ព្រះសីហនុៈ រដ្ឋបាលខេត្តព្រះសីហនុព្រមានចាត់វិធានការតាមផ្លូវច្បាប់យ៉ាងតឹងរ៉ឹងចំពោះពលរដ្ឋចំនួន ៦៨ គ្រួសារដោយអះអាងថា ពួកគេប្រមូលផ្ដុំគ្នាកាប់ទន្ទ្រានដីព្រៃឈើ និងសង់ខ្ទមលើតំបន់អភិរក្សព្រៃឈើធម្មជាតិ និងការពារសត្វព្រៃភូមិអូរត្រជាក់ចិត្ត ឃុំសំរុង ស្រុកព្រៃនប់ ប៉ុន្ដែអ្នកឃ្លាំមើលសិទ្ធិមនុស្សស្នើសុំឱ្យកាត់ឆ្វៀលដីតំបន់នោះជូនពលរដ្ឋ។
សេចក្ដីប្រកាសព័ត៌មានរបស់រដ្ឋបាលខេត្តព្រះសីហនុចុះថ្ងៃទី ១៣ វិច្ឆិកា ដែល ភ្នំពេញ ប៉ុស្ដិ៍ ទទួលបានពីម្សិលមិញឱ្យដឹងថា កន្លងមកខណ្ឌរដ្ឋបាលព្រៃឈើនៃមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុទទួលព័ត៌មានថា មាន ក្រុមអនាធិបតេយ្យប្រមូលផ្ដុំគ្នាកាប់ទន្ទ្រានដីព្រៃឈើ និងសង់ខ្ទមនៅចំណុចភ្នំត្រងោលស្ថិតនៅភូមិ/ឃុំខាងលើ។
តំបន់នោះជាទីតាំងចុះអនុស្សរណៈរវាងអង្គការសម្ព័ន្ធមិត្តសត្វព្រៃ និងក្រុមហ៊ុនឋានសួគ៌ចំកាត់ ដើម្បីអភិរក្សព្រៃឈើធម្មជាតិ អភិរក្សការពារសត្វព្រៃ និងដាំដើមឈើឡើងវិញស្របតាមទិសដៅ និងចក្ខុវិស័យរបស់អង្គការសម្ព័ន្ធមិត្តសត្វព្រៃ និងរាជរដ្ឋាភិបាល។
តាមសេចក្តីប្រកាសដដែលនៅថ្ងៃទី ១១ វិច្ឆិកា ខណ្ឌរដ្ឋបាលព្រៃឈើព្រះសីហនុបានសហការជាមួយអាជ្ញាធរស្រុកព្រៃនប់ និងស្រុកស្ទឹងហាវ ចុះដល់ទីតាំងដីព្រៃជាក់ស្ដែង ដើម្បីបង្ក្រាបការកាប់ទន្ទ្រានដីព្រៃដោយខុសច្បាប់ខាងលើ។ ប៉ុន្ដែត្រូវក្រុមអនាធិបតេយ្យប្រដាប់ដោយកាំបិត ពូថៅ ដំបង ចបកាប់ និងដបសាំងក្នុងដៃមកធ្វើការរារាំង សម្លុតគំរាម វាយប្រហារមកលើក្រុមការងារចម្រុះ។ ខណៈនោះក្រុមការងារមិនបានតបតអ្វីឡើយ និងដកថយ ដើម្បីបញ្ចៀសពីការប៉ះទង្គិច។ ជាមួយគ្នានេះក្រុមអនាធិបតេយ្យបានរៀបចំសេណារីយោជាប្រព័ន្ធ ដើម្បីផ្សព្វផ្សាយព័ត៌មានមិនពិតមួលបង្កាច់អាជ្ញាធរក្នុងការអនុវត្តការងារក្នុងដែនសមត្ថកិច្ចខ្លួន។
តាមរយៈសេចក្តីប្រកាសនេះរដ្ឋបាលខេត្តព្រះសីហនុបានក្រើនរំឭកដល់ក្រុមអនាធិបតេយ្យឱ្យបញ្ឈប់សកម្មភាពល្មើសច្បាប់ និងដកខ្លួនចេញជាបន្ទាន់ពីទីតាំងដីខាងលើ។ អាជ្ញាធរបញ្ជាក់ថា៖ «ក្នុងករណីមិនអនុវត្តតាមការណែនាំនេះ រដ្ឋបាលខេត្តព្រះសីហនុនឹងចាត់វិធានការតាមផ្លូវច្បាប់យ៉ាងតឹងរ៉ឹងបំផុតចំពោះជនខាងលើដោយគ្មានការលើកលែង»។
លោក ឃាង ភារម្យ អ្នកនាំពាក្យសាលាខេត្តព្រះសីហនុពីម្សិលមិញមិនបញ្ជាក់ឱ្យបានលម្អិតលើករណីនេះទេ ដោយប្រាប់ថា ករណីនេះសមត្ថកិច្ចជំនាញកំពុងធ្វើការស្រាវជ្រាវរកអ្នកដឹកនាំក្រុមពលរដ្ឋទន្ទ្រានដីព្រៃ។ លើសពីនេះ មន្ត្រីជំនាញកំពុងវាស់វែងទំហំដីដែលរងការរំលោភបំពាន។
លោក ឌី សុខុម នាយខណ្ឌរដ្ឋបាលព្រៃឈើខេត្តព្រះសីហនុពីម្សិលមិញក៏មិនបានបញ្ជាក់លម្អិតករណីនេះដែរ ប៉ុន្តែថាលោកបានសហការជាមួយកម្លាំងរដ្ឋបាលស្រុកព្រៃនប់ និងស្រុកស្ទឹងហាវចុះដល់ទីតាំងដីព្រៃជាក់ស្ដែងកាលពីថ្ងៃទី ១១ វិច្ឆិកា ដើម្បីបង្ក្រាបការកាប់ទន្ទ្រាន ដីព្រៃនេះប៉ុន្ដែត្រូវបានក្រុមអនាធិបតេយ្យ រារាំងក្រុមការងារចម្រុះ។
លោកថា៖ «ភ្លាមៗនោះយើងមិនបានធ្វើអ្វីទេ គឺដកថយត្រឡប់មកវិញ»។
បើតាមរដ្ឋបាលខេត្តព្រះសីហនុ សកម្មភាពអនាធិបតេយ្យនេះគឺជាបទល្មើសព្រហ្មទណ្ឌដែលមានចែងនៅក្នុងមាត្រា ៩៧ និងមាត្រា ៩៨ នៃច្បាប់ស្ដីពីព្រៃឈើ និងមាត្រា ៥០២ មាត្រា ៥០៥ មាត្រា ៥០៦ និងមាត្រា ៦០៧ នៃក្រមព្រហ្មទណ្ឌដែលសុទ្ធសឹងជាបទល្មើសមជ្ឈិម និងបទល្មើស ឧក្រិដ្ឋដែលត្រូវផ្តន្ទាទោសដាក់ពន្ធនាគារ។
លោក ស៊ុន សុផាត តំណាងពលរដ្ឋសហគមន៍ ៦៨ គ្រួសាររស់នៅភូមិអូរត្រជាក់ចិត្ត ឃុំសំរុង ស្រុកព្រៃនប់ថ្លែងថា ពលរដ្ឋចំនួន ៦៨ គ្រួសារ បានរស់នៅអាស្រ័យផលលើដីជាង ៣៣៣ ហិកតាចាប់តាំងពីឆ្នាំ ១៩៩៣ ដែលភាគច្រើនជាមន្ត្រីទាហានចូលនិវត្តន៍ ប៉ុន្ដែអាជ្ញាធរមិនព្រមទទួលស្គាល់ និងចុះបញ្ជីកម្មសិទ្ធិដីជូនពលរដ្ឋឱ្យបានស្របច្បាប់ទេ។
លោកនិយាយថា៖ «អាជ្ញាធរបានបង្គាប់ឱ្យពលរដ្ឋយើងសរសេរលិខិតស្នើសុំ ដីសម្បទានសង្គមកិច្ចពីរាជរដ្ឋាភិបាលនៅអំឡុងខែតុលាកន្លងទៅ ហើយពួកយើងក៏បានដាក់លិខិតស្នើសុំរួចហើយដែរ។ ប៉ុន្ដែរហូតមកដល់ពេលនេះ អាជ្ញាធរនៅតែមិនទាន់ផ្ដល់ដំណឹងជូនពួកខ្ញុំវិញ។ លើសពីនេះបែរជាមកចង់រុះរើផ្ទះពួកខ្ញុំចោលទៀត។ បើអាជ្ញាធររុះរើផ្ទះពួកខ្ញុំអស់ ពួកយើងគ្មានកន្លែងរស់នៅទេ សូមអាជ្ញាធរជួយដោះស្រាយផង»។
លោក ស្រេង វ៉ាន់លី មន្ដ្រីសម្របសម្រួល អង្គការសិទ្ធិមនុស្ស (Licadho) ប្រចាំខេត្តព្រះសីហនុប្រាប់ថា លោកធ្លាប់ចុះស្រាវជ្រាវករណីនេះដែរ។ ពលរដ្ឋបានដាក់សំណើសុំកាត់ឆ្វៀលដីតំបន់នេះចែកជូនពួកគាត់រស់នៅអាស្រ័យផល ដោយសារពួកគាត់រស់នៅយូរឆ្នាំ ហើយក៏គ្មានកន្លែងផ្សេងសម្រាប់រស់នៅទៀតដែរ។
លោកថ្លែងថា៖ «អាជ្ញាធរត្រូវតែចុះសិក្សា ករណីនេះឱ្យបានច្បាស់លាស់ដើម្បីចៀសវាងបាតុភាពណាមួយកើតឡើងរវាងពលរដ្ឋ និងអាជ្ញាធរ។ បើសិនជាពួកគាត់រស់នៅជាយូរឆ្នាំបែបនេះ គួរតែកាត់ចែកពួកគាត់តាមរយៈដីសម្បទានសង្គមកិច្ចទៅ។ បើបណ្ដេញពួកគាត់ចេញ ពួកគាត់មិនដឹងទៅរស់នៅកន្លែងណាដែរពួកគាត់អ្នកក្រីក្រ»៕