បាត់ដំបង: រដ្ឋបាលខេត្តបាត់ដំបងបានព្រមានចាត់វិធានការតាមច្បាប់ចំពោះអ្នកឈូសឆាយដីព្រៃ និងតាំងលំនៅថ្មីមិនស្របច្បាប់ក្នុងតំបន់ការពារធម្មជាតិនៃដែនជម្រកសត្វព្រៃភ្នំសំកុស និងតំបន់ប្រើប្រាស់ច្រើនយ៉ាងសំឡូត ក្នុងស្រុកសំឡូត ខេត្តបាត់ដំបង ជាអ្វីដែលសង្គមស៊ីវិលគាំទ្រ ប៉ុន្តែស្នើអនុវត្តច្បាប់ឲ្យមានតម្លាភាព និងយុត្តិធម៌។
តាមសេចក្ដីជូនដំណឹងរបស់រដ្ឋបាលខេត្តបាត់ដំបងចុះថ្ងៃទី ៨ ខែកញ្ញា ដែលភ្នំពេញប៉ុស្ដិ៍ទើបទទួលបានពីម្សិលមិញឲ្យដឹងថា កន្លងមកមានពលរដ្ឋមួយចំនួនបានបន្តទន្ទ្រានដីព្រៃថ្មីបន្ថែមទៀត តាមរយៈការឈូសឆាយពង្រីក ការកាប់រាន ឬការតាំងលំនៅថ្មីមិនស្របច្បាប់។ នេះជាសកម្មភាពខុសច្បាប់ដែលរដ្ឋបាលខេត្តនឹងមិនទទួលស្គាល់នូវរាល់ទិន្នន័យណាដែលកើតដោយសារការរុករានថ្មីនេះឡើយទោះក្នុងរូបភាពណាក៏ដោយ។
សេចក្ដីជូនដំណឹងបន្តថា ដូច្នេះក្រុមការងារថ្នាក់ជាតិដឹកនាំដោយក្រសួងបរិស្ថានសហការជាមួយក្រុមការងារចម្រុះខេត្ត កំពុងចុះធ្វើអត្តសញ្ញាណកម្មមនុស្ស និងអត្តសញ្ញាណកម្មដីដើម្បីលើកយោបល់ស្វែងរកដំណោះស្រាយបញ្ហា។
លិខិតបញ្ជាក់ថា ក្នុងន័យនេះរដ្ឋបាលខេត្តសូមហាមដាច់ខាត និងត្រៀមចាត់វិធានការតាមច្បាប់ដោយមិនលើកលែងឡើយ។ ក្នុងករណីរឹងរូស ឬប្រឆាំងតបតដោយហិង្សាណាមួយនឹងត្រូវទទួលទោសតាមច្បាប់ជាធរមាន។ គណៈបញ្ជាការឯកភាពស្រុក និងមន្ត្រីឧទ្យានុរក្សត្រូវតាមដានជាប្រចាំនៅតំបន់នេះ ហើយអាជ្ញាធរក៏មិនត្រូវចេញលិខិតបញ្ជាក់ពីលំនៅឋាន និងដីធ្លីជូនដែរ តែត្រូវបន្តកសាងសំណុំរឿងបញ្ជូនទៅតុលាការ។
លោក សើ សាម៉េត អភិបាលស្រុកសំឡូតបានថ្លែងពីម្សិលមិញថា បន្ទាប់ពីទទួលបានសេចក្ដីជូនដំណឹងនេះ អាជ្ញាធរស្រុកសំឡូតបានជួបប្រជុំដើម្បីផ្សព្វផ្សាយពីវិធានការនេះដល់ពលរដ្ឋដែលកំពុងទន្ទ្រានយកដី និងតាំងលំនៅក្នុងតំបន់នេះ ប៉ុន្ដែលោកមិនអាចបញ្ជាក់ពីចំនួនគ្រួសារពលរដ្ឋដែលកំពុងកាន់កាប់ដីនៅតំបន់នោះឡើយ។
លោកថា៖ «ខ្ញុំកំពុងដឹកនាំប្រជុំពីបញ្ហានេះដើម្បីផ្សព្វផ្សាយប្រាប់ពលរដ្ឋកុំទៅទន្ទ្រានដីនៅតំបន់ហ្នឹងទៀត ព្រោះជាកន្លែងហាមឃាត់។ ខ្ញុំអត់ទាន់ដឹងទិន្នន័យ ឬចំនួនពលរដ្ឋដែលបានទៅទន្ទ្រានយកដីនៅតំបន់ហ្នឹងទេ គឺពេលប្រជុំចប់ យើងនឹងចុះទៅធ្វើជំរឿន និងពិនិត្យជាក់ស្ដែងតែម្ដង»។
លោក ហេង សាយហុង មន្ត្រីសិទ្ធិមនុស្សនៃអង្គការលីកាដូប្រចាំខេត្តបាត់ដំបងបានថ្លែងពីម្សិលមិញថា លោកគាំទ្រ វិធានការអនុវត្តច្បាប់របស់អាជ្ញាធរ ប៉ុន្តែលោកថា ករណីនេះគួរធ្វើពីឆ្នាំ ២០០៥ មក ពីព្រោះឆ្នាំនោះមានការទន្ទ្រានដីព្រៃនៅតំបន់ជាច្រើន ទាំងពលរដ្ឋសាមញ្ញ និងអ្នកមានអំណាចផង។
លោកបន្តថា៖ «វិធានការហ្នឹងក្នុងនាមសង្គមស៊ីវិលគឺយើងគាំទ្រ ប៉ុន្ដែអ្វីដែលសំខាន់នោះគឺយើងចង់ឲ្យធ្វើការច្បាស់លាស់ ថា តើពួកគាត់ពិតជាអ្នកទីទ័លក្រគ្មានដីពិតប្រាកដ ឬជាជនខិលខូចដើរចាប់ដីលក់? បើជនខិលខូចត្រូវតែចាត់វិធានការតាមច្បាប់ ប៉ុន្ដែបើពលរដ្ឋក្រីក្រគួរតែធ្វើសម្បទានសង្គមកិច្ចចែកជូនពួកគាត់ប្រើប្រាស់»។
តាមរបាយការណ៍របស់ក្រសួងបរិស្ថានបានឲ្យដឹងថា តំបន់ប្រើប្រាស់ច្រើនយ៉ាងសំឡូតស្ថិតក្នុងខេត្តបាត់ដំបង ១ ផ្នែក និងខេត្តប៉ៃលិន ១ ផ្នែក ដែលមានផ្ទៃដីសរុប ៦០ ០០០ ហិកតា។ រីឯដែនជម្រកសត្វព្រៃភ្នំសំកុស មានទីតាំងស្ថិតនៅក្នុងខេត្តបាត់ដំបង ពោធិ៍សាត់ និងកោះកុងដែលមានផ្ទៃដីសរុប ៣៣៥ ៧៥០ ហិកតា៕