.jpg)
សមាជិកសហជីពការងារកម្ពុជាធ្វើការអបអរសាទរទិវានារីអន្តរជាតិ នៅរាជធានីភ្នំពេញ កាលពីឆ្នាំ ២០១៧។ ស្រេង ម៉េងស្រ៊ុន
ស្វាយរៀង: រដ្ឋលេខាធិការក្រសួងមហាផ្ទៃលោក ប៊ុន ហុន បានអះអាងកាលពីម្សិលមិញថា អាជ្ញាធរមូលដ្ឋានខេត្តស្វាយរៀងបានយល់ព្រមឲ្យពលរដ្ឋនៅភូមិហែកសំណាញ់ ឃុំម៉ឺនជ័យ ស្រុករំដួល ប្រារព្ធទិវាសិទ្ធិនារីអន្តរជាតិ ៨ មីនាខាងមុខនេះ បន្ទាប់ពីបានបដិសេធក្រោមហេតុផលថា សរសេរលិខិតសុំច្បាប់មិនផ្លូវការ។
លោក ប៊ុន ហុន បានប្រាប់ភ្នំពេញប៉ុស្ដិ៍ថា បន្ទាប់ពីទទួលបានព័ត៌មាននេះ លោកបានជួយអន្តរាគមន៍ហើយអាជ្ញាធរបានយល់ព្រមឲ្យពួកគាត់ប្រារព្ធទិវាសិទ្ធិនារីអន្តរជាតិ ៨ មីនានៅថ្ងៃទី ៦ មីនា ក្នុងភូមិ-ឃុំរបស់ពួកគាត់ធម្មតាឡើងវិញ។
លោកបញ្ជាក់ថា៖ «ឥឡូវនេះ គ្មានការរារាំងអ្វីទេ ខ្ញុំបានសួរគាត់ ហើយគាត់ថា កាលដែលហាមនេះគឺខ្លាចប៉ះពាល់សណ្ដាប់ធ្នាប់ចរាចរណ៍ផ្សេងៗ ហើយឥឡូវនេះ ខ្ញុំបានប្រាប់ហើយថា ឲ្យពលរដ្ឋធ្វើវិញទៅកុំហាមគាត់ទៀត ហើយទៅជួយការពារគាត់ផង។ អ៊ីចឹង ពួកគាត់អាចធ្វើកម្មវិធីនេះក្នុងភូមិឃុំគាត់ធម្មតា តែកុំឲ្យតែមានបញ្ហាទៅបានហើយ»។
អ្នកស្រី ម៉ែន ដាវី រស់នៅភូមិហែកសំណាញ់ ឃុំម៉ឺនជ័យ និងជាតំណាងពលរដ្ឋជាង ២០០ នាក់បានសម្ដែងក្ដីរីករាយក្រោយពីដឹងថា អាជ្ញាធរព្រមឲ្យដំណើរការកម្មវិធីនេះឡើងវិញ ខណៈកន្លងទៅអាជ្ញាធរឃុំម៉ឺនជ័យបានបដិសេធសំណើដោយទាមទារលិខិតផ្លូវការ និងឲ្យចុះលេខលិខិតត្រឹមត្រូវ។
អ្នកស្រីបញ្ជាក់ថា៖ «មុនពេលគាត់យល់ព្រមនេះខ្ញុំអត់ដឹងថា ខ្ញុំនឹងត្រូវកែតម្រូវយ៉ាងណាទេ ព្រោះពួកខ្ញុំជាពលរដ្ឋ គ្មានស្ថិតនៅក្រោមស្ថាប័នឬអង្គភាពណាមួយទេ ដូច្នេះខ្ញុំមិនដឹងថាគួរដាក់លេខលិខិតនេះថាលេខប៉ុន្មានទេ។ ខ្ញុំគិតថា ការប្រារព្ធទិវានេះនឹងនៅតែបន្តធ្វើ ប៉ុន្ដែនៅរង់ចាំការពិភាក្សាជាមួយសមាជិកទាំងអស់គ្នាសិន»។
អ្នកស្រី ម៉ែន ដាវី បានបន្ថែមថា អ្នកស្រីគ្រោងយកបញ្ហាជាច្រើនមកថ្លែងក្នុងកម្មវិធីនេះដើម្បីពន្យល់ដល់ស្ដ្រីដែលមិនទាន់យល់ពីសិទ្ធិអំណាចរបស់ខ្លួន។ម្យ៉ាងទៀតចំណេះដឹងពួកគាត់នៅមានកម្រិតអំពីការរក ដំណោះស្រាយបញ្ហានានា ពិសេសបញ្ហារំលោភផ្លូវភេទអំពើហិង្សានិងការរំលោភដីធ្លីផងដែរ។
លោក សុខា រាម អភិបាលស្រុករំដួលបានថ្លែងថា អាជ្ញាធរមិនហាមឃាត់ប្រារព្ធទិវាសិទ្ធិនារីនេះទេ ព្រោះកម្មវិធីនេះជាកម្មវិធីអន្តរជាតិ ប៉ុន្ដែអាជ្ញាធរសុំឲ្យពួកគាត់បំពេញបែបបទតាមច្បាប់ឬមានលេខលិខិតនិងទទួលការយល់ព្រមពីក្រសួងមហាផ្ទៃសិន។
លោកថា៖ «ឲ្យពួកគាត់ដាក់លិខិតសុំច្បាប់ត្រឹមត្រូវតាមច្បាប់ទម្លាប់មក គេអនុញ្ញាតហើយ ព្រោះយើងត្រូវធ្វើអ្វីមួយឲ្យវាត្រូវនឹងច្បាប់ ព្រោះវាជាសិទ្ធិនារីអន្តរជាតិ។គាត់ដាក់លិខិតមួយទៅសុំច្បាប់ទៅឃុំមែន តែគាត់ភ្ជាប់ជាមួយសហគមន៍មួយ ហើយអាជ្ញាធរឲ្យគាត់បំពេញបែបបទឲ្យត្រឹមត្រូវសិន»។
បន្ទាប់ពីតំណាងពលរដ្ឋដាក់លិខិតសុំប្រារព្ធទិវាសិទ្ធិនារី ៨ មីនា នៅឃុំនៅភូមិហែកសំណាញ់ឃុំម៉ឺនជ័យនៅថ្ងៃទី ៦ មីនា លោក មៃ រឿន មេឃុំបានតបតាមលិខិតចុះថ្ងៃទី ១ មីនាដោយមិនអនុញ្ញាតឲ្យធ្វើទេ។
លោក មៃ រឿន បន្តថា៖ «សូមជម្រាបជូនលោក លោកស្រីដែលថា ខ្លួនជាអ្នកតំណាងពលរដ្ឋប៉ះពាល់ដីធ្លីនៅឃុំម៉ឺនជ័យជ្រាបថា យោងលិខិតជូនដំណឹងអត់លេខរបស់ឈ្មោះ ម៉ែន ដាវី ស៊ីង សាម៉េត វ៉ា ថាវី ផាត់ សាវិន និងអ្នកស្រី ស៊ីន ណម ដោយមានការឯកភាពពីក្រុមប្រឹក្សាឃុំសម្រេចមិនអនុញ្ញាតឲ្យលោក-លោកស្រីរៀបចំកម្មវិធីនេះទេ ដោយអស់លោក-លោកស្រីមិនមានច្បាប់ច្បាស់លាស់ក្នុងការទទួលខុសត្រូវជាតំណាងពលរដ្ឋដែលថាមានផលប៉ះពាល់ដីធ្លីនៅឃុំម៉ឺនជ័យ ស្រុករំដួល ខេត្តស្វាយរៀង»។
លោក ថេង សាវឿន ប្រធានសម្ព័ន្ធសហគមន៍កសិករកម្ពុជា (CCFC) បានថ្លែងថា ការផ្សព្វផ្សាយលិខិតបទដ្ឋានគតិយុត្តឬអនុសាសន៍ថ្នាក់ដឹកនាំក្រសួងមហាផ្ទៃនៅមានកម្រិត ជាហេតុធ្វើឲ្យអាជ្ញាធរមូលដ្ឋានប្រើវប្បធម៌ដដែលៗឬបែបបទរដ្ឋបាលចាស់មកអនុវត្តលើពលរដ្ឋដែលមិនអនុលោមតាមច្បាប់។
លោកបន្តថា៖ «ខ្ញុំអំពាវនាវឲ្យក្រសួងមហាផ្ទៃ ជាពិសេសអាជ្ញាធរខេត្តស្វាយរៀងជួយអន្តរាគមន៍ឲ្យមន្ត្រីមូលដ្ឋានបានយល់ពីសេចក្ដីណែនាំរបស់ខ្លួនច្បាស់លាស់ ហើយឈប់ចោទពលរដ្ឋក្រុមនេះឬក្រុមនោះជាដើម»។
តាមលិខិតដែលចុះហត្ថលេខាដោយរដ្ឋមន្ត្រីក្រសួងមហាផ្ទៃលោក ស ខេង ចេញផ្សាយកាលពីថ្ងៃទី ២៧ វិច្ឆិកា ឆ្នាំមុន បានជូនដំណឹងឲ្យអភិបាលនៃគណៈអភិបាលរាជធានី-ខេត្ត ឲ្យជួយសម្រួលចំពោះការធ្វើសកម្មភាពរបស់អង្គការមិនមែនរដ្ឋាភិបាល និងសហគមន៍នានាក្នុងមូលដ្ឋានដោយមិនចាំបាច់ជូនដំណឹងមុន ៣ ថ្ងៃ ពេលធ្វើសកម្មភាពដូចមុនទៀតទេ។
ក្នុងលិខិតនោះ លោក ស ខេង គូសបញ្ជាក់ថា៖ «សមាគមអង្គការមិនមែនរដ្ឋាភិបាលដែលបានចុះបញ្ជីត្រឹមត្រូវស្របច្បាប់ព្រមទាំងសហគមន៍នានានៅមូលដ្ឋានមានសិទ្ធិសេរីភាពពេញលេញក្នុងការធ្វើសកម្មភាពស្របច្បាប់ដោយពុំចាំបាច់ជូនដំណឹងដល់អាជ្ញាធរមូលដ្ឋានក្នុងរយៈពេល ៣ ថ្ងៃមុនពេលធ្វើសកម្មភាពដូចមុននោះឡើយ»។
ការបញ្ជាក់របស់លោក ស ខេង បែបនេះគឺជាលើកទី២ ហើយ បន្ទាប់ពីថ្ងៃ ៣១ តុលា ឆ្នាំមុន លោកក៏ធ្លាប់បានចេញសេចក្ដីណែនាំមួយដែរស្ដីពីកិច្ចសហប្រតិបត្ដិការរវាងរាជរដ្ឋាភិបាល និងរដ្ឋបាលថ្នាក់ក្រោមជាតិជាមួយសមាគម និងអង្គការមិនមែនរដ្ឋាភិបាលក្នុងន័យដើម្បីពង្រឹងកិច្ចសហប្រតិបត្តិការ និងភាពជាដៃគូ៕
