សីហនុ​ ទើប​ពួក​គាត់​យល់​ព្រម​ផ្លាស់​ប្ដូរ​។

លោក ឡាំ វ៉ា ប្រជា​ពលរដ្ឋ ​១ ​រូប​ដែល​រស់​នៅ​ក្បែរ​ព្រលាន​យន្ដហោះ កង​កេង​ និង​ជា​ប្រជា​ពលរដ្ឋ​ដែល​​បាន​ចូល​រួម​ក្នុង​ជំនួប​​ជា​មួយ​លោក​អភិបាល​ខេត្ដ​ព្រះសីហនុ​កាល​ពី​ថ្ងៃ​ចន្ទ​ បាន​បញ្ជាក់​ថា៖ «ខេត្ដ​បាន​ឲ្យ​ប្រជា​ពលរដ្ឋ​ដូរ​ដី​ទៅ​នៅ​តំបន់​​​ផ្សេង ប៉ុន្ដែ​ប្រជា​ពលរដ្ឋ​មិន​ព្រម​ទាំង​អស់​គ្នា គឺ​មិន​ព្រម​ផ្លាស់​ប្ដូរ​ដាច់​ខាត ដោយ​យើង​ទាំង​អស់​ស្នើ​សុំ​សំណង​ជា​ទឹក​ប្រាក់​វិញ​»។

លោក​បន្ថែម​ថា ​មូល​ហេតុ​ដែល​ពលរដ្ឋ​មិន​ព្រម​តាម​ការ​ស្នើ​របស់​ខេត្ដ​ ព្រោះ​ពលរដ្ឋ​មិន​មែន​ជា​អ្នក​មក​រស់​នៅ​អនា​ធិបតេយ្យ​ទេ។ ​លោក​ឡាំ វ៉ា ​អះអាង​ថា​ ប្រជា​ពលរដ្ឋ​មក​នៅ​កន្លែង​នេះ​ (ទីតាំង​ក្បែរ​របង​ព្រលាន​យន្ដ​ហោះ​​កងកេង​)​ តាំង​ពី​ឆ្នាំ​ ១៩៨០​ ជាង​មក ​គឺ​អាជ្ញាធរ​ជា​អ្នក​យក​ក្រុម​ប្រជា​ពលរដ្ឋ​ទាំង​នោះ​មក​រស់​នៅ​តំបន់​នេះ ​គឺ​អាជ្ញាធរ​ជា​អ្នក​ចែក​ដី​នៅ​កន្លែង​នេះ​ឲ្យ​ប្រជា​ពលរដ្ឋ​រស់​នៅ​តែ​ម្ដង​។

លោក​ ឡាំ វ៉ា ​បញ្ជាក់​ថា​៖ «អ៊ីចឹង​ពួក​ខ្ញុំ​ទាំង​អស់​គ្នា​គឺ​សុំ​សំណង​ឲ្យ​សមរម្យ​ គឺ​សុំ​សំណង​ទៅ​តាម​តម្លៃ​ទីផ្សារ​ដីធ្លី​នៅ​ក្នុង​ខេត្ដ​ព្រះ​សីហនុ​»។

បើ​តាម​លោក​ ឡាំ វ៉ា​ ប្រជា​ពលរដ្ឋ​ដែល​កំពុង​រស់​នៅ​ក្បែរ​របង​ព្រលាន​យន្ដហោះ​កងកេង​នោះ​មាន​ចំនួន​ជាង ៦០ ​គ្រួសារ និង​មាន​ផ្ទះ​ ៥២ ខ្នង​ផ្ទះ ​ដែល​មាន​ក្បាល​ដី​ចាប់​ពី​ ៦-២២ ម៉ែត្រ ​និង​បើ​សរុប​ផ្ទៃ​ដី​ប្រជា​ពលរដ្ឋ​ទាំង​អស់​មាន​ប្រមាណ​ជិត​ ១ ហិកតា​។

លោក​ ស៊ុន សុផាត​ តំណាង​សហគមន៍​ដីធ្លី​ខេត្ត​ព្រះសីហនុ ​ថ្លែង​ថា​ អាជ្ញាធរ​ខេត្ដ​ព្រះ​សីហនុ ​គួរ​តែ​មាន​ដំណោះ​ស្រាយ​ចំពោះ​ការ​ដោះ​ដូរ​ទី​លំនៅ​ឲ្យ​ប្រជា​ពលរដ្ឋ​ឲ្យ​មាន​ទឹក ​មាន​ភ្លើង នឹង​ហេដ្ឋា​រចនា​សម្ព័ន្ធ​សមរម្យ ​ព្រោះ​ប្រជា​ពលរដ្ឋ​ទាំង​នោះ ពួក​គាត់​សុទ្ធ​តែ​ជា​អ្នក​រស់​នៅ​ស្រប​ច្បាប់ និង​មករស់​នៅ​តាំង​ពី​ឆ្នាំ ១៩៨០ ជាង​មក​។

លោក​បន្ដ​ថា​៖ «ក្នុង​នាម​ខ្ញុំ​ជា​សហគមន៍​នៅ​ក្នុង​ខេត្ដ​ព្រះសីហនុ​នេះ ខ្ញុំ​សូម​សំណូម​ពរ ​អាជ្ញាធរ​ជួយ​រក​ទីតាំង​សមរម្យ​ នៅ​ជិត​ផ្សារ ​មាន​ហេដ្ឋា​រចនា​សម្ព័ន្ធ​ និង​រៀប​ចំផ្ទះ​សំបែង​ដល់​ពួក​គាត់ ​ព្រោះ​ពេល​នេះ​ ប្រជា​ពលរដ្ឋ​ ពួក​គាត់​បាន​រស់​នៅ​យូរ​ហើយ​ និង​បាន​សាង​សង់​ផ្ទះ​មាន​ផ្ទះ​ថ្ម​ក៏​មាន​ដែរ​»៕

អត្ថបទគួរចាប់អារម្មណ៍