តាកែវៈ អាជ្ញាធរស្រុកសំរោងពីម្សិលមិញព្រមានចាត់វិធានការតាមផ្លូវច្បាប់ចំពោះម្ចាស់គ្រឿងចក្រ (ត្រាក់ទ័រ) និងរថយន្តដឹកដីដែលរំលោភចូលកាយដីដោយខុសច្បាប់ ហើយដឹកដីឆ្លងកាត់ក្បែរប្រាសាទសែនភូវាំងស្ថិតក្នុងភូមិអំពិល ឃុំស្លា ស្រុកសំរោង ខេត្តតាកែវ ដែលអាចបណ្តាលឱ្យប៉ះពាល់ដល់ប្រាសាទ។
ការព្រមាននេះធ្វើឡើងក្រោយពីអាជ្ញាធរចាប់គ្រឿងចក្រកាយដី ១ គ្រឿងពីថ្ងៃទី ៣ មករា ដែលបានចូលកាយដីក្នុងតំបន់អភិរក្សវប្បធម៌ ប្រាសាទសែនភូវាំងដោយមិនបានសុំច្បាប់អនុញ្ញាតត្រឹមត្រូវ។
លោក កេត ម៉ៅ អភិបាលស្រុកសំរោងឱ្យដឹងថា នៅព្រឹកថ្ងៃអាទិត្យលោកបានទទួលព័ត៌មានថា មានពលរដ្ឋនៅក្នុងភូមិបានជួលគ្រឿងចក្រកាយយកដីស្រែនៅចម្ងាយពីប្រាសាទប្រមាណ ២០០ ម៉ែត្រ។ ក្រោយទទួលបានព័ត៌មានលោកចាត់អភិបាលរងស្រុកម្នាក់រួមជាមួយអាជ្ញាធរឃុំ និងសមត្ថកិច្ចជំនាញប៉ុស្តិ៍រដ្ឋបាលចុះឃាត់រថយន្តដឹកដី ប៉ុន្តែចាប់រថយន្តមិនបានទៅឃាត់បានគ្រឿងចក្រ ១ គ្រឿងកំពុងកាយដី។
លោកថ្លែងថា៖ «រដ្ឋបាលស្រុកគ្រាន់តែចាប់ព្រមានផ្នែករដ្ឋបាល រក្សាត្រាក់ទ័រទុកនៅប៉ុស្តិ៍រដ្ឋបាល ៣ ថ្ងៃសិនទើប [ដោះ] លែងទៅវិញ។ ប៉ុន្តែមិនមានការពិន័យអីទេដោយសារតែនេះជាលើកទី ១ ហើយគាត់មិនទាន់បានធ្វើឱ្យប៉ះពាល់អ្វីដល់ប្រាសាទឡើយ»។
មេឃុំស្លាលោក ឃឹម ហ៊ុល ឱ្យដឹងថា ពេញ ១ ព្រឹកថ្ងៃទី ៤ ខែមករា អាជ្ញាធរឃុំ-ស្រុក រួមជាមួយប្រធានមន្ទីរវប្បធម៌ និងវិចិត្រសិល្បៈបានអប់រំណែនាំដល់ម្ចាស់គ្រឿងចក្រកាយដី និងម្ចាស់រថយន្តដឹកដី ដោយកំណត់ថា ចាប់ពីថ្ងៃអប់រំណែនាំនេះទៅគ្រឿងចក្រណាក៏ដោយមិនអនុញ្ញាតឱ្យចូលមកកាយ និងដឹកដីមុខប្រាសាទ សែនភូវាំងទៀតឡើយ ព្រោះជាតំបន់បេតិកភណ្ឌរបស់ជាតិ អាចធ្វើឱ្យមានរំញ័រ ឬរញ្ជួយដែលអាចប៉ះពាល់ដល់ប្រាសាទ។
លោកថ្លែងថា៖ «ប្រសិនបើមានលើកទី ២ ទៀតគឺមិនអនុញ្ញាតទេត្រូវតែចាប់ធ្វើការដោះស្រាយទៅតាមផ្លូវច្បាប់ដាច់ខាត ហើយយើងជាអាជ្ញាធរឃុំ ក៏មិនមែនចេះតែហ៊ានធ្វើច្បាប់ឲ្យគេដឹកដោយខុសច្បាប់អ៊ីចឹងដែរ»។
លោកថា ម្ចាស់គ្រឿងចក្រកាយដីបានចូលទៅកាយអាចម៍ដី ដោយមិនបានសុំការអនុញ្ញាតពីអាជ្ញាធរឃុំឡើយ នេះជាបញ្ហាលំបាកមួយរបស់អាជ្ញាធរឃុំ។
លោក ឃឹម ហ៊ុល ថ្លែងថា៖ «ពិបាកណាស់រឿងបញ្ហាប្រជាពលរដ្ឋ គាត់ឃើញដីស្រែផ្អៀងម្ខាងអ៊ីចឹងទៅ គាត់កាយពង្រាបទៅណា។ ចំណែកអ្នកកាយដីនោះ ទៅកាយអត់មានប្រាប់ឃុំឲ្យដឹងទេ។ ខ្ញុំនិយាយពិត ឃុំអត់ដឹងទេ ហើយខ្ញុំខំផ្សព្វផ្សាយប្រាប់មេភូមិទាំងអស់ ប៉ុន្តែពួកគាត់លួចកាយ ឆ្មក់ថ្ងៃសៅរ៍អាទិត្យអ៊ីចឹងទៅ»។
លោក ឈួន ង៉ែត ម្ចាស់គ្រឿងចក្រ កាយដីរស់នៅភូមិអម្ពិល ស្រុកសំរោងសារភាពថាពិតជាបានចូលទៅកាយដីដោយមិនបានសុំការអនុញ្ញាតពីអាជ្ញាធរឃុំពិតមែន។
លោក ង៉ែត ថ្លែងថា៖ «ពេលចុះដំបូងខ្ញុំបានសុំគាត់ ប៉ុន្តែនៅពេលប្តូរទីតាំងកាយដីចុងក្រោយនេះ ខ្ញុំអត់បានសុំគាត់ទេ។ តែជាក់ស្តែង ការដឹកដី អត់មានប៉ះពាល់អីដល់ប្រាសាទទេ។ ព្រោះផ្លូវនោះជាផ្លូវចាស់គេធ្លាប់រត់តាំងពីមុនមកក្នុងការដឹកផលកសិកម្មអីផ្សេងៗដោយគោយន្តតាមផ្លូវហ្នឹង» ។
បើតាមលោក ឈួន ង៉ែត ការចូលទៅកាយដីនេះ លោកធ្វើតាមដែលពលរដ្ឋជួលទៅកាយ ហើយលោកមិនដឹងថា ទីនោះជាតំបន់បេតិកភណ្ឌរបស់ជាតិ ហើយអាចមានផលប៉ះពាល់ធ្ងន់ធ្ងរដល់ប្រាសាទដែរ។
លោកប្រាប់ថា ដីដែលត្រូវកាយមានប្រមាណជាង ១០០ ឡាន លោកកាយបានចំនួន ៨០ ឡាន ត្រូវបានអាជ្ញាធរឃាត់។ រីឯរថយន្តដឹកដីមាន ៥ គ្រឿង ដែលរថយន្តនីមួយៗមានម្ចាស់ផ្សេងៗគ្នា។ រថយន្តដែលដឹកឆ្លងកាត់ក្បែរប្រាសាទមាន ៣ គ្រឿង រីឯ ២ គ្រឿងផ្សេងទៀតរត់កាត់តាមផ្លូវផ្សេង។
ប្រធានមន្ទីរវប្បធម៌ និងវិចិត្រសិល្បៈខេត្តតាកែវលោក ជេត ពិសុទ្ធ ថ្លែងថា តាមការពិនិត្យប្រាសាទមិនទាន់មានការប៉ះពាល់យ៉ាងណាមួយនៅឡើយទេ ប៉ុន្តែការដឹកដីក្បែរប្រាសាទ ការចូលកាយដីក្នុងតំបន់ដីអភិរក្សវប្បធម៌ គឺជារឿងខុសឆ្គង។
លោក ពិសុទ្ធ ថ្លែងថា៖ «ការដឹកដីឆ្លងកាត់ក្បែរប្រាសាទ វាអាចប៉ះពាល់ទៅថ្ងៃអនាគត ដូចជា ប៉ះពាល់ទៅដល់ខឿន វាអាចរលំ ស្រុត ឬក៏ប្រេះស្រាំ អ៊ីចឹងទៅណា»៕