.jpg)
សកម្មភាពសមត្ថកិច្ចជួយដឹកសិស្សដែលសន្លប់នៅខេត្តមណ្ឌលគិរីទៅមន្ទីរពេទ្យ។ រូបថត ប៉ូលិស
មណ្ឌលគិរី: អាជ្ញាធរខេត្តមណ្ឌលគិរីកំពុងរៀបចំជីកស្រះទឹក និងដាំដើមឈើ បន្ថែមនៅក្នុងបរិវេណវិទ្យាល័យហ៊ុនសែនកែវសីមា ដើម្បីបង្កើតឲ្យមានខ្យល់បរិសុទ្ធ និងកាត់បន្ថយកម្ដៅខ្លាំង បន្ទាប់ពីមានសិស្សចំនួន ១៤ នាក់បានដួលសន្លប់ជាបន្តបន្ទាប់កាលពីថ្ងៃទី ២៧ ខែមករា ដែលអាជ្ញាធរអះអាងថា មកពីពួកគេខ្វះខ្យល់អុកស៊ីហ្ស៊ែន និងអាកាសធាតុក្ដៅខ្លាំង។
លោក ឡោ សុខា ស្នងការនគរបាលខេត្តមណ្ឌលគិរីបានប្រាប់ភ្នំពេញប៉ុស្ដិ៍ពីថ្ងៃអង្គារថា សិស្សរងគ្រោះដោយការដួលសន្លប់នៅវិទ្យាល័យហ៊ុនសែនកែវសីមាក្នុងភូមិអូរអាម ឃុំស្រែខ្ទុម ស្រុកកែវសីមានោះបានធូរស្រាលវិញហើយ ដោយក្រុមគ្រូពេទ្យបានអនុញ្ញាតឲ្យពួកគេត្រឡប់ទៅផ្ទះវិញហើយ។
លោកបន្តថា អាជ្ញាធរបាននិងកំពុងពិភាក្សាគ្នារកដំណោះស្រាយជុំវិញការដួលសន្លប់នេះដោយគណៈកម្មការចម្រុះគ្រោងនឹងជីកស្រះទឹក ១ និងដាំដើមឈើបន្ថែមក្នុងបរិវេណវិទ្យាល័យហ៊ុនសែនកែវសីមានេះដើម្បីបង្កើតឲ្យមានខ្យល់អុកស៊ីហ្ស៊ែន និងដាំដើមឈើសម្រាប់បង្កើតជាម្លប់ដល់សិស្សានុសិស្ស។
លោកបញ្ជាក់ថា៖ «យើងបានស្រាវជ្រាវហើយគឺមូលហេតុអាកាសធាតុក្ដៅខ្លាំងពេកបណ្ដាលឲ្យខ្វះខ្យល់ដកដង្ហើម។ មួយទៀតពួកគាត់មានសុខភាពខ្សោយហើយខំប្រឹងរៀនសូត្ររហូតជ្រុលម៉ោង (រៀនគួរ) និងមួយទៀតពួកគាត់ឃើញមិត្តភក្ដិគាត់ដួលក៏មានអារម្មណ៍ភិតភ័យ ហើយក៏ដួលសន្លប់ជាបន្តបន្ទាប់ដែរ»។
លោក ប៊ុន សួរ ប្រធានមន្ទីរសុខាភិបាលខេត្តមណ្ឌលគិរីបានឲ្យដឹងពីថ្ងៃអង្គារថាមកទល់ពេលនេះសិស្សានុសិស្សដែលសន្លប់នោះត្រូវបានក្រុមគ្រូពេទ្យអនុញ្ញាតឲ្យត្រឡប់ទៅផ្ទះវិញជាបន្តបន្ទាប់នៅថ្ងៃកើតហេតុ។ តែនៅសិស្ស ២ នាក់នៅសល់ត្រូវបានគ្រូពេទ្យអនុញ្ញាតឲ្យត្រឡប់ទៅវិញនៅល្ងាចថ្ងៃទី ២៨ ខែមករា។
លោកបន្តថា ករណីដួលសន្លប់នៅវិទ្យាល័យហ៊ុនសែនកែវសីមានេះធ្លាប់មានកាលពីថ្ងៃទី ២៣ ខែមករារួចម្ដងហើយ ប៉ុន្ដែមានតែសិស្ស ២ នាក់ប៉ុណ្ណោះ។
លុះដល់ថ្ងៃទី ២៧ ខែមករា ក៏មានអ្នកដួលសន្លប់បន្ថែមចំនួន ១៤ នាក់ទៀត។ ក្រោយពីមានហេតុការណ៍នេះ លោកគ្រូ អ្នកគ្រូ រួមទាំងអាជ្ញាធរបានប្រញាប់ប្រញាល់បញ្ជូនពួកគាត់មកមន្ទីរពេទ្យបានទាន់ពេល។
លោកបញ្ជាក់ថា៖ «យើងបាននិងកំពុងជីកស្រះទឹកនៅបរិវេណសាលាហ្នឹងហើយ និងដាំដើមឈើបន្ថែមទៀត ព្រោះតំបន់ហ្នឹងមើលទៅវាខ្វះខ្យល់អុកស៊ីហ្ស៊ែន។ ម្យ៉ាងទៀតពួកគាត់ខំប្រឹងរៀនគួរ (រៀនក្រៅម៉ោងរដ្ឋ) ច្រើនម៉ោងដោយមិនបានបរិភោគអាហារគ្រប់គ្រាន់ទើបអស់កម្លាំងខ្លាំង។ រឿងមួយទៀតនោះគឺគាត់ភ័យនៅពេលឮមិត្តភក្ដិគាត់ដួលសន្លប់ អ៊ីចឹងគាត់ក៏សន្លប់ដែរ»។
យុវតីជាសិស្សដែលដួលសន្លប់ម្នាក់ក្នុងចំណោមអ្នកផ្សេងទៀតត្រូវបាន Swiftnews ដកស្រង់សម្ដីថា ខណៈពេលកំពុងសិក្សានារសៀលថ្ងៃទី ២៧ ខែមករា ស្រាប់តែមានសិស្សនារីម្នាក់បានដួលសន្លប់ក្នុងបន្ទប់រៀន។ មួយសន្ទុះក្រោយមកក៏មានសិស្សដទៃដួលសន្លប់ជាបន្តបន្ទាប់ទៀត ហើយពេលឃើញមិត្តភក្ដិរបស់ខ្លួនបែបនេះ រូបគេក៏បានដួលសន្លប់ដែរ។
សិស្សដដែលបានបន្តថា នៅវិទ្យាល័យរបស់ពួកគេគឺជាអគារសិក្សាថ្មីដែលទើបសាងសង់រួច និងនៅក្បែរព្រៃការពាររបស់ដែនជម្រកសត្វព្រៃកែវសីមា ហើយនៅពេលដួលសន្លប់នោះអាកាសធាតុក្នុងបន្ទប់រៀនមានសភាពក្តៅខ្លាំង បើទោះបីជាមានកង្ហារចំនួន ២ គ្រឿងក្នុងបន្ទប់រៀនក៏ដោយ។ ក្នុងអំឡុងពេលនោះរូបគេមានអាការចុកជើងណែនដើមទ្រូង ពិបាកដកដង្ហើម និងវិលមុខពិបាកទ្រាំ ហើយក៏ដួលទៅលើដីតែម្ដង។
តាមរបាយការណ៍អគ្គស្នងការដ្ឋាននគរបាលជាតិបានឲ្យដឹងកាលពីថ្ងៃទី ២៥ ខែមករា ថា នៅវិទ្យាល័យបន្ទាយឆ្មារក្នុងឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យក៏មានករណីសិស្សានុសិស្សប្រុសស្រីចំនួន ៣៥ នាក់ បានដួលសន្លប់ជាបន្តបន្ទាប់ផងដែរ ដោយពួកគេមានអាការក្អួតចង្អោរ វិលមុខ ទន់ដៃជើង និងអស់កម្លាំង។ ប៉ុន្ដែត្រូវលោកគ្រូ អ្នកគ្រូ និងអាជ្ញាធរជួយដឹកបញ្ជូនទៅមណ្ឌលសុខភាពបន្ទាយឆ្មារ។ ក្នុងនោះមានសិស្សម្នាក់មានអាការធ្ងន់ធ្ងរត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកថ្មពួក។
ក៏ប៉ុន្តែរបាយការណ៍ដដែលបានបន្តថា ភ្លាមៗនោះលោក ឌៀប ឈួន អភិបាលស្រុកថ្មពួកបានអះអាងថា សិស្សានុសិស្សដែលដួលសន្លប់ទាំងនោះបានធូរស្បើយវិញនៅរសៀលថ្ងៃទី ២៥ ខែមករា ដែលជាថ្ងៃកើតហេតុនោះ។ ជាមួយគ្នានោះលោកបានធ្វើការណែនាំឲ្យប្រកាន់ភ្ជាប់នូវវិធានការអនាម័យតាមរយៈការហូបស្អាត ផឹកស្អាត ពិសេសមិនត្រូវញ៉ាំចំណីអាហារដែលនាំឲ្យប៉ះពាល់ដល់សុខភាពឡើយ៕
