The Phnom Penh Post Search

Search form

Logo of Phnom Penh Post newspaper Phnom Penh Post - អាជ្ញាធរ​ផ្អាក​សំណង់​កោះរ៉ុង




អាជ្ញាធរ​ផ្អាក​សំណង់​កោះរ៉ុង

Content image - Phnom Penh Post
សំណង់នៅលើកោះរ៉ុង។ រូបថត លាង ផាន់ណារ៉ា

អាជ្ញាធរ​ផ្អាក​សំណង់​កោះរ៉ុង

ខេត្ត​ព្រះសីហនុៈ អាជ្ញាធរ និង​សមត្ថកិច្ច​ចម្រុះក្នុង​ខេត្ត​ព្រះសីហនុ បាន​ដឹក​នាំ​កម្លាំង​ចុះ​ផ្អាក​ការ​ធ្វើ​សំណង់​បឹង​កាឡូ ស្ថិត​នៅ​ទីតាំង​កោះរ៉ុង និង​អះ​អាង​ជា​កោះ​ដែល​រដ្ឋាភិបាល​បាន​អនុញ្ញាត​ឲ្យ​តែ​ក្រុមហ៊ុន​រ៉ូយ៉ាល់​គ្រុបរបស់​ឧកញ៉ា គិត ម៉េង ធ្វើ​ការ​អភិវឌ្ឍ​តែ​ប៉ុណ្ណោះ។

លោក ឈិ​ត សុខុន អភិបាលខេត្ត​ព្រះសីហនុ បាន​ឲ្យ​ដឹង​ម្សិលមិញ​ថា សំណង់បឹង​កាឡូ​ជា​ច្រើន​ផ្ទះ និង​សំណង់​អគារ​បេតុង​ដែល​ជា​របស់​បុគ្គល​ឯកជន​ពីរ​រូប មិន​ត្រូវ​អនុញ្ញាត​ឲ្យ​សង់​បន្ត​ឡើយ ដោយ​សារ​មិន​មាន​ច្បាប់​អនុញ្ញាត​ពី​អាជ្ញាធរ។

ការ​ហាម​ឃាត់​នេះ​ត្រូវ​បាន​ធ្វើ​ឡើង​កាល​ពី​ថ្ងៃ​ ១ មិថុនា ខណៈ​សំណង់​ទាំង​នោះ ទើប​តែ​សាង​សង់​ពី​ពេល​ថ្មីៗ​នេះ​ប៉ុណ្ណោះ។​

លោក​បន្តថា៖ «ពួក​គេ​ធ្វើ​ទាំង​បំពាន​ច្បាប់ ដោយ​សារ​ពួក​គេ​ជា​អ្នក​មាន​ និង​ជា​ឧកញ៉ា ធ្វើ​ទាំង​គ្មាន​ច្បាប់​សោះ។ ឯ​អាជ្ញាធរ​នៅ​ទី​នោះ ​មាន​ត្រឹម​ថ្នាក់​សង្កាត់ និង​នគរបាល​ប៉ុស្តិ៍​ប៉ុណ្ណោះ មិន​ហ៊ាន​ធ្វើ​អី​ពួក​គេ​ឡើយ។ ទើប​អាជ្ញាធរ​ខេត្ត ចុះ​ទៅ​ផ្អាក។

ការ​សាង​សង់​នៅ​លើ​កោះរ៉ុង ក្រៅ​ពី​ក្រុមហ៊ុន​រ៉ូយ៉ាល់​គ្រុប​របស់​ឧកញ៉ា គិត​ម៉េង គឺ​មិន​អាច​អ្នក​ក្រៅ​ណា​មក​ធ្វើ​បាន​ឡើយ។ បើ​ប្រជាពលរដ្ឋ​នៅ​ទី​នោះ អាច​ត្រឹម​អាស្រ័យ​ផល​លើ​ដី​កោះ ដែល​ជា​របស់​រដ្ឋ​តែ​មិន​មាន​កម្មសិទ្ធិ​នៅ​ទី​នោះ​ទេ»។

លោក​បន្ត​ថា ម្ចាស់​កម្មសិទ្ធិ​សំណង់​ទាំង​ពីរ​កន្លែង​នៅ​លើ​កោះរ៉ុង ត្រូវ​បាន​អាជ្ញាធរ​ឲ្យ​ធ្វើ​កិច្ច​សន្យា​បញ្ឈប់​ការ​សាង​សង់​នោះ។

រ៉ូយ៉ាល់​គ្រុប ទទួល​សិទ្ធិ​ជួល​ ៩៩ ​ឆ្នាំ​កាល​ពី​ឆ្នាំ ​២០០៨ ពី​រដ្ឋាភិបាល​ដើម្បី​អភិវឌ្ឍ​ដី​កោះ​ទំហំ​ ៧៨ គីឡូម៉ែត្រ​ការ៉េ ដែល​ក្នុង​នោះ​មាន​ព្រលាន​យន្តហោះ​ផង​ដែរ។ ប៉ុន្តែ​អភិបាលខេត្ត​បាន​ឲ្យ​ដឹង​ថា ក្រុមហ៊ុន​លោក គិត ម៉េង នៅ​មិន​ទាន់​អភិវឌ្ឍ​អ្វី​ឲ្យ​ជា​ដុំ​កំភួន​នៅ​ឡើយ ហើយ​ការ​អភិវឌ្ឍ នៅ​ទី​នោះ​នឹង​មិន​ត្រូវ​ធ្វើ​ឲ្យ​ប៉ះ​ពាល់​ដល់​ប្រជាពលរដ្ឋ​ដែល​តាំង​លំ​នៅ​នៅ​ទី​នោះ​យូរ​យារ​មក​ហើយ ដែល​មាន​ប្រមាណ​​ ៦០០ គ្រួសារ​នោះ​ទេ។

ទាក់​ទង​បញ្ហា​នេះ មិន​អាច​ទាក់​ទង​លោក​ឧកញ៉ា គិត ម៉េង បាន​ទេ​កាល​ពី​ម្សិលមិញ៕

អត្ថបទគួរចាប់អារម្មណ៍