.jpg)
ឈើដែលគេលាក់ក្នុងព្រៃស្រុកឱរ៉ាល់ ខេត្តកំពង់ស្ពឺ។ រូបថត GRK
កំពង់ស្ពឺៈ ឈើម្រេញ និងឈើគគីរចំនួន ១២ កំណាត់ដែលមានទំហំប្រហែលជាង ៤០ ម៉ែត្រគុបត្រូវបានអាជ្ញាធរខេត្តកំពង់ស្ពឺប្រទះឃើញលាក់ទុកនៅក្នុងព្រៃមួយកន្លែងក្នុងស្រុកឱរ៉ាល់ ដោយអាជ្ញាធរសង្ស័យថា ឈើទាំងនោះអាចដឹកចេញពីខេត្តក្រចេះ។
លោក វ៉ី សំណាង អភិបាលខេត្តកំពង់ស្ពឺបានប្រាប់ភ្នំពេញប៉ុស្ដិ៍ពីម្សិលមិញថា ក្នុងចំណោមឈើទាំង ១២ កំណាត់នោះ គឺ ២ កំណាត់ដែលមានមុខកាត់ ៩៦ គុណ ៩៦ សង់ទីម៉ែត្រ និងប្រវែងពីជាង ៥ ម៉ែត្រទៅដល់ជាង ៦ ម៉ែត្រត្រូវបានរកឃើញកាលពីថ្ងៃទី ៣ ខែកញ្ញា ស្ថិតក្នុងព្រៃមួយកន្លែងនៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។ ឯ ១០ កំណាត់ទៀតដែលជាប្រភេទឈើម្រេញ និងគគីរ ត្រូវបានរកឃើញបន្ថែមទៀតនៅព្រឹកថ្ងៃម្សិលមិញ និងស្ថិតនៅក្បែរទីតាំងដែលបានរកឃើញឈើទាំង ២ កំណាត់មុន។
លោក វ៉ី សំណាង ប្រាប់ថា៖ «ឥឡូវយើងបានរកឃើញ ១០ កំណាត់ទៀតហើយ ប៉ុន្តែមិនទាន់ដឹងថាឈើទាំងហ្នឹងមានមុខកាត់អីប៉ុន្មានទេ។ ខ្ញុំនឹងចុះទៅពិនិត្យមើល ប៉ុន្តែបើតាមពួកហ្នឹងបានចុះទៅឃើញមុនហ្នឹង គឺជាឈើម្រេញ និងគគីរ អាចមានទំហំ ឬតូចជាងតិចតួចនឹងឈើ ២ កំណាត់ដែលយើងបានរកឃើញកាលពីថ្ងៃទី ៣»។
អភិបាលខេត្តរូបនេះបន្តថានៅក្នុងការរកឃើញឈើទាំង ២ កំណាត់មុននោះ ក៏បានរកឃើញរថយន្តបាកុងចំនួន ៣ គ្រឿងដែរ ប៉ុន្តែទីតាំងដែលរកឃើញឈើទាំង ១០ កំណាត់ក្រោយនោះគឺពុំបានប្រទះឃើញមានរថយន្តបាកុងនោះទេ។ លោកអះអាងថា វត្ថុតាងសម្រាប់បម្រើប្រព្រឹត្តបទល្មើសនឹងត្រូវរៀបចំដុតកម្ទេចចោល។ ឯឈើបានរក្សាទុកបណ្ដោះអាសន្ននៅខណ្ឌរដ្ឋបាលព្រៃឈើស្រុកឱរ៉ាល់។
លោក វ៉ី សំណាង ចង់យកឈើដែលទើបបង្ក្រាបបាននេះ ទៅរក្សាទុកនៅរដ្ឋបាលខេត្តដើម្បីបន្សល់ទុកជាភ័ស្ដុតាងសម្រាប់ក្មេងជំនាន់ក្រោយបានឃើញអំពីប្រភេទឈើធំៗរបស់កម្ពុជា។
បើតាមគេហទំព័រហ្វេសប៊ុករបស់កងរាជអាវុធហត្ថលើផ្ទៃប្រទេសដែលបានចុះផ្សាយពីថ្ងៃម្សិលមិញដែរនោះ ឱ្យដឹងថាឈើទាំង ២ ដុំត្រូវបានដឹកចេញពីកន្លែងគេលាក់ទុកក្នុងព្រៃយកទៅរក្សានៅរដ្ឋបាលព្រៃឈើឱរ៉ាល់។ ចំណែករថយន្តបាកុងទាំង ៣ គ្រឿងប្រគល់ឱ្យមូលដ្ឋានកងរាជអាវុធហត្ថស្រុកឱរ៉ាល់ជាបណ្ដោះអាសន្ន។
ករណីរកឃើញឈើថ្មីៗទាំងនេះលោក វ៉ី សំណាង សង្ស័យថាឈើទាំងនោះអាចដឹកចេញពីខេត្តក្រចេះគឺនៅពេលមានការចាប់ផ្ដើមបើកប្រតិបត្តិការបង្ក្រាបបទល្មើសព្រៃឈើរបស់គណៈកម្មាធិការជាតិបង្ក្រាប និងទប់ស្កាត់បទល្មើសធនធានធម្មជាតិ។ ប៉ុន្តែលោកមិនបញ្ជាក់អំពីមូលហេតុដែលជនល្មើសអាចដឹកឈើចេញពីខេត្តក្រចេះយកទៅរក្សាក្នុងខេត្តកំពង់ស្ពឺឡើយ។
ពីម្សិលមិញភ្នំពេញប៉ុស្ដិ៍មិនអាចសុំបញ្ជាក់ព័ត៌មានពាក់ព័ន្ធនឹងការរកឃើញឈើទាំងនោះពីលោក ជា ហ៊ាន ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋបានទេ ដោយសារទូរស័ព្ទរបស់លោកមិនអាចទាក់ទងបាន។
កាលពីថ្ងៃទី ២៩ ខែកក្កដា លោក វ៉ី សំណាង ក៏បានដឹកនាំកម្លាំងចម្រុះខេត្តរកឃើញរថយន្តបាកុងចំនួន ៦ គ្រឿងដែលជារថយន្តរបស់ក្រុមឈ្មួញប្រព្រឹត្តបទល្មើសព្រៃឈើក្នុងខេត្តពោធិ៍សាត់។ រថយន្តទាំងនោះត្រូវបានបើកយកមកលាក់ទុកនៅក្នុងចម្ការដាំក្រូចមួយកន្លែងស្ថិតក្នុងភូមិច្រកទៀក ឃុំត្រពាំងជោរស្រុកឱវ៉ាល់ ខេត្តកំពង់ស្ពឺ ប៉ុន្តែកាលនោះក៏ពុំបានរកឃើញជនល្មើសផងដែរ។
លោក ឈាង តុលា ប្រធានមន្ទីរកសិកម្មខេត្តកំពង់ស្ពឺ ប្រាប់ពីម្សិលមិញថា ឈើទាំង ២ កំណាត់រកឃើញនៅថ្ងៃទី ៣ កញ្ញាគឺមិនមែនជាឈើដែលកាប់នៅក្នុងខេត្តកំពង់ស្ពឺឡើយ ព្រោះនៅក្នុងខេត្តនេះពុំមានការកាប់ឈើក្នុងព្រៃនោះទេ។
លោកថា ឈើទាំង ២ កំណាត់នោះ គឺជាឈើគគីរដែលទើបត្រូវបានគេដឹកចេញពីខេត្តផ្សេងចូលមកខេត្តកំពង់ស្ពឺកាលពីប៉ុន្មានថ្ងៃថ្មីៗនេះប៉ុណ្ណោះ។ ប៉ុន្តែត្រូវសមត្ថកិច្ចដឹងទាន់មុន រហូតរកឃើញឈើទាំងនោះត្រូវបានគេលាក់ទុក។
លោកបញ្ជាក់ថា៖ «ឈើហ្នឹងអត់មានយកមកលាក់ទុកយូរមកហើយនៅកំពង់ស្ពឺគឺអត់មានទេ ព្រោះវាគ្រាន់តែគេដឹកពីកន្លែងផ្សេងឆ្លងកាត់កន្លែងហ្នឹងហើយយើងដឹកទាន់ ហើយចុះទៅបង្ក្រាប»។
លោក ឈាន តុលា បន្តថាគិតត្រឹមរសៀលថ្ងៃម្សិលមិញ លោកមិនទាន់ទទួលបានរបាយការណ៍អំពីការរកឃើញកំណាត់ឈើចំនួន ១០ ដុំបន្ថែមទៀតនៅឡើយទេ៕
