The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​រក​ឃើញ​ថា វត្ត​​សាមគ្គី​រង្សី​មិន​ទាន់​ស្រប​ច្បាប់

អាជ្ញាធរ​រក​ឃើញ​ថា វត្ត​​សាមគ្គី​រង្សី​មិន​ទាន់​ស្រប​ច្បាប់

លោក ឃួង ស្រេង អភិបាលរង​រាជធានីភ្នំពេញ ពេលចុះ​ទៅ​ធ្វើរដ្ឋ​បាល នៅ​វត្តសាមគ្គីរង្សី កាលពីថ្ងៃ​ម្សិលមិញ​។ រូបថត ផា លីណា
លោក ឃួង ស្រេង អភិបាលរង​រាជធានីភ្នំពេញ ពេលចុះ​ទៅ​ធ្វើរដ្ឋ​បាល នៅ​វត្តសាមគ្គីរង្សី កាលពីថ្ងៃ​ម្សិលមិញ​។ ផា លីណា

អាជ្ញាធរ​រក​ឃើញ​ថា វត្ត​​សាមគ្គី​រង្សី​មិន​ទាន់​ស្រប​ច្បាប់

ភ្នំពេញៈ បន្ទាប់​ពី​ការ​ត្រួត​ពិនិត្យ​ដោយ​ផ្ទាល់ កាល​ពី​ម្សិលមិញ​ អាជ្ញាធរ​រាជធានី​ភ្នំពេញ បាន​រក​ឃើញ​ថា​ វត្ត​សាមគ្គី​រង្សី នៅ​ក្នុង​ខណ្ឌ​មាន​ជ័យ​ជា​ទី​ស្នាក់​អាស្រ័យ​របស់​អ្នក​មាន​ជម្លោះ​ដី​ធ្លី​តាម​ខេត្ត​និង​ធ្លាប់​មាន​ជម្លោះ​ចាក់​សម្លាប់​ព្រះ​សង្ឃ​សុគត​ ១ ​អង្គ​នោះ​ គឺ​ជា​វត្ត​ដែល​មិន​ទាន់​ស្រប​ច្បាប់ទេ ប៉ុន្តែ​ក៏​មិន​មែន​ជា​តំបន់​អបគមន៍​នោះ​ដែរ។

អភិបាល​រង​រាជធានី​ លោក ឃួង ស្រេង ​​និង​ប្រតិភូ​សាលា​រាជធានី ព្រម​ទាំង​មន្រ្តី​ក្រសួង​ធម្មការ និង​សាសនា បញ្ជាក់​យ៉ាង​នេះ បន្ទាប់​ពី​បញ្ចប់​ការ​ត្រួត​ពិនិត្យ​រដ្ឋបាល​នៅ​វត្ត​ សាម​គ្គី​រង្សី កាល​ពី​រសៀល​ថ្ងៃ​អង្គារ។ ជា​ការ​កត់​សម្គាល់ការ​ចុះ​ពិនិត្យ​នេះ ក៏​មាន​ដាក់​ពង្រាយ​កម្លាំង​ប៉េអឹម ប៉ូលិសនិង​ក្រុម​សន្តិសុខ​ខណ្ឌ​នៅ​ជុំវិញ​វត្ត​ផង​ដែរ​។

នៅ​ក្នុង​សន្នី​សីទ​សារ​ព័ត៌​មាន លោក ឃួង ស្រេង ​អះ​អាង​ថា ការ​ចុះ​ពិនិត្យ​នេះ​ គឺ​ដោយសារ​ភាព​អសកម្ម​នៃ​ការ​ចាក់​សម្លាប់​ព្រះ​សង្ឃ​មួយ​អង្គ​កាល​ពី​ខែ​មុន និង​បណ្តឹង​របស់​ចៅ​អធិការ​វត្ត ពី​បទ​គំរាម​កំហែង​អាយុ​ជីវិត ​មិន​មែន​ជា​ការ​ចុះ​មកដើម្បី​រក​វិការ ដើម្បី​ចង់​កម្ទេច​វត្ត​នេះ​ទេ បើ​ទោះ​ជា​ដឹង​ថា ​វត្ត​នេះមិន​ទាន់​ចុះ​បញ្ជិកា​នៅ​ក្រសួង​ធម្ម​ការនិង​សាសនា​ក្តី។

លោក​ថា៖ «យើង​មក​នេះ ​ដើម្បី​ពិនិត្យ​ពី​ចំណុច​ខ្វះ​ខាត​រាយការណ៍​ទៅ​ថ្នាក់​លើ​ថា​ វត្ត​នេះ​​ខ្វះ​អី​ខ្លះ​ ​ត្រូវ​ធ្វើ​យ៉ាង​ណា​ឲ្យ​ស្រប​ច្បាប់​?»​។

ពាក់​ព័ន្ធ​នឹង​​ការ​សាក​សួរ​ពី​អ្នក​សារ​ព័ត៌មាន​ជុំវិញ​ការ​លើក​ឡើង​ថា វត្ត​សាមគ្គី​រង្សី ស្ទើរ​តែ​ក្លាយ​ជា​តំបន់​អបគមន៍​មួយ​ទៅ​ហើយ​នោះ ​អ្នក​នាំ​ពាក្យ​សាលា​រាជធានី​លោក ឡុង ឌីម៉ង់ ​មិន​ឆ្លើយតប​ពាក់​ព័ន្ធ​នឹង​បញ្ហា​នេះ​ទេ​។

តែ​លោក ឃួង ស្រេង​លើក​ថា៖ «គេ​លើក​ឡើង​ថា​ ដូច សឹង​តែ ពាក្យ​ខ្មែរ​គឺ​សម្បូរ​បែប​អ៊ីចឹង​ ពាក្យ​ដែល​ស្តាប់​អត់​ទាន់​ហ្នឹង​ គឺ​មិន​អាច​បញ្ជាក់​អី​ទេ ចំពោះ​ខ្ញុំ ខ្ញុំ​អត់​ដែល​ថាឬ​លើក​​រឿង​តំបន់​អបគមន៍​ទេ បើ​ខ្ញុំវាយ​តម្លៃ​ថា ទី​​ណា​ជា​តំបន់​អបគមន៍​ គឺ​ខ្ញុំ​នឹង​យក​កម្លាំង​ទៅ​​កម្ទេច ប៉ុន្តែ ខ្ញុំ​អត់​វាយ​តម្លៃ​បែប​ហ្នឹង​ទេ»។

ក្នុង​ការត្រួត​ពិនិត្យនោះ អាជ្ញាធរ​ក៏​បាន​រក​ឃើញ​មាន​ត្រាជ័រ ដែល​កំពុង​ប្រើ​ក្នុង​វត្ត​សាមគ្គី​រង្សី មិន​មែន​ជា​ត្រា​ស្រប​ច្បាប់​នោះ​ទេ និង​បាន​បញ្ជា​ឲ្យ​ឈប់​ប្រើ​ប្រាស់​ជា​បន្ទាន់​ផងដែរ។

ជាការ​ឆ្លើយ​តបចៅ​អធិការ​ស្តី​ទី​វត្ត​សាមគ្គី​រង្ស៊ី ព្រះ​តេជ​គុណ ថាច់ ហាសំអាង មាន​ថេរ​ដីកា​ថា ត្រា​នេះអាច​ជា​ត្រា​មិន​ស្រប​ច្បាប់​មែន ដែល​បាន​​ប្រើ​ប្រាស់​សម្រាប់​​ផ្ទៃ​ក្នុង​វត្ត​ តែ​ប៉ុណ្ណោះ។

លោកបន្ត​​ថា៖ «អាត្មា​មក​វត្ត​នេះនៅ​ឆ្នាំ​២០០៦​ ត្រា​ប្រចាំ​វត្ត​អាច​បាត់​ក្នុង​ពេល​ដែល​វត្ត​ត្រូវ​​ភ្លើង​ឆេះ​កន្លង​មក ​ឥឡូវ​យើង​បាន​ដឹងនិង​រៀប​ចំ​ឯកសារ​តាម​ការ​ទាម​ទារ​របស់​អាជ្ញាធរ ដើម្បី​មាន​​ត្រា​ស្រប​ច្បាប់​​ប្រើ»។

ភិក្ខុ ថាច់ ហា​សំ​អាង ​អះ​អាង​ថា៖«តាម​ពិត​ទៅវត្ត​នេះ​​មិន​មែន​​មិន​ស្រប​ច្បាប់​ទេ​ គ្រាន់​តែ​មិន​ទាន់​ពេញ​​លេញ បើ​និយាយ​ទៅ​ស្រប​ច្បាប់ ៨០ ភាគរយ​ហើយ ​ថ្វី​​បើយើង​មិន​ទាន់​ចុះ​បញ្ជិកា​នៅ​​ក្រសួង​ធម្មការ។ ព្រះ​សង្ឃ​ទាំង​អស់​សុទ្ធ​តែ​មាន​ព្រះ​ឆាយា​ល័ក្ខណ៍ (លិខិត​សម្គាល់)»។

អ្នក​តំណាង​រាស្ត្រ​គណបក្ស​សង្គ្រោះ​ជាតិ លោក អ៊ុំ សំអាន ដែល​ចូល​រួម​ក្នុង​ការ​ពិនិត្យ​នេះ ​យល់​ថា សាលា​រាជធានី​ហាក់​​អនុវត្ត​ខុស​តួនាទី​ ដែល​ការ​ត្រួត​ពិនិត្យ​រដ្ឋ​បាលវត្ត ​គប្បី​ជា​ភារកិច្ច​​ក្រសួង​ធម្មការ​និង​សាសនា។

លោកថា៖ «ការ​ធ្វើ​បែប​នេះ​ ខ្ញុំ​គិត​ថា​ សាលា​រាជធានី​គ្រាន់​តែ​ចង់​ដាក់​សម្ពាធ​លើ​ព្រះ​សង្ឃ មិន​ឲ្យ​ចូល​រួម​បញ្ហា​នយោបាយ ឬ​សង្គម​តែ​ប៉ុណ្ណោះ»។

អនុ​ប្រធាន​អង្កេត​សិទ្ធិ​មនុស្ស និង​ជំនួយ​ផ្នែក​ច្បាប់​នៅ​អង្គ​ការ​អាដ​ហុក ​លោក​ ណៃ​ វ៉ង់​ដា ​ដែល​មាន​វត្តមាន​នៅទី​នោះដែរ​​ឲ្យ​ដឹង​ថា ការ​ចុះ​ពិនិត្យ​នេះ​គឺ​មកពី​វត្ត​នេះ​តែង​ផ្តល់​ការ​ស្នាក់​អាស្រ័យ​ដល់​អ្នក​មាន​ជម្លោះ​ដី​ធ្លី ហើយ​ការ​លើក​ពាក់​ព័ន្ធ​នឹង​រឿង​តំបន់​អបគមន៍​នោះ វា​មិន​អាច​ទៅ​រួច​នោះទេ។

គួរ​រំឭកថា​ តាម​លទ្ធ​ផល​នៃ​ការ​ស្រង់​តួ​លេខ នៅ​វត្ត​សាមគ្គី​រង្សី មាន​ព្រះ​សង្ឃ ៥២ ​អង្គ និស្សិត ៦ នាក់ ប្រជា​ជន​ស្នាក់​​ក្នុង​វត្ត ១៦ ​នាក់ (​ស្រី​ ៥ ​នាក់​) ​និង​គណៈកម្ម​ការ​អាចារ្យ​វត្ត​ ១១ នាក់ ហើយ​និង​ចុង​ភៅ​ស្រ្តី ១៤​នាក់ ទាំង​អស់​ ៨៥ នាក់​៕​

អត្ថបទគួរចាប់អារម្មណ៍