.jpg)
គ្រាប់មិនទាន់ផ្ទុះត្រូវបានរកឃើញដោយមន្រ្ដី CMAC នាពេលកន្លងមក។ រូបថត CMAC
ភ្នំពេញ៖ គ្រាប់មីន និងគ្រាប់យុទ្ធភណ្ឌមិនទាន់ផ្ទុះមួយចំនួនត្រូវបានប្រទះឃើញក្នុងពេល និងក្រោយពេលទឹកជំនន់ ដោយសារការហូរច្រោះដី រសាត់មកពីតំបន់ ដែលមានមីនប្រឆាំងមនុស្ស មីនប្រឆាំងរថក្រោះ និងសំណល់ជាតិផ្ទុះពីសង្គ្រាមជាច្រើនប្រភេទ។ ក្រោយពីឃើញគ្រាប់បែបនេះ អាជ្ញាធរមីនប្រាប់គ្រប់ប្រតិបត្តិករឱ្យមានវិធានការទប់ស្កាត់គ្រោះថ្នាក់។
លោក លី ធុជ ទេសរដ្ឋមន្រ្តីទទួលបន្ទុកបេសកកម្មពិសេសអនុប្រធានទី១ នៃអាជ្ញាធរមីនបានធ្វើការណែនាំស្តីពីការពង្រឹងវិធានការការពារ និងទប់ស្កាត់គ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមក្នុងពេល និងក្រោយពេលគ្រោះទឹកជំនន់។ ដើម្បីទប់ស្កាត់បាននូវគ្រោះថ្នាក់ ដោយសារមីន និងសំណល់ជាតិផ្ទុះពីសង្គ្រាម ក្នុងពេល និងក្រោយពេលគ្រោះទឹកជំនន់ លោក លី ធុជ បានណែនាំដល់គ្រប់គណៈកម្មាធិការសកម្មភាពមីនខេត្ត គ្រប់ប្រតិបត្តិករអប់រំកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមឱ្យពង្រឹងនូវវិធានការការពារ និងទប់ស្កាត់គ្រោះថ្នាក់នេះ។
លោកថ្លែងតាមរយៈសេចក្តីណែនាំនេះថា៖ «គ្រប់ប្រតិបត្តិករ និងអង្គការពាក់ព័ន្ធ ត្រូវចូលរួមសហការដោយបន្តតាមដានជាប្រចាំនៅតាមទីទួលសុវត្ថិភាព និងកន្លែងទំនាបនានា ដែលប្រជាពលរដ្ឋស្នាក់នៅ និងឆ្លងកាត់ ដើម្បីបញ្ចៀសគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម»។
បើតាមសេចក្តីណែនាំនោះ លោកប្រាប់ឱ្យធ្វើការផ្សព្វផ្សាយជាប្រចាំដល់ប្រជាពលរដ្ឋ សិស្សានុសិស្ស កុមារា-កុមារី ឱ្យមានការប្រុងប្រយ័ត្នខ្ពស់ពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម។ ពេលប្រទះឃើញ គ្រាប់ទាំងនោះ សូមរាយការណ៍មកអាជ្ញាធរមូលដ្ឋាន មេភូមិ មេឃុំ ឬប្រតិបត្តិករបោសសម្អាតមីនដែលនៅទីនោះជាបន្ទាន់ ដើម្បីយកគ្រាប់ទាំងនោះទៅកម្ទេចចោល។
លោក លី ធុជ បន្ថែមទៀតថា៖ «ត្រូវរៀបចំខ្លឹមសារផ្សព្វផ្សាយ និងផលិតជាសម្ភារអប់រំសម្រាប់ផ្តល់ជូនភ្នាក់ងារអប់រំកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម បណ្តាញមីនស្ម័គ្រចិត្តសហគមន៍ លោកគ្រូ អ្នកគ្រូ ដើម្បីជាមធ្យោបាយសម្រាប់ធ្វើការអប់រំផ្ទាល់ដល់ប្រជាពលរដ្ឋ និងសិស្សានុសិស្សក្នុងតំបន់រងគ្រោះ ដោយសារទឹកជំនន់»។
លោកថា ត្រូវធ្វើការឆ្លើយតបឱ្យបានទាន់ពេលវេលាក្នុងការប្រមូលយកទៅកម្ទេចចោលនូវមីន និងសំណល់ ជាតិផ្ទុះពីសង្គ្រាមដែលប្រជាពលរដ្ឋបានរាយការណ៍។ រៀបចំដាក់ស្លាកសញ្ញាសម្គាល់ជាបន្ទាន់នៅតាមតំបន់សង្ស័យមានមីន និងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមដែលអាចហូរតាមទឹក និងដីល្បាប់ ដើម្បីទប់ស្កាត់កុំឱ្យប្រជាពលរដ្ឋចូលទៅស្នាក់នៅ ឬឆ្លងកាត់។
លោកទេសរដ្ឋមន្ត្រី ក៏បានប្រាប់មន្រ្តីពាក់ព័ន្ធត្រូវបន្តចុះអប់រំ ពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមឱ្យបានជាប់ជាប្រចាំដល់ប្រជាពលរដ្ឋ ដែលកំពុងស្នាក់នៅបណ្តោះអាសន្ន តាមទីទួលសុវត្ថិភាពនានា ក៏ដូចជាតំបន់ដទៃទៀត។ ធ្វើយ៉ាងណាកុំឱ្យពលរដ្ឋរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមក្នុងពេល និងក្រោយពេលគ្រោះទឹកជំនន់។
យោងតាមរបាយការណ៍របស់អាជ្ញាធរមីនកាលពីថ្ងៃទី ១ តុលា គឺក្នុងរយៈពេល ៩ ខែ ឆ្នាំ ២០២០ មានមនុស្សចំនួន ៥៥ នាក់ រងគ្រោះដោយសារយុទ្ធភណ្ឌគ្រឿងផ្ទុះ។
របាយការណ៍នេះឱ្យដឹងថា ចាប់ពីខែមករា ដល់ ខែកញ្ញា ឆ្នាំ ២០២០ មានជនរងគ្រោះចំនួន ៥៥ នាក់ ក្នុងនោះរងគ្រោះដោយសារមីនប្រឆាំងមនុស្សចំនួន ១៤ នាក់ មីនតោនចំនួន ៩ នាក់ និងសំណល់ជាតិផ្ទុះពីសង្រ្គាមចំនួន ៣២ នាក់ ដោយក្នុងនោះមានអ្នកស្លាប់ចំនួន ១៦ នាក់។
តួលេខនេះមានការថយចុះ ១៧ ភាគរយប្រៀបធៀបនឹងរយៈពេលដូចគ្នានៅឆ្នាំ ២០១៩ ដែលមានជនរងគ្រោះចំនួន ៦៦ នាក់។
របាយការណ៍ដដែលបានបញ្ជាក់ដែរថា ខេត្តដែលមានជនរងគ្រោះដោយសារយុទ្ធភណ្ឌគ្រឿងផ្ទុះនេះ មានក្នុងខេត្តបាត់ដំបង ពោធិ៍សាត់ ព្រះវិហារ បន្ទាយមានជ័យ ខេត្តកំពង់ធំ ក្រចេះ ប៉ៃលិន ត្បូងឃ្មុំ ឧត្តរមានជ័យ មណ្ឌលគិរី ស្ទឹងត្រែង និងខេត្តកណ្តាល៕
