.jpg)
បុរសចិនបោះសំរាមចោលតាមទឹកបានសុំទោស។ រូបថត មន្ទីរបរិស្ថានខេត្ត
ព្រះសីហនុៈ បុរសជនជាតិចិនម្នាក់ជាបុគ្គលិកនៅកាស៊ីណូមួយត្រូវបានអាជ្ញាធរហៅទៅសួរនាំ និងពិន័យកាលពីចុងសប្តាហ៍មុន ដោយសារតែបោះចោលស្បោងសំរាមឲ្យហូរទៅតាមទឹកភ្លៀងនៅលើផ្លូវសាធារណៈដែលបណ្តាលឲ្យស្ទះលូនៅក្នុងសង្កាត់លេខ ៤ ក្នុងក្រុងព្រះសីហនុ។
មន្ទីរបរិស្ថាន និងសាលាក្រុងព្រះសីហនុបានហៅចុងភៅជាជនជាតិចិនម្នាក់នៅកាស៊ីណូញូវហ្គោលឌិនទៅធ្វើការសាកសួរ ក្រោយពីឃើញបុរសរូបនោះតាមវីដេអូឃ្លីបមួយនៅលើហ្វេសប៊ុកកំពុងតែធាក់ថង់គំនរសំរាមបង្ហូរចោលតាមទឹកភ្លៀងចេញពីមុខកាស៊ីណូនោះ។ មន្ទីរបរិស្ថានខេត្តបានឲ្យដឹងថា ជនជាតិចិនម្នាក់ឈ្មោះ WANG MU QUNG ត្រូវបានធ្វើការអប់រំ និងបង្ខំឲ្យទទួលការផាកពិន័យតាមច្បាប់ស្តីពីកិច្ចការពារបរិស្ថាន និងគ្រប់គ្រងធនធានធម្មជាតិ។
ទោះយ៉ាងណាលោក សាមុត សុធារិទ្ធិ ប្រធានមន្ទីរបរិស្ថានខេត្តព្រះសីហនុមិនអាចបញ្ជាក់ប្រាប់ពីទំហំទឹកប្រាក់ដែលត្រូវបានពិន័យនោះទេ។ លោក សុធារិទ្ធិ ថ្លែងកាលពីម្សិលមិញថា៖ «[នេះ] ជារឿងបុគ្គលមិនមែនជាចេតនារបស់ក្រុមហ៊ុនទេ។ ក្រុមហ៊ុនមកទទួលខុសត្រូវហើយ។ គេសន្យាជាមួយយើងថា មិនធ្វើអាហ្នឹងទៀតទេ។ គេនឹងអប់រំបន្ថែមលើបុគ្គលហ្នឹង»។
លោកឲ្យដឹងផងដែរថា ការបង្ហូរសំរាមបែបនេះធ្វើឲ្យកកស្ទះលូ ហើយកន្លងមកមន្ត្រីជំនាញក៏ធ្លាប់បានធ្វើការណែនាំដល់កាស៊ីណូនេះម្តងរួចមកហើយដែរ ក្រោយពីសង្កេតឃើញពីការវេចខ្ចប់ និងទុកដាក់សំរាមមិនបានត្រឹមត្រូវ។
លោកបន្ថែមថា ជនជាតិចិនម្នាក់នោះបានទទួលស្គាល់កំហុសរបស់ខ្លួន និងក៏បានសរសេរលិខិតជាភាសាចិន និងបកប្រែជាភាសាខ្មែរដើម្បីសុំទោសជាសាធារណៈ និងកុំឲ្យអ្នកផ្សេងយកគំរូតាមទង្វើមិនគាំពារបរិស្ថានរបស់ខ្លួន។
ក្នុងករណីដែលមិនរាងចាល «យើងនឹងពិន័យទ្វេដង ឬបញ្ជូនសំណុំរឿងទៅតុលាការ។ តែជារួមគាត់ខ្លាច និងលែងហ៊ានហើយ។ គាត់សុំទោសយើងជាសាធារណៈហើយ។ គាត់បានធ្វើទង្វើមិនគប្បី គឺខុសនឹងច្បាប់យើង។ កុំយកគំរូតាមគាត់»។
លិខិតជាភាសាខ្មែរដែលមានស្នាមមេដៃលោក WANG MU QUNG កាលពីថ្ងៃសុក្រសប្តាហ៍មុនបានសរសេរថា៖ «ខ្ញុំសូមទោសជាសាធារណៈចំពោះប្រជាជនកម្ពុជាទូទាំងប្រទេសនូវទង្វើ ដែលខ្ញុំបានទាត់សំរាមបណ្តែតទឹកពេលកំពុងភ្លៀងបណ្តាលឲ្យមានការស្ទះលូ រាយប៉ាយ ប៉ះពាល់ និងខូចសោភណភាពក្រុង សូមកុំយកគំរូតាមខ្ញុំ»។
សកម្មភាពបំផ្លាញបរិស្ថានរបស់ជនជាតិចិនម្នាក់នេះត្រូវបានគេលួចថត និងបង្ហោះតាមបណ្តាញសង្គមហ្វេសប៊ុកកាលពីថ្ងៃព្រហស្បតិ៍សប្តាហ៍មុន។ វីដេអូឃ្លីបរយៈពេល ១:២២ នាទីបានបង្ហាញថា សំណល់សំរាមត្រូវបានច្រកថង់ និងគរទុកនៅមុខកាស៊ីណូហើយពេលកំពុងភ្លៀងធ្លាក់ទឹកហូរលើថ្នល់ ជនជាតិចិនរូបនេះបានធាក់ថង់សំរាមយ៉ាងហោចណាស់ ១៥ ថង់ធំៗចោលតាមទឹកហូរនោះ៕
