.jpg)
ទិដ្ឋភាពចាក់ដីក្នុងតំបន់ប្រើប្រាស់ប្រកបដោយចីរភាព ខេត្តកោះកុង ពីថ្ងៃ ១៥ មីនា។ រូបថត រដ្ឋបាលខេត្ត
ព្រះសីហនុ/កោះកុងៈ អាជ្ញាធរខេត្តជាប់មាត់សមុទ្រចំនួន ២ គឺខេត្តកោះកុងនិងខេត្តព្រះសីហនុបាននិងកំពុងស្រាវជ្រាវរកមុខសញ្ញាអ្នកដែលចាក់ដីចូលតំបន់ប្រើប្រាស់ប្រកបដោយចីរភាពក្នុងស្រុកមណ្ឌលសីមា ខេត្តកោះកុង និងករណីចាក់ដីចូលសមុទ្រក្នុងស្រុកស្ទឹងហាវខេត្តព្រះសីហនុ ដើម្បីដោះស្រាយទៅតាមនីតិវិធីច្បាប់។
លោក សុខ សុទ្ធី អភិបាលរងខេត្តកោះកុង ប្រាប់ភ្នំពេញប៉ុស្តិ៍ពីម្សិលមិញថា លោកបានបញ្ជាឱ្យរដ្ឋបាលស្រុកមណ្ឌលសីមា និងមន្ត្រីជំនាញពាក់ព័ន្ធចុះស្រាវជ្រាវរកអ្នកដែលចាក់ដីចូលចំណីព្រែកសាធារណ:របស់រដ្ឋ (តំបន់ប្រើប្រាស់ប្រកបដោយចីរភាព) នៅភូមិទួលគគីរក្រោម ឃុំទួលគគីរ ស្រុកមណ្ឌលសីមា និងធ្វើរបាយកាណ៍ឱ្យបានច្បាស់លាស់មុននឹងឈានដល់ការសម្រេចជាផ្លូវការណាមួយ។
លោក សុខ សុទ្ធី បានពន្យល់ថា តំបន់នេះកាលពីកន្លងមកមានការស្នើសុំកាត់ឆ្វៀល ប៉ុន្តែការស្នើសុំនេះត្រូវផ្អែកលើនីតិវិធីថាតើដីប្រភេទណាជាដីរក្សាទុកនិងដីប្រភេទណាត្រូវកាត់ឆ្វៀលជូនពលរដ្ឋ។ ក៏ប៉ុន្តែករណីនេះមានពលរដ្ឋ (មិនទាន់ស្គាល់អត្តសញ្ញាណ) មួយចំនួនបានចាក់ដីបំពេញ ១ ជំហានមុនក្នុងពេលអាជ្ញាធរមិនទាន់សម្រេច។
លោកថ្លែងថា៖ «ឥឡូវនេះយើងកំពុងតែឱ្យមន្ត្រីជំនាញសិក្សាផែនទី ១ ច្បាស់លាស់ថា តើវាចូលចំណីព្រែកប៉ុន្មានម៉ែត្រ និងវាប៉ះព្រៃកោងកាងប៉ុន្មានម៉ែត្រ និងធ្វើរបាយការណ៍ ឬកសាងនីតិវិធីច្បាស់លាស់។ យើងត្រូវតែមានឯកសារមួយច្បាស់លាស់ វាមិនដូចការចុះផ្សាយតាមហ្វេសប៊ុកនោះទេ»។
បើតាមលោក សុខ សុទ្ធី នៅពេលដែលទទួលរបាយការណ៍ជាក់លាក់រួចហើយ រដ្ឋបាលខេត្តនឹងបើកកិច្ចប្រជុំពិនិត្យជាក់ស្តែងដើម្បីឱ្យដឹងថា អ្នកដែលចាក់ដីនេះមកពីណាមានទោសទណ្ឌកម្រិតណា ប៉ុន្តែពួកគាត់មានទោសរួចទៅហើយ គឺចាក់ដីមិនបានស្នើសុំច្បាប់។
ទោះជាយ៉ាងណា លោកថា នៅក្នុងដំណាក់កាលនេះលោកបានបញ្ជាឱ្យផ្អាកសកម្មភាពចាក់ដីបន្តទៀត និងឱ្យអាជ្ញាធរស្រុក និងឃុំស្រាវជ្រាវរកឈ្មោះបុគ្គលអ្នកចាក់ដីនេះយកមកឱ្យរដ្ឋបាលខេត្តដើម្បីដឹងថា ពួកគាត់ខ្វះដី ឬក៏យ៉ាងម៉េច ទើបបានហ៊ានទៅចាក់ដីនៅទីនោះដើម្បីអនុវត្តទៅតាមនីតិវិធីច្បាប់។
ដោយឡែកលោក ឆាយ សុគន្ធដា អភិបាលស្រុកស្ទឹងហាវ ខេត្តព្រះសីហនុ បានឱ្យដឹងពីម្សិលមិញថា កាលពីថ្ងៃ ១៥ មីនា លោកបានដឹកនាំកម្លាំងចុះផ្អាកសកម្មភាពចាក់ដីចូលសមុទ្រនៅក្នុងភូមិ ៤ ឃុំអូរត្រេះ ដោយគ្មានលិខិតអនុញ្ញាត។ ក៏ប៉ុន្តែពុំមានអ្នកចេញមុខទទួលខុសត្រូវទេ ខណៈដែលសកម្មភាពនេះគេលួចធ្វើនៅពេលយប់។
លោក ឆាយ សុគន្ធដា បានបន្តថា ជនឆ្លៀតឱកាសដែលបានលួចទៅចាក់ដីក្នុងសមុទ្រនាពេលនេះ ខណៈកំណាត់ផ្លូវរបស់ក្រសួងសាធារណការ និងដឹកជញ្ជូនត្រូវបានបិទបណ្តោះអាសន្នក្នុងការស្ថាបនាតភ្ជាប់ពីក្រុងស្ទឹងហាវទៅកាន់ផ្លូវជាតិលេខ ៤។ ក៏ប៉ុន្តែបច្ចុប្បន្ននេះ រដ្ឋបាលស្រុក កំពុងតែយកគ្រឿងចក្រកាយដីនោះចេញពីសមុទ្រមកវិញ។
បើតាមលោក ឆាយ សុគន្ធដា ចំពោះការចាក់ដីចូលសមុទ្រនេះមានប្រវែងប្រមាណ ៤០ ម៉ែត្រដែលប្រើប្រាស់ដីអស់ជាច្រើនរយឡាន និងចំណាយថវិកាគឺខ្ទង់ម៉ឺនដុល្លារអាមេរិក ហើយរហូតមកទល់ពេលនេះក៏មិនទាន់មានអ្នកចេញមុខមកទទួលខុសត្រូវដែរ។
លោកថ្លែងថា៖ «បច្ចុប្បន្ននេះ រដ្ឋបាលស្រុកកំពុងតែស្រាវជ្រាវ អ្នកដែលចាក់ដីនេះ ដើម្បីឱ្យមកដោះស្រាយតាមនីតិវិធីច្បាប់ ប៉ុន្តែបើនៅតែមិនមកទេ រដ្ឋបាលស្រុកនឹងធ្វើរបាយការណ៍បន្ថែមទៅរដ្ឋបាលខេត្តដើម្បីដាក់ពាក្យប្តឹងតាមផ្លូវតុលាការចាត់ការតាមនីតិវិធីច្បាប់ជាធរមាន»។
យោងតាមសេចក្តីជូនដំណឹងរបស់រដ្ឋបាលស្រុកស្ទឹងហាវកាលពីថ្ងៃទី ១៥ ខែមីនា បញ្ជាក់ថាដីចំណីឆ្នេរសមុទ្រត្រូវបានចាត់ថ្នាក់ជាដីសាធារណៈរបស់រដ្ឋ និងត្រូវហាមឃាត់រាល់ការកាន់កាប់ ឬសាងសង់សំណង់នានា ហើយបានកំណត់ទុកជាតំបន់សម្រាប់ប្រើប្រាស់ជាប្រយោជន៍សាធារណៈ។
សេចក្តីជូនដំណឹងដដែលបន្តថា ការអនុញ្ញាតក្នុងការប្រើប្រាស់ដីចំណីសមុទ្រត្រូវបានអនុវត្តតាមប្លង់គោលប្រើប្រាស់ដី និងផែនការប្រើប្រាស់ដីរបស់ក្រសួងរៀបចំដែនដី នគរូបនីយកម្ម និងសំណង់ដែលមានសេចក្តីណែនាំលម្អិតសម្រាប់អនុវត្ត និងបទប្បញ្ញត្តិជាធរមានដើម្បីធានាសុវត្ថិភាពសាធារណៈសង្គម និងបរិស្ថាន។
លោក ស៊ឹង សែនករុណា មន្ត្រីអង្កេតជាន់ខ្ពស់នៃសមាគមអាដហុកថ្លែងថា ទាំងតំបន់ប្រើប្រាស់ប្រកបដោយចីរភាព និងតំបន់ហាមឃាត់ គឺជាដីសាធារណៈរបស់រដ្ឋដែលមិនអាចវិនិយោគឱ្យទៅក្រុមហ៊ុនឯកជនណាមួយបានទេ។ ករណីនេះលុះត្រាតែធ្វើជាអនុប្រយោគជាដីឯកជនរបស់រដ្ឋ ទើបមានសិទ្ធិចាត់ចែងក្នុងការលក់ ឬជួលទៅឱ្យក្រុមហ៊ុនឯកជន និងធ្វើសម្បទានផ្សេងៗបាន។
លោកបានបន្តថា បើមិនធ្វើស្របច្បាប់ទេ ជនទាំងឡាយណាដែលទៅកាន់កាប់ចាត់ចែងប្រើប្រាស់ដីតំបន់ឆ្នេរ និងដីតំបន់ការពារក្នុងស្ថានភាពជាក់ស្តែង គឺជាជនល្មើសច្បាប់ ដែលងាយស្រួលដល់អាជ្ញាធរមូលដ្ឋានចាត់វិធានការតាមផ្លូវច្បាប់។
បើតាមលោក ស៊ឹង សែនករុណា បើអាជ្ញាធរមូលដ្ឋានមិនចាត់វិធានការតាមផ្លូវច្បាប់ទេ ហើយករណីទាំងនេះលេចឮដល់ថ្នាក់ជាតិនោះអាចមានការដាក់ទោសទណ្ឌផ្នែករដ្ឋបាលមិនខានឡើយ ឬក៏អាចដាក់ទោសទណ្ឌកាន់តែធ្ងន់ធ្ងរមួយកម្រិតទៀតនៅពេលដែលគេរកឃើញ មានជាប់ពាក់ព័ន្ធនឹងជនទុច្ចរិតទាំងអស់នោះ។
លោកថា៖ «អ៊ីចឹងអាជ្ញាធរមូលដ្ឋានគប្បីចាត់វិធានការរារាំងកុំឱ្យក្រុមជនល្មើសទាំងនោះបន្តរំលោភលើឆ្នេរ និងតំបន់ការពារទាំងអស់អីហ្នឹងទៀត»៕
