.jpg)
ឡានដឹកដីជ្រុះធ្លាក់រាយប៉ាយនៅតាមផ្លូវផ្សារទួលពង្រ។ រូបថត សហការី
ភ្នំពេញៈ អាជ្ញាធរសង្កាត់ចោមចៅទី ១ បានចាប់ឃាត់រថយន្តដឹកដីជាង ២០ គ្រឿង ដែលដឹកដីធ្វើឲ្យជ្រុះរាយប៉ាយពេញដងផ្លូវ និងធ្វើឲ្យកើតមានគ្រោះថ្នាក់ចរាចរណ៍ ប៉ះពាល់ដល់ប្រជាពលរដ្ឋដែលរស់នៅ និងធ្វើដំណើរតាមបណ្តោយផ្លូវផ្សារទួលពង្រ។
លោក កង វង ចៅសង្កាត់ចោមចៅទី ១ បានប្រាប់ភ្នំពេញ ប៉ុស្ តិ៍កាលពីថ្ងៃអាទិត្យថា រថយន្តទាំងនោះត្រូវបានរក្សាទុកនៅដីឡូត៍ ១ កន្លែង ស្ថិតក្នុងភូមិត្រពាំងរំចេក ដោយមានកម្លាំងសមត្ថកិច្ចនៅយាមជាប់ជានិច្ច។
ការចាប់ឃាត់រថយន្តទាំងនេះធ្វើឡើងកាលពីថ្ងៃទី ២៥-២៦ ខែកញ្ញា ក្រោយពីប្រជាពលរដ្ឋប្រមាណជាង ៣០០ នាក់ បានផ្តិតមេដៃស្នើសុំឲ្យចៅសង្កាត់ជួយដោះស្រាយទប់ស្កាត់ឡានដឹកដីដែលធ្វើឲ្យធ្លាក់ជ្រុះរាយប៉ាយពេញដងផ្លូវ បង្កឲ្យមានគ្រោះថ្នាក់ចរាចរណ៍កើតឡើង និងបណ្តាលឲ្យមានការខូចខាតផ្លូវជាដើម។
លិខិតពលរដ្ឋបញ្ជាក់ទៀតថា លើសពីនេះ រថយន្តដឹកដីទាំងនោះបង្កការភ័យខ្លាចដល់ប្រជាពលរដ្ឋដោយសារតែអ្នកបើកបរបើកក្នុងល្បឿនលឿនៗ និងធ្វើឲ្យផលប៉ះពាល់ដល់បរិស្ថាន និងការរស់នៅរបស់ប្រជាពលរដ្ឋនោះទើបពួកគាត់បាននាំគ្នាផ្តិតមេដៃស្នើសុំឲ្យអាជ្ញាធរសង្កាត់ជួយដោះស្រាយយ៉ាងដូចច្នេះ។
បើតាមលោក កង វង រថយន្តដឹកដីប្រមាណជាង ២០ គ្រឿងនោះ មានរថយន្តយីឌុប និងរថយន្តកង់ ៦ ដឹកដីយកទៅចាក់ធ្វើបុរី ១ កន្លែង ដែលនៅក្បែរតំបន់នោះ។ ការឃាត់រថយន្តនេះ មិនសំដៅលើក្រុមហ៊ុនណាមួយនោះទេ ពោលគឺឲ្យតែបើកបរលើផ្លូវដឹកដីបង្កការប៉ះពាល់បរិស្ថានក្នុងការរស់នៅរបស់ពលរដ្ឋត្រូវធ្វើការឃាត់ទាំងអស់។ លោកបញ្ជាក់ថា៖ «ក្រុមការងារយើងបានចាប់ឡានទុកហើយអ្នកដែលពាក់ព័ន្ធដែលត្រូវដឹកដីហ្នឹងយើងអត់ជជែកទេ យើងឲ្យទៅចូលជជែកជាមួយថ្នាក់ដឹកនាំខណ្ឌតែម្តង...»។
លោកចៅសង្កាត់ចោមចៅទី ១ ប្រាប់ថា កន្លងមកករណីរថយន្តដឹកដីនៅតាមបណ្តោយផ្លូវនោះក៏ធ្លាប់បានបង្កផលប៉ះពាល់ដល់ប្រជាពលរដ្ឋដែរ។ ហេតុនេះអាជ្ញាធរធ្លាប់មានវិធានការ និងបោសសម្អាតផ្លូវនេះជាញឹកញាប់ ប៉ុន្តែ សមត្ថកិច្ចធ្វេសប្រហែសភ្លេចខ្លួនបន្តិច ស្រាប់តែរថយន្តដឹកដីទាំងនោះមានសកម្មភាពវិញដដែល។
លោក ហែម ដារិទ្ធ អភិបាលខណ្ឌពោធិ៍សែនជ័យបានប្រាប់ភ្នំពេញប៉ុស្តិ៍ កាលពីថ្ងៃចន្ទថា សំខាន់ត្រូវធ្វើយ៉ាងណាឲ្យផ្លូវស្អាត ហេតុនេះម្ចាស់ក្រុមហ៊ុនដឹកដីត្រូវតែលាងសម្អាតផ្លូវនោះឲ្យបានស្អាតជាមុន ហើយត្រូវធ្វើកិច្ចសន្យាចប់សព្វគ្រប់ ទើបអនុញ្ញាតឲ្យយករថយន្តត្រឡប់ទៅវិញ។
យ៉ាងណាក៏ដោយលោកអភិបាលខណ្ឌពោធិ៍សែនជ័យមិនបានបញ្ជាក់ច្បាស់លាស់ថា ត្រូវធ្វើការពិន័យ ឬព្រមានយ៉ាងណាចំពោះម្ចាស់ក្រុមហ៊ុនរថយន្តដឹកដីទាំងអស់នោះទេ ដោយលោកគ្រាន់តែថ្លែងយ៉ាងខ្លីថា៖ «ពួកគាត់ (ក្រុមហ៊ុន) មិនបានធ្វើការលាងសម្អាតផ្លូវឲ្យបានស្អាតត្រឹមត្រូវនោះទេ ហើយការដែលលាងសម្អាតកន្លងមកនោះ គឺខាងអាជ្ញាធរខណ្ឌជាអ្នកចុះទៅសម្អាតផ្ទាល់»៕
