ភ្នំពេញៈ អាជ្ញាធររាជធានីបានប្រកាសឱ្យអាជីវករ និងអ្នកពាក់ព័ន្ធទាំងអស់ត្រូវរួសរាន់ទៅធ្វើតេស្តរកមេរោគកូវីដ ១៩ ជាបន្ទាន់នៅក្នុងបរិវេណវិទ្យាល័យបាក់ទូក និងត្រូវអនុវត្តវិធានចត្តាឡីស័កឱ្យបានត្រឹមត្រូវ បន្ទាប់ពីរយៈពេលតែ ៤ ថ្ងៃ ក្រសួងសុខាភិបាលបានរកឃើញអាជីវករ សន្តិសុខ និងបុគ្គលិក-កម្មករក្នុងផ្សារអូរឫស្សីមានវិជ្ជមានជំងឺកូវីដ ១៩ រហូតជាង ១០០ នាក់។
លោក ឃួង ស្រេង អភិបាលសាលារាជធានីភ្នំពេញបានចេញសេចក្តីជូនដំណឹងនៅថ្ងៃពុធ នេះថា អាជីវករ សន្តិសុខ និងបុគ្គលិក-កម្មករបម្រើការងារក្នុងផ្សារដែលមិនព្រមសហការទៅយកសំណាកតេស្តរកមេរោគកូវីដ ១៩ តាមការណែនាំនេះទេ រដ្ឋបាលរាជធានីភ្នំពេញនឹងមិនអនុញ្ញាតឱ្យបន្តអាជីវកម្មលក់ដូរឬចេញ-ចូលមកបម្រើការងាររបស់ខ្លួនឡើយនៅពេលដែលផ្សារបើកដំណើរការជាប្រក្រតីឡើងវិញ។
លោកបានបន្តថា៖ «ចំពោះប្រជាពលរដ្ឋដែលមានលំនៅឋានរស់នៅក្បែរខាងជាមួយអាជីវករ សន្តិសុខ និងបុគ្គលិក-កម្មករបម្រើការងារក្នុងផ្សារអូរឫស្សីក្នុងកាលៈទេសៈនេះដាច់ខាត គឺមិនត្រូវជួបប្រាស្រ័យទាក់ទងជាមួយគ្នាឡើយ និងត្រូវចូលរួមឃ្លាំមើលពីការអនុវត្តវិធានចត្តាឡីស័ករបស់ពួកគាត់»។
អភិបាលក្រុងរូបនេះបានបញ្ជាក់ទៀតថា ក្នុងករណីពិនិត្យឃើញថាមានបុគ្គលណាមួយមិនព្រមអនុវត្តឬអនុវត្តមិនបានពេញលេញតាមវិធានចត្តាឡីស័ក ប្រជាពលរដ្ឋត្រូវណែនាំ និងរាយការណ៍ជាបន្ទាន់មកអាជ្ញាធរមូលដ្ឋានដែលនៅជិតបំផុត ឬទាក់ទងទៅកាន់លេខ ១២៩៩ ហើយរដ្ឋបាលរាជធានីភ្នំពេញធានារក្សាការសម្ងាត់ជូន ដើម្បីឱ្យអាជ្ញាធរមូលដ្ឋានចាត់វិធានការបានទាន់ពេលចៀសវាងការចម្លងជំងឺកូវីដ ១៩ កាន់តែធ្ងន់ធ្ងរទៅក្នុងមូលដ្ឋានភូមិ-សង្កាត់ដែលខ្លួនកំពុងរស់នៅ៕