ព្រះសីហនុៈ រដ្ឋបាលខេត្ដព្រះសីហនុ បានព្រមានចាត់វិធានការតាមផ្លូវច្បាប់ ចំពោះម្ចាស់សំណង់ដែលរឹងរូសមិនព្រមរុះរើសំណង់ខុសបច្ចេកទេសចំនួន ១០ ទីតាំងទៅតាមការជូនដំណឹងចំនួន ៣ លើករួចមកហើយរបស់អាជ្ញាធរខេត្ត ខណៈដែលម្ចាស់សំណង់ចំនួន ៤ ទីតាំងបានរុះរើដោយខ្លួនឯង។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុបានប្រាប់ភ្នំពេញប៉ុស្ដិ៍កាលពីថ្ងៃពុធថា បើម្ចាស់សំណង់ខុសបច្ចេកទេសទាំង ១០ ទីតាំងនៅតែមិនព្រមរុះរើទៀត អាជ្ញាធរនឹងអនុវត្ដតាមនីតិវិធីច្បាប់នឹងឈានទៅដល់ការដាក់ពាក្យប្តឹងទៅតុលាការផងដែរ។
លោកថ្លែងថា៖ «សំណង់ខុសបច្ចេកទេសចំនួន ៤ កំពុងរុះរើជិតរួចរាល់ហើយ។ ចំណែកនៅសល់ ១០ ទៀតមិនទាន់រុះរើទើបយើងហៅគាត់មកណែនាំបន្ថែមកាលពីថ្ងៃចន្ទដើម្បីឲ្យគាត់រុះរើចេញជាបន្ទាន់។ យើងក៏ព្រមានចាត់វិធានការដែរ បើគាត់មិនរុះរើទេ យើងនឹងចាត់វិធានការផ្លូវច្បាប់ហើយ គឺអនុវត្ដទាំងបង្ខំដោយមានសាលក្រមតុលាការហើយម្ចាស់សំណង់ប្រឈមនឹងទោសទណ្ឌថែមទៀត»។
លោក ភារម្យ ថ្លែងថា៖ «ជាដាច់ខាតជំហររបស់រដ្ឋបាលខេត្ដ គឺមិនឲ្យមានអ្នកណាមកអន្តរាគមន៍ទេសំណង់ខុសបច្ចេកទេសទាំងនេះដាច់ខាតត្រូវតែរុះរើចេញ»។ បើតាមលោក ភារម្យ សំណង់ខុសបច្ចេកទេសទាំង ១៤ ទីតាំងនេះ ជាប្រភេទសំណង់រឹង ខ្ពស់ៗធ្វើឡើងអំពីដែក និងជាប្រភេទសំណង់ចម្រុះ។ ប៉ុន្ដែលោកមិនបានប្រាប់ឲ្យដឹងថាតើសំណង់ទាំងនោះមានកម្ពស់ប៉ុន្មានជាន់នោះទេ។
លោក ឡៅ ទិព្វសីហា រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មការត្រួតពិនិត្យគុណភាពសំណង់នៅខេត្តព្រះសីហនុ និងលោក គួច ចំរើន អភិបាលខេត្តព្រះសីហនុក្នុងជំនួបជាមួយម្ចាស់សំណង់ខុសបច្ចេកទេសទាំង ១៤ ទីតាំងកាលពីថ្ងៃទី ២ ខែកញ្ញាកន្លងមកបានព្រមានថា៖ «ម្ចាស់សំណង់មិនបាច់ដើររកអ្នកអន្តរាគមន៍ទប់ស្កាត់ទេ។ បើមិនព្រមរុះរើទេអាជ្ញាធរមានសមត្ថកិច្ចនឹងចាត់វិធានការតាមផ្លូវច្បាប់»។
ក្នុងជំនួបប្រជុំជាមួយម្ចាស់សំណង់នេះលោកអភិបាលខេត្ដព្រះសីហនុបានបញ្ជាក់ថា ក្រោយពីបានរុះរើសំណង់ខុសបច្ចេកទេសចេញរួច អាជ្ញាធរ និងមន្ត្រីជំនាញនឹងជួយសម្រួលការគូរប្លង់ ពិនិត្យលក្ខណៈបច្ចេកទេស និងចេញលិខិតអនុញ្ញាតសាងសង់ឡើងវិញឲ្យបានឆាប់ ដើម្បីជាការប៉ះប៉ូវនូវការខូចខាត។
កាលពីថ្ងៃទី ២៧ ខែសីហា កន្លងទៅនេះសំណង់ចម្រុះចំនួន ១៤ កន្លែងនៅខេត្តព្រះសីហនុត្រូវបានអាជ្ញាធរ និងមន្ត្រីជំនាញតម្រូវឲ្យរុះរើចេញវិញ បន្ទាប់ពីក្រុមការងារបច្ចេកទេសរកឃើញថា សំណង់ទាំងនោះសង់ឡើងដោយគ្មានគុណភាព ខណៈសំណង់ចំនួន ៧០ ផ្សេងទៀតកំពុងធ្វើកោសល្យវិច័យពីគុណភាពក្នុងចំណោមសំណង់ជាង ៥០០ កន្លែងដែលត្រូវបានចុះត្រួតពិនិត្យកាលពីពេលថ្មីៗនេះ។ នេះបើតាមលោក គួច ចំរើន។
លោក ភារម្យ ឲ្យដឹងទៀតថាសំណង់ចំនួន ៧០ កន្លែងដែលកំពុងធ្វើកោសល្យវិច័យនេះ រដ្ឋបាលខេត្ត និងក្រុមការងារបច្ចេកទេសបានប្រគល់ឲ្យក្រុមហ៊ុនឯករាជ្យមួយដែលមានជំនាញបច្ចេក ចុះត្រួតពិនិត្យដោយមិនទាន់ទទួលបានលទ្ធផលនៅឡើយទេ។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) គាំទ្រចំពោះវិធានការរបស់រដ្ឋបាលខេត្ដព្រះសីហនុទៅលើម្ចាស់សំណង់ខុសបច្ចេកទេសដោយការអនុវត្ដច្បាប់បែបនេះ។
លោកថា៖ «សំណង់ខុសបច្ចេកទេសបែបនេះត្រូវតែមានវិធានការតាមផ្លូវច្បាប់ ព្រោះបើម្ចាស់សំណង់ មិនព្រមរុះរើចេញទេអាចបណ្ដាលឲ្យមានគ្រោះថ្នាក់ជាយថាហេតុណាមួយកើតឡើង។ ដូច្នេះដើម្បីសុខសុវត្ថិភាពដល់ពលរដ្ឋ រដ្ឋបាលខេត្ដត្រូវតែជំរុញឲ្យរុះរើជាដាច់ខាតចំពោះសំណង់ខុសបច្ចេកទេសនេះ»៕