.jpg)
ទំនប់វារីអគ្គិសនីសេសានក្រោម២ ពេលបើកសម្ពោធឱ្យដំណើរការកន្លងមក ។ ហុង មិនា
ស្ទឹងត្រែងៈ អាជ្ញាធរខេត្តស្ទឹងត្រែង បានសន្យាជាថ្មីម្តងទៀតថា នឹងកសាងហេដ្ឋារចនាសម្ព័ន្ធជូនជនជាតិដើមភាគតិចភូមិក្បាលរមាសដែលទទួលរងផលប៉ះពាល់ពីគម្រោងទំនប់វារីអគ្គិសនីសេសានក្រោម ២បន្ទាប់ពីមានការស្នើសុំពីសំណាក់តំណាងប្រជាពលរដ្ឋ។
២សប្តាហ៍ក្រោយពីតំណាងពលរដ្ឋ៨នាក់ដាក់លិខិតសុំជួបដើម្បីដោះស្រាយបញ្ហា លោក ម៉ុម សារឿន អភិបាលខេត្តស្ទឹងត្រែង បានចុះទៅជួបជាមួយពលរដ្ឋនៅភូមិក្បាលរមាសដែលមិនព្រមចាកចេញពីភូមិចាស់ចំនួន៥២គ្រួសារប្រមាណជា១ម៉ោងកាលពីព្រឹកថ្ងៃទី៣១ខែឧសភានេះ។
លោក ប្រ៉ច រិទ្ធី ដែលបានចូលរួមក្នុងជំនួបនោះ បានឲ្យដឹងថា ជាការឆ្លើយតបនឹងសំណើពលរដ្ឋនោះ លោកអភិបាលខេត្តបានសន្យាថា អាជ្ញាធរនិងក្រុមហ៊ុនទំនប់វារីអគ្គិសនីសេសានក្រោម២នឹងសង់បន្ទប់រៀន មណ្ឌលសុខភាព វត្តអារាម ស្រះទឹក និងផ្លូវក្រាលក្រួសក្រហមចូលភូមិមួយខ្សែប្រវែង១៣គីឡូម៉ែត្រផងដែរ។ ប៉ុន្តែលោកថាពលរដ្ឋមិនទាន់ជឿលើការសន្យានោះទេដោយសារសន្យាតែមាត់ដូចតែលើកមុនៗដែរគឺគ្មានសរសេរជាលាយលក្ខណ៍អក្សរទេ។
លោករិទ្ធី បានបញ្ជាក់ថា៖«លើកនេះលោកអភិបាលខេត្តបានចុះមកសន្យាផ្ទាល់ជាមួយពលរដ្ឋ។ គាត់ថានឹងដោះស្រាយជូន តែយើងមិនទាន់ជឿទេ ដោយសារ អត់មានលាយលក្ខណ៍អក្សរ។ ទាល់តែគាត់ផ្តិតមេដៃធ្វើកិច្ចសន្យាទើបជឿ តែអត់មានធ្វើទេ»។ លោកថា ម្យ៉ាងវិញទៀត ពេលវេលាជាក់លាក់នៃការសាងសង់ក៏មិនមានបញ្ជាក់ច្បាស់ដែរ ខណៈពលរដ្ឋចង់បានហេដ្ឋារចនាសម្ព័ន្ធប្រើប្រាស់ឲ្យបានឆាប់។
លោកបន្ថែមថាក្រៅពីនោះលោកអភិបាលខេត្តក៏បានសន្យាថា នឹងចុះបញ្ជីដីសមូហភាពសម្រាប់ជនជាតិដើមភាគតិចព្នងពួកគាត់ផងដែរ។ លោកថា កន្លងមក ពលរដ្ឋបានទាមទារចុះបញ្ជីដីសមូហភាពលើផ្ទៃដីជាង៦ពាន់ហិកតា តែអាជ្ញាធរទំនងជាឯកភាពចុះឲ្យតែប្រមាណជា៩០០ហិកតាប៉ុណ្ណោះ ព្រោះបើចុះធំពេក វាប៉ះពាល់ដីក្រុមហ៊ុន។
ពលរដ្ឋភូមិក្បាលរមាសជាង៨០គ្រួសារបានយល់ព្រមចាកចេញទៅទីតាំងថ្មីជាប់ផ្លូវជាតិលេខ៧៨Aថ្មី តែជាង៥០គ្រួសារបានបដិសេធមិនព្រមចាកចេញ។ក្រុមហ៊ុនបានបិទទ្វារទំនប់ទឹកកាលពីខែតុលាកន្លងមក បណ្តាលឲ្យជន់លិចផ្ទះពលរដ្ឋនៅភូមិស្រែគចាស់ដល់ដំបូលនិងផ្ទះពលរដ្ឋនៅក្បាលរមាសលិចជាង១ម៉ែត្រ។ អ្នកភូមិក្បាលរមាសបាននាំគ្នាទៅរស់នៅតាមស្រែចម្ការរហូតមកទល់នឹងពេលនេះ។
លោក ម៉ែន គុង អ្នកនាំពាក្យសាលាខេត្តស្ទឹងត្រែង បានឲ្យដឹងថា កន្លងមកអាជ្ញាធរខេត្តគ្រាន់តែទទួលយកសំណើពលរដ្ឋយកទៅពិនិត្យ ប៉ុន្តែនៅពេលនេះលោកអភិបាលខេត្តបានចុះទៅផ្ទះនិងបានសន្យាដោះស្រាយបញ្ហាជូនពលរដ្ឋមែន។ លោកបានបន្តថា កិច្ចការងារនេះត្រូវមានការគាំទ្រពីរដ្ឋបាលខេត្ត ហេតុនេះ លោកអភិបាលខេត្តនឹងធ្វើលិខិតមួយជម្រាប់ជូនផ្នែកពាក់ព័ន្ធ ដើម្បីចាត់មន្ត្រីជំនាញចុះពិនិត្យ និងសិក្សាឲ្យបានច្បាស់លាស់ មុននឹងចាប់ផ្តើមសង់។
ដោយឡែកចំពោះផ្លូវវិញ អាចចាប់ផ្តើមធ្វើក្នុងរដូវប្រាំងខាងមុខ ព្រោះថា វាមានការលំបាកធ្វើក្នុងរដូវវស្សា ហើយគុណភាពមិនល្អទៀត។
លោកបានបញ្ជាក់ថា៖«ឯកឧត្តមអភិបាលខេត្តបានសម្រេចផ្ទាល់នៅកន្លែង...គឺរៀបចំក្រុមការងារក្នុងវិស័យទាំងអស់ហ្នឹងចូលទៅសិក្សានិងដោះស្រាយឲ្យបានលឿន។សំខាន់គឺសិក្សាឲ្យបានលឿននិងដោះស្រាយតាមកម្រិតណាមួយដែលដោះស្រាយបាន»។
ទំនប់វារីអគ្គិសនីសេសានក្រោម ២កម្លាំង៤០០ មេហ្គាវ៉ាត់ដែលធំជាងគេនៅកម្ពុជាត្រូវបានបើកសម្ពោធជាផ្លូវការក្រោមវត្តមានលោកនាយករដ្ឋមន្ត្រីហ៊ុន សែន កាលពីខែកញ្ញាកន្លងមក។ ក្រុមហ៊ុនស្ថិតក្នុងគម្រោងទំនប់នេះ រួមមាន ក្រុមហ៊ុន Royal Group មានភាគហ៊ុន ៣៩ ភាគរយ ក្រុមហ៊ុន Hydrolancang International Energy របស់ប្រទេសចិន៥១ ភាគរយ (ជាក្រុមហ៊ុនបុត្រសម្ព័ន្ធនៃក្រុមហ៊ុន China Huaneng Group) និងក្រុមហ៊ុនវៀតណាម EVN International មាន ១០ ភាគរយ។
