.jpg)
លោក សុខ សុវណ្ណវឌ្ឍនាសាប៊ុង (ឆ្វេង) នៅតំបន់បឹងសំរោងថ្មីៗនេះ។ រូប William Guang
ភ្នំពេញៈ រដ្ឋបាលរាជធានីភ្នំពេញបានចេញលិខិតបំភ្លឺជុំវិញគម្រោងអភិវឌ្ឍន៍បឹងសំរោងជាសួន និងផ្លូវថ្មើរជើងជុំវិញបឹងដែលស្ថិតក្នុងខណ្ឌព្រែកព្នៅ រាជធានីភ្នំពេញ ហើយបដិសេធចំពោះការចោទប្រកាន់ដែលថា អាជ្ញាធរខណ្ឌព្រែកព្នៅបានវាយតប់ចាប់ខ្លួនមនុស្សខុសច្បាប់ដោយបានចាត់ទុកការផ្សព្វផ្សាយទាំងនេះថា គ្មានតុល្យភាពព័ត៌មាន។
ការចេញមុខបំភ្លឺ និងបដិសេធនេះបានធ្វើឡើង បន្ទាប់ពីលោក សុខ សុវណ្ណវឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្តល់យោបល់គណបក្សខ្មែរក្រោកកាលពីថ្ងៃទី ៨ មេសាបានដឹកនាំក្រុមការងារចុះពិនិត្យករណីអាជ្ញាធរ ឈូសឆាយដីចិញ្ចឹមត្រីនៅបឹងសំរោងក្នុងសង្កាត់សំរោងខណ្ឌព្រែកព្នៅ រហូតមានការប៉ះទង្គិចគ្នាធ្វើឲ្យមានពលរដ្ឋរបួស និងអ្នកខ្លះត្រូវបានចាប់ឃុំខ្លួន។
សេចក្តីប្រកាសព័ត៌មានរបស់រដ្ឋបាលរាជធានីភ្នំពេញចុះថ្ងៃទី ៨ មេសាបានឲ្យដឹងថា ដើម្បីចៀសវាងការបំភ្លៃព័ត៌មានពីជនអគតិក្នុងន័យបំភ័ន្តសាធារណៈមតិឲ្យយល់ច្រឡំរដ្ឋបាលរាជធានីភ្នំពេញសូមបញ្ជាក់ថា បឹងសំរោងត្រូវបានរំលោភបំពានកាន់កាប់ពីជនខិលខូចមួយចំនួនអាចឈានដល់ការបាត់បង់ផ្ទៃបឹងទាំងមូល។
សេចក្តីប្រកាសព័ត៌មាននេះ បន្តថាដើម្បីរក្សាបានប្រព័ន្ធបង្ហូរទឹក និងផ្ទៃបឹង រដ្ឋបាលរាជធានីក៏សម្រេចចាក់ទំនប់តាមព្រំបឹង ដើម្បីស្ថាបនាជាសួន និងផ្លូវថ្មើរជើងជុំវិញបឹង។ ដោយឡែកកាលពីថ្ងៃ ៣០ មីនា ឆ្នាំ ២០២០ អាជ្ញាធរខណ្ឌបានចុះអនុវត្តវិធានការរដ្ឋបាលចំពោះអ្នករឹងរូស ក្រោយពីបានជូនដំណឹងច្រើនលើកច្រើនសារួចមក។
រដ្ឋបាលរាជធានីភ្នំពេញបញ្ជាក់ថា៖ «មុននឹងឈានដល់ការអនុវត្តនេះ រដ្ឋបាលរាជធានីភ្នំពេញបានដោះស្រាយគោលនយោបាយជូនពលរដ្ឋដែលចិញ្ចឹមត្រីលើផ្ទៃបឹងសំរោងបានចំនួន ៣២២ គ្រួសារស្មើនឹង ៤២៦ ស៊ងចិញ្ចឹមត្រីដែលចំណាយថវិកាអស់ជាង ៩៦០ លានរៀលដោយពួកគាត់បានចូលរួមជាមួយរដ្ឋបាលរាជធានីភ្នំពេញ»។
បន្ថែមពីនេះរដ្ឋបាលរាជធានីភ្នំពេញបានអះអាងថា អាជ្ញាធរមិនបានប្រើហិង្សាលើអ្នករឹងរូសដែលបន្តកាន់កាប់ផ្ទៃបឹង និងមិនព្រមសហការដូចការចោទប្រកាន់ទេ។ ប៉ុន្តែគ្រាន់តែឃាត់ខ្លួនជនដែលបានរារាំងការអនុវត្តការងារមកអប់រំណែនាំ និងបានដោះលែងវិញ ដោយការយោគយល់បំផុត។
យ៉ាងណាក្ដីលោក សុខ សុវណ្ណវឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្តល់យោបល់គណបក្សខ្មែរក្រោកបានប្រាប់ភ្នំពេញប៉ុស្តិ៍កាលពីថ្ងៃពុធថា លោកនឹងបន្តចុះស្រាវជ្រាវករណីប៉ះទង្គិចគ្នា រវាងពលរដ្ឋប្រមាណ ១០ គ្រួសារជាមួយសមត្ថកិច្ចក្នុងអំឡុងពេលចុះអនុវត្តសេចក្តីជូនដំណឹងដែលនាំឲ្យមានពលរដ្ឋរងរបួសនេះ។
លោកបញ្ជាក់ថា៖ «ខ្ញុំមិនទាន់ធ្វើការវែកញែកថា ការលើកឡើងមួយណាត្រឹមត្រូវនោះទេ ទាល់តែបើកការស៊ើបអង្កេតសិន។ ចំណែកឯកសារគតិយុត្តថា ការកាន់កាប់អាស្រ័យផលរបស់ប្រជាជន និងការអនុវត្តច្បាប់របស់អាជ្ញាធរស្របច្បាប់ឬអត់ដោយយើងនឹងរកថា ការអនុវត្តនេះមានផលប្រយោជន៍អ្វីមួយផ្សេងក្នុងហ្នឹងអត់?»។
លោក សាប៊ុង បានថ្លែងថា លោកនឹងចំណាយពេល ២ សប្តាហ៍ ដើម្បីប្រមូលព័ត៌មាន និងស្រាវជ្រាវករណីនេះឲ្យបានច្បាស់ ដើម្បីដាក់ជូនលោកនាយករដ្ឋមន្ត្រី ហ៊ុន សែន ពិនិត្យ និងដោះស្រាយ ខណៈពលរដ្ឋថា ដីមួយចំនួនធំក្នុងតំបន់បឹងសំរោង គឺសុទ្ធជារបស់អ្នកមាន និងមិនស្ថិតក្នុងតំបន់អនុក្រឹត្យ ចំណែកដីពលរដ្ឋក្រីក្រអាស្រ័យផល បើទោះជាមិនស្ថិតក្នុងអនុក្រឹត្យនេះ ក៏ត្រូវកាត់ចូលក្នុងគម្រោងដែរ។
លោកបញ្ជាក់ថា៖ «នេះគ្រាន់តែប្រជាពលរដ្ឋប្រាប់ខ្ញុំទេណាថា គម្រោងនេះ ប៉ះពាល់តែដីអ្នកក្រទេ ចំណែកដីអ្នកមានអី មិនប៉ះពាល់ទេ គឺសុទ្ធតែនៅក្រៅអនុក្រឹត្យទាំងអស់ហើយការអនុវត្តការឈូសឆាយមានហិង្សាទៀតដោយមានចាប់មនុស្សឃុំឃាំងអស់រយៈពេល ៧ ម៉ោង និងបង្កឲ្យមានរបួសស្នាម ៣ នាក់ក្នុងនោះមានយុវជនម្នាក់អាយុ ១៨ ឆ្នាំបានបាក់ដងកាំបិត និងប្រេះឆ្អឹង»។
តាមពលរដ្ឋរងគ្រោះម្នាក់ក្នុងចំណោមអ្នករងគ្រោះដទៃទៀតដែលមិនបានបញ្ចេញឈ្មោះបានបង្ហោះវីដេអូក្នុងពេលលោក សាប៊ុង ចុះត្រួតពិនិត្យផ្ទាល់នៅផ្ទះរបស់ពួកគាត់កាលពីថ្ងៃពុធថា ពួកគេមិនជំទាស់នឹងគម្រោងអភិវឌ្ឍន៍របស់រដ្ឋាភិបាលនោះទេ។ ប៉ុន្តែពួកគេចង់ឲ្យការអនុវត្តនេះស្មើគ្នា ខណៈសមត្ថកិច្ចគ្មានវិធានការចំពោះដីក្នុងបឹង។
លោកបញ្ជាក់ថា៖ «ក្នុងតំបន់ហ្នឹងមានដីរបស់អ្នកធំ ប៉ុន្តែគេមិនបានឈូសឆាយលើដីអ្នកធំទេ គឺវាងទាំងអស់ ហើយថានៅក្រៅអនុក្រឹត្យ ចំណែកដីរបស់ពលរដ្ឋកាន់កាប់ បែរជានៅក្នុងអនុក្រឹត្យទៅវិញ»។
លោក យិន អ៊ីម ចៅសង្កាត់សំរោងបានប្រាប់ភ្នំពេញប៉ុស្តិ៍ពីថ្ងៃពុធថា ការឈូសឆាយនេះគឺអាជ្ញាធរបានជូនដំណឹងច្រើនលើក និងបានបញ្ជាក់ថា ដីទាំងនោះស្ថិតក្នុងអនុក្រឹត្យដែលត្រូវអភិរក្សបឹងធ្វើជាផ្លូវថ្មើរជើង និងសួនកម្សាន្ត។ លោកថា ពលរដ្ឋមិនត្រឹមតែមិនគោរពសេចក្តីជូនដំណឹងទេ ថែមទាំងរារាំងការងាររបស់អាជ្ញាធរទៀតទើបមានការប៉ះទង្គិចគ្នា។
លោកថា៖ «នេះគ្រាន់តែល្បិចរបស់គេទេ (ពលរដ្ឋ) នៅពេលដែលធ្វើហ្នឹងគឺយើងការពារទាំងអស់ មិនឲ្យមានការបំពានអីទេ។ នេះគ្រាន់តែជាល្បិចរបស់វាដែលលើកទី ១ យើងបានទប់កម្លាំងមិនឲ្យឡើងលើគ្រឿងចក្រហើយក៏មានការធ្វើជាសន្លប់។ គ្មានអ្នកណាទៅធ្វើអីគាត់ទេ ហ្នឹងនិយាយឲ្យអស់ គ្រាន់តែកម្លាំងទប់ៗកុំឲ្យមករំខានគ្រឿងចក្រគេកំពុងធ្វើហ្នឹង»។
បើតាមលោក យិន អ៊ីម រហូតមកទល់ពេលនេះអាជ្ញាធរអនុវត្តគម្រោងអភិវឌ្ឍន៍នេះបានប្រមាណ ៧០ ភាគរយហើយ។ លោកអះអាងថា មានពលរដ្ឋតែប៉ុន្មានគ្រួសារប៉ុណ្ណោះ ដែលបន្តការតវ៉ាគឺមិនមានច្រើនដូចការអះអាងរបស់ពលរដ្ឋទាំងនេះឡើយ៕
