.jpg)
រថយន្តដឹកស្រូវដែលឈប់ជិតច្រកទ្វារអន្តរជាតិបន្ទាយចក្រីខេត្តព្រៃវែងពីថ្ងៃ ៦ មីនា។ រូបថត FN
ព្រៃវែងៈ អាជ្ញាធរខេត្តព្រៃវែងបានទទួលសំណើរបស់ក្រុមអាជីវករដែលរកស៊ីដឹកស្រូវតាមច្រកព្រំដែនអន្តរជាតិ-បន្ទាយចក្រី ដើម្បីពិនិត្យលទ្ធភាពដោះស្រាយ បន្ទាប់ពីក្រុមអាជីវករជាច្រើននាក់បានប្រមូលផ្តុំគ្នានៅច្រកព្រំដែននេះ ហើយបានស្នើឲ្យអាជ្ញាធរជួយសម្រួលឲ្យមានបេនលក់ស្រូវនៅខាងទឹកដីខ្មែរ ដើម្បីកាត់បន្ថយការចំណាយ។
ក្រុមអាជីវករដែលបានប្រមូលផ្តុំគ្នាកាលពីថ្ងៃទី ៦ មីនាបានប្រាប់អ្នកសារព័ត៌មានក្នុងស្រុកថា កាលពីមិនទាន់ផ្ទុះកើតជំងឺកូវីដ១៩ ឈ្មួញវៀតណាមបានបើកទូកចូលមកទិញស្រូវពីខ្មែរដល់មាត់ទឹកព្រំដែនខាងខ្មែរ ខណៈម្ចាស់បេនខាងខ្មែរជាអ្នករៀបចំ រីឯពួកគាត់ដែលជាអាជីវករដើរទិញស្រូវពីតាមបណ្តាស្រុក ខេត្តផ្សេង។
ក្រុមអាជីវករទាំងនោះបានថ្លែងថា ពេលដឹកមកដល់មាត់ច្រកគ្រាន់តែចរចាតម្លៃត្រូវរ៉ូវគ្នា ហើយក៏ទម្លាក់ស្រូវពីរថយន្តចូលទូកភ្លាមៗ ហើយបើមិនត្រូវថ្លៃគ្នាទេ ក៏អាចដឹកស្រូវទៅលក់នៅកន្លែងផ្សេងបានដែរ គឺងាយស្រួលខ្លាំងណាស់។
ប៉ុន្តែពួកគេអះអាងថា បច្ចុប្បន្នការដឹកអង្ករទៅលក់នៅវៀតណាមគឺខុសគ្នាដាច់ស្រឡះព្រោះត្រូវបើករថយន្តឆ្លងព្រំដែន ចូលទៅទម្លាក់ស្រូវក្នុងបេនខាងដីវៀតណាម។ លុះពេលទៅដល់បើទោះតម្លៃថោកយ៉ាងណាក៏ត្រូវតែបង្ខំចិត្តលក់ឲ្យគេដែរ។
ក្រុមអាជីវករបានបញ្ជាក់ថា៖ «បើមិនលក់គ្មានលុយបង់ថ្លៃសេវាបេនឲ្យគេទេ ហើយរឿងដែលសំខាន់នោះ គឺពេលឆ្លងព្រំដែនចូលដីគេម្តងៗពួកគាត់បារម្ភខ្លាំងណាស់គឺខ្លាចឆ្លងជំងឺកូវីដ១៩។ ម្យ៉ាងទៀត កម្មករវៀតណាមដែលចាក់ស្រូវចូលក្នុងទូកគឺចាក់ស្រូវអត់អស់ពីបាវនោះទេ ដែលនាំឲ្យបាត់ភ្នែកគីឡូ ដោយសារសមត្ថកិច្ចវៀតណាមអនុញ្ញាតឲ្យតែតៃកុងឡានមួយគត់ចូលក្នុងទឹកដីរបស់គេ ហើយការចំណាយទាំងភាគីខ្មែរ និងវៀតណាមអស់ប្រមាណ ១០ ម៉ឺនរៀលក្នុង ១ រថយន្ត»។
បើតាមក្រុមអាជីវករស្រូវដែលលក់នៅច្រកបន្ទាយចក្រីនេះ ភាគច្រើននាំមកពីខេត្តពោធិ៍សាត់ បាត់ដំបង បន្ទាយមានជ័យ កំពង់ធំ ដែលពួកគេត្រូវចំណាយថវិកាច្រើនដែលចង់ឱ្យរាជរដ្ឋាភិបាល និងអាជ្ញាធរខេត្តព្រៃវែង ជួយសម្របសម្រួលឱ្យឈ្មួញវៀតណាមឆ្លងដែនចូលមកទិញស្រូវនៅត្រឹមបេនក្នុងទឹកដីខ្មែរវិញ។
យ៉ាងណា លោក ឈាង សុវណ្ណារ៉ា អ្នកនាំពាក្យរដ្ឋបាលខេត្តព្រៃវែងបានប្រាប់ភ្នំពេញប៉ុស្តិ៍ពីម្សិលមិញថា អាជ្ញាធរខេត្តនឹងពិនិត្យលើសំណើទាំងនេះ។ ប៉ុន្តែលោកថាលទ្ធផលយ៉ាងណានោះរង់ចាំការពិនិត្យ និងដោះស្រាយបន្តទៀត។
លោកបញ្ជាក់ថា៖ «យើងកំពុងរវល់ការងារធំៗមួយចំនួននៅក្នុងថ្នាក់ខេត្ត។ សំណើនេះយើងទទួលសិន រង់ចាំការដោះស្រាយ នៅពេលក្រោយ»។
លោក ខៀវ ហ៊ាន ប្រធានច្រកទ្វារអន្តោប្រវេសន៍ព្រំដែនអន្តរជាតិបន្ទាយចក្រី បានប្រាប់ភ្នំពេញប៉ុស្តិ៍ពីម្សិលមិញថា ក្រុមអាជីវកររកស៊ីដឹកស្រូវ ពិតជាបានប្រមូលផ្តុំគ្នាស្នើឱ្យអាជ្ញាធរដោះស្រាយបញ្ហារបស់ពួកគាត់ដូច្នេះមែន។ ប៉ុន្តែលោកថា ក្នុងនាមប្រធានច្រកទ្វារអន្តោប្រវេសន៍ព្រំដែន លោកបានសម្រួលគ្រប់នីតិវិធីដើម្បីឱ្យផលិតផលជាអាទិភាពអាចនាំចូលទៅវៀតណាមបានទាន់ពេល។ តែការស្នើឱ្យមានបេនស្រូវនៅក្នុងទឹកដីខ្មែរគឺហួសដែនសមត្ថកិច្ចរបស់លោកហើយ។
លោកថា៖ «សម្រាប់កិច្ចការខ្ញុំ គឺធ្វើយ៉ាងណារៀបចំសម្រួលដល់ពលរដ្ឋយើងឱ្យដឹកកសិផលហ្នឹងកុំឱ្យកកស្ទះហើយធ្វើខូចគុណភាពផលិតផលពួកគាត់។ យើងធ្វើយ៉ាងណា ជំរុញឱ្យអាជីវករយើងអាចនាំចេញកសិផលឱ្យបានលឿន»។
បើតាម លោក ខៀវ ហ៊ាន នៅច្រកទ្វារព្រំដែនអន្តរជាតិបន្ទាយចក្រី នៅតែមានការនាំទំនិញចេញចូលជាធម្មតា ក្នុងនោះទំនិញនាំពីវៀតណាម មានដូចជា ត្រី បន្លែ បង្កង សាច់ និងគ្រឿងទេសជាដើម។ ចំណែកទំនិញនាំពីកម្ពុជា ទៅវៀតណាមគឺមានតែ ២ មុខប៉ុណ្ណោះ គឺស្វាយ និងស្រូវ។
លោកថា៖ «រថយន្តដែលចេញចូលនៅតាមច្រកទ្វារនេះ តម្រូវឱ្យតៃកុងទ្បានចុះលាងដៃជាមួយអាល់កុល វាស់កម្ដៅ គោរពទៅតាមការណែនាំរបស់ក្រសួងសុខាភិបាលដើម្បីចូលរួមប្រយុទ្ធនឹងជំងឺកូវីដ១៩មិនឱ្យមានករណីឆ្លងតាមច្រកនេះឡើយ»។
លោកស្រី អ៊ាង គឹមលី មន្ត្រីសមាគមអាដហុកប្រចាំខេត្តព្រៃវែងបានប្រាប់ភ្នំពេញប៉ុស្តិ៍ពីម្សិលមិញថា ករណីនេះ បើក្រុមអាជីវករមិនប្រឈមនឹងបញ្ហា ពួកគេនឹងមិនប្រមូលផ្តុំគ្នាឱ្យជួយដោះស្រាយទេ។
លោកស្រីយល់ថា ក្នុងនាមជាអាជ្ញាធរដែនដីគួរស្វែងរកដំណោះស្រាយដែលល្អ ដើម្បីជួយដល់ក្រុមអាជីវករទាំងនេះ។
លោកស្រីបញ្ជាក់ថា៖ «បើគាត់ដោះស្រាយបញ្ហារបស់ខ្លួនមិនបានគឺគាត់មានតែពឹងពាក់ទៅអាជ្ញាធរ ហើយធម្មតា កសិករគាត់ធ្វើស្រែពឹងតម្លៃ និងកសិផលរបស់គាត់ ហើយបើបានមកហើយ គាត់លក់អត់បានថ្លៃ គាត់មិនរួចខ្លួនដើម្បីទូទាត់ថ្លៃជី ថ្លៃសេវាផ្សេងទេ»៕
