មណ្ឌលគិរី: អាជ្ញាធរខេត្តមណ្ឌលគិរីបានអះអាងថា នឹងចាត់មន្ត្រីជំនាញចុះទៅពិនិត្យ និងបង្ក្រាបករណីជនល្មើសជីកយកថ្មពណ៌ខៀវមានតម្លៃម្យ៉ាងដោយខុសច្បាប់យកទៅលក់ឱ្យឈ្មួញជនជាតិចិន និងវៀតណាម បន្ទាប់ពីមានការស្នើសុំឱ្យជួយទប់ស្កាត់ពីជនជាតិដើមភាគតិចព្នងរស់នៅភូមិឡៅការ សង្កាត់សុខដុម ក្រុងសែនមនោរម្យ។
លោក ហៀក សុផាន អភិបាលក្រុងសែនមនោរម្យបានថ្លែងកាលពីថ្ងៃទី ៤ មករាថា លោកមិនទាន់បានទទួលព័ត៌មានដែលថា មានជនខិលខូចជីកយកថ្មពណ៌ខៀវមានតម្លៃនៅក្នុងដែនជម្រកសត្វព្រៃភ្នំព្រេចស្ថិតនៅភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរីនោះទេ។ ប៉ុន្តែលោកថា នឹងចាត់មន្ត្រីជំនាញចុះទៅពិនិត្យនៅទីតាំងនោះដោយផ្ទាល់។
លោកបានបញ្ជាក់ថា៖ «ប្រជាពលរដ្ឋនៅមូលដ្ឋាន ប្រសិនបើគាត់បានឃើញករណីនេះសូមជួយទប់ស្កាត់ សហការជាមួយអាជ្ញាធរ បើមិនអ៊ីចឹងទេពួកគាត់ត្រូវតែរាយការណ៍មកសមត្ថកិច្ចជំនាញឱ្យបានលឿនបំផុត ដើម្បីកុំឲ្យជនឱកាសនិយមឆ្លៀតពេលប្រមូលផលធនធានធម្មជាតិដោយខុសច្បាប់បែបនេះ។ ខ្ញុំនឹងចាត់មន្ត្រីជំនាញចុះទៅបង្ក្រាបប្រសិនបើបានឃើញមានករណីនេះ»។
លោកបន្ថែមថា នៅក្នុងដែនជម្រកសត្វព្រៃភ្នំព្រេចមានសម្បត្តិធនធានធម្មជាតិជាច្រើន ពិសេសព្រៃឈើ សត្វព្រៃ ប៉ុន្ដែលោកមិនធ្លាប់ឮថាក្នុងតំបន់នេះមានថ្មពណ៌ខៀវមានតម្លៃទេ។ ការប្រមូលផលសម្បត្តិធម្មជាតិទាំងនេះត្រូវតែមានការអនុញ្ញាតពីអាជ្ញាធរ ឬមន្ត្រីជំនាញឱ្យបានត្រឹមត្រូវជាមុនសិន។
លោក ពៅ សុផាត មេឃុំសុខដុម ក្រុងសែនមនោរម្យបានថ្លែងកាលពីថ្ងៃទី ៤ មករាថា លោកក៏មិនទាន់បានទទួលព័ត៌មានដែរ ប៉ុន្ដែលោកនឹងចាត់មន្ត្រីជំនាញ និងអាជ្ញាធរភូមិចុះទៅពិនិត្យនៅទីតាំងនោះផ្ទាល់ដោយសារលោកមិនទាន់បានទទួលលិខិតស្នើសុំធ្វើអាជីវកម្មអ្វីទេ។
លោកបញ្ជាក់ថា៖ «ខ្ញុំអត់ទាន់ដឹងរឿងហ្នឹងទេ ប៉ុន្ដែខ្ញុំនឹងចាត់មេភូមិចុះទៅពិនិត្យមើល។ ខ្ញុំគិតថា ទីតាំងដែលមានថ្មប្រភេទនេះ គឺនៅក្នុងព្រៃជ្រៅ ប៉ុន្ដែបើនៅក្បែរៗភូមិនេះមិនមានថ្មបែបនេះទេ។ ប្រសិនបើនៅក្នុងព្រៃជ្រៅគឺយើងពិបាកនឹងចុះទៅការពារវា ព្រោះជនខិលខូចចាំតែឆ្លៀតឱកាសចូលទៅជីកពេលយើងចន្លោះប្រហោង»។
លោក គ្រើង តុលា តំណាងជនជាតិដើមភាគតិចព្នង និងជាសកម្មជនការពារព្រៃឈើបានឱ្យដឹងកាលពីថ្ងៃទី ៤ មករាដែរថា ទីតាំងដែលមានសកម្មភាពជីកយកថ្មមានពណ៌ទាំងនេះគឺស្ថិតក្នុងដែនជម្រកសត្វព្រៃភ្នំព្រេចក្នុងសង្កាត់សុខដុមក្រុងសែនមនោរម្យ។ ក្រុមពលរដ្ឋបាននាំគ្នាចូលទៅជីកយកថ្មមានពណ៌នេះតាំងពី ១ ខែមុន ដោយសារពួកគាត់ខ្វះការយល់ដឹងអំពីច្បាប់ និងមានឈ្មួញជនជាតិចិន និងវៀតណាមរង់ចាំទទួលទិញពីពួកគាត់។
លោកបន្តថា ពលរដ្ឋទាំងនេះបានយកថ្មដែលពួកគេរកបានពីក្នុងព្រៃដឹកតាមម៉ូតូច្នៃយកមកទុកនៅតាមផ្ទះ ហើយមានឈ្មួញចុះមកប្រមូលទិញ។
ថ្មមានពណ៌ទាំងនេះអាចលក់បានតម្លៃពី ៣ ទៅដល់ ៥ ដុល្លារ ក្នុង ១ គីឡូក្រាមដោយអាស្រ័យលើគុណភាពនៃដុំថ្មនីមួយៗ។
លោក តុលា បញ្ជាក់ថា៖ «អ្នកចាំទទួលទិញហ្នឹង យើងមិនស្គាល់អត្តសញ្ញាណច្បាស់ទេ តែយើងដឹងថា ពួកគេចាំទិញនៅតាមផ្ទះពលរដ្ឋតែម្តងគឺឈ្មួញកណ្តាលនេះជាខ្មែរយើងទេ ប៉ុន្តែថៅកែធំៗគឺជាចិន និងវៀតណាម។ ថ្មពណ៌នេះប្រហែលគេយកទៅធ្វើចិញ្ចៀន ឬគ្រឿងលម្អផ្សេងទៀតហើយឥឡូវនេះថ្មត្បូងពណ៌អ្វីក៏គេយកដែរ»។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកបានថ្លែងកាលពីថ្ងៃទី ៤ មករាថា ការជីកកកាយថ្ម ឬជីកយកប្រភេទរ៉ែអ្វីមួយក្នុងព្រៃដោយគ្មានការអនុញ្ញាតត្រឹមត្រូវគឺអាចចាត់ចូលជាបទឧក្រិដ្ឋ។ ដូច្នេះសមត្ថកិច្ចជំនាញត្រូវតែចាត់វិធានការបន្ទាន់ដើម្បីទប់ស្កាត់ឱ្យបានទាន់ពេលវេលា។
លោកបន្តថា អាជ្ញាធរត្រូវតែចុះអប់រំ ណែនាំពលរដ្ឋក្នុងមូលដ្ឋានដើម្បីឱ្យពួកគាត់ងាកមកចូលរួមការពារ អភិរក្សសម្បត្តិធនធានធម្មជាតិទាំងអស់នេះ។
ពលរដ្ឋស្ថិតនៅក្នុងតំបន់នេះស្រាប់ ប្រសិនបើពួកគាត់បានចូលរួមជាមួយអាជ្ញាធរគឺការប្រសើរបំផុត។
លោក ប៊ុណ្ណារ៍ បញ្ជាក់ថា៖ «ខ្ញុំគិតថា មន្ត្រីយើងប្រសិនបើបានដឹងពីអំពើល្មើសច្បាប់បែបឧក្រិដ្ឋ ឬមជ្ឈិមនេះត្រូវតែចាត់វិធានការភ្លាមៗតាមរយៈការកសាងសំណុំរឿងបញ្ជូនទៅតុលាការ ហើយមិនត្រូវឆ្លើយថា មិនបានដឹងរឿង ឬឆ្លើយដោះសាយករួចខ្លួនណាមួយដើម្បីរង់ចាំទទួលផលប្រយោជន៍ពីបទល្មើសទេ។ ប្រសិនបើមានការស្រាវជ្រាវឱ្យបានស៊ីជម្រៅមន្ត្រី និងជនល្មើសមានទោសដូចគ្នា»៕
វីដេអូ៖