The Phnom Penh Post Search

Search form

អាជ្ញាធរ​ព្រមាន​ចាត់​វិធានការ​ចំពោះ​លោក អាឡិច បើ​មិន​ចេញ​ពី​កម្ពុជា

អាជ្ញាធរ​ព្រមាន​ចាត់​វិធានការ​ចំពោះ​លោក អាឡិច បើ​មិន​ចេញ​ពី​កម្ពុជា

ភ្នំពេញៈ ស្រប​ពេល​ទិដ្ឋាការ​ស្នាក់​នៅ​កម្ពុជា​របស់​ប្រធាន​អង្គការ​មាតា​ធម្មជាតិ លោក អាឡិច ហ្សង់ដ្រូ ត្រូវ​ផុត​កំណត់​នៅ​ថ្ងៃ​សុក្រ​នេះ អាជ្ញាធរ​កម្ពុជា ក៏​បាន​ព្រមាន​ចាត់​វិធានការ​ផ្លូវ​ច្បាប់​ចំពោះ​សកម្មជន​បរិស្ថាន​រូប​នេះ ប្រសិន​បើ​លោក អាឡិច នៅ​តែ​បន្ត​ស្នាក់​នៅ​កម្ពុជា​ដោយ​មិន​មាន​ការ​អនុញ្ញាត​នោះ។

លោក​នាយ​ឧត្តម​សេនីយ៍ ខៀវ សុភ័គ អ្នក​នាំ​ពាក្យ​ក្រសួង​មហាផ្ទៃ បាន​មាន​ប្រសាសន៍​ថា ក្រសួង​មហាផ្ទៃ​ពុំ​អាច​បន្ត​ទិដ្ឋាការ​ជូន​លោក អាឡិច បាន​ទេ ហើយ​បើ​លោក​នៅ​តែ​ស្នាក់​នៅ​កម្ពុជា​ខណៈ​ដែល​ទិដ្ឋាការ​របស់​លោក​បាន​ផុត​កំណត់​នោះ ក្រសួង​នឹង​ចាត់​ការ​ទៅ​លើ​បុគ្គល​រូបនេះ​តាម​នីតិវិធី​ច្បាប់។ លោក​ថា៖ «យើង​ធ្វើ​តាម​ច្បាប់​អន្តោប្រវេសន៍ ក្នុង​ច្បាប់​មាន​ផាកពិន័យ មាន​គុក​ច្រវាក់​ហើយ​បណ្តេញ​ចេញ​ក៏​មាន អ៊ីចឹង​ធ្វើ​តាម​ច្បាប់ សមត្ថកិច្ច​អត់​មាន​ទៅ​អង្វរ ឬ​ថ្វាយ​បង្គំ​គាត់​ឲ្យ​ចាក​ចេញ​ទេ»។

រដ្ឋ​មន្ត្រី​ក្រសួង​មហាផ្ទៃ​ស្តីទី លោក ឯម សំអាន បាន​បញ្ជាក់​ក្នុង​លិខិត​មួយ​កាលពី​ថ្ងៃ​ពុធ​ថា ក្រសួង​តម្រូវ​ឲ្យ​លោក អាឡិច ចាក​ចេញ​ពី​កម្ពុជា​មួយ​រយៈ​សិន នៅ​ពេល​សម​ស្រប​ណា​មួយ ដែល​លោក អាឡិច ចង់​មក​កម្ពុជា​វិញ នោះ​ក្រសួង​មហាផ្ទៃ ពុំ​មាន​គោល​ការណ៍​ហាម​ឃាត់​ទេ ប្រសិន​បើ​លោក​បាន​បំពេញ​បែប​បទ និង​មាន​លក្ខណៈ​គ្រប់​គ្រាន់​ដូច​ជន​អន្តោ​ប្រវេសន៍​ដទៃ​ទៀត​ស្រប​តាម​គោល​ការណ៍​ច្បាប់។

មន្ត្រី​ក្រសួង​រ៉ែ និង​ថាមពល ជាង ១៤០ នាក់​បាន​នាំ​គ្នា​ផ្តិត​មេដៃ​គាំទ្រ​ចំណាត់​ការ​របស់​ក្រសួង​មហាផ្ទៃ ដោយ​ថា លោក អាឡិច មិន​គោរព​អធិបតេយ្យ​របស់​ប្រទេស​កម្ពុជា ជ្រៀត​ជ្រែក​ការងារ​របស់​រាជ​រដ្ឋាភិបាល​ក្នុង​ការ​អភិវឌ្ឍ​គម្រោង​វារី​អគ្គិសនី​នានា ព្រម​ទាំង​ជេរ​ប្រមាថ និង​បរិហារកេរ្តិ៍​មន្ត្រី​រាជការ​ក្រសួង​រ៉ែ និង​ថាមពល​ជាដើម។

លោក អាឡិច ហ្សង់ដ្រូ ហ្គន់ហ្សាឡេស ដេវីតសិន ប្រធាន​អង្គការ​មាតា​ធម្មជាតិ មិន​អាច​សុំ​ការ​អត្ថាធិប្បាយ​បាន​ទេ ខណៈ​ដែល​លោក​ជាប់​ប្រជុំ។ ប៉ុន្តែ​បុគ្គលិក​អង្គការ​មាតា​ធម្មជាតិ លោក ដាំ គុនឌី បាន​បញ្ជាក់​ថា លោក អាឡិច នឹង​បន្ត​ស្នាក់​នៅ​កម្ពុជា​បន្ត​ទៀត ខណៈ​ដែល​ច្បាប់​អន្តោ​ប្រវេសន៍​កម្ពុជា អាច​អនុញ្ញាត​ឲ្យ​ជន​បរទេស​ស្នាក់​នៅ​បាន ១ ខែ​ទៀត តាម​ការ​ផាក​ពិន័យ បន្ទាប់ពី​ទិដ្ឋការ​ផុត​កំណត់។ លោក​ថា៖ «យើង​បាន​សិក្សា​ច្បាប់​អន្តោ​ប្រវេសន៍​ហើយ គឺថា ទិដ្ឋាការ​ផុត​កំណត់​មែន ប៉ុន្តែ​គាត់​អាច​ស្នាក់​នៅ​បាន ៣០ ថ្ងៃ​ទៀត ដោយ​បង់​ពន្ធ​សម្រាប់​ការ​ស្នាក់​នៅ ៥ ដុល្លារ​ក្នុង ១ ថ្ងៃ រហូត​ដល់ ៣០ ថ្ងៃ​ហ្នឹង​បាន​គេ​ចាប់​ផ្តើម​បង្ខំ​ឲ្យ​យើង​ចេញ​ពី​ប្រទេស​ខ្មែរ ដោយ​មាន​ការ​ផាក​ពិន័យ ឬ​ការ​ប្រើ​រូបភាព​ផ្សេង»។

កាល​ពី​ថ្ងៃ ទី១៨ កុម្ភៈ អនុ​ប្រធាន ទី១ រដ្ឋសភា លោក កឹម សុខា ក៏​បាន​ថ្វាយ​លិខិត​ជូន​ព្រះ​មហាក្សត្រ និង​ផ្ញើ​លិខិត​ជូន​ប្រធាន​រដ្ឋសភា​ឲ្យ​ជួយ​អន្តរាគមន៍​ទៅ​រាជ​រដ្ឋាភិបាល អនុញ្ញាត​ឲ្យ​លោក អាឡិច ហ្សង់ដ្រូ អាច​ស្នើ​សុំ​បន្ត​ទិដ្ឋាការ​រស់​នៅ និង​បម្រើ​ការងារ​នៅ​ព្រះ​រាជា​ណាចក្រ​កម្ពុជា ដោយ​ពុំ​ចាំបាច់​តម្រូវ​ឲ្យ​លោក​ចាក​ចេញ​ជា​មុន ទើប​ស្នើ​សុំ​ទិដ្ឋាការ​ជា​ក្រោយ​នោះ​ទេ។ លោក កឹម សុខា បាន​បញ្ជាក់​ក្នុង​លិខិត​ថា លោក អាឡិច ហ្សង់ដ្រូ ជា​ជន​បរទេស​មួយ​រូប ដែល​ពុំ​មែន​ជា​ឧក្រិដ្ឋ​ជន និង​ជា​អ្នក​បំផ្លាញ​ធនធាន​ធម្មជាតិ​របស់​ខ្មែរ​ឡើយ ផ្ទុយ​ទៅ​វិញ​លោក​ជា​អ្នក​ចូល​រួម​ថែរក្សា និង​ការពារ​ធនធាន​ធម្មជាតិ​យ៉ាង​សកម្ម។

ទីប្រឹក្សា​ព្រះ​រាជ​លេខាធិការដ្ឋាន​ព្រះ​មហាក្ស​ត្រិយ៍ នរោត្តម មុនីនាថ លោក អ៊ុំ ដារ៉ាវុធ បាន​មាន​ប្រសាសន៍​ថា លោក​ពុំ​ទាន់​ទទួល​បាន​លិខិត​នៅ​ឡើយ​ទេ៕

អត្ថបទគួរចាប់អារម្មណ៍

  • សណ្ឋាគារ​ប្រណីត​នៅ​កោះរ៉ុង បើក​ជា​ផ្លូវការ

    ភ្នំពេញៈ សណ្ឋាគារ​ដ៏ប្រណីត Royal Sands នៅលើ​កោះរ៉ុង​របស់​លោក គិត ម៉េង បាន​បើក​ដំណើរការ​ជា​ផ្លូវការ​កាលពី​ថ្ងៃ​ម្សិលមិញ ដែល​គេ​រំពឹង​ថា​នឹង​ទាក់ទាញ​ភ្ញៀវទេសចរ​កាន់តែ​ច្រើន​។

  • ដំរី​ដែល​ចូល​ចម្ការ​អ្នក​ភូមិ​បាន​គេច​ទៅ​ភ្នំ​ដងរែក

    ឧត្តរមានជ័យៈ ក្រុម​មន្ត្រី​បាន​និយាយ​ថា​សត្វ​ដំរី​ញី​មួយ​ក្បាល​ដែល​បាន​ចូល​លុកលុយ​ក្នុង​ចម្ការ​អ្នកភូមិ​រំដួល​ចាស់ ឃុំ​អម្ពិល ស្រុក​បន្ទាយ​អម្ពិល ខេត្ត​ឧត្តរមានជ័យ​កាលពី​ព្រឹក​ថ្ងៃ​អាទិត្យ​នោះ​បាន​គេច​ខ្លួន​ចូល​ទៅ​ក្នុង​តំបន់​ជួរ​ភ្នំ​ដងរែក​វិញ​ហើយ ខណៈ​ដែល​ក្រុម​មន្ត្រី​ជំនាញ​បរិស្ថាន និង​អាជ្ញាធរ​កំពុង​បន្ត​ឃ្លាំ​មើល​ពី​ដំណើរ​របស់​វា​។

  • ព្រះមហាក្សត្រ​អំពាវនាវ​ឲ្យ​ធានា​ការពារ​យុត្តិធម៌​ និង គោរព​សិទ្ធិ​មនុស្ស

    ភ្នំពេញៈ ក្រោយពី​ឈ្នះ​អាសនៈ​ទាំង​ ៥៨ ដោយ​មិន​មាន​អតីត​បក្ស​សង្គ្រោះ​ជាតិ​ដែល​ជា​គូប្រកួត​ដ៏ស័ក្តិសម​នឹង​គ្នា​សម្រាប់​ការបោះឆ្នោត​ព្រឹទ្ធសភា​ពី​ខែ​កុម្ភៈ គណបក្ស​កាន់​អំណាច​ដែល​ទទួល​ជ័យជម្នះ​បាន​បន្ត​គ្រប់គ្រង​ស្ថាប័ន​នីតិប្បញ្ញត្តិ​ជាថ្មី​ដោយ​បើក​សម័យប្រជុំ​លើក​ដំបូង នីតិកាល​ទី​ ៤ ​នៃ​ព្រឹទ្ធសភា​ពី​ម្សិលមិញ​ក្រោម​ព្រះរាជាធិបតីភាព​ព្រះមហាក្សត្រ​ព្រះបាទ​សម្តេច​ព្រះនរោត្តម សីហមុនី ដែល​ព្រះអង្គ​អំពាវនាវ​ឲ្យ​មាន​ការធានា​ការពារ​យុត្តិធម៌ និង​គោរព​សិទ្ធិ​មនុស្ស និង​រួម​សាមគ្គី​គ្នា​ជា​ធ្លុង​មួយ​។

  • នាយក​រដ្ឋមន្ត្រី​បញ្ជា​ឲ្យ​ដកហូត​កោះ​ ៣០ ​មក​វិញ និង​ឲ្យ​ពិនិត្យ​អ្នក​នៅ​ពី​ក្រោយ​ការទន្ទ្រាន​យក​ដី

    ព្រះសីហនុៈ លោក​នាយករដ្ឋមន្ត្រី ហ៊ុន សែន បាន​បញ្ជា​ឲ្យ​ដកហូត​កោះ​ដែល​មិន​បាន​អភិវឌ្ឍ​ប្រមាណ​ ៣០ ​មក​វិញ​ ខណៈ​អត្តសញ្ញាណ​របស់​ម្ចាស់​ក្បាល​ដី​ចំនួន​ ៥៨៤ ​ដែល​មាន​ទាំង​មន្ត្រី​មាន​អំណាច​កំពុង​ត្រូវបាន​ពិនិត្យ​រឿង​នៅ​ពី​ក្រោយ​ខ្នង​ការកាប់​ទន្ទ្រាន​យក​ដី​ដ៏ក្តៅគគុក​នៅ​កោះរ៉ុង ហើយ​មន្ត្រី​ជាន់ខ្ពស់​ខ្លះ​នឹង​មិន​ត្រូវ​ឲ្យ​ចូលរួម​បង្កើត​រដ្ឋាភិបាល​ថ្មី​នៅ​​អាណត្តិ​ក្រោយ​ឡើយ​។